20.4 C
Sri Lanka
25 September,2022

සියතින් ගෙල වැල
දා ගැනීම

Must read

තමන් කළ දේවල නපුරු විපාක තමන් ම විඳින භයානක අවස්ථාවලට මේ ආණ්ඩුව 2019 නොවැම්බරයේ, එහි උපතේ සිට ම මුහුණු දුන්නේ ය. දැන් මුහුණ දෙමින් සිටින්නේ ද ඒ නපුරු ඉරණමේ ම තවත් පියවරවලට ය.

යුගදනවි ද්‍රවීකෘත වායු විදුලි බලාගාරය අයත් සමාගමේ මහා භාණ්ඩාගාරයට අයත් කොටස් සියයට හතළිහ අමෙරිකානු සමාගමකට විකුණා දැමීම නිසා ආණ්ඩුව පත් වී ඇත්තේ එසේ මෙසේ අර්බුදයකට නොවේ. එක පැත්තකින් ආණ්ඩුව ලක්‍ෂ හැටනවයක තම ඡන්දදායකයන්ට මහා බොරුවක් කළ බව හෙළිදරව් වෙමින් තිබේ. අනෙක් අතින් ආණ්ඩුවේ හවුල්කාර කුඩා පක්‍ෂවල විරෝධයට හා ප්‍රසිද්ධ විවේචනයට මුහුණ දෙමින් සිටියි. තවත් අතකින්, යුදගනවි ගිවිසුම සාධාරණීකරණයට මාධ්‍ය ඉදිරියට යවන තමන්ගේ දේශපාලන නායකයන්, මුළු මහත් ජනතාවට ම විහිළු සපයන ආකාරය බලමින් විලියෙන් ඇඹරෙන්නට ද ආණ්ඩුවට සිදු වී තිබේ.

පොදුජන පෙරමුණේ ලේකම්වරයා කියන්නේ ගිවිසුම මහ රෑ අත්සන් කළේ, දෙපැත්තටම යවමින් එහි කෙටුම්පත් සකස් කරන්නට සිදු වුණු නිසාත්, මුද්‍රණ දෝෂ හරි ගස්සන්නට සිදු වුණු නිසාත් බව ය. එසේ දෙපැත්තට ම කෙටුම්පත් යවමින් මහ රෑ වෙන තුරු කළ සාකච්ඡාව නිසා ලංකාවට උපරිම වාසි ගෙන දෙන අයුරින් ගිවිසුම සකසා ගන්නට හැකි වුණු බව ද ඔහු කිව්වේ ය. සියයට හතළිහක කොටස් හා අවුරුදු ගණනාවක ද්‍රවීකෘත වායු විදුලි බලය සැපයීමේ ඒකාධිකාරය ඇමෙරිකානු සමාගමට පවරා දීම ‘රටට උපරිම වාසි ගෙන දෙන’ කොන්දේසි යැයි මන්ත්‍රීවරයා කියන විට, ගිවිසුම මුල් තත්වයේ කොයි ආකාරයෙන් තිබුණේ ද යන්න අපට සිතා ගත හැකි ය.

ආණ්ඩුව මුලින් එවැනි ගිවිසුමක් මහ රෑ 12.06ට අත්සන් කළ බව පිළිගත්තේ නැත. කැබිනට් මාධ්‍ය ප්‍රකාශකවරු ද එවැනි දෙයක් ඇතැ’යි නිශ්චිතව නොකීවෝ ය. එහෙත්, වටින් ගොඩින් තොරතුරු හෙළිවන විට ටිකෙන් ටික ආණ්ඩුව එය පිළිගත්තේ ය. ගාමිණී ලොකුගේ ඇමතිවරයා, එවැන්නක් අත්සන් කළ බවත්, එය සෞභාග්‍යයේ දැක්ම ප්‍රතිපත්ති ප්‍රකාශනයේ ප්‍රතිපත්ති ක්‍රියාත්මක කිරීමක් බවත් තිරසාරව කියා සිටියේ ය. විමල් වීරවංශ ඇමතිවරයා කිව්වේ, සියයට හතළිහක කොටස් දුන්නේ ඇමෙරිකානු සමාගමකට බවත්, සමාගමක් කියන්නේ අමෙරිකාවට නොවන බවත් ය. එහෙත්, මේ ගිවිසුමට තමන් එකඟ නැති බවත්, ඒ ගැන කැබිනට් රැස්වීමේ දී ප්‍රකාශ කළ බවත් ආණ්ඩුවේ හවුල්කාර කුඩා පක්‍ෂ කීවේ ය. ලොකුගේ ඇමතිවරයා කිව්වේ, කිසි විරෝධයක් කැබිනට් මණ්ඩලයේ දී නොනැගුණ බව ය. වාසුදේව නානායක්කාර මහතා කිව්වේ, ගිවිසුමක් අත්සන් කරන බව කීවත්, අන්තර්ගතය ගැන කැබිනට් මණ්ඩලයට දැනුම් නොදුන් බව ය.

