ශ්‍රී ලංකා ප්‍රමිති ආයතනය මහජන අදහස් විමසීම සඳහා ජනවාරි 26 දින ‘විශේෂිත පොහොර සඳහා වන ශ්‍රී ලංකා ප්‍රමිති පිරිවිතර කෙටුම්පත’ යනුවෙන් අලුත් පොහොර විශේෂයක් සඳහා කෙටුම්පතක් ඉදිරිපත් කර ඇති අතර ඒ සම්බන්ධයෙන් කෘෂිකර්ම ක්ෂේත්‍රයේ විශේෂඥයන් බොහෝ දෙනෙකුගේ සැක මතුවී ඇත.
එම සැකයට හේතුව වන්නේ විශේෂිත පොහොර යනුවෙන් හැඳින්විය හැකි පොහොර වර්ගයක් නොමැති වීම හා විශේෂිත පොහොර යනුවෙන් හඳුන්වන්නේ කිනම් පොහොරද යන්න අවිනිශ්චිත වීමය.
එම කෘෂි විශේෂඥයින් තවදුරටත් සැක මතු කරන්නේ ක්ෂුද්‍රජීවීන් සිටින නිසා ප්‍රතික්ෂේප වූ චීන සමාගමේ පොහොර ගෙන්වීම සඳහා මෙම අලුත් ප්‍රමිතිය කෙටුම්පත් කර ඇතිද යන්නය. ඝන කාබනික පොහොර සම්බන්ධයෙන් දැනට ඇති ශ්‍රී ලංකා ප්‍රමිතිය අනුව ක්ෂුද්‍රජීවීන් සියල්ලක්ම අවසන්වන ආකාරයෙන් ජීවානුහරණය කිරීමකින් තොරව එම වර්ගයේ පොහොර රටට ගෙනආ නොහැකි අතර විශාල ඝන කාබනික පොහොර තොගයක් ඉතා ඉහළ උෂ්ණත්වයක් යටතේ ජීවානුහරණය කළ නොහැකි බව ඔවුන්ගේ මතයය. ඒ නිසා විශේෂිත පොහොර යනුවෙන් මේ නව පොහොර කෙටුම්පත හඳුන්වා දී ඇති බව ඔවුන්ගේ මතයය.
ඉදිරපත් කර ඇති නව කෙටුම්පතට අනුව මහජන අදහස් ලබාදීමේ අවසන් දිනය මාර්තු මස 26 දින වන අතර මේ සම්බන්ධයෙන් ශ්‍රී ලංකා ප්‍රමිති ආයතනයේ අධ්‍යක්ෂ ජනරාල්වරිය එම කෙටුම්පතට අදාළව සඳහන් කර ඇත්තේ ශ්‍රී ලංකා ප්‍රමිති ආයතනය විසින් සකස් කරන ලද එම කෙටුම්පත සියලුම උද්යෝගි අංශවලට තාක්ෂණික විවේචනය සඳහා යවන බවය. එසේම අදාළ අංශ භාර කමිටු මාර්ගයෙන් එම කෙටුම්පත එම ආයතනයේ මහා මණ්ඩලයට ඉදිරිපත් කිරීමට පෙර ලැබෙන සියලුම විවේචන එම ආයතනය විසින් සලකා බලා අවශ්‍ය වෙතොත් සංශෝධන කරන බවද එහි සඳහන් කර තිබේ.
ශ්‍රී ලංකා ප්‍රමිති ආයතනය නව පොහොර ප්‍රමිතියක් සකස් කළේ ඇයි හා කගේ ඉල්ලීමකටද යන්න සඳහන් නොවන අතර මෙම ප්‍රමිතිය සකස් කිරීමට පත්කළ ක්‍රියාකාරි කමිටුව කවුද යන්නද සඳහන් නොවේ.
මේ ආකාරයට ක්‍රියාකාරි කමිටුවක් මගින් සකස්කර මහජන අදහස් සඳහා යොමුකරන ප්‍රමිති කෙටුම්පතක් සම්බන්ධයෙන් ලැබෙන අදහස් විශේෂඥ කමිටුවකට යොමු කිරීමෙන් පසු එහි ස්ථාපිත කර ඇති කෘෂිකර්ම කමිටුවට යොමු කිරීමෙන් පසු මහා මණ්ඩලයට යොමු කිරීම සිදුවේ.■
