අමාත්‍යාංශ ලේකම් කොන්ත‍්‍රාත් පිරිනැමීම් හා ගෙවීම් නවතයි
ප‍්‍රවාහන හා මහාමාර්ග අමාත්‍යාංශයේ ලේකම් එම්එම්පීකේ මායාදුන්නේ එම අමාත්‍යාංශය යටතේ ක්රියාත්මක සියලූම ව්‍යාපෘති අධ්‍යක්ෂවරුන්ට 2023 මැයි 08 දින ලිපියක් යවමින් දැනුම් දෙන්නේ ඉංජිනියරින් ඩිසයින් ඇන්ඩ් ප්‍රොජෙක්ට් මැනේජ්මන්ට් කන්සල්ටන්ට් (පෞද්ගලික) සමාගමට සිදුකරන සියලූම ගනුදෙනු සහ ප‍්‍රසම්පාදන නවතා දමන ලෙසය. එහි පිටපත් ප‍්‍රවාහන හා මහාමාර්ග අමාත්‍යාංශයේ සියලූම ප‍්‍රසම්පාදන විශේෂඥයින්ට, මාර්ග සංවර්ධන අධිකාරියේ සභාපතිවරයාට හා මාර්ග සංවර්ධන අධිකාරියේ අධ්‍යක්ෂ ජනරාල්වරයාට යොමුකර ඇත.
මේ ආකාරයට ප‍්‍රවාහන හා මහාමාර්ග අමාත්‍යාංශයේ ලේකම්වරයා ඉහත සඳහන් කරන ලද සමාගමට සිදුකරන ගෙවීම් හා ප‍්‍රසම්පාදන අත්හිටුවන ලෙස දැනුම් දෙන්නේ එම සමාගම ලබාගත් කොන්ත‍්‍රාත් නිසියාකාරව ඉටු නොකිරීම පිළිබඳ ප්රශ්නයක් නිසා නොව එම සමාගමට එම අමාත්‍යාංශය යටතේ ඇති මාර්ග සංවර්ධන අධිකාරියේ අධ්‍යක්ෂ ජනරාල් ලෙව්වන්දු විතානගේ සර්ධා වීරකෝන්ට සම්බන්ධයක් ඇති බවට ලැබී ඇති පැමිණිලි නිසාය. එම පැමිණිලි මගින් කියා ඇත්තේ මාර්ග සංවර්ධන අධිකාරිය යටතේ ක්රියාත්මක වන මාර්ග සංවර්ධන ව්‍යාපෘතිවලදී එම අධිකාරියේ අධ්‍යක්ෂ ජනරාල්වරයා ඔහුට සම්බන්ධයක් ඇති එම සමාගමට කොන්ත‍්‍රාත් පිරිනැමීමට කටයුතු කරමින් සිටින බවය.
මෙම චෝදනාව මාර්ග සංවර්ධන අධිකාරියේ ව්‍යාපෘති වෙනුවෙන් මූල්‍ය ප‍්‍රතිපාදන ලබාදී ඇති ලෝක බැංකුවේ ශ්රී ලංකා අධ්‍යක්ෂවරයාටද යොමුකර ඇත. ඒ ලෝක බැංකුව විසින් මූල්‍ය ප‍්‍රතිපාදන සලසනු ලබන ව්‍යාපෘතියක ප‍්‍රශ්නගත ප‍්‍රසම්පාදන ඇගැයීමක් සම්බන්ධයෙන් කරුණු ඉදිරිපත් කරමින්ය. එම පැමිණිල්ලෙන් කියා ඇත්තේ නුසුදුසු හා නීති විරෝධී මිල ගැළපීම් කර ඇති බවයි. එහි සඳහන් කරන්නේ මාර්ග සංවර්ධන අධිකාරියේ අධ්‍යක්ෂ ජනරාල් සර්ධා වීරකෝන් ඔහුට සම්බන්ධයක් ඇති සමාගමට එම ප‍්‍රසම්පාදනය ලබාදීමට බරපතල ලෙස ප‍්‍රසම්පාදන ක‍්‍රියාවලියට මැදිහත් වී ඇති බවයි.
ලෝක බැංකුව මූල්‍ය ආධාර සපයන ප‍්‍රවාහන සම්බන්ධතා සහ වත්කම් කළමනාකරණ ව්‍යාපෘතියේ ප‍්‍රසම්පාදනය සඳහා සමාගම් 7ක් මිල ගණන් ඉදිරිපත් කර ඇති අතර අඩුම මිල ඉදිරිපත් කර තිබී ඇත්තේ ග‍්‍රීන්ටෙක් කොන්සල්ටන්ට්ස් සමාගමය ඒ රු. 188,940,000ක මිලක්ය. ප‍්‍රශ්නගත ඉංජිනියරින් ඩිසයින් ඇන්ඩ් පොජෙක්ට් මැනේජ්මන්ට් කන්සල්ටන්ට් (පෞද්ගලික) සමාගම ඒ සඳහා ඉදිරිපත් කර ඇති මිල වන්නේ රු. 190,773,648කි. එහෙත් මෙම මිල ගණන් ඇගැයීමේදී ප‍්‍රසම්පාදන කමිටුව ග‍්‍රීන් සන්සල්ටන්ට්ස් සමාගමේ මිල රු. 217,834,000ක් වශයෙන් අගයා ඇත. ඒ වැට් රහිත භෞතික අවවිනිශ්චිතතාවය හා තාවකාලික එකතුව ලෙස ගණනය කරමින් සියයට 10ක් එම මිලට එකතු කිරීම මගින්ය. ඒ මගින් අවසානයේ සිදුවී ඇත්තේ ඉංජිනියරින් ඩිසයින් ඇන්ඩ් පොජෙක්ට් මැනේජ්මන්ට් කන්සල්ටන්ට් (පෞද්ගලික) සමාගම සමග ඒකාබද්ධව මිල ගණන් ඉදිරිපත් කළ ස්කිල්ස් ඉන්ටර්නැෂනල් ඇන්ඩ් ඉංජිනියරින් ඩිසයින් ඇන්ඩ් ප්‍රොජෙක්ට් මැනේජ්මන්ට් කන්සල්ටන්ට් (පෞද්ගලික) සමාගම යන ඒකාබද්ධ සමාගමට කොන්ත‍්‍රාත්තුව ලබාදීමය.
ඉහතින් සඳහන් කළ ලිපියේ තවදුරටත් සඳහන් කරන්නේ මාර්ග සංවර්ධන අධිකාරියේ අධ්‍යක්ෂ ජනරාල්වරයාට ඉංජිනියරින් ඩිසයින් ඇන්ඩ් ප්‍රොජෙක්ට් මැනේජ්මන්ට් කන්සල්ටන්ට් (පෞද්ගලික) සමාගමේ බහුතර කොටස් අයිතිය තිබෙන බවට ඔවුන් සතුව සාධක ඇති බවයි.
විමසා බැලිය යුතු කරුණ වන්නේ එම චෝදනාව ඇත්තක්ද යන්නය. එය ඇත්තක් නම් බරපතළ තත්වයකි. මන්ද යම් ආයතනයක් සම්බන්ධ කොන්ත‍්‍රාත්තු එහි ප‍්‍රධානියකුට සම්බන්ධ සමාගමකට ප‍්‍රසම්පාදන ක්රියාවලියක් තුළින් හෝ පිරිනැමීම සැකයට තුඩු දෙන්නක් වන නිසාය.
