ප්රවාහන, මහාමාර්ග, වරාය හා සිවිල් ගුවන් සේවා අමාත්යාංශයේ අතිරේක ලේකම්වරයා ලෙස පත් කළ ඩබ්ලිව්. එස්. සත්යානන්ද මහතාට අමාත්යාංශ ලේකම් මහාචාර්ය කපිල පෙරේරා මහතා විසින් ඔහුගේ සේවය අවශ්ය නොවන බව සඳහන් කරමින් එම නිලධාරියා අවමානය සහ මානසික කනස්සල්ලට ලක් කිරීම තුළින් එම අමාත්යාංශයේ ලේකම්වරයා විසින් එම නිලධාරියාගේ මූලික මිනිස් අයිතිවාසිකම් උල්ලංඝනය කිරීමක් සිදුකර ඇතැයි ශ්රේෂ්ඨාධිකරණය මැයි 19 දින තීන්දු කර ඇත.
ශ්රේෂ්ඨාධිකරණ විනිසුරු අර්ජුන ඔබේසේකර මහතා විසින් අදාල තීන්දුව ප්රකාශයට පත් කර ඇති අතර විනිසුරු ආචාර්ය සෝභිත රාජකරුණා සහ ජනක් ද සිල්වා යන මහත්වරුන්ගේ එකඟත්වයද ඊට හිමිව තිබිණි.
අදාල තීන්දුව ගෙන තිබුණේ ඩබ්ලිව්. එස්. සත්යානන්ද මහතා විසින් අධිකරණය හමුවේ ගොනු කළ මූලික අයිතිවාසිකම් පෙත්සම විභාග කිරීමෙන් අනතුරුවය.
පෙත්සම්කරු සිය පෙත්සමේ සඳහන් කර තිබුණේ තමන් ශ්රී ලංකා පරිපාලන සේවයේ විශේෂ ශ්රේණියේ නිලධාරියෙකු වන අතර වසර 30කට ආසන්න කාලයක් රාජ්ය පරිපාලන ක්ෂේත්රයේ විවිධ තනතුරු දරා ඇති බවයි. ඔහු වැඩිදුරටත් සඳහන් කර තිබුණේ 2024 දෙසැම්බර් 18 දින රාජ්ය පරිපාලන අමාත්යාංශය විසින් නිකුත් කළ ලිපියක් මඟින් ප්රවාහන, මහාමාර්ග, වරාය හා සිවිල් ගුවන් සේවා අමාත්යාංශයේ අතිරේක ලේකම් තනතුරට පත් කර ඇති බවත් එදිනම තමන් සේවයට වාර්තා කළ බවත්ය.
එදින දහවල් අමාත්යාංශ ලේකම්වරයා තම කාර්යාලයට පැමිණ තම සේවය අවශ්ය නොවන බව දැනුම් දී කාර්යාලයෙන් ඉවත්වන ලෙස තමන්ට දැනුම්දුන් බව පෙත්සම්කරු පෙත්සමේ සඳහන් කර ඇති අතර එම ක්රියාකලාපය උසස් රාජ්ය නිලධාරියෙකුට සුදුසු නොවන අයුරින් සිදුකර ඇති බවත් එමගින් තමන් අවමානයට හා මානසික පීඩනයට ලක් වූ බවත් පෙත්සම මඟින් පෙන්වා දී තිබුණි.
තීන්දුවේදී ශ්රේෂ්ඨාධිකරණය පෙන්වා දී ඇත්තේ 2022 දෙසැම්බර් 14 දින නිකුත් කළ අංක 2310/29 දරන අතිවිශේෂ ගැසට් පත්රයේ සඳහන් රාජ්ය සේවා කොමිෂන් සභාවේ ක්රියාපටිපාටි රීති අනුව අතිරේක ලේකම්වරුන් පත් කිරීමේ බලය රාජ්ය සේවා කොමිෂන් සභාව සතු වන බවය.
එමෙන්ම අමාත්යාංශ ලේකම්වරයා විසින් රාජ්ය සේවා කොමිෂන් සභාව විසින් ගත් පත්කිරීමේ තීරණයට මැදිහත් වීම හරහා එම කොමිෂන් සභාවේ බලතලවලට බලපෑම් කිරීමක් සිදුකර ඇති බවත් එය නීතියේ ආධිපත්යයට පටහැනි ක්රියාවක් බවත් අධිකරණය සඳහන් කර ඇත.
තීන්දුවේ වැඩිදුරටත් සඳහන් වූයේ රාජ්ය නිලධාරීන් ජනතාවගේ විශ්වාසය මත බලතල භාවිත කළ යුතු බවත් අමාත්යාංශ ලේකම්වරයෙකුට පරිපාලන අධීක්ෂණ බලතල තිබුණද රාජ්ය සේවා කොමිෂන් සභාවට පැවරී ඇති පත්කිරීම් සහ මාරුකිරීම් බලතලවලට මැදිහත් වීම බරපතළ කාරණයක් බවයි.
ඒ අනුව වගඋත්තරකාර අමාත්යාංශ ලේකම්වරයාගේ ක්රියාකලාපය හේතුවෙන් පෙත්සම්කරුගේ ගෞරවය හා රාජ්ය නිලධාරියෙකු ලෙස ඇති අයිතිවාසිකම් උල්ලංඝනය වී ඇති බවත් එමගින් ආණ්ඩුක්රම ව්යවස්ථාවේ 12(1) වගන්තිය යටතේ සහතික කර ඇති නීතිය ඉදිරියේ සමාන සැලකිලි ලැබීමේ මූලික අයිතියද උල්ලංඝනය වී ඇති බවත් ශ්රේෂ්ඨාධිකරණය තීන්දු කර ඇත.
