No menu items!
24.4 C
Sri Lanka
20 May,2024

ශ්‍රේෂ්ඨාධිකරණ තීන්දුව අනුව දේශබන්දු ඉල්ලා අස්විය යුතුයි

Must read

නැත්නම් ජනාධිපතිවරයා ඉවත් කළ යුතුයි
නීතිපතිවරයා වධහිංසාව ගැන නඩු පැවරිය යුතුයි

අත්අඩංගුවට ගත් පුද්ගලයකුට වධහිංසා කිරීම සම්බන්ධයෙන් වැඩ බලන පොලිස්පති දේශබන්දු තෙන්නකෝන් වගකිව යුතු බව සඳහන් කරමින් සහ ඔහුට එරෙහිව ජාතික පොලිස් කොමිසම හා වගකිව යුතු ආයතන විනයානුකූල පියවර ගත යුතු බවට ශ්‍රේෂ්ඨාධිකරණය ලබාදී ඇති තීන්දුව අනුව දේශබන්දු තෙන්නකෝන් මහතා එම ධුරයෙන් ඉල්ලා අස් වියයුතු හෝ ඔහුව එම ධුරයෙන් ඉවත් කළ යුතු තත්වයක් ඇතිවී තිබේ.

ඒ වැඩ බලන පොලිස්පති දේශබන්දු තෙන්නකොන් පුද්ගලයකුට වධහිංසා කිරීම සම්බන්ධයෙන් අධිකරණයෙන් වරදකරු බවට පත්වී ඇති නිසා ඔහුට එරෙහිව එම වරද සම්බන්ධයෙන් නීතිපතිවරයා නඩු පැවරිය යුතු වීමත්, විනය පියවර ගැනීම සඳහා පවත්වන පරීක්ෂණයකදී ඒ සඳහා ධුරයේ අත්හිටුවීමක් සිදුකළ යුතු වීමත් නිසාය.

මේ සම්බන්ධයෙන් කළ විමසීමකදී ජාතික පොලිස් කොමිසමේ අභියාචනා සම්බන්ධයෙන් කටයුතු කළ කේජී ලීලානන්ද මහතා පැවසුවේ මෙම අවස්ථාවේදී ජාතික පොලිස් කොමිසම වැඩ බලන පොලිස්පතිවරයා සම්බන්ධයෙන් විනයානුකූල පියවර ගැනීමට කටයුතු කරන්නේ නම් පළමුවෙන්ම වැඩ බලන පොලිස්පතිවරයාගේ ධුරය අත්හිටුවන ලෙස ඉල්ලීමක් ජනාධිපතිවරයාගෙන් කරන ලෙස ආණ්ඩුක්‍රම ව්‍යවස්ථා සභාවට දැනුම් දීමක් කළ යුතු බවයි. ඒ තවදුරටත් ඔහුව එම ධුරයේ තබාගෙන විනය පියවරට අදාළ පරීක්ෂණයක් කළ නොහැකි බැවිනි.

එහෙත් වැඩ බලන පොලිස්පතිවරයාගේ පත්වීම් බලධාරියා පොලිස් කොමිසමවත්, ආණ්ඩුක්‍රම ව්‍යවස්ථා සභාවවත් නොවන නිසා එම ධුරය අත්හිටුවීම ජනාධිපතිවරයාගේ උපදෙස් අනුව ජනාධිපති ලේකම්වරයා විසින් සිදුකළ යුතු බවත්, මීට පෙර මේ ආකාරයේ පූර්වාදර්ශ නැති තත්වය තුළ මෙම තත්වය ව්‍යාකූල එකක් බවයි.

එහෙත් මේ සම්බන්ධයෙන් අදහස් දක්වමින් අමාත්‍යාංශ ගණනාවක හිටපු නීති උපදේශකයකු වශයෙන් කටයුතු කළ නීතිඥ දමිත් ද සිල්වා පැවසුවේ පත්වීම් බලධාරියා ජනාධිපතිවරයා වන අමාත්‍යාංශ ලේකම්වරුන්ගේ විනය කටයුතු රාජ්‍ය සේවා කොමිසමට පවරා ඇති බවත්, එහි ඉහළ පොලිස් නිලධාරීන්ට අදාළ විනය කටයුතු පොලිස් කොමිසමට පවරා ඇති බැවින් වැඩ බලන පොලිස්පතිවරයා සම්බන්ධයෙන් චෝදනා පත්‍රයක් ඉදිරිපත් කර විනය පියවර ගැනීමේ බාධාවක් ශ්‍රේෂ්ඨාධිකරණ නියෝගය අනුව පොලිස් කොමිසමට නොමැති බවයි.

