හිටපු ජනාධිපතිවරු විදේශ සංචාරවල යෙදීමේදී මෙතෙක් වැඩිම මුදලක් වන රුපියල් මිලියන 3572ක් වැය කර ඇත්තේ මහින්ද රාජපක්ෂ මහතා බවත්, රුපියල් මිලියන 1144ක් වන එක් වර්ෂයක වැඩිම මුදල වැය කර ඇත්තේ ද මහින්ද රාජපක්ෂ මහතා බවත් අගමැතිනී ආචාර්ය හරිනි අමරසූරිය පෙබරවාරි 27 දින පාර්ලිමේන්තුවට ප්‍රකාශ කළාය.
අගමැතිනිය ප්‍රකාශ කළ ආකාරයට මහින්ද රාජපක්ෂ මහතා 2010 වර්ෂයේ සිට 2014 වර්ෂය දක්වා විදේශ සංචාර සඳහා රුපියල් මිලියන 3572ක් වැය කර ඇති අතර ඒ යටතේ 2013 වර්ෂයේදී රුපියල් මිලියන 1144ක් වැයකර ඇත.
හිටපු ජනාධිපති මෛත්‍රීපාල සිරිසේන 2015ත් 2019ත් අතර කාලයේදී විදේශ සංචාර සඳහා රුපියල් මිලියන 384ක් වැයකර ඇති අතර හිටපු ජනාධිපති ගෝඨාභය රාජපක්ෂ 2020ත් 2022ත් අතර කාලයේදී විදේශ සංචාර සඳහා රුපියල් මිලියන 126ක් වැයකර ඇත.
හිටපු ජනාධිපති රනිල් වික්‍රමසිංහ 2023ත් 2024ත් අතර කාලයේදී විදේශ සංචාර සඳහා රුපියල් මිලියන 533ක් වැයකර ඇති අතර වත්මන් ජනාධිපති අනුර කුමාර දිසානායක 2024 සැප්තැම්බර් සිට 2025 පෙබරවාරි දක්වා විදේශ සංචාර සඳහා රුපියල් මිලියන 1.8ක් වැයකර ඇත.
එමෙන්ම හිටපු ජනාධිපති රනිල් වික්‍රමසිංහ විදේශ සංචාර 33ක නිරතවී ඇති අතර ඒ සඳහා 154 දෙනෙකු සහභාගි කරගෙන ඇත. වික්‍රමසිංහ මහතා එළිසබෙත් මහ රැජිනගේ අවමඟුල සඳහා කළ සංචාරයේදී 10 දෙනෙකු රැගෙන ගොස් ඇති අතර ජපාන අගමැතිවරයාගේ අවමඟල සඳහා කළ සංචාරයේදී 18 දෙනෙකු රැගෙන ගොස් ඇත. චාල්ස් කුමරුගේ රාජාභිෂේකය සඳහා කළ සංචාරයේදී 12 දෙනෙකු රැගෙන ගොස් ඇති අතර ඉන්දියාවට කළ සංචාරයේදී 22 දෙනෙකු රැගෙන ගොස් ඇත.
අගමැතිනිය එහිදී අවධාරණය කළේ ජනාධිපති අනුර කුමාර දිසානායක ඉන්දියාවට කළ සංචාරයේදී රැගෙන ගියේ 05 දෙනෙකු බවයි.
- ඉඳුවර බණ්ඩාර
