මොරගහකන්ද වේල්ලවැව, රම්බොඩ පුසුල්පිටිය මාර්ග සහ මොරගහකන්ද පාලම තවම ප්‍රතිංස්කරණය කර නැහැ

දිට්වා සුළි කුණාටුවෙන් හානි වූ මොරගහකන්ද වේල්ලවැව මාර්ගය, රම්බොඩ පුසුල්පිටිය මාර්ගය සහ මොරගහකන්ද පාලම තවමත් ප්‍රතිසංස්කරණය කර නොමැති බව මාර්ග සංවර්ධන අධිකාරියේ අධ්‍යක්ෂ ජනරාල් ඉන්ජිනේරු එච්.එච්.එන්. අනුරාධ හෙට්ටිආරච්චි කියයි.

සුළි කුණාටුවෙන් හානි වූ පාර සහ පාලම් අතරින් කොපමණ ප්‍රමාණයක් මේ වන විට ප්‍රතිසංස්කරණය කර ඇති දැයි අප කළ විමසීමකට ලිඛිතව පිළිතුර ලබා දෙමින් ඒ මහතා මේ බව පවසා ඇත.

2025 නොවැම්බර් 27 වන විට මාර්ග 316ක කිලෝමීටර් 1182ක දුර ප්‍රමාණයක් හානි වී ඇති බවත්, මාසයක් තුළ මාර්ග කොටස් 305ක හදිසි හා තාවකාලික ප්‍රතිසංස්කරණ කටයුතු අවසන් කර ඇති බවත් ඔහු කියයි.

මාර්ග කොටස් 409ක් සඳහා ප්‍රතිසංස්කරණ පැකේජ 245ක් වශයෙන් ප්‍රතිපාදන රුපියල් බිලියන 64.28ක් ලැබී ඇති බවත් මේ වන විට රුපියල් බිලියන 13.9ක කොන්ත්‍රාත් පිරිනමා ඇති බවත් ඔහුගේ පිළිතුරේ සඳහන් වෙයි.

පාලම් 40ක් සම්පූර්ණයෙන් හෝ අර්ධ වශයෙන් විනාශයට පත් වී ඇත. එයින් පාලම් 38ක් මාසයක් තුළ තාවකාලිකව ප්‍රතිසංස්කරණය කර ඇති බවත් මොරගහකන්ද පාලම පමණක් නැවත ප්‍රතිංස්කරණය කළ යුතු බවත් වැඩිදුරටත් සඳහන් වෙයි.

ඔහුගේ පිළිතුරට අනුව, පළාත් අනුව වැඩිම හානි වාර්තා වී ඇත්තේ මධ්‍යම පළාතෙනි. එහි මාර්ග කොටස් 111ක කිලෝමීටර් 425.48ක් හානි වී ඇත.

ස්ථිර ප්‍රතිසංස්කරණය සඳහා පාලම් 40ක් හඳුනාගෙන තිබේ. ඉන් පාලම් 6ක් සම්පූර්ණයෙන්ම ප්‍රතිසංස්කරණය කර අවසන් කර ඇත. පාලම් 8ක් ඉන්දීය ආධාර යටතේද, 12ක් චීන ආධාර යටතේද, පාලම් 2ක් ලෝක බැංකු -අයිඑම්එෆ් ව්‍යාපෘතිය යටතේද ප්‍රතිසංස්කරණය කිරීමට යෝජනා කර ඇත.

හානි වූ මාර්ග ප්‍රතිසංස්කරණ කටයුතු සඳහා රුපියල් බිලියන 69ක් අවශ්‍ය වෙයි. පාලම්වල ව්‍යුහාත්මක කොටස් ප්‍රතිසංස්කරණය සඳහා රුපියල් බිලියන 6කි.

හානි අවම කිරීමේ හා ආරක්ෂිත ව්‍යුහ සංවර්ධන කටයුතු ඇතුළු මාර්ග යටිතල පහසුකම් සංවර්ධනය සඳහා තවත් රුපියල් බිලියන 115ක් අවශ්‍ය වන බවද එම වාර්තාවේ දැක්වේ. ඒ අනුව සමස්ත ප්‍රතිසංස්කරණ කටයුතු සඳහා රුපියල් බිලියන 190ක මූල්‍ය ප්‍රතිපාදන අවශ්‍ය වන බව මාර්ග සංවර්ධන අධිකාරිය පෙන්වා දෙයි.