ලබාගත් මන්ත්‍රීවරුන් ගැන විමර්ශන..
කෙහෙළිය, හැරිසන්, සුසිල්, දයාසිරි, රාජිත ඒ අතර
හිටපු ජනාධිපති මෛත්‍රීපාල සිරිසේනට ලැබුණු කැඳවීමක් අනුව ඔහු අපරාධ පරීක්ෂණ දෙපාර්තමේන්තුවට ගොස් ප්‍රකාශයක් ලබාදී තිබුණි. ඒ ඔහුගේ ජනාධිපතිවරණ ධුර කාලයේදී ජනාධිපති අරමුදල මගින් හිටපු හා වත්මන් පාර්ලිමේන්තු මන්ත්‍රීවරුන්ට සැත්කම් ඇතුළු වෛද්‍ය ප්‍රතිකාර සඳහා මුදල් ලබාදීම සම්බන්ධයෙන්ය.
ජනාධිපති අරමුදලෙන් මුදල් ලබා ගැනීම සම්බන්ධයෙන් හිටපු පාර්ලිමේන්තු මන්ත්‍රීවරුන් ඇතුළු දේශපාලනයට සම්බන්ධ පුද්ගලයින් හතලිස් ගණනකගේ විස්තර ඇතුළත් ලිපිගොනු ජනාධිපති අරමුදල විසින් සකස් කර තිබී ඇති අතර ඒවා අපරාධ පරීක්ෂණ දෙපාර්තමේන්තුව විසින් වැඩිදුර විමර්ශන සඳහා ඔවුන්ගේ භාරයට ගෙන තිබුණි. ඉන් ලිපිගොනු විසි ගණනක් සම්බන්ධයෙන් ඉදිරි විමර්ශන සිදු කිරීම සඳහා වන නියෝගයක් අධිකරණයට කරුණු වාර්තා කරමින් අපරාධ පරීක්ෂණ දෙපාර්තමේන්තුව ලබාගෙන පසුගිය දිනෙක ලබාගෙන තිබුණි.
හිටපු ජනාධිපති මෛත්‍රීපාල සිරිසේන අපරාධ පරීක්ෂණ දෙපාර්තමේන්තුවට ප්‍රකාශයක් ලබා ගැනීම සඳහා කැඳවා තිබුණේ ඒ අනුවය. අප මීට පෙර අනාවරණය කරන ලද ජනාධිපති අරමුදලෙන් මුදල් ලබාගත් දේශපාලනඥයින්ට අදාළ ලැයිස්තුව අනුව හිටපු ජනාධිපතිවරුන් වන රනිල් වික්‍රමසිංහ, ගෝඨාභය රාජපක්ෂ, මහින්ද රාජපක්ෂ යන අයද ඉදිරියේදී ප්‍රකාශ ලබා ගැනීම සඳහා අපරාධ පරීක්ෂණ දෙපාර්තමේන්තුවට කැඳවනු ඇතැයි සිතිය හැකිය. ඒ ඔවුන් ජනාධිපති අරමුදලේ මුදල් දේශපාලනඥයින්ගේ වෛද්‍ය ප්‍රතිකාර සඳහා ලබාදීම සම්බන්ධයෙන්ය.
ජනාධිපති අරමුදලෙන් මුදල් ලබාගත් දේශපාලනඥයින් පිළිබඳ තොරතුරු ආණ්ඩුව පාර්ලිමේන්තුවට ඉදිරිපත් කිරීමෙන් පසු හිටපු ජනාධිපති රනිල් වික්‍රමසිංහ ඒ සම්බන්ධයෙන් නිවේදනයක් නිකුත් කරමින් සඳහන් කර තිබුණේ මහජන නියොා්ජිතයින් විසින් වෛද්‍යාධාර ලබා ගැනීම සඳහා කරන ලද සියලු පෞද්ගලික ඉල්ලීම් ජනාධිපති අරමුදලේ සම්මත පරිපාලන ක්‍රියා පටිපාටි යටතේ සිදුකළ බවයි.
එමෙන්ම එක් අවස්ථාවකදී හැර කිසිදු මහජන නියෝජිතයෙකුට රුපියල් මිලියනයකට වඩා වැඩි මුදලක් ලබාදී නැති බවද ඔහු එම නිවේදනයේ සඳහන් කර තිබුණි.
එම නිවේදනයේ ඔහුගේ පාලන කාලයේදී ජනාධිපති අරමුදලෙන් ආධාර ලබාදුන් දේශපාලනඥයින් පිළිබඳව සඳහන් කර තිබුණි.
බස්නාහිර පළාත් හිටපු ප්‍රධාන ඇමති ඉසුර දේවප්‍රියට නවලෝක රෝහලේ සිදුකළ හෘදය සැත්කමක් සඳහා රුපියල් මිලියනයක්, හිටපු මන්ත්‍රී සරත් කෝන්ගහගේට ලංකා රෝහලේ සිදුකළ හෘදය සැත්කම සඳහා රුපියල් ලක්ෂ 5ක්, හිටපු මන්ත්‍රී එස්සී මුතුකුමාරණට විෂන් කෙයාර් වෙතින් ශ්‍රවණාධාර ලබා ගැනීමට රුපියල් ලක්ෂ 4ක්, හිටපු මන්ත්‍රී ජගත් කුමාර සුමිත්‍රාආරච්චිට ආසිරි රෝහලේ සිදුකළ හෘදය සැත්කමට රුපියල් මිලියනයක්, හිටපු මන්ත්‍රී මාලනී පොන්සේකාට ඉන්දියාවේ ඇපලෝ රෝහලෙන් ප්‍රතිකාර ලබා ගැනීම සඳහා ඉන්දියාවේ ශ්‍රී ලංකා කොන්සල් කාර්යාලය හරහා රුපියල් මිලියන 5ක මුදලක් ලබාදුන් බව එහි සඳහන් කර ඇත.
එම නිවේදනයේ හිටපු ජනාධිපති රනිල් වික්‍රමසිංහ සඳහන් කරන ජනාධිපති අරමුදලේ සම්මත ක්‍රියා පටිපාටි යටතේ එම වෛද්‍යාධාර ලබා දුන්නා යන්න අමූලික බොරුවකි. එය මෙතෙක් ජනාධිපති අරමුදලෙන් වෛද්‍ය ආධාර වශයෙන් මුදල් ලබාගෙන ඇති හා මුදල් ලබා ගැනීම සඳහා ඉල්ලුම් කර ඇති මේ රටේ සාමාන්‍ය ජනතාව දන්නා කරුණකි. ඒ ප්‍රධාන කරුණු දෙකක් නිසාය. එකක් ජනාධිපති අරමුදලෙන් වෛද්‍යාධාර ලබා ගැනීමට පනවා ඇති සුදුසුකම්ය. අනෙක ජනාධිපති අරමුදලෙන් සාමාන්‍ය ජනතාවට ලබාදෙන වෛද්‍යාධාර සඳහා මූල්‍යමය සීමාවක් පනවා තිබීමය.
ජනාධිපති අරමුදලෙන් වෛද්‍යාධාර ලබා ගැනීම සඳහා සුදුසුකම් ලැබීමට කොන්දේසි කිහිපයයක් පනවා ඇති අතර ඒ සැත්කම/ ප්‍රතිකාරය සිදුකර රෝහලෙන් පිටවූ දින සිට දින 60ක් ඇතුළත අයදුම්පත ඉදිරිපත් කිරීම (සති අන්ත හා රජයේ නිවාඩු දිනයන්ද ඇතුළුව), රෝගියා කලත්‍රයා හා අවිවාහක දරුවන් ඇතුළු පවුලේ මාසික ආදායම් සීමාව රු 200,000 නොඉක්මවීම (2024.01.01 දින සිට ඉදිරියට ජනාධිපති අරමුදල වෙත භාර ගන්නා අයැදුම්පත් සඳහා පමණක් මෙම සීමාව වෙනස්වීම බලපැවැත්වේ), රෝගියා කලත්‍රයා හා අවිවාහක දරුවන් ඇතුළු පවුලේ සාමාජිකයෙක් ආදායම් බදු නොගෙවීම, සැත්කම/ ප්‍රතිකාරය සඳහා වැයවන මුළු වියදමෙන් 50% ක මුදලක් වෙනත් කවර හෝ ආයතනයකින් ලබා ගැනීමට සුදුසුකම් ලබා නොතිබීම (රක්ෂණාවරණයකින්/වෛද්‍යාධාර ක්‍රමයකින්/සුභසාධන ක්‍රමයකින්), ප්‍රාදේශීය ලේකම්වරයාගේ නිර්දේශය ලැබීම, සැත්කම/ ප්‍රතිකාරය සඳහා යන වියදම දරා ගැනීමට ප්‍රමාණවත් මූල්‍ය සම්පත් රෝගියාගේ පවුල සතු නොවීම, අදාළ සැත්කම/ ප්‍රතිකාරය ජනාධිපති අරමුදලේ අනුමත රෝහලකින් සිදුකරවා ගෙන තිබීම, ජනාධිපති අරමුදලේ අනුමත මූල්‍යාධාර ලබාදෙන රෝගයක් වීම හා ජනාධිපති අරමුදලේ අනුමත උපරිම මූල්‍යාධාරය ලබා නොතිබීම යන ඒවාය.
ඒ අනුව හිටපු ජනාධිපති රනිල් වික්‍රමසිංහ මෙන්ම අනෙක් හිටපු ජනාධිපතිවරුන්ද ජනාධිපති අරමුදලෙන් වෛද්‍යාධාර ලබාදී ඇති හිටපු හා වත්මන් පාර්ලිමේන්තු මන්ත්‍රීවරුන් ඇතුළු දේශපාලනඥයින්ගේ පවුල්වල මාසික ආදායම රුපියල් ලක්ෂ 2ට අඩු යැයි කිව නොහැකිය. (මෙම සීමාව වර්තමානයේ වන අතර මීට පෙර එය තිබී ඇත්තේ ඊට වඩා අඩු අගයකය) වර්තමානයේ පාර්ලිමේන්තු මන්ත්‍රීවරයෙකුට වැටුප් හා දීමනා වශයෙන් රුපියල් ලක්ෂ 3ක් හෝ ඊට වඩා මුදලක් ලැබේ. ඒ ඔවුන්ගේ වෙනත් ආදායම් හා පවුලේ සාමාජිකයන්ගේ වෙනත් ආදායම් නොමැතිවය. එම නිසා එම සුදුසුකමෙන් මන්ත්‍රීවරු ඇතුළු දේශපාලනඥයින් අසමත් බව පැහැදිලිය.
ඊට අමතරව රක්ෂණාවරණ කොන්දේසිය යටතේද මන්ත්‍රීවරුන් සියල්ලන්ම පාහේ අසමත් බව පැහැදිලිය. මන්ද වෙනත් පෞද්ගලික රක්ෂණාවරණයක් නැතත් පාර්ලිමේන්තු මන්ත්‍රීවරුන් සම්බන්ධයෙන් රක්ෂණාවරණයක් ක්‍රියාත්මක වන නිසාය.
සැත්කම් හා ප්‍රතිකාර කිරීමට ප්‍රමාණවත් මූල්‍ය සම්පත් රෝගියාගේ පවුල සතු නොවීම යන කොන්දේසිය සම්බන්ධයෙන්ද මේ දේශපාලනඥයින් අසමත් බව තවදුරටත් පැහැදිළිය. හිටපු මන්ත්‍රීවරුන් හා වත්මන් මන්ත්‍රීවරුන් ලබාදී ඇති ඔවුන්ගේ වත්කම් හා බැරකම් ප්‍රකාශ මගින් පමණක් වුවද එය හඳුනාගත හැකිය. ඔවුන් වාසය කරන නිවාස, පරිහරණය කරන වාහන, වතුපිටි ඉඩකඩම්, විදේශගත දරුවන්ගේ අධ්‍යාපනය සඳහා සිදුකරන වියදම් ආදිය දෙස බැලූ විට එම සුදුසුකමෙන්ද මෙම දේශපාලනඥයන් අසමත් බව හොඳින්ම තහවුරු වේ.
ප්‍රාදේශීය ලේකම්වරයාගේ නිර්දේශය යන කරුණේදීද මෙම දේශපාලනඥයින්ට සමත් වීමට හැකියාවක් ලැබෙන්නේ නැත. මන්ද එහිදී සිදුවන්නේ ග්‍රාම නිලධාරිවරයා විසින් ජනාධිපති අරමුදලෙන් වෛද්‍යාධාර ලබා ගැනීම සඳහා එම පුද්ගලයා හෝ පවුල සතුව ප්‍රමාණවත් ආදායම් හෝ මූල්‍ය සම්පත් නැති බවට සහතික කිරීමක් වන නිසාය. හිටපු ජනාධිපති රනිල් වික්‍රමසිංහ සිය නිවේදනයේ සඳහන් කරන ආකාරයට එම මන්ත්‍රීවරුන් නිසි කාර්ය පටිපාටිය අනුගමනය කර තිබුණේ නම් ඔවුන්ට එම නිර්දේශ සහතික කිරීම් ලබාදී තිබූ ග්‍රාම නිලධාරීන්ටද රාජ්‍ය මුදල් අවභාවිතයට ආධාර අනුබල දීම යටතේ දඬුවම් කළ යුතුය.
අනෙක් කාරණය වන්නේ එක් එක් සැත්කම හෝ වෛද්‍ය ප්‍රතිකාරය සඳහා වන උපරිම මුදලට වැඩියෙන් මන්ත්‍රීවරුන් ඇතුළු මෙම දේශපාලනඥයින්ට ලබාදී තිබීමය.
ජනාධිපති අරමුදලේ පාලක මණ්ඩලය විසින් 2024 ජනවාරි 01 දින සිට අනුමත කර ඇති වෛද්‍යාධාර අනුව හදවත් සැත්කමක් සඳහා ශ්‍රී ජයවර්ධනපුර රෝහල, පෞද්ගලික රෝහල් හා විදේශ රෝහලක් සඳහා උපරිමයෙන්ම ලබාගත හැකි මුදල රුපියල් 250,000ක් පමණය. හදවත් රුධිර නාලවලට ස්ටෙන්ට් දැමීම සඳහා උපරිමයෙන් ලබාගත හැකි මුදල රුපියල් ලක්ෂ 3කි. ඒ ස්ටෙන්ට් 3ක් දැමීමේ අවස්ථාවකටය.
වකුගඩු බද්ධ කිරීමේ සැත්කමක් සඳහා කොළඹ ජාතික රෝහලේ හෝ රිජ්වේ ආර්යා ළමා රෝහලේ නම් රු. 250,000ක්, ශ්‍රී ජයවර්ධනපුර රෝහලේ නම් රුපියල් ලක්ෂ 4ක්, පෞද්ගලික රෝහලක හෝ විදේශ රෝහලක නම් රුපියල් ලක්ෂ 5ක් උපරිමයෙන් ලබාගත හැකිය. එමෙන්ම රුධිරය කාන්දුකරණය (ඩයලයිසිස්) සඳහා ශ්‍රී ජයවර්ධනපුර, පෞද්ගලික හා විදේශ රෝහලක් සඳහා උපරිම ගෙවනු ලබන්නේ රුපියල් ලක්ෂ 5ක් පමණය.
පිළිකා රෝග ප්‍රතිකාර සඳහා රජයේ, පෞද්ගලික හෝ විදේශ රෝහලක ප්‍රතිකාර සඳහා උපරිම ලබාගත හැකි මුදල රුපියල් ලක්ෂ 5ක් වන අතර ඒ රුපියල් ලක්ෂ 9කට වඩා වැඩි ඇස්තමේන්තුවලටය. රුපියල් ලක්ෂ 9ක් දක්වා වන ඇස්තමේන්තුවලට ගෙවනු ලබන මුදල ඇස්තමේන්තුගත මුදලින් සියයට 50ක් පමණය.
මොළය සම්බන්ධ සැත්කම්වලදී උපරිම ගෙවනු ලබන්නේ රුපියල් ලක්ෂ 6ක් වන අතර ඒ රුපියල් ලක්ෂ 15කට වඩා වැඩි ඇස්තමේන්තුවලටය. රුපියල් ලක්ෂ 5ත් 15ත් අතර ඇස්තමේන්තුවලට තුනෙන් එකක මුදලක් ගෙවනු ලබන අතර රුපියල් ලක්ෂ 5 දක්වා ඇස්තමේන්තුවලටද ගෙවනු ලබන්නේ තුනෙන් එකක මුදලක් පමණය.
විකලාංග තැන්පත් කිරීම් යටතේ ලබාදෙන උපරිම මුදල රුපියල් ලක්ෂ 3ක් වන අතර සුසුම්නාව සම්බන්ධයෙන් වන ප්‍රතිකාර සඳහා ලබාදෙන උපරිම මුදලද රුපියල් ලක්ෂ 3කි. ඇට මිදුළු බද්ධ කිරීම යටතේ ලබාදෙන උපරිම මුදල රුපියල් ලක්ෂ 6ක් වන අතර අක්මා සැත්කම් සම්බන්ධයෙන් ලබාදෙන උපරිම මුදලද රුපියල් ලක්ෂ 6කි. එහෙත් අවුරුදු 16ට අඩු දරුවන් සඳහා උතුරු කොළඹ ශික්ෂණ රෝහල හෙවත් රාගම රෝහලේදී සැත්කම කරන්නේ නම් පෙර හා පසු පරීක්ෂණ සහ බෙහෙත් සඳහා රුපියල් ලක්ෂ 10ක මුදලක් ලබාගත හැකි බව සඳහන් කර ඇත.
ඊට අමතරව අක්ෂි ශල්‍යකර්ම ඇතුළු අනෙකුත් ප්‍රතිකාර සඳහා ලබාගත හැකි උපරිම මුදල රුපියල් ලක්ෂ 3 ඉක්මවන්නේ නැත.
එම මුදල් සීමා වර්තමානයට අදාළ ඒවා වන අතර මීට පෙර කාලවල එම අගයන් පැවතියේ මීටත් වඩා අඩු අගයන්වලය.
ඒ අනුව හිටපු ජනාධිපති රනිල් වික්‍රමසිංහ ඇතුළු අනෙක් හිටපු ජනාධිපතිවරුන් ජනාධිපති අරමුදලින් මන්ත්‍රීවරුන් ඇතුළු දේශපාලනඥයින්ට මුදල් ලබාදී ඇත්තේ එහි ඇති නීති රීතිවලට පිටින් ඔවුන්ගේ බලය පාවිච්චි කරමින් බව පැහැදිලිය. ජනාධිපති අරමුදල සම්බන්ධයෙන් රාජ්‍ය විගණනය විසින් මේ බව අවස්ථා ගණනාවකදී පෙන්වා දී තිබේ.
ජනාධිපති අරමුදල සම්බන්ධයෙන් වන 2022 විගණන වාර්තාවේ සඳහන් වන්නේ ‘පාර්ලිමේන්තු මන්ත්‍රීන් දෙදෙනෙකු විදේශ රෝහලකදී සිදුකළ වෛද්‍ය ප්‍රතිකාර සඳහා සමාලෝචිත වර්ෂයේදී තනි පුද්ගලයකු සඳහා ගෙවූ වැඩිම වටිනාකම වූ රු. මිලියන 6.083ක් හා 6.955ක් බැගින් එකතුව රු. මිලියන 13.038ක් අරමුදලෙන් ගෙවා තිබුණ බව නිරීක්ෂණය විය.’ යන්නයි.
එම අසාමාන්‍ය ගෙවීම් සම්බන්ධයෙන් ජනාධිපති අරමුදලේ කළමනාකාරිත්වය ලබාදුන් පිළිතුර වශයෙන් එහි සඳහන් වන්නේ ‘ජනාධිපති අරමුදල් පනත අනුව ජනාධිපතිතුමාගේ අභිමතය පරිදි මෙවැනි ගෙවීම් සිදුකළ හැකි බව දන්වා තිබුණි.‘ යන්නයි.
ජනාධිපති අරමුදල සම්බන්ධයෙන් 2019 වර්ෂයේ විගණන වාර්තාවේ සඳහන් වන්නේද ‘එක් එක් රෝග සඳහා ගෙවීම් කිරීමේදී එම රෝග සඳහා අරමුදලේ පාලක මණ්ඩලය විසින් අනුමත කර තිබූ සීමාවන් ඉක්මවා රෝගීන් 136 දෙනෙකුට එකතුව රු. 57,899,147ක් ගෙවා තිබුණි. මෙම රෝග සඳහා ගෙවීමේ සීමා ඉක්මවීම අනුමත සීමාව හා සසඳන විට සියයට 243ක් පමණ විය.’ යන්නයි. ඒ සම්බන්ධයෙන් ද ජනාධිපති අරමුදලේ කළමනාකාරිත්වයේ අදහස් දැක්වීම වී ඇත්තේ ‘අතිගරු ජනාධිපතිතුමාගේ විශේෂ අනුමැතිය යටතේ ගෙවීම් සිදුකර ඇත’ යන්නයි.
මේ මගින් පැහැදිලි වන දෙය වන්නේ හිටපු ජනාධිපතිවරුන් දැන දැනම එම අරමුදලේ මුදල් ඔවුන් සමඟ කටයුතු කළ මැති ඇමතිවරුන් හා දේශපාලනඥයින් වෙනුවෙන් එහි නීති රීති අබිබවා සිතු සේ ලබාදී ඇති බවයි.
අප මීට පෙර අනාවරණය කළ ජනාධිපති අරමුදලෙන් වෛද්‍ය ප්‍රතිකාර සඳහා මුදල් ලබාගත් හිටපු මැති ඇමතිවරුන් සම්බන්ධයෙන් ගත්කල හිටපු අගමැතිවරයකු වූ දිමු ජයරත්නට 2012 වර්ෂයේ අවස්ථා 3කදී හා 2014 වර්ෂයේ එක් අවස්ථාවකදී යන අවස්ථා 4කදී රු. මිලියන 30කට ආසන්න (රු.29,809,143.09) මුදලක් හෙවත් රුපියල් කෝටි 3කට ආසන්න මුදලක් එම අරමුදලෙන් ලබාදී තිබේ. ඉන්පසු වැඩිම මුදලක් වන රු.මිලියන 18කට (රු. 18,747,196.44) හෙවත් රුපියල් එක්කෝටි 80 ලක්ෂයකට වඩා වැඩි මුදලක් 2019, 2020 හා 2022 යන වර්ෂවල අවස්ථා තුනකදි විදේශ ප්‍රතිකාර සඳහා ලබාගෙන ඇත්තේ හිටපු මන්ත්‍රීවරයකු වූ රංජිත් ද සොයිසාය. රු. 10,908,798.40ක් හෙවත් රුපියල් කෝටියකට වැඩි මුදලක් කෙහෙළිය රඹුක්වැල්ල හිටපු ඇමතිවරයා ලබාගෙන ඇත්තේ 2012 වර්ෂයේ එක් අවස්ථාවක විදේශ වෛද්‍ය ප්‍රතිකාර සඳහාය.
මෙසේ ජනාධිපති අරමුදලෙන් වෛද්‍ය ප්‍රතිකාර සඳහා මුදල් ලබාගත් හිටපු මැති ඇමතිවරුන්ගෙන් ඇලික් අලුවිහාරේ, ජෝශප් මයිකල් පෙරේරා, එම්කේඒඩීඑස් ගුණවර්ධන, විමල් වික්‍රමසිංහ, ධර්මදාස බණ්ඩා, පී චන්ද්‍රසේකරන්, ටියුඩර් දයාරත්න, මහින්ද රත්නතිලක, ජයලත් ජයවර්ධන, දිමු ජයරත්න, රංජිත් ද සොයිසා, ටීබී ඒකනායක හා ලකී ජයවර්ධන මේ වනවිට ජීවතුන් අතර නැත. ඒ නිසා ඔවුන් සම්බන්ධයෙන් ලිපි ගොනු ඇතත් අපරාධ පරීක්ෂණ දෙපාර්තමේන්තුව ඉදිරි විමර්ශන සිදුකරනු ඇතැයි සිතිය නොහැකිය.
එම අරමුදලෙන් මුදල් ලබාගත් පී දයාරත්න, එස්බී නාවින්න, සුමේධා ජයසේන, පියසේන ගමගේ, පී හැරිසන්, කෙහෙළිය රඹුක්වැල්ල, විදුර වික්‍රමනායක, වාසුදේව නානායක්කාර, ජෝන් අමරතුංග, රාජිත සේනාරත්න, මාලිනී පොන්සේකා, රංජිත් අලුවිහාරේ, සුසිල් ප්‍රේමජයන්ත, සරත් අමුණුගම, දයාසිරි ජයසේකර, එච්එම්පීඑන් ද සිල්වා (මෙම හිටපු මන්ත්‍රීවරයා මොහාන් ප්‍රියදර්ශන ද සිල්වා විය යුතුය) විමලවීර දිසානායක, කේපීඑස් කුමාරසිරි, ජයන්ත වීරසිංහ, ගුණතිලක රාජපක්ෂ, සරත් කෝන්ගහගේ, එස්සී මුතුකුමාරණ හා ජගත්, කුමාර සුමිත්‍රාරච්චි යන හිටපු හා වත්මන් පාර්ලිමේන්තු මන්ත්‍රීවරුන් සහ ඉසුර දේවප්‍රිය පෙරේරා යන බස්නාහිර පළාත් හිටපු මහ ඇමතිවරයා දැනට ජීවතුන් අතර සිටිති.
අපරාධ පරීක්ෂණ දෙපාර්තමේන්තුව හිටපු ජනාධිපතිවරුන් කැඳවා ප්‍රකාශ ලබබා ගනිමින් තවදුරටත් විමර්ශන සිදුකරන්නේ මෙම පිරිස සම්බන්ධයෙන් විය යුතුය. ඒ අනුව හිටපු ජනාධිපතිවරුන්ට අමතරව ජනාධිපති අරමුදලෙන් තමන්ට හිමිකමක් නැති මූල්‍ය ආධාර ලබා ගැනීම සම්බන්ධයෙන් එම හිටපු මැති ඇමතිවරුන්ටද ප්‍රකාශ ලබාදීම සඳහා පෝලිමේ යන්නට සිදුවනු ඇත.
