No menu items!
29.7 C
Sri Lanka
29 March,2024

කොරෝනා ආසාදිතයින් සහ මරණ සංඛ්‍යාව ඉහළට – දෛනික පරීක්ෂණ සංඛ්‍යා පහළට

Must read

■ ප්‍රියාශා හෙට්ටිහේවා

දෛනික කොරෝනා ආසාදිතයින් සංඛ්‍යාව 4,000 ඉක්මවා වාර්තා වන සහ දෛනික කොරෝනා මරණ සංඛ්‍යාව 200 ඉක්මවා වාර්තා වන පසුබිමක රට තුළ සිදු කරන පී.සී.ආර්. සහ ක්ෂණික ප්‍රතිදේහජනක පරීක්ෂණ සංඛ්‍යාවල අඩුවීමක් දක්නට ලැබේ.
සෞඛ්‍ය ප්‍රවර්ධන කාර්යාංශයේ වෙබ් අඩවියේ දත්ත අනුව රට වසා දැමූ අගෝස්තු 20 වන දා සිට ඊයේ (අගෝස්තු 31) දිනය දක්වා කාලය තුළ පී.සී.ආර්. පරීක්ෂණ සංඛ්‍යාව 20,274 සිට 13,936 දක්වා අඩු වී ඇත.


කොරෝනා වෛරස ව්‍යාප්තිය ඉහළයාමත් සමග අගෝස්තු 20 වන දා රාත්‍රී 10.00 සිට රට වසා දැමීමට රජය තීරණය කළ අතර එදින සිදු කළ පී.සී.ආර්. සංඛ්‍යාව 20,274ක් වන අතර ක්ෂණික ප්‍රතිදේහජනක පරීක්ෂණ සංඛ්‍යාව 6,186කි. එදින වාර්තා වූ ආසාදිතයින් සංඛ්‍යාව 3,839කි.


අගෝස්තු 25 වන දා සිට 31 වන දා දක්වා සතියක කාලය තුළ සිදු කර ඇති පී.සී.ආර්. පරීක්ෂණ සංඛ්‍යාව පිළිවෙලින් 18051, 16189, 18355, 16073, 13446, 13696, 13,936කි. එම දිනවල වාර්තා වූ ආසාදිතයින් සංඛ්‍යාව 4,500 ඉක්මවූ අතර අගෝස්තු 31 දින වාර්තා වූ ආසාදිතයින් සංඛ්‍යාව 4,221කි. එම සතිය තුළ දෛනික කොරෝනා මරණ සංඛ්‍යාව පිළිවෙලින් 209, 214, 212, 192, 216, 194 බැගින් වේ.


සෞඛ්‍ය වෘත්තීය සමිති ඇතුළු සෞඛ්‍ය ක්ෂේත්‍රයේ බොහෝ පිරිස් ආසාදිතයින් සෙවීමේ පරීක්ෂණ සංඛ්‍යාව ඉහළ නංවන්න යැයි ඉල්ලා තිබියදී සහ දෛනික ආසාදිතයින් සහ මරණ සංඛ්‍යාව ඉහළයමින් තිබියදී ආසාදිතයින් සොයා සිදු කරන පරීක්ෂණ සංඛ්‍යාව මෙලෙස අවම වීම සම්බන්ධයෙන් සෞඛ්‍ය අමාත්‍යාංශයේ නියෝජ්‍ය සෞඛ්‍ය සේවා අධ්‍යක්ෂ ජනරාල් විශේෂඥ වෛද්‍ය හේමන්ත හේරත්ගෙන් ‘අනිද්දා‘ විමසීමක් කළේය.
වෛද්‍යවරයා පැවසුවේ, ක්ෂණික ප්‍රතිදේහ පරීක්ෂණ විශාල ප්‍රමාණයක් සිදු කරන බවත් පරීක්ෂණ සඳහා යන වියදම අවම කර ගැනීමත් ඒ හරහා සිදුවන බැවින් අවශ්‍යතාවට ගැළපෙන පරිදි පී.සී.ආර්. පරීක්ෂණ සංඛ්‍යාව ඉහළ පහළ යා හැකි බවය.


ක්ෂණික ප්‍රතිදේහජනක පරීක්ෂණ සංඛ්‍යාව ඉහළ දමා ඇති බව වෛද්‍යවරයා ප්‍රකාශ කළ ද අගෝස්තු 25 සිට 31 දක්වා සතියක කාලය තුළ සිදු කළ ක්ෂණික ප්‍රතිදේහජනක පරීක්ෂණ සංඛ්‍යාව පිළිවෙලින් 4355, 4886, 4897, 4621, 4384, 3173, 4323 බැගින් වේ.


මේ පිළිබඳව විමසීමේදී වෛද්‍යවරයා පැවසුවේ, ප්‍රතිදේහජනක පරීක්ෂණ වාර්තා වීමේ ප්‍රමාදයක් පවතින බවය. හේතුව ලෙස ඔහු ප්‍රකාශ කළේ ක්ෂේත්‍රයේ සිදු කරන පරීක්ෂණ දත්ත දෛනිකව වාර්තාවීමක් නොවන බවය. ක්ෂණික ප්‍රතිදේහජනක පරීක්ෂණ මගින් වාර්තා වන ආසාදිතයන් සංඛ්‍යාව දැනුම් දුන්න ද ආසාදිතයන් නොවන සංඛ්‍යාව වාර්තා නොවන බවත් එම හේතුවෙන් පරීක්ෂණ දත්ත ඉහළ යාමක් පැහැදිලිව පෙන්නුම් නොකරන බවත් ඔහු පැවසීය.


පරීක්ෂණ සංඛ්‍යාව අවමවීම පිළිබඳව රජයේ වෛද්‍ය නිලධාරීන්ගේ සංගමයේ ලේකම් වෛද්‍ය සෙනාල් ප්‍රනාන්දු මහතා පැවසුවේ, රෝගීන් හඳුනාගැනීම සඳහා පරීක්ෂණ සුලබ කළ යුතු බවය.


පරීක්ෂණ සංඛ්‍යාව අඩුවීම හේතුවෙන් රෝගය පැතිරීම ඉහළ යන බවත් රෝග ව්‍යාප්තියේ පාලනයක් සිදු නොවී දරාගත නොහැකි අන්දමින් රෝගීන් සංඛ්‍යාව ඉහළ යාමට ඉඩකඩ ඇති බවත් ඔහු වැඩිදුරටත් පැවසීය.■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි