2019 වසරේ පාස්කු ඉරිදා ත්රස්ත ප්රහාර සම්බන්ධයෙන් කොළඹ මහාධිකරණ ත්රිපුද්ගල විනිසුරු මඬුල්ල හමුවේ විභාග වූ නඩුවේ විත්තිකරුවන් 24 දෙනාගෙන් 15 දෙනෙකු වරදකරුවන් බවට අද (22) තීන්දු කර තිබේ.
නවුෆර් මවුලවි ඇතුළු විත්තිකරුවන් 24 දෙනෙකුට එරෙහිව පවරා තිබූ මෙම නඩුවේ තීන්දුව කොළඹ ස්ථිර මහාධිකරණ ත්රිපුද්ගල විනිසුරු මඬුල්ල විසින් අද ප්රකාශයට පත් කර ඇත.
අනෙක් විත්තිකරුවන් 9 දෙනා සියලු චෝදනාවලින් නිදොස් කොට නිදහස් කිරීමට අධිකරණය නියෝග කර තිබේ. වරදකරුවන් බවට තීන්දු වූ විත්තිකරුවන් 15 දෙනාට අදාළ දඬුවම් අද පසුව ප්රකාශයට පත් කිරීමට නියමිත බව වන අතර විත්තිකරුවන් 24 දෙනාට එරෙහිව කුමන්ත්රණ කිරීම, ආධාර අනුබල දීම, අවි සහ පතොරම් එකතු කිරීම සහ ත්රස්තවාදය වැළැක්වීමේ පනත යටතේ මිනීමැරීමට තැත් කිරීම ඇතුළු චෝදනා 23,270කට අධික සංඛ්යාවක් ගොනු කර තිබිණි.
2019 අප්රේල් 21 වැනිදා ශ්රී ලංකාවේ ස්ථාන කිහිපයක පිහිටි දේවස්ථාන තුනක් සහ හෝටල් තුනක් ඉලක්ක කර ගනිමින් මරාගෙන මැරෙන බෝම්බ ප්රහාර මාලාවක් එල්ල විය. එම ප්රහාරවලින් විදේශිකයන් ඇතුළු පුද්ගලයන් 350කට වැඩි පිරිසක් මියගොස් 500කට අධික පිරිසක් තුවාල ලැබූහ.
අදාළ විමර්ශනවලින් අනතුරුව නීතිපතිවරයා විසින් සැකකරුවන් 24 දෙනෙකුට එරෙහිව අධිචෝදනා ගොනු කර නඩුව විභාග කිරීම සඳහා ත්රිපුද්ගල මහාධිකරණ විනිසුරු මඬුල්ලක් පත් කරන ලෙස ඉල්ලා තිබිණි. නඩු විභාගයේදී පැමිණිල්ල වෙනුවෙන් සාක්ෂිකරුවන් 2,309 දෙනෙකු සාක්ෂි ලබාදී ඇති අතර, පැමිණිල්ලේ සහ විත්තියේ සාක්ෂි සටහන් කිරීම අගෝස්තු 24 වැනිදා අවසන් කර තිබිණි.
තීන්දුව ප්රකාශයට පත් කිරීම අදට නියම කර තිබූ අතර, ඒ හේතුවෙන් අද පෙරවරුවේ සිට හුල්ෆ්ට්ස්ඩෝර්ෆ් අධිකරණ සංකීර්ණයේ ආරක්ෂාව ද දැඩි කර තිබිණි.
