රුපියල් බිලියන 10කට අධික මුදලක් මේ වන විට ලැබී ඇති Rebuilding Sri Lanka අරමුදල නීත්යානුකූලව ස්ථාපිත කිරීම සඳහා අවශ්ය පනත් කෙටුම්පත තවමත් සම්පාදනය කරමින් පවතින බව ජනාධිපති කාර්යාලය පවසා ඇත.
එම පනත් කෙටුම්පත අනුමැතිය සඳහා අමාත්ය මණ්ඩලයට ඉදිරිපත් කිරීමට නියමිත බව සඳහන් කළද, එය පාර්ලිමේන්තුවට ඉදිරිපත් කරන දිනයක් හෝ සම්මත කිරීමේ කාලරාමුවක් පිළිබඳ කිසිදු තොරතුරක් එම කාර්යාලය ලබාදී නොමැත.
මෙම තොරතුරු අනාවරණය වී ඇත්තේ මාධ්යවේදිනි රේඛා නිලුක්ෂි විසින් Rebuilding Sri Lanka අරමුදල ස්වාධින අරමුදලක් ලෙස නීත්යානූකූලව පිහිටුවීමට අවශ්ය පනත මේ වන විට කුමන අදියරක තිබේද, පනත පාර්ලිමේන්තුවට ඉදිරිපත් කිරීමට නියමිත දිනය සහ අදාල අරමුදල සම්බන්ධයෙන් සම්මත කර ගත යුතු පනත මාස 08කට වඩා කාලයක් ප්රමාද වීමට හේතු වූ කරුණු මොනවාද, අරමුදලේ පරිපාලනය, මූල්ය කළමනාකරණය සහ විගණන ක්රමවේදය ඇතුළු කරුණු රැසක් විමසමින් 2026 මැයි 06 දින ජනාධිපති කාර්යාලයට යොමු කළ තොරතුරු ඉල්ලුම් පත්රයකට පිළිතුරු ලබා දෙමින් දැනුම් දී ඇත.
නියමිත කාලය තුළ සම්පූර්ණ තොරතුරු ලබා නොදීම හේතුවෙන් තොරතුරු දැනගැනීමේ පනත යටතේ අභියාචනයක් ද ඉදිරිපත් කිරීමෙන් අනතුරුව අදාල තොරතුරු 2026 ජුලි 07 වන දින ලබාදී තිබේ. ජනාධිපති කාර්යාලය පෙන්වා දෙන්නේ පළමු ඉල්ලීමට නියමිත කාලය තුළ පිළිතුරු සැපයීමට නොහැකි වූයේ අදාළ තොරතුරු එක්රැස් කිරීමට ගත වූ කාලය හේතුවෙන් බවය.
ජනාධිපති කාර්යාලය පිළිතුරු ලබා දීමේදී සඳහන් කර ඇත්තේ Rebuilding Sri Lanka යනු රජය, පෞද්ගලික අංශය, සංවර්ධන හවුල්කරුවන් සහ පරිත්යාගශීලීන්ගේ දායකත්වයෙන් ක්රියාත්මක වන ජාතික සංවර්ධන අරමුදලක් ලෙස සැලසුම් කර ඇති බවයි. එම අරමුදලේ ප්රධාන අරමුණ වන්නේ ජාතික සංවර්ධන ප්රමුඛතා සඳහා මූල්ය පහසුකම් සැපයීම බවද සඳහන් කර ඇත.
අරමුදල මගින් ක්රියාත්මක කෙරෙන ව්යාපෘති තෝරා ගැනීමේදී ජාතික සංවර්ධන සැලසුම්, රජයේ ප්රතිපත්ති ප්රමුඛතා සහ අදාළ ක්ෂේත්රවල අවශ්යතා සැලකිල්ලට ගන්නා බවත් ඒ සඳහා ජාතික සැලසුම් දෙපාර්තමේන්තුව ඇතුළු අදාළ රාජ්ය ආයතන සමඟ සම්බන්ධීකරණයෙන් කටයුතු කරන බවත් ජනාධිපති කාර්යාලය පවසා ඇත.
2026 අප්රේල් 30 වන විට Rebuilding Sri Lanka අරමුදලට ලැබී තිබූ දේශිය ප්රදාන මුළු මුදල රුපියල් 10,015,741,459.07 කි. එම දිනය වන විට අරමුදලට ලැබී තිබුණු විදේශිය මුදල් ප්රදානය රුපියල් 3,389,102,370.54 ක් බවත් සඳහන් කර ඇත.
දේශිය සහ විදේශිය ප්රදානකරුවන් විසින් Rebuilding Sri Lanka අරමුණ වෙනුවෙන් මේ දක්වා එවා ඇති සම්පූර්ණ මුදල් භාණ්ඩාගාරයේ Rebuilding Sri Lanka තැන්පත් ගිණුම නමින් දේශිය සහ විදේශිය තැන්පත් බැර කොට භාණ්ඩාගාර නියෝජ්ය ලේකම් ගිණුම පවත්වාගෙන යනු ලබන බවත් පිළිතුරු ලබා දෙමින් පවසා ඇත.
Rebuilding Sri Lanka මුලපිරීමට අදාළ දේශිය ප්රදාන තැන්පතු ගිණුමෙන්, දිට්වා සුළි කුණාටුවෙන් සිදු වූ හානිය හේතුවෙන් ලේඛණාගාර සංරක්ෂණ කටයුතු සඳහා ජාත්යන්තර ලේඛනාගාර කවුන්සිලය විසින් 2026 අප්රේල් 22 වන දින රුපියල් 500,000.00ක මුදලක් ජාතික ලේඛනාගාරක්ෂක දෙපාර්තමේන්තුවට නිදහස් කර ඇති බවත් වෙනත් වියදම් පිළිබඳව හෝ දිට්වා සුළි කුණාටුවෙන් හානියට පත් වූ නිවෙස් හෝ වන්දි ලබා දුන් ආකාරය පිළිබඳව ඉල්ලුම් කර තිබුණද පිළිතුරු ලබා දී නොමැත.
කෙසේ වෙතත් අරමුදලේ කළමනාකරණ ව්යුහය, පාලන මණ්ඩලය, විගණන ක්රමවේදය, විගණන දෙපාර්තමේන්තුව විසින් සිදුකරන විගණනය, පාර්ලිමේන්තු අධීක්ෂණය සහ අරමුදලේ පාලන යාන්ත්රණය සම්බන්ධයෙන් විමසූ ප්රශ්න සඳහා පිළිතුරු ලබාදීමට නොහැකි බවත් ඒ සඳහා තොරතුරු විමසිය යුත්තේ මුදල් ක්රම සම්පාදන සහ ආර්ථික සංවර්ධන අමාත්යංශයෙන් බවත් ජනාධිපති කාර්යාලය දන්වා ඇත.
ජනාධිපති කාර්යාලයේ මෙම ප්රතිචාරයෙන් අනාවරණය වන්නේ Rebuilding Sri Lanka අරමුදලට මේ වන විට රුපියල් බිලියන 10කට වැඩි මුදලක් ලැබී තිබියදීත් එම අරමුදල නීත්යානුකූලව ස්ථාපිත කිරීම සඳහා අවශ්ය පනත තවමත් සම්පාදනය කරමින් පවතින බවත්, එය පාර්ලිමේන්තුවට ඉදිරිපත් කරන කාලසීමාවක් හෝ නීතිමය රාමුවක් සම්බන්ධයෙන් රජය තවමත් නිශ්චිත තොරතුරු අනාවරණය කර නොමැති බවත්ය.