එමෙන්ම ඔහු අවධාරණය කළේ වැඩ බලන පොලිස්පති යන්න දේශබන්දු තෙන්නකෝන් මහතාගේ ස්ථීර තනතුර නොවන බවත්, ඔහුගේ ස්ථීර තනතුර වන ජෙඨෂ්ධ නියෝජ්‍ය පොලිස්පති තනතුරේ පත්වීම් බලධාරියා ජනාධිපතිවරයා නොවන බවත්ය. එමෙන්ම ශ්‍රේෂ්ඨාධිකරණ නියෝගය ඇත්තේද වැඩ බලන පොලිස්පතිවරයා සම්බන්ධයෙන් නොවන බවය.

රාජ්‍ය සේවකයන්ගේ විනය සංග්‍රහය ලෙස සැළකෙන ආයතන සංග්‍රහයේ රාජ්‍ය නිලධාරියකුට විරුද්ධව අධිකරණයක් විසින් හෝ ව්‍යවස්ථාපිත බලධරයකු විසින් හෝ පනවනු ලබන නියෝග සැළකිල්ලට ගෙන විනයානුකූලව කටයුතු කිරීම සම්බන්ධයෙන් සඳහන් කරන්නේ යම්කිසි අධිකරණයකින් රාජ්‍ය නිලධාරියකු වරදකරු කරනු ලැබුවහොත් හෝ දණ්ඩනයකට යටත් කරනු ලැබුවහොත් ඒ සම්බන්ධයෙන් නිලධාරියා අයත් දෙපාර්තමේන්තුව විනය පරීක්ෂණයක් පවත්වා නැති වුවද විනය බලධාරියාට විනය නියෝගයක් පැනවිය හැකි බවයි.

එස් තුරෙයිරාජා, කුමුදුණී වික්‍රමසිංහ හා ප්‍රියන්ත ප්‍රනාන්දු යන ශ්‍රේෂ්ඨාධිකරණ විනිසුරු මඩුල්ල අංක 107/2011 යටතේ වෙහෙරගෙදර රංජිත් සුමංගල විසින් ඉදිරිපත් කළ මූලික අයිතිවාසිකම් පෙත්සම පිළිබඳ සිය තීන්දුව දෙසැම්බර් 14 වැනිදා ලබාදෙමින් පොලිස් කොමිසම හා වගකිව යුතු ආයතනවලට එම නියෝගය ලබාදී ඇත.

පෙත්සම්කරුට රජය විසින් රුපියල් ලක්ෂයක වන්දියක් ගෙවන ලෙස නියම කර ඇති ශ්‍රේෂ්ඨාධිකරණය 4 වන වගඋත්තරකරු වන වැඩ බලන පොලිස්පති දේශබන්දු තෙන්නකෝන්ට නියම කර ඇත්තේ පෙත්සම්කරුට සිය පුද්ගලික මුදලින් රුපියල් ලක්ෂ 5ක මුදලක් ගෙවන ලෙසයි.

හිටපු යුද හමුදා සෙබලෙක් වන පෙත්සම්කරුට පහරදීම හා මිරිස් ගෝනියකට දමා වධහිංසා කිරීම සම්බන්ධයෙන් වගඋත්තරකාර දේශබන්දු තෙන්නකෝන් පුද්ගලිකවම වගකිව යුතු බවද ශ්‍රේෂ්ඨාධිකරණ තීන්දුවේ සඳහන් කර තිබේ.

එවක මිරිහාන පොලිස් ස්ථානයේ හදිසි ඒකකයේ ස්ථානාධිපති පොලිස් පරීක්ෂක භාතිය ජයසිංහ, මිරිහාන පොලිස් ස්ථානයේ පොලිස් පරීක්ෂක එගොඩවෙල, අජිත් වනසුන්දර, මිරිහාන ප්‍රදේශය භාර එවක පොලිස් අධිකාරි දේශබන්දු තෙන්නකෝන්, එවක පොලිස්පති මහින්ද බාලසූරිය හා නීතිපතිවරයා පිළිවෙලින් එම පෙත්සමේ වගඋත්තරකරුවන් වන අතර ඒ අය අතරින් පළමු, දෙවන, සිව්වන හා පස්වන වගඋත්තරකරුවන් පෙත්සම්කරුගේ මූලික අයිතිවාසිකම් කඩකර ඇති බව තීරණය කර ඇත.

ඒ අනුව එම වගඋත්තරකරුවන්ට ඔවුන්ගේ පුද්ගලික මුදලින් පෙත්සම්කරුට රුපියල් ලක්ෂ 5 බැගින් ගෙවන ලෙස නියම කර ඇත. එමෙන්ම වගඋත්තරකරුවන් සම්බන්ධයෙන් ජාතික පොලිස් කොමිසම ඇතුළු වගකිව යුතු ආයතන විනය පියවර ගත යුතු බවද නියෝග කර ඇත.
ජනාධිපති නීතිඥ විරාන් කොරයා පෙත්සම්කරු වෙනුවෙන් පෙනී සිට ඇත.

ලසන්ත රුහුණගේ/කේ සංජීව

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි