No menu items!
20.9 C
Sri Lanka
28 March,2024

බන්ධනාගාරයේදී පුතාට ගහලා මැරුවා – මානව හිමිකම් කොමිසමට පැමිණිල්ලක්

Must read

බන්ධනාගාර ගත කර සිටි තම පුත්‍රයා මහර බන්ධනාගාරයෙන් පැන යෑමට තැත් කරද්දී තාප්පයකින් වැටී තමන්ගේ මිය ගිය බව ප්‍රකාශ කළත්, ඔහු මිය ගොස් ඇත්තේ පහර දීමකින් බව යුවළක් ජුනි 02 වැනිදා මානව හිමිකම් කොමිෂන් සභාවේ පැමිණිල්ලක් කරමින් ප්‍රකාශ කර ඇත.

එම පැමිණිල්ල අනුව, ලංකාවේ ආරක්ෂිත සිරගෙදරකදී කවිඳු ඉසුරු තිසේරා නම් 27 හැවිරිදි තරුණයා මියගොස් ඇත්තේ භයානක පහරදීම් වලින්ය. තම පුත්‍රයා මැයි 03 වැනිදා මහර බන්ධනාගාරයේදී මියගිය බව එම පැමිණිල්ලෙහි සඳහන්ය. ඔහු මියගිය දිනට දින 2කට පෙර බන්ධනාගාරයට ඇතුළු කර තිබී ඇත.

ආර්.එම් කරුණාවති මහත්මිය අනිද්දාට අදහස් දක්වමින් මෙසේ කීවාය.

‘පුතාව පොලිසියෙන් අත්අඩංගුවට ගත්තේ අප්‍රේල් 25 වෙනිදා. වැලිසර උසාවියට පුතාව ඉදිරිපත් කරලා. බන්ධනාගාර ගත කළේ අප්‍රේල්  28 වෙනිදා. පුතාව බන්ධනාගාර ගත කළාට පස්සේ අපි එයාව බලන්න ගියා. ඒත් අපිට එදා එයාව බලන්න බන්ධනාගාරය ඇතුලට යන්න දුන්නේ නැහැ. බන්ධනාගාරයේ වැඩකරන නිලධාරි මහත්වරුන් කිව්වේ  පුතාව නිරෝධායනය කරන්න දාලා ඉන්න නිසා දවස් 14 ක් යනකම් කාටවත්  බලන්න දෙන්න බැහැ කියලා. ඉන්පස්සේ අපි ආපහු ගෙදර ආවා.

මැයි 03 වෙනිදා උදේ 9.30 ට විතර  කඩවත පොලිසියේ නිලධාරින් දෙන්නෙක් ඇවිත්  කිව්වා ඔයාලා රාගම වෛද්‍ය අධිකරණයට ඉක්මනට යන්න කියලා. ඉන්පස්සේ අපි දෙන්නාම රාගම වෛද්‍ය අධිකරණයට ගියා. එතැනින් අපිට රෝහල් පොලිසියට යන්න කිව්වා. අපි රෝහල් පොලීසියට ගියා. එතනදි අපිට පුතා මිය ගිය බව කිව්වා. ඉන්පස්සේ අපිට රාගම පොලිසිට ගිහින් විස්තර දෙන්න කියලා කිව්වා. රාගම පොලිසියෙන් අපිට කිව්වා මිනී කාමරයට යන්න කියලා. අපි මිනි කාමරය ලඟ විනාඩි දහයක් විතර හිටියා. ඉන්පස්සේ තමයි පුතාගේ මළ සිරුර අපිට පෙන්නුවේ. අපිට කිව්වා මේ ඔයාලාගේ පුතාද කියලා බලන්න කියලා. අපේ පුතා තමයි මැරිලා හිටියේ.

අපි පුතාගේ මල සිරුර බලද්දි අපි දැක්කා ට්‍රොලියේ ලේ තියෙනවා. ලේ නිසා මම පුතාගේ ඔළුව උස්සලා බැලුවා. මම දැක්කා පුතාගේ ඔළුවේ  අගල් දෙකක විතර ලොකු තුවාලයක් තියෙනවා. ට්‍රොලිය යටත් සෑහෙන්න ලේ වැටිලා තිබුණා. මගේ දුක වැඩිකමට මම ඒ වෙලාවේ කෑගහුවා මගේ පුතාට ගහලා තමයි මරලා තියෙන්නේ කියලා. පුතාගේ අත්, කකුල් කඩලා තිබුණා. ඒ තැන්වලත් තුවාල තිබුණා. අපට හොඳට පෙනුණා පුතාට ගහලා කියලා. ඇඳුම් සහ කොණ්ඩය තෙතට තිබුණා. පුතාව වතුරෙ ඔබලා කියලයි අපට හිතෙන්නේ.

පුතා මැරුණේ කොහොමද කියලාවත් කියන්න කෙනෙක් හිටියේ නැහැ. ඒ වෙලාවේ  අපිට පුතාගේ මළ සිරුර පෙන්නපු කෙනා විනාඩි දහයක් විතර අපිට පුතා ගාව රැදෙන්න දිලා අපිට එළියට යන්න කියලා ඉක්මනින් දොර වහලා දැම්මා. අපට කිසි කෙනෙක් කිව්වේ නැහැ පුතා කොහොමද මැරුණේ කියලා. පස්සේ තමයි අපිට කිව්වේ පුතා බන්ධනාගාරයෙන් පැනලා යන්න හදලා තාප්පෙන් වැටිලා මැරුණා කියලා. පුතාගේ මිනිය වල දාන්න කියලා දුන්න තාවකාලික සහතිකයෙත් පුතා මැරුණ හේතුව විදියට සදහන් කරලා තිබුණේ තාප්පෙන් වැටිලා මිය ගිහින් කියලා. ජුනි 19 තමයි  පුතාගේ මරණ පරීක්ෂණ  වාර්තාව දෙනවා කියලා අපට කිව්වේ. අපට මේ මරණය ගැන සැකයි.

මේ පිලිබඳව අප කළ විමසීකදී  සිරකරුවන් සුරැකීමේ සංවිධානයේ සභාපති නීනිඥ සේනක පෙරේරා ප්‍රකාශ කළේ  මිය ගිය පුද්ගලයා බන්ධනාගාරයෙන් පැන යෑමට තැත් කළ අවස්ථාවේදි වැටී මිය ගොස්  ඇති බවට මාධ්‍ය වලින් පැවසූවද ඔහුව බන්ධතාගාර ගත කළ දින සිට මිය ගිය දින දින දක්වා දින 5 ක් කිසිවක් ආහාර ගෙන නොතිබුණු බවත්  එසේ දුර්වල පුද්ගලයෙකු මෙලෙස පැන යෑම සදහා තාප්පයකට නගින්නේ කෙසේදැයි ප්‍රශ්නකාරි බවත්ය.

අදාල පුද්ගලයා මිය ගියේ පහරදීමකින් බවට ඇසින් දුටු සාක්ෂිකරුවෙක් සිටින බවද ඔහු කීය. මෙම සිදුවීමෙන් පසුව, එම සාක්ෂිකරුවාව මේ වන විට පොළොන්නරුව බන්ධනාගාරයට මාරු කර යවා ඇති බවත් ඒ මහතා පැවසීය. තමන් අදාල සාක්ෂිකරුගෙන් දිවුරුම් ප්‍රකාශයක් ගැනීමට පොලොන්නරුව බන්ධනාගාරය වෙත ජූනි 02 වන දින ගිය බවත් එම දිවුරුම් ප්‍රකාශය ලබා ගැනීමට පොලොන්නරු බන්ධනාගාරයේ බලධාරීන් තමන්ට ඉඩ නොදුන් බවත් නීතිඥ සේනක පෙරේරා පැවසීය.

අදාල පුද්ගලයා මිය ගොස් ඇත්තේ වද හිංසාවට ලක් කරමින් බවට පවසමින් ඉදිරියේදි ඔහුගේ දෙමව්පියන් ශ්‍රේෂ්ඨාධිකරණය හමුවේ මූලික අයිතිවාසිකම් පෙත්සමක් ගොනු කිරීමට බලාපොරොත්තු  වන බවද නීතිඥවරයා පැවසීය.

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි