2019 වසරේ පාස්කු ඉරුදින එල්ල වූ මරාගෙන මැරෙන ත්රස්ත ප්රහාර මාලාව සම්බන්ධයෙන් අධිකරණය හමුවේ වරදකරුවන් වූ මොහොමඩ් නවුෆර් හෙවත් ‘නවුෆර් මවුලවි’ ඇතුළු විත්තිකරුවන් 15 දෙනාට එක් අයෙකුට වසර 220 බැගින් වූ බරපතළ වැඩ සහිත සිරදඬුවම් කොළඹ විශේෂ ත්රිපුද්ගල මහාධිකරණය විසින් අද (22) නියම කළේය.
එමෙන්ම, වරදකරුවන් වූ විත්තිකරුවන් 15 දෙනා සතු සියලු දේපළ සහ වත්කම් තහනම් කිරීමට ද විනිසුරු මඬුල්ල නියෝග කර තිබේ.
නවරත්න මාරසිංහ (සභාපති විනිසුරු), සුජීව නිශ්ශංක සහ රාමනාදන් කන්නන් යන මහත්වරුන්ගෙන් සමන්විත විශේෂ ත්රිපුද්ගල මහාධිකරණ විනිසුරු මඬුල්ල හමුවේ නඩු විභාගය පැවැත්විණි.
අද පස්වරුවේ නඩුවේ තීන්දුව ප්රකාශයට පත් කරමින් විත්තිකරුවන් 24 දෙනාගෙන් 15 දෙනෙකු වරදකරුවන් බවට තීන්දු කළ අතර, සෙසු විත්තිකරුවන් 9 දෙනා නිදොස් කොට නිදහස් කිරීමට නියෝග කෙරිණි. අනතුරුව රාත්රියේ අධිකරණය යළි රැස්වී වරදකරුවන් වූ විත්තිකරුවන් 15 දෙනාට අදාළ දඬුවම් නියම කර තිබේ.
ත්රස්තවාදය වැළැක්වීමේ පනත යටතේ ගොනුකර තිබූ අධිචෝදනා සාධාරණ සැකයෙන් ඔබ්බට ඔප්පු වී ඇති බවට නිගමනය කළ අධිකරණය, එක් එක් විත්තිකරුට වසර 220 බැගින් වූ බරපතළ වැඩ සහිත සිරදඬුවම් නියම කර ඇත.
2019 අප්රේල් 21 වැනිදා දිවයිනේ ප්රධාන පෙළේ හෝටල් තුනක් සහ කිතුනු දේවස්ථාන තුනක් ඉලක්ක කරගනිමින් එල්ල වූ මරාගෙන මැරෙන ප්රහාර මාලාවෙන් විදේශිකයන් ඇතුළු පුද්ගලයන් 270කට අධික පිරිසක් මියගොස් 500කට වැඩි පිරිසක් තුවාල ලැබූහ. මෙම ප්රහාර මාලාව සම්බන්ධයෙන් නීතිපතිවරයා විසින් අධිචෝදනා 23,270ක් යටතේ නඩුව පවරා තිබූ අතර, නඩු විභාගය අතරතුර පැමිණිල්ල වෙනුවෙන් සාක්ෂිකරුවන් 2,300කට අධික පිරිසක් සාක්ෂි ලබාදී තිබිණි.
