No menu items!
26.1 C
Sri Lanka
28 March,2024

එක රටක් එක නීතියක් වුණාට
ඥානසාර හිමිගේ පන්සලට ඇළක් ගොඩකරලා

Must read

■ ඇන්තනී වෙරංග පුෂ්පික

ගෝඨාභය රාජපක්ෂ මහතා ජනාධිපතිවරණය සඳහා ඉදිරිපත් වන විට ඔහුගේ ප්‍රධානම මැතිවරණ පොරොන්දුවක් වූයේ ‘එක් රටක් එක් නීතියක්’ ස්ථාපිත කිරීමට තමන් කැපවෙන බවයි. හැට නව ලක්ෂයක ජනතාවක් ගෝඨාභය රාජපක්ෂ මහතා වටා පෙළ ගැසෙන්නට ප්‍රධාන හේතුවක් වූයේ ද එක් රටක් තුළ එක් නීතියක් ක්‍රියාත්මක වනු දැකීමයි. ගෝඨාභය රාජපක්ෂ මහතා ජනාධිපති වූවායින් පසු හැට නවලක්ෂයක් වූ ජනතාව පමණක් නොව සමස්ත රටේ ජනතාවම ඉතාමත් ඕනෑකමින් බලා සිටියේ සියලුම පුරවැසියන් නීතිය ඉදිරියේ සමානව සලකන නව දේශපාලන සංස්කෘතියක් බිහිවනු දැකීමටයි. ඔහු ජනාධිපති වී වසර දෙකක් ගත වීමට ඇත්තේ තව දවස් කිහිපයක් පමණයි. ගෙවුණු වසර දෙකකට ආසන්න කාලය තුළ එක් රටක් එක් නීතියක් සංකල්පය හෑල්ලුවට සහ හාස්‍යයට ලක් වූයේ සැමට සමානව නීතියේ ආධිපත්‍යය හොඳටම ක්‍රියාත්මක වූ නිසා විය යුතුය.


‘එක් රටක් එක් නීතියක්’ නැවත සමාජයේ සංවාදයට තුඩු දුන් පුවත් මවන සිදුවීමක් වූයේ දවස් කිහිපයකට පෙර ජනාධිපති ගෝඨාභය රාජපක්ෂ, එක් රටක් එක් නීතියක් සංකල්පය ක්‍රියාවට නැංවීම සඳහා ජනාධිපති කාර්ය සාධක බලකායක් පත් කොට එහි සභාපතිත්වය ගලගොඩඅත්තේ ඥානණසාර හිමියන්ට ලබා දීමත් සමගයි. මෙම පත්වීම, විපක්ෂ පාර්ශ්ව පමණක් නොව ආණ්ඩුව තුළ සිටින ප්‍රබල දේශපාලන චරිත පවා ප්‍රසිද්ධියේ තම විරෝධතාව සහ අප්‍රසාදය පළ කළ අතර, සිවිල් ක්‍රියාකාරීන් සිවිල් සංවිධාන ද, මාධ්‍ය සාකච්ඡා පවත්වමින් විවේචනය කළ සිදුවීමක් විය. ඉතිහාසය පුරාවටම ඥානසාර හිමියන්ගෙන්, නීතිය සම්බන්ධයෙන් සහ ජාතික සංහිඳියාවේ භාවිතය සම්බන්ධයෙන් ප්‍රශ්නකාරී හැසිරීම් ගණනාවක්ම මතු වූ අතර ඒ සියල්ලම සිංහල බෞද්ධ දේශප්‍රේමී සළුවෙන් වසා දමන ලදි.


‘එක් රටක් එක් නීතියක්’ ගැන නිර්දේශ කිරීම සඳහා සුදුසුම පුද්ගලයා ලෙස රටේ ජනතාව නොදකින සුවිශේෂ හැකියාවක් සහ ගුණාංග ඥානසාර හිමියන්ගෙන් ඇතැම් විට ගෝඨාභය රාජපක්ෂ මහතා දකිනවා වන්නට පුළුවන. එසේ නම්, ඥානසාර හිමියන්ට සහ රටේ සෙසු ජනතාවට නීති දෙකක් තිබිය නොහැක. එහෙත් මේ ඒ අවලස්සන කතාවයි.
ඥානසාර හිමියන් වෙසෙන්නේ නාවල රාජගිරිය ප්‍රධාන මාර්ගයේ රාජගිරිය අන්තයට සමීපව, ප්‍රධාන මාර්ගය අසබඩ, රාජගිරියේ ශ්‍රී සද්ධම්ම රාජික විහාරස්ථානයේය.
එම විහාරය අසලින් ප්‍රධාන ඇළ මාර්ගයට එකතු වන අතුරු ඇළ මාර්ගයෙහි ගමන් මාර්ගය වෙනස් කොට, එම අතුරු ඇළ මාර්ගය ගොඩ කරමින් එම කොටස විහාරස්ථානයට මේ වන විටත් ඈඳාගෙන අවසන්ය. එය සිදු කොට ඇත්තේ මීට මාස දෙකකට පමණ පෙරාතුවය. එම අතුරු ඇළ මාර්ගය සහ ඊට මත්තෙන් තිබෙන කුඩා දූපත් කොටස අයත් වන්නේ ශ්‍රී ලංංකා ඉඩම් සංවර්ධනය කිරීමේ සංස්ථාවටයි. මෙහි ඇති බරපතළම ප්‍රශ්නය වන්නේ මෙම අතුරු ඇළ මාර්ගයෙහි ගමන් මාර්ගය වෙනස් කොට ගොඩකිරීම් සිදුකොට ඇත්තේ ශ්‍රී ලංකා ඉඩම් සංවර්ධනය කිරීමේ සංස්ථාවේ ආශීර්වාදය ද ඇතිව වීමයි. මෙම ගොඩ කිරීම හේතුවෙන් අතුරු ඇළ මාර්ගයේ ජලය ප්‍රධාන ඇළ වෙත ගමන් කිරීම අවහිර වී ඇති අතර එම නිසා අතුරු ඇළ මර්ගය අසල ජීවත්වන ජනතාවටද එහි බලපෑම එල්ල වී ඇත.


අනෙක් පැත්තෙන් මෙම ගොඩ කිරීම හේතුවෙන් අතුරු ඇළ මාර්ගයට එහායින් තිබූ කුඩා දූපත් කොටසට ද ඇතිවීමට නියමිත පරිසර හානියකි. මෙහි ඇති බරපතළම තත්වය ඉඩම් සංවර්ධන සංස්ථාව සතු පහත් බිම්, ගොඩකළ ඇත්තන්ට නීතිය ක්‍රියාත්මක නොවීමයි.
කොළඹ දිස්ත්‍රික්කයේ පහත් බිම් ප්‍රදේශ ගොඩ කිරීමේ හා සංවර්ධනය කිරීමේ 2006 අංක 35 දරණ සංශෝධිත පනත අනුව අනවසර ගොඩකිරීම් හා ජල රැඳවුම් ප්‍රදේශ දූෂණය කිරීම සම්බන්ධව නීතිමය කටයුතු කිරීමට ඉඩම් සංවර්ධනය කිරීමේ සංස්ථාවට හැකි වූවත් සංස්ථාවේ අනුදැනුම මතම මෙවැනි ගොඩකිරීම් සිදුවීම කනගාටුවට කරුණකි. එය වැටත් නියරත් ගොයම් කෑම සිහිගන්වයි.


