කොළඹ දකුණු වරායේ නැගෙනහිර පර්යන්තයේ සංවර්ධන කටයුතු සඳහා ඇමරිකානු ඩොලර් මිලියන 325ක ණය පහසුකමක් ලබා ගැනීමට ශ්‍රී ලංකා වරාය අධිකාරිය යෝජනා කැඳවා ඇත.
අවශ්‍ය උපකරණ හා පර්යන්ත මෙහෙයුම් පද්ධතියක් නැගෙනහිර පර්යන්තයට ලබා ගැනීමට අවශ්‍ය බව සඳහන් කරමින් එම යෝජනා කැඳවා ඇත.
දේශීය හා ජාත්‍යන්තර බැංකු හා මූල්‍ය ආයතනවලින් මෙම ණය පහසුකම ලබා ගැනීමට යෝජනා කැඳවා ඇති අතර ණය පහසුකම් සැපයීමේ අක්වෙරළ සමූහයන් සමග එක්ව එම යෝජනා බැංකු හා මූල්‍ය ආයතනවලට ඉදිරිපත් කළ හැකිය.
එම මූල්‍ය පහසුකම් යෝජනා නොවැම්බර් 01 වැනිදාට පෙර ශ්‍රී ලංකා වරාය අධිකාරියේ සභාපතිවරයාට යොමු කරන ලෙස ඒ සම්බන්ධයෙන් පළකළ දැන්වීම්වල සඳහන් කර තිබේ.
මේ සම්බන්ධයෙන් කළ විමසීමකදී වරාය නිදහස් සේවක සංගමයේ සභාපති ප්‍රසන්න කළුතරගේ පැවසුවේ නැගෙනහිර පර්යන්තයේ ඉදිකිරීම් සඳහා අවශ්‍ය මුදල් වෙන්කර තිබියදී මේ ආකාරයට ණය ලබා ගැනීමට අවශ්‍යතාවක් නැති බවය. ■