ප‍්‍රශ්නගත ඉංජිනියරින් ඩිසයින් ඇන්ඩ් ප්‍රොජෙක්ට් මැනේජ්මන්ට් කන්සල්ටන්ට් (පෞද්ගලික) සමාගම සමාගම් නීතිය යටතේ ලියාපදිංචි කරන්නේ 2013 වර්ෂයේ අප්‍රේල් 01 වැනිදාය. එහි පළමු අධ්‍යක්ෂවරුන් වන්නේ ඩබ්ලිව් විජය බණ්ඩාර, ඩීඑම්එච් මනෝජ් අසේල බණ්ඩාර හා බීකේ හිල්ඩා කමලාවතීය. මේ තිදෙනාටම මුල් අවස්ථාවේ ඇත්තේ එක් කොටස බැගින්ය. මින් ඩබ්ලිව් විජය බණ්ඩාර යනු මාර්ග සංවර්ධන අධිකාරියේ අධ්‍යක්ෂ ජනරාල් සර්ධා වීරකෝන් යටතේ එම අධිකාරියේ නුවර කාර්යාලයේ මීට පෙර සේවය කරන ලද කනිෂ්ඨ නිලධාරියෙකි. සර්ධා වීරකෝන්ට ඇති සම්බන්ධය එම කනිෂ්ඨ නිලධාරියා යන්න නොවේ. ඊටත් වඩා සමීප සම්බන්ධතාවකි. ඒ එහි පළමු අධ්‍යක්ෂවරුන් තිදෙනාගෙන් එක් අයකු වන බීකේ හිල්ඩා කමලාවතී සර්ධා වීරකෝන්ගේ නැන්දනිය වීමයි. නැතහොත් බිරිඳගේ මව වීමයි. සර්ධා වීරකෝන්ගේ බිරිඳ වන්නේ ගනේගමගේ මනෝරිය. ඊට අදාල සාක්ෂි අපට සපයන්නේ ඔවුන් දෙදෙනාගේ විවාහ සහතිකය හා බිරිඳගේ උප්පැන්න සහතිකයයි.
මේ ආරම්භක අධ්‍යක්ෂවරුන් අතරින් සර්ධා වීරකෝන්ගේ නැන්දනිය වන හිල්ඩා කමලාවතී 2014.03.26 දින ඉවත් වන අතර ඒ වෙනුවට නව අධ්‍යක්ෂවරයකු ලෙස නම් කරනු ලබන්නේ ඩීජී හරිස් තුෂාර තිලකරත්නය. මේ තුෂාර තිලකරත්න යනු ඉහතින් සඳහන් කරන ලද සර්ධා වීරකෝන්ගේ නැන්දනිය වන හිල්ඩා කමලාවතීගේ නැගනියගේ පුතාය. ඒ බව අපට සනාථ කරන්නේ එම තුෂාර තිලකරත්නගේ උප්පැන්න සහතිකයයි.
ඉහත අධ්‍යක්ෂවරු මාරුවීමත් සමග මෙතෙක් එක් කොටස බැගින් තිබූ සමාගමේ අධ්‍යක්ෂවරු තිදෙනාගේ කොටස් අයිතිය වෙනස්වීම සිදුවේ. ඒ අනුව ඩබ්ලිව් විජය බණ්ඩාරට කොටස් 6000ක්ද, ඩීඑච්එම් මනෝජ් අසේල බණ්ඩාරට කොටස් 4000ක්ද, අලූතින්ම අධ්‍යක්ෂවරයකු බවට පත්වන සර්ධා වීරකෝන්ගේ ඥාතියාට හෙවත් මස්සිනාට කොටස් 10,000ක්ද ලෙස එම සමාගමේ කොටස් අයිතිය බෙදී යයි. ඉන්පසු 2019 ජුලි මාසයේ සිට 2020 දක්වා තුෂාර තිලකරත්න අධ්‍යක්ෂධුරයෙන් ඉවත්ව සිටියද එම සමාගමේ ඔහුගේ කොටස් අයිතියේ කිසිදු වෙනසක් සිදුවන්නේ නැත.
සමාගමේ මුල් ලියාපදිංචි ලිපිනය වන්නේ අංක 5/2 පිටකන්ද පාර, මහනුවරය. සමාගමේ ලියාපදිංචි අංකය වන්නේ පීවී 91809ය.
මෙම ප‍්‍රශ්නගත සමාගමට මාර්ග සංවර්ධන අධිකාරිය සමග ඇති සම්බන්ධය එම සමාගමේ වෙබ් අඩවිය අනුව මෙසේ පෙළගැස්විය හැකිය.
මාර්ග සංවර්ධන අධිකාරිය සේවා යෝජකයා වූ එම සමාගම අවසන් කර ඇති ව්‍යාපෘති වන්නේ, පුත්තලම් දිස්ත්රික්කයේ ග‍්‍රාමීය මාර්ග පුනරුත්ථාපනය කිරීමේ ව්‍යාපෘතිය 2016, කුරුණෑගල දිස්ත්රික්කයේ ග‍්‍රාමීය මාර්ග පුනරුත්ථාපනය කිරීමේ ව්‍යාපෘතිය, 2016, මහනුවර හා කෑගල්ල ප‍්‍රමුඛතා මාර්ග පුනරුත්ථාපනය කිරීමේ ව්‍යාපෘතිය 2016, මාතර දිස්ත්රික්කයේ ග‍්‍රාමීය මාර්ග පුනරුත්ථාපනය කිරීම හා වැඩි දියුණු කිරීමේ ව්‍යාපෘතිය 2015, රුවන්පුර අධිවේගී මාර්ග ව්‍යාපෘතිය ශක්‍යතා අධ්‍යයනය 2016, මාතර දිස්ත්රික්කයේ ග‍්‍රාමීය මාර්ග වැඩි දියුණු හා පුනරුත්ථාපනය කිරීමේ ව්‍යාපෘතිය 2015, දකුණු අධිවේගී මාර්ගයේ මාතර සිට බෙලි අත්ත දක්වා දික් කිරීමේ ව්‍යාපෘතිය 2015, ජාතික මාර්ග පද්ධතිය වැඩි දියුණු කිරීම සහ පුනරුත්ථාපනය කිරීමේ ව්‍යාපෘතිය 2014, දකුණු අධිවේගී මාර්ගය මාතර සිට බෙලිඅත්ත දක්වා දිගු කිරීම ව්‍යාපෘතිය 2014, වරකාපොල අඟුරුවැල්ල කරවනැල්ල පාර පුනරුත්ථාපනය කිරීම 2014, ජාතික මාර්ග පද්ධතිය වැඩි දියුණු කිරීම 2014, පොළොන්නරුව හිඟුරක්ගොඩ මාර්ගය වැඩි දියුණු කිරීමේ ව්‍යාපෘතිය 2014, රත්නපුර වේවැල්වත්ත පාර වැඩි දියුණු කිරීමේ ව්‍යාපෘතිය 2014, කුරුස හන්දියේ සිට පානදුර දක්වා පැරණි කොළඹ පාර වැඩි දියුණු කිරීමේ ව්‍යාපෘතිය 2014, හසලක හඳුන්ගමුව පාර වැඩි දියුණු කිරීමේ ව්‍යාපෘතිය 2013, නාවුල, ඇලහැර, ලග්ගල, පල්ලේගම, හෙට්ටිපොල පාර වැඩි දියුණු කිරීම 2013, කිරින්ද පලටුපාන යාල පාර වැඩි දියුණු කිරීම 2013, මාතලේ වත්තේගම පාර වැඩි දියුණු කිරීම 2013, ලූණුගම්වෙහෙර කතරගම අතර කැපූ අධිවේගී මාර්ගය 2013, මිරිජ්ජවිල සූරියවැව පාර වැඩි දියුණු කිරීම 2013, හම්බන්තොට වරායේ සිට ගුවන් තොටුපල දක්වා අධිවේගී මාර්ගය සහ රේල් පාර සම්බන්ධ ශක්‍යතා වාර්තාව 2013, මාර්ග වෙන්කිරීම් හා ජලාප‍්‍රවහන සිතියම්ගත කිරීම සම්බන්ධයෙන් වූ ව්‍යාපෘතිය 2021, පැල්මඩුල්ල ඇඹිලිපිටිය නෝනාගම පාර වැඩි දියුණු කිරීම 2017 යන ව්‍යාපෘතීන්ය.
මාර්ග සංවර්ධන අධිකාරිය සේවා යෝජකයා නොවූ ව්‍යාපෘතියකට එම සමාගම සම්බන්ධ වී ඇත්තේ ඇලහැර සිට හබරණ දක්වා ඉදි කිරීමට නියමිත ඇල මාර්ග ව්‍යාපෘතිය සඳහා පමණය.
මේ සියලූ තොරතුරු අපට කියන්නේ කුමක්ද? මේ රටේ දේශපාලනඥයින්ට අමතරව රාජ්‍ය නිලධාරීන්ද ඔවුන්ට සම්බන්ධ ක්ෂේත‍්‍රවලදී අතුරු පාරවල් සහ හොර පාරවල්වලින් ගමන් කරමින් සිටින බවය.
නම දැම්මොත් අධිකරණ ක්රියාමාර්ග ගන්නවා
සර්ධා වීරකෝන්
මාර්ග සංවර්ධන අධිකාරියේ අධ්‍යක්ෂ ජනරාල්
(මෙම චෝදනා සම්බන්ධයෙන් අප මාර්ග සංවර්ධන අධිකාරයේ අධ්‍යක්ෂ ජනරාල් සර්ධා වීරකෝන්ගෙන් විමසූ අතර ඒවාට අදාළව ඔහු ලබාදුන් පිළිතුරු මෙසේ දැක්විය හැකිය.)
අප මතුකළ චෝදනා සම්බන්ධයෙන් පරීක්ෂණ කරන්න යැයි ඔහුද කියා ඇත. ඔහුගේ නැන්දම්මා සහ එම නෑදැයින්ටත් වඩා ළඟ වෙනත් නෑදැයින් ඉදිකිරීම් ක්ෂේත‍්‍රයේ වෙනත් තැන්වල ඇති බව ඔහු කියයි. ප‍්‍රශ්නගත සමාගමට එම කොන්ත‍්‍රාත් ලබාදීමට ඔහු කිසි දායකත්වයක් ලබාදී නැති අතර චෝදනා කරන කොන්ත‍්‍රාත්වලට අදාළ ප‍්‍රසම්පාදනයන් සිදුකර ඇත්තේ සහ එම කොන්ත‍්‍රාත් පිරිනමා ඇත්තේ මාර්ග සංවර්ධන අධිකාරිය නොව එය අයත් අමාත්‍යාංශයයි.
ප‍්‍රශ්නගත සමාගමේ කටයුතු සම්බන්ධයෙන් ළැදියාවන් අතර බැඳීමක් (කන්ෆ්ලික්ට් ඔෆ් ඉන්ටරෙස්ට්) ඔහුට නැති අතර එයට හේතුව ලෙස ඔහු ප්රකාශ කරන්නේ එසේ වීමට නම් ඒ අය පවුලේ සාමාජිකයෙක් විය යුතුයි යන්න හා ළමයෙක් සම්බන්ධයෙන් ගත්තද විවාහ නොවූ ළමයෙක් විය යුතුයි යන්නයි.
ඔහු මාර්ග සංවර්ධන අධිකාරියේ අධ්‍යක්ෂ ජනරාල් වීමෙන් පසු එම සමාගමට කොන්ත‍්‍රාත් ලැබී ඇත්නම් එහි ප්රශ්නයක් නැත. එම සමාගමට ඒ සඳහා අයිතියක් ඇති බව ඔහු කියයි. නෑදෑයන් යන්න සලකා බැලූවහොත් මාර්ග සංවර්ධන අධිකාරයේ සේවය කරන තවත් අයගේත් ඕනෑ තරම් සමාගම් තිබෙන බවද ඔහු කියයි.
මාධ්‍ය පළකිරීම් කරනවා නම් කළ යුත්තේ නම් සහිතව බවද, ඔහුගේ නමත් සමග එසේ පළවෙනවා නම් අධිකරණ ක්රියාමාර්ග ගැනීමට ඔහු කටයුතු කරන බවද, මේ චෝදනාව කරන්නේ කවුද කියලා කියනවා නම් ඔවුන්ට එරෙහිවත් නීතිමය කටයුතු කිරීමට සූදානම් බවද ඔහු කියයි.
මේ සම්බන්ධයෙන් විෂයභාර ඇමතිවරයාටත් පැහැදිලි කිරීම් කර ඇති බවද, පරීක්ෂණ නිසියාකාරව සිදුකළ යුතු බව හා අවසානයේ චෝදනාව එල්ල කළ යුතු බවද ඔහු කියයි.