මේ තරම් හතර විලිලජ්ජා නැති තත්වයකට ආණ්ඩුව පත් වී ඇත්තේ අප පෙර ද කී පරිදි, තමන් ම ගෙල වටා පටලවා ගත් වැල් නිසා ය. යහපාලන ආණ්ඩු කාලයේ ඇමෙරිකානු මිලේනියම් චැලේන්ජ් ගිවිසුම හරහා ඩොලර් මිලියන හයසියයකට ආසන්න සම්පූර්ණ ප්‍රදානයක් ලංකාවට ලැබෙන්නට යන විට, එදා විපක්‍ෂයේ සිටි අද ආණ්ඩුවට හිතවත් ටියුෂන් ගුරුවරුන් පවා තම ළමයින්ට ලංකාව මැදින් ඉරක් ගසා එම්සීසී ගිවිසුමෙන් රට දෙකඩ වෙන හැටි පෙන්වා දුන්නේ ය. සීතා අරඹේපොළ වැනි වියත් කාන්තාවන් පෙන්වා දුන්නේ ඇමෙරිකන්කාරයන් එන්නේ අපේ වැටමාර සුද්ද කරන්නට නොවන බව ය. ඒ හැර යහපාලන ආණ්ඩුවෙන් පිටරටට විකුණන දේපළ තමන් බලයට ආ විට යළි පවරා ගන්නා බවට ද තර්ජනය කරන ලදි.

එසේ කී දේශපාලකයන් අද වැටී ඇති දුර්භාග්‍ය සම්පන්න තත්වය කෙසේ විස්තර කළ හැකි ද?

ලංකාවේ වසර සියගණන් පවතින ඉඩම් අයිතිය පිළිබඳ ආරාවුල් විසඳා ඒවා නිරවුල් කරන්නට මෙන් ම රටේ ප්‍රවාහන හා මාර්ග පද්ධතිය දියුණු කරගන්නට විශාල මුදලක් හුදු ප්‍රදානයක් ලෙස පමණක් ලබා දෙන එම්සීසී ගිවිසුම සම්බන්ධයෙන් එකල විපක්‍ෂය මැවූ ගෝනිබිල්ලා අද ඔවුන්ගේ ම ආණ්ඩුවේ ගෙලෙහි වැටී ඇති මන්ද බවට පත් වී තිබේ. එය සැපයක් යැයි කලකට පෙර ගෙල පළඳා ගත්තේ ද මේ ආණ්ඩුවේ දේශපාලන නායකයන් ම ය.

2019 අප්‍රේල් 21 වැනි දා පාස්කු දින ත්‍රස්ත ප්‍රහාරය, එවක ආණ්ඩුවේ නොසැලකිල්ල නිසා සිදු වූ මහා මිනිස් ඝාතනයක් ලෙස එදා පෙන්වන ලදි. පාස්කු දින ප්‍රහාරය සිදු වී දින කිහිපයකින් ගෝඨාභය රාජපක්‍ෂ මහතා ඉදිරි ජනාධිපතිවරණයට තමා ඉදිරිපත් වන බව ප්‍රකාශ කෙළේ ය. 2019 නොවැම්බර් ජයග්‍රහණයට, පාස්කු දින ප්‍රහාරය වෙනුවෙන් නිර්මාණය කල බොරු උපරිම සේවයක් කළ බව කවුරුත් දනිති. තමන් බලයට පැමිණි පසු පාස්කු දින ප්‍රහාරකයන්ට උපරිම දඬුවම් හා වින්දිතයන්ට උපරිම යුක්තිය ඉටු කරන බවට ද එදා විපක්‍ෂය පොරොන්දු විය.

එහෙත් අද සිදු වී ඇත්තේ කුමක්ද? පාස්කු මහ මොළකරු සඟවා ගෙන සිටින බවට ඒ ආණ්ඩුවට ම චෝදනා එල්ල වීම ය. ජනාධිපති කොමිසමෙන් අපරාධ නඩු පැවරිය යුතු යැයි නිර්දේශ කළ අයට තම දේශපාලන හෝ වෙනත් වුවමනා මත නඩු නොපවරා සිටින බවට ද ආණ්ඩුව චෝදනාවලට ලක් වෙයි. ඒ අතර ආණ්ඩුවේ නායකයන්ට විදෙස්වලදී පවා විරෝධතා විඳින්නට සිදු වි තිබේ.

තමන් විසින් මුදා හරින ලද භූතයන් ඇඟේ හැපෙමින් සිටින වටාපිටාවක සියතින් ගෙල වැල දාගෙන සිටින අසරණයකුගේ මුහුණ ආණ්ඩුවේ ලොකු ලොක්කන්ගෙන් ද මැනැවින් ප්‍රදර්ශනය වේ.■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි