පළාත් පාලන ආයතන ඡන්ද විමසීම් සඳහා මාර්තු මස 17 වැනිදා සිට මාර්තු 20 වැනිදා දහවල් 12 දක්වා නාම යෝජනා කැඳවීමට මැතිවරණ කොමිෂන් සභාව තීරණය කර ඇත.
ඒ මැතිවරණ කොමිෂන් සභාව මාර්තු 03 වැනිදා රැස්වී ඒ සම්බන්ධයෙන් සාකච්ඡා කිරීමෙන් අනතුරුවය.
නාම යෝජනා බාර ගැනීම අවසන් වීමෙන් පසු සති 5ත් 7ත් අතර කාලයේදී පළාත් පාලන ආයතන ඡන්ද විමසීම් පැවැත්විය යුතුවේ. අප්‍රේල් මස 24 වැනිදා සිට මැයි මස 8 වැනිදා දක්වා එම සති 5ත් 7ත් අතර කාලය එළඹේ. එම කාලයේදී පළාත් පාලන ආයතන ඡන්ද විමසීම් පැවැත්විය යුතුය. එම ඡන්ද දිනය මැතිවරණ කොමිසම තීරණය කරනු ලබන්නේ නාම යෝජනා බාර ගැනීමෙන් පසුය.
