ශ්‍රී ලංකා පොලිසියේ නිල ෆේස්බුක් පිටුවේ පළ කර ඇති තර්ජනාත්මක බව කියන සටහනකට එරෙහිව ‘YOUTH FOR CHANGE’ සංවිධානයේ නියෝජිතයන් ඔක්තෝබර් 22 දින ශ්‍රී ලංකා මානව හිමිකම් කොමිසමට පැමිණිල්ලක් ඉදිරිපත් කර තිබේ.
“Think twice before you open your mouth” යන මාතෘකාවෙන් පළ කර තිබූ අදාල සටහන සම්බන්ධයෙන් ඔවුන් මෙම පැමිණිලි කර ඇත.
YOUTH FOR CHANGE සංවිධානයේ ජාත්‍යන්තර කටයුතු ලේකම් ශක්ති මකවිට, ජාතික කමිටු සාමාජික උදාර සඳරුවන් සහ කොළඹ දිස්ත්‍රික් කමිටු සාමාජික ටෙරන්ස් රොද්‍රිගෝ යන මහත්වරුන් විසින් මෙම පැමිණිල්ල මානව හිමිකම් කොමිෂන් සභාවට ඉදිරිපත් කර තිබේ.
අදාල සටහනේ ශ්‍රී ලංකා පොලිසිය සඳහන් කර ඇත්තේ කට ඇරින්න කලින් දෙපාරක් හිතන්න! ඔබ අද කෝපයෙන් කියන එක වචනයක්, හෙට දවසේ ඔබට විරුද්ධව සාක්ෂියක් වෙන්න පුළුවන්. ඒ නිසා කතා කරන්න කලින් දෙපාරක් හිතන්න. ඔබ කියන දේ සත්‍යයක්ද? ඒක කියන්න අවශ්‍යද? ඒ වචනවලින් තවත් කෙනෙකුට අසාධාරණයක් සිදු වෙනවාද? යන්නය.