එමෙන්ම රටේ ජනතාව ලෙස අප තේරුම් ගත යුත්තේ රටේ ජනතාවට එක් නීතියකුත් රටේ පාලකයන්ට සහ ඔවුන්ගේ හිතවතුන්ට වෙනස් නීති කිහිපයකුත් ඇති බවය.
මෙම විහාරස්ථානය අසලින් අතුරු ඇළ මාර්ගයක් ගමන් කරමින් ප්‍රධාන ඇළ මාර්ගයට සම්බන්ධ වන අයුරු සහ විහාරස්ථානයට එහායින් තිබෙන කුඩා දූපත් තීරුවේ පිහිටීම 2021 වර්ෂයේදීම යාවත්කාලීන කරන ලද ගූගල් සිතියමක් පරිශීලනය කරන ඕනෑම පුද්ගලයෙකුට හඳුනාගැනීමට හැකිය. අඩි 15කට වැඩි පළලින් යුත් එම අතුරු ඇළ මාර්ගයේ ගමන් මාර්ගය වෙනස් කොට අතුරු ඇළ මාර්ගය ගොඩ කොට ඇති ආකාරය එම ස්ථානයට යන ඕනෑම පුද්ගලයෙකුට දැන් නිරීක්ෂණය කිරීමට හැකිය.


රාජගිරිය ශ්‍රී සද්ධම්ම රාජික විහාරස්ථානය අසලින් ගමන් ගන්නා ප්‍රධාන ඇළ මාර්ගය අසලට ගිය විට අපට නිරීක්ෂණය කිරීමට හැකි වූයේ පන්සල අසලින් ගමන් ගත් අතුරු ඇළ මාර්ගයක සේයාවක් හෝ දැන් නොමැති බවයි. මේ වන විට එම අතුරු ඇළ මාර්ගය ගොඩ කොට පස් පුරවා ඒ වටා විශාල දැල් වැටක් ද ඉදි කොට ඇති ආකාරය හොඳින් නිරීක්ෂණය කිරීමට හැකි විය. ඒ අලුත් ඉඩම් කොටස දැන් අයිති ඥානසාර හිමි වසන පන්සලටය.


නිරීක්ෂණය සඳහා රාජගිරිය සද්ධර්ම රාජික විහාරස්ථානය අසල ප්‍රධාන ඇළ මාර්ගය වෙත අප ගිය අවස්ථාවේ ඉඩම් සංවර්ධනය කිරීමේ සංස්ථාවේ අධීක්ෂණ නිලධාරියෙකු තාවකාලික කුටියක සිට පිටතට පැමිණියේය. අතුරු ඇළ මාර්ගය ගොඩ කිරීම පිළිබඳව සාකච්ඡා කිරීමේදී ඔහු කියාසිටියේ ගොඩකර ඇති ඇළ මාර්ගය ඉඩම් සංවර්ධන සංස්ථාවට අයිති කොටසක් බවයි. එය මීට මාස දෙකකට පමණ ඉහතදී විහාරස්ථානයේ ඉල්ලීමක් පරිදි ගොඩ කර ඇති බවයි.


එසේම මෙම අතුරු ඇළ මාර්ගය පන්සල් භූමියට අයත් ඉඩමෙන් පෙර පැවති ආණ්ඩුවක් විසින් කපා ඇති බව විහාරස්ථාන පාර්ශ්වයෙන් පවසන බව ද අධීක්ෂණ නිලධාරියා අප සමග පවසා සිටියේය.


එම අවස්ථාවේ දීම මේ පිළිබඳව වැඩි දුරටත් කරුණු දැනගැනීම පිණිස ඔහු ඉඩම් සංවර්ධන සංස්ථාවේ ප්‍රධාන ඉංජිනේරුවරයෙකු දූරකථනයෙන් සම්බන්ධ කොටගත් අතර එහිදී ඉංජිනේරුවරයා අධීක්ෂණ නිලධාරියාට කියාසිටියේ අතුරු ඇළ මාර්ගයේ ගොඩ කිරීම් සම්බන්ධව කිසිවක් මාධ්‍යයට නොකියන ලෙසයි.


එම ප්‍රදේශයේ පුද්ගලයෙකු ඔහුගේ නම් ගම් හෙළි නොකරමින් කියා සිටියේ දැන් කුඩා වැස්සකටත් මෙම ඇළ මාර්ගය පිටාර ගලා ගංවතුර තත්වයක් ඇතිවෙන බවත් මේ වන විට සිදු කොට ඇති ගොඩ කිරීම් නිසා එය තවත් දරුණු ලෙස ජන ජීවිතයට බලපෑ හැකි බවයි. ‘හරි නම් අපි මේවාට විරුද්ධ වෙන්න ඕනෑ. ඒත් මේක ඥානසාර හාමුදුරුවන්ගේ පන්සල නිසා ඒක කරන්න බෑ.’ ඔහු කීවේය.


මේ සම්බන්ධව විමසූ කල ඉඩම් සංවර්ධනය කිරීමේ සංස්ථාවේ සභාපති විශ්‍රාමික මේජර් ජෙනරාල් එම්. ආර්.ඩබ්. ඩී සොයිසා කියා සිටියේ තමන් එවැනි ගොඩකිරීමක් පිළිබඳව නොදන්නා බවත් ඉඩම් සංවර්ධනය කිරීමේ සංස්ථාව ලෙස එවැනි ගොඩ කිරීමක් කිසිසේත්ම නොකරන බවත්ය.


ගොඩ කර ඇති ඇළ මාර්ගය පිළිබඳව ශ්‍රී ලංකා ඉඩම් ගොඩකිරීමේ සහ සංවර්ධනය කිරීමේ සංස්ථාවේ පසුගිය ආණ්ඩු සමයේ සිටි ඉහළ නිලධාරියෙකුගෙන් විමසූ විට ඔහු අපත් සමග පැවසුවේ පසුගිය ආණ්ඩු සමයේ ද මෙම අතුරු ඇළ මාර්ගය ගොඩ කිරීම සඳහා කිහිප විටකදීම ඉඩම් ගොඩකිරීමේ සහ සංවර්ධනය කිරීමේ සංස්ථාවෙන් අවසර ඉල්ලූ නමුත් ඒ සඳහා කිසිදු අවසරයක් නොදුන් බවයි.


ආරක්ෂක හා නාගරික සංවර්ධන අමාත්‍යාංශයේ ලේකම්ව සිටි සමයේ පවා කොළඹ නගරය ලස්සන කිරීමට විවිධ ව්‍යාපෘති කරමින් ජල ගැලීම් වළකාලන ලෙස ක්‍රමවත්ව ජල ප්‍රවාහන පද්ධති ඉදි කරමින් තිබෙන ජල පද්ධතීන් නිසියාකාරව නඩත්තු කිරීමට කටයුතු කළ අයෙකු වන ගෝඨාභය රාජපක්ෂ මහතා එක් රටක් එක් නීතියක් ක්‍රියාත්මක කිරීම සම්බන්ධයෙන් විශ්වාසය තාබා ඇත්තේ තමන් ගෙන ගිය ප්‍රතිපත්තිය හෝ නොදන්නා අයෙකු ගැන වීම විමතියට කරුණකි.


ශ්‍රී ලංකාව තුළ එක් රටක් එක් නීතියක් සංකල්පය ක්‍රියාවට නැංවීමේ මූලික පරමාර්ථය වන්නේ සැමට සමාන ලෙස නීතියේ ආධිපත්‍යය උපරිම මට්ටමෙන් ක්‍රියාත්මක කිරීමේදී පුද්ගලයෙකුගේ ජාතිය, ආගම, කුලය, දේශපාලන බල පුළුවන්කාරකම් මත හෝ කිසිදු සාධකයක් මත නීතියේ වෙනස් වීමක් හෝ විශේෂ වරප්‍රසාද නොදෙන බව වඩාත් තහවුරු කිරීම නම්, ඒ එක් රටක් එක් නීතියක් සංකල්පය ක්‍රියාවට නැංවීමට ප්‍රථමයෙන් ඥානසාර හිමියන්ට ද රටේ සාමාන්‍ය ජනතාවට ක්‍රියාත්මක වන නීතිය ක්‍රියාත්මක විය යුතුය.■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි