යුද හමුදාපති ලුතිනන් ජෙනරාල් විකුම් ලියනගේ යුද හමුදා ඉතිහාසය අලුත් කළ බවට වූ පුවතක් පසුගිය සතියේ සෑම මාධ්‍යයකම පාහේ පළවිය. යුද හමුදා මාධ්‍ය අංශය විසින් මාධ්‍ය ආයතනවලට එම පුවත යොමු කිරීම හා යුද හමුදා නිල වෙබ් අඩවියේ එම පුවත ප්‍රමුඛත්වයකින් යුතුව පළවීම නිසා කාගේත් අවධානය ඒ සඳහා යොමුවිය.

යුද හමුදා නිල වෙබ් අඩවියේ ඇති ඒ සම්බන්ධයෙන් වූ පුවත අනුව යුද හමුදාපතිවරයා තණමල්විල කුඩා ඔය පිහිටි කොමාන්ඩෝ රෙජිමේන්තු පුහුණු පාසලේදී හමුදා පැරෂුට් භටයෙකු ලෙස සිය පුහුණුව ලබා ඇත. ඉන්පසු ඔහු 2024 ජනවාරි 22 දින අම්පාර උහන ගුවන් හමුදා කඳවුරෙන් එම්අයි 17 හෙලිකොප්ටර් යානයකින් ගුවන් ගතවී පැරෂුට් පැනීම සිදුකර ඇත. ඒ සඳහා මාලදිවයින් ජාතික ආරක්ෂක බලකායේ සාමාජිකයන් 18 දෙනෙකු මෙන්ම ශ්‍රී ලංකා යුද හමුදා සාමාජිකයන් 14 දෙනෙකුද යුද හමුදාපතිවරයා සමග සහභාගි වී ඇත.

යුද හමුදා නිල වෙබ් අඩවියේ ඇති එම ප්‍රවෘත්තියේ වැඩිදුරටත් සඳහන් කරන්නේ කුඩා ඔය පිහිටි කොමාන්ඩෝ රෙජිමේන්තු පුහුණු පාසල් පරිශ්‍රයේ ගුවන් මෙහෙයුම් සඳහා නිර්මාණය කර ඇති පුහුණු ප්‍රදේශයේදී පැරෂුට් පුහුණු පාඨමාලාව යුද හමුදාපතිවරයා විසින් සාර්ථකව හදාරනු ලැබූ බවයි. ක්ෂේත්‍රයේ පළපුරුදු අත්දැකීම්වලින් පරිපූර්ණ උපදේශක මඩුල්ලක් වන මේජර් වසන්ත දිසානායක, සැරයන් ටීජීඑච් සුදේශ් කුමාර හා ක්‍රෝපල් එස්එස්යූකේ සූරියගේ ගේ මෙහෙයවීමෙන් එම පුහුණු පාඨමාලාව සාර්ථකව සිදුකෙරුණු බවත්, ඔවුන්ගේ කුසලතා හා ශිල්පීය ක්‍රම තුළින් යුද හමුදාපතිවරයාට ප්‍රවීණ හමුදා පැරෂුට් භටයෙකු බවට පත්වීමට හැකි වූ බවයි.එමෙන්ම කාර්යක්ෂමතාව හා විශිෂ්ටත්වය තහවුරු කරමින් නියමිත කාල සීමාව තුළ පාඨමාලාව සාර්ථකව අවසන් කිරීම සඳහා අවශ්‍ය මග පෙන්නීම් කොමාන්ඩෝ රෙජිමේන්තු අධිපති මේජර් ජෙනරාල් ශානක රත්නායක, යුද හමුදාපතිවරයාගේ පුද්ගලික ආරක්ෂක නිලධාරි බි්‍රගේඩියර් අනුජීව බාලසූරිය, කොමාන්ඩෝ රෙජිමේන්තු පුහුණු පාසල් සේනාවිධායක කර්නල් චමින්ද කරුණාරත්න, එම පුහුණු පාසලේ පැරෂුට් පුහුණු අංශයේ ප්‍රධාන උපදේශක මේජර් නලින් කුලතුංග හා සහායක පිමි පනින්නා වන මේජර් සමීර විදානගමගේ විසින් ලබාදුන් බවයි.
එසේම තවදුරටත් ඒ පිළිබඳව සඳහන් කර ඇත්තේ ගුවන් හමුදාපති එයාර් මාර්ෂල් උදේනි රාජපක්ෂ හා අම්පාර ගුවන් හමුදා කඳවුරේ අණදෙන නිලධාරි ගෲප් කැප්ටන් ලලිත් සුගතදාසගේ සහයෝගය මත යුද හමුදාපතිවරයා එම පාඨමාලාව සාර්ථකව හැදෑරූ බවයි. අම්පාර පැරෂුට් පුහුණු පාසලේ අණදෙන නිලධාරි විංග් කමාන්ඩර් විජිත ගෝමිස් විසින් ලබාදුන් මගපෙන්නීම් හා පුහුණු ක්‍රමවේදයන් හමුවේ පුහුණු පාඨමාලාව සාර්ථක කර ගැනීමට යුද හමුදාපතිවරයාට හැකිවූ බවයි.

යුද හමුදාපතිවරයාගේ මෙම පැරෂුට් පැනීම යුද හමුදා නිල වෙබ් අඩවියේ විස්තර කර ඇත්තේ, ශ්‍රී ලංකා හමුදා ඉතිහාසයේ ලුතිනන් ජෙනරාල් නිලය දරමින්, යුද හමුදාපතිවරයෙකු ලෙස රාජකාරිය කරන අතරතුර පුහුණුව ලබා සක්‍රිය සේවයේ යෙදී සිටියදී එම සුදුසුකම සම්පූර්ණ කළ ජ්‍යෙෂ්ඨතම හමුදා නිලධාරියා මෙන්ම මෙරට හමුදා ඉතිහාසයේ පැරෂුට් පැනීමක් සිදුකළ පළමු යුද හමුදාපතිවරයා ලෙස හා සංග්‍රාමික පැරෂුට් ඉසව්වකට සහභාගි වී සාර්ථකව පැනීම් සිදුකළ වයසින් ජ්‍යෙෂ්ඨතම හමුදා නිලධාරියා ලෙස යුද හමුදාපති ලුතිනන් ජෙනරාල් විකුම් ලියනගේ ඉතිහාසයට එක්වන බවයි.

යුද හමුදා නිල වෙබ් අඩවියේ මෙන්ම මාධ්‍යවල යුද හමුදාපතිවරයාගේ එම පැරෂුට් පැනීම විවිධකාරයෙන් උත්කර්ෂයට නංවා තිබුණද කෙටියෙන්ම සඳහන් කළහොත් එය උත්කර්ෂයට නැංවීමට නොහැකි ගොන් වැඩකි. රාජ්‍ය මුදල් අවභාවිත කිරීමකි. යුද හමුදා සාමාජිකයෙකුට අවස්ථාව නැති කිරීමකි.

ගොන් වැඩය වන්නේ යුද හමුදාපතිවරයෙකු එම ධුරයට පත්වී මේ ආකාරයේ පැරෂුට් පැනීමක් කිරීමයි. ඔහුගේ ජීවිතයට ඒ මගින් අනතුරක් සිදුවුවහොත් එය රටට බලපාන්නකි. මන්ද හමුදාවේ ප්‍රධානියා ඔහු වන හෙයිනි. අනිවාර්යෙන්ම මේ සඳහා ඔහුට ආරක්ෂක අමාත්‍යාංශයේ මෙන්ම සේනාධිනායක ජනාධිපතිවරයාගේද අනුමැතිය ලැබී තිබිය යුතුය. එසේ ඔහු ආරක්ෂක අමාත්‍යාංශයෙන් හා සේනාධිනායක ජනාධිපතිවරයාගෙන් එම අනතුරුදායක ගොන් වැඩය සඳහා අනුමැතිය ලබා ගත්තාද නැද්ද යන්න වාර්තා වන්නේ නැත. පැරෂුට් පාඨමාලාවලට හමුදා සාමාජිකයන් බඳවා ගන්නේත්, ඔවුන් ඒ සඳහා යොමු වන්නේත් තරුණ වයසේදීය. විශේෂයෙන්ම අවුරුදු 50ට පෙරය. මේජර් නිලය හෝ ඊට පෙර අවස්ථාවලදීය.

යුද හමුදාපති ධුරය යනු සියලු පාඨමාලා අවසන් කර හමුදාවේ නායකත්වයට පත්වීමකි. හමුදාපති ධුරයට පැමිණීමෙන් පසු පාඨමාලා හදාරන්නේ නැත. අඩුම තරමේ මීට පෙර හමුදාවේ පැරෂුට් පුහුණුව ලබා ඒ සඳහා සුදුසුකම් ඇතිව සිටි අයෙකු යුද හමුදාපති ධුරයට පත්වීමෙන් පසු පැරෂුට් පිම්මක් පැනීමක් නම් ඒ ගැන යම් සලකා බැලීමක් කිරීමට වත් හැකියාව තිබුණි. එහෙත් මෙම තත්වය එසේ නොවේ. විශ්‍රාම යෑමට නියමිතව සිටියදී සේවා දිගු මත යුද හමුදාපති ධුරයේ කටයුතු කරන හමුදාපතිවරයෙකු රඟදැක්වූ නාඩගමකි.

සේවා දිගු මත සිටින හමුදාපතිවරයෙකුට තබා විශ්‍රාම යෑමට වසරක පමණ කාලයක් තිබෙන කිසිදු හමුදා සාමාජිකයෙකුට පුහුණු පාඨමාලා ලබාදෙන්නේ නැත. ඒ එම පුහුණුවෙන් පසු ඔහුව එම පුහුණුවේ කාර්යය සඳහා යෙදවීමේ හැකියාවක් නැති නිසාය. ඒ අනුව යම් පුහුණුවක් හමුදා සාමාජිකයෙකුට ලබා දීමේදී එම පුහුණුවෙන් පසු ඒ සම්බන්ධයෙන් හමුදාවේ ඉදිරි කටයුතු සඳහා එම හමුදා සාමාජිකයා යොදා ගැනීමේ හැකියාව තිබේද යන්න අනිවාර්යෙන් සලකා බැලීමක් සිදුකරයි.

ඒ අනුව හමුදාවේ එම සියලු නිර්ණායක කඩකරමින් යුද හමුදාපති විකුම් ලියනගේ ඔහුගේ බලය යොදා මෙම පැරෂුට් පුහුණුව ලබා ඇති බව පැහැදිලි කරුණකි. යුද සෙබලෙකු පුහුණු කිරීමටත් රජයට යම් මුදලක් වැයවන අතර නියමිත අවම සේවා කාලයට පෙර විවිධ හේතු දක්වමින් හමුදාවෙන් ඉවත්වීමේදී එම තැනැත්තා වෙනුවෙන් රජය වැයකළ මුදල ගෙවීමට නියම කරන්නේ ඒ නිසාය. පැරෂුට් පුහුණුවක් යනු සාමාන්‍ය සෙබළ පුහුණු අවස්ථාවකට වඩා විශාල මුදලක් වැයකළ යුතු ගුවන් යානා යොදා ගනිමින් කළ යුතු පුහුණුවකි. සේවා දිගුව නිසා විශ්‍රාම ගැනීම කල් දමාගෙන සිටින හමුදාපතිවරයෙකු පැරෂුට් පුහුණුවක් කිරීම රාජ්‍ය මුදල් අවභාවිත කිරීමකි. එනයින් මහජන මුදල් අවභාවිත කිරීමකි. යුද හමුදාව නඩත්තු කරන්නේ මහජනතාව ගෙවන බදු මුදලිනි.

පැරෂුට් පුහුණුව වැනි අවස්ථා ඉතාම සීමිත පිරිසකට පමණක් ලබාදෙන එකක් බැවින් අනෙක් අතට මෙය යුද හමුදා සාමාජිකයෙකුගේ අවස්ථාව නැති කිරීමකි. මෙම පැරෂුට් පැනීමෙන් යුද හමුදාපතිවරයාට ලබාගත හැක්කේ ලාංඡනයක් පමණය. එය පෞද්ගලික එකකි. එයින් ඉන්පසු හමුදාවට මෙන්ම රටටද දායකත්වයක් ලබාගත හැකි නොවේ. පුහුණුවක් ලබාදිය යුත්තේ පැරෂුට් මෙහෙයුමකට ඉදිරියේ යොදාගත හැකි හමුදා සාමාජිකයෙකුට පමණය. අපගේ යුද හමුදා ආරංචි මාර්ග සඳහන් කරන ආකාරයට එක් පැරෂුට් පැනීමකදී පමණක් එම ලාංඡනය ලබා නොදෙන අතර ඒ සඳහා අවස්ථා තුනකදී පැරෂුට් පැනීම් තුනක් සිදුකළ යුතුය. එහෙත් නඩුත් හාමුදුරුවන්ගේ බඩුත් හාමුදුරුවන්ගේ යැයි කියන්නා සේ යුද හමුදාපතිවරයා එම පැරෂුට් ලාංඡනය ලබාගත්තා ද විය හැක.

කෙසේ වෙතත්, යුද හමුදාපතිවරයාගේ මෙම පැරෂුට් පැනීම පිළිබඳ යුද හමුදා වෙබ් අඩවියේ ඇති විස්තරය හා වීඩියෝ දර්ශන අනුව පෙනෙන්නේද, යුද හමුදාපතිවරයාගේ ළද බොළඳ ආශාවක් සන්තර්පණය කර ගැනීම සඳහා ඔහු එය සිදුකර ඇති බවයි. ඔහු පැරෂුටයෙන් බසින අවස්ථාවේ ඒ අවට සිටින්නේ විශාල හමුදා සාමාජිකයන් පිරිසකි. ඒ ඔහුට යම් අනතුරක් සිදු වුවහොත් බේරා ගැනීම සහ සහාය දීම සඳහාය. එහෙත් වෙනත් පැරෂුට් භටයන් සම්බන්ධයෙන් එවැන්නක් සිදුවන්නේ නැත. ඔවුන් තමාම බිමට පතිත වී පැරෂුටය හකුලාගෙන යළි පැමිණිය යුතුය. ඔවුන් පැරෂුටයෙන් පනින විට සහායකයන් පනින්නේද නැත. එහෙත් යුද හමුදා වෙබ් අඩවි ප්‍රවෘත්තිය අනුව පෙනෙන්නේ පැරෂුටය විවෘත නොවුවහොත් සහාය වීම සඳහා සහායක පැරෂුට් පනින්නෙකුද ඔහු සමග යොදවා තිබී ඇති බවයි.

තමා සියල්ලෙන්ම කෙළ පැමිණියේ යැයි පෙන්නීමේ ආශාවන් ඇතිවීම සාමාන්‍ය තත්වයක් නොවේ. එය යම් විකෘති තත්වයකි. මේ ආකාරයේ බොළඳ ආශාවන් තිබූ ජනාධිපතිවරුද, ඔවුන්ගේ ආර්යාවෝද මේ රටේ මෑත අතීතයේ සිටියහ. නවකතාකරුවෙකු, ගීත රචකයෙකු, පාපන්දු ක්‍රීඩකයෙකු ලෙස ඔවුන්ට ඊට පෙර නොතිබූ හැකියාවන් ජනාධිපති වීමෙන් පසු විවිධ ආකාරයෙන් ලබා ගන්නට උත්සාහ දැරූහ. ආර්යාවෝද එසේම වූහ. ටෙනිස් සෙල්ලම් කරන්නට, නෙට්බෝල් සෙල්ලම් කරන්නට උත්සාහ කළෝය. ඒ මගින් අවසානයේ සිදුවූයේ ඡායාරූප ශිල්පීන්ගේ ජීවිත අබිරහස් ලෙස අවසන් වීම පමණය.

යුද හමුදාවේ කනිෂ්ඨ නිලයක සිටියදී නොතිබූ දක්ෂතාවක් හා ආශාවක් හමුදාපති වී විශ්‍රාම යන මොහොතේදී සන්තර්පණය කර ගැනීමට ගොස් යුද හමුදාපති විකුම් ලියනගේ සිදුකර ඇත්තේ පැහැදිලිවම යුද හමුදා පටිපාටි උල්ලංඝනය කිරීමකි. තවත් යුද හමුදා සාමාජිකයෙකුට ඇති අවස්ථාවක් මෙන්ම යුද හමුදාවට ඇති අවස්ථාවක්ද නැතිකර දැමීමකි. රාජ්‍ය මුදල් නිකරුණේ නාස්ති කර අවභාවිත කිරීමකි.

යුද හමුදාපතිවරයාගේ එම පැරෂුට් සංදර්ශනයේ ඇති නොගැළපෙන බව තවදුරටත් යුද හමුදා නිල වෙබ් අඩවියේ ඒ සම්බන්ධයෙන් ඇති මෙම සඳහන් කිරීමෙන් වටහාගත හැකිය. ‘ගුවන් සංග්‍රාමික හමුදාවන්හි අත්‍යවශ්‍ය භටයින් ලෙස සැලකෙන හමුදා පැරෂුට් භටයන් ගුවන් මෙහෙයුම් සඳහා විශේෂයෙන්ම පුහුණු වූවන් වේ. දෙවන ලෝක සංග්‍රාමයේ සිට පුළුල් ලෙස සේවයේ යෙදී සිටින මොවුන් උපායමාර්ගිකව පැරෂුට් පතිත කරවීම ඔස්සේ විශ්මිත ප්‍රහාර ක්‍රියාත්මක කිරීමේ සහ ගුවන් පෙදෙස් සහ පාලම් වැනි විශේෂ ස්ථානයන්හි උපායමාර්ගිකව මෙහෙයුම් දියත් කිරීමට සුවිශේෂී ප්‍රවීණතාවයක් ලබා ඇත. බහුකාර්ය හමුදා පැරෂුට් භටයින් හමුදාහි බලය පැහැදිලිවම පෙන්නුම් කරන අතර මෙහෙයුම් කාර්යක්ෂමතාවද ඉහළම මට්ටමින් පෙන්නුම් කරයි. මේ අනුව ඕනෑම ජාතියක සන්නද්ධ හමුදාවන් සඳහා පැරෂුට් භටයින් ඉහළම ප්‍රමිතීන්ට අනුව පුහුණු කිරීම අත්‍යවශ්‍ය වේ.’

නිලධාරීන් කිහිප දෙනෙකු ජ්‍යෙෂ්ඨත්වයෙන් ඉහළට ගැනීමේ අරමුණෙන් යුතුව නීතිපති කාර්යාලයේ ලිපියක් පදනම් කර ගනිමින් යුද හමුදා මාණ්ඩලික ප්‍රධානියාගේ ප්‍රධානත්වයෙන් පත්කරන ලද මණ්ඩලයක තීරණයකට අනුව යුද හමුදා ස්වේච්ඡා බලසේනාවේ නිලධාරීන්ට අසාධාරණයක් සිදුව ඇතැයි සේනාධිනායක ජනාධිපති රනිල් වික්‍රමසිංහට පැමිණිල්ලක් යොමු කර තිබේ.

එම අසාධාරණය කර ඇත්තේ 2022 වර්ෂයේ දෙසැම්බර් මස යුද හමුදා මාණ්ඩලික ප්‍රධානියාගේ ප්‍රධානත්වයෙන් පත්කළ මණ්ඩලයක් මගින් වන අතර එහිදී සිදුකර ඇත්තේ යුද හමුදාපතිවරයාගේ අනුමැතිය මත ලබාගත් වැටුප් රහිත සක්‍රිය සේවයෙන් මුදා හැරීමේ කාලසීමාවන් නිල උසස් කිරීමේදී/නිල ස්ථීර කිරීමේදී ජ්‍යෙෂ්ඨත්වයට බලපාන පරිදි ඉවත් කිරීමෙන්ය. එතෙක් එසේ සක්‍රිය සේවයෙන් මුදා හැරීමේ කාලසීමාවන් නිල උසස් කිරීම් හා නිල ස්ථීර කිරීමේදී අඩුකර ගණනය කර නැත. ඒ සඳහා පාදකකරගෙන ඇත්තේ 2018 වර්ෂයේදී නීතිපති දෙපාර්තමේන්තුවෙන් ලබාගත් උපදේශයක් වන අතර එම උපදේශය අනුව සෙසු නිලයන් සම්බන්ධයෙන් වැටුප් රහිතව සක්‍රිය සේවයෙන් මුදා හැරීමේ කාලයන් ජ්‍යෙෂ්ඨත්වය සඳහා හා තනතුරේ ස්ථීර කිරීම් සඳහා ගණනය කර නැත. එහෙත් නිලධාරීන් සඳහා එම අවස්ථාවේදී එය ක්‍රියාත්මක වී නැත.

එය ශ්‍රී ලංකා යුද හමුදා ස්වෙච්ඡා බලසේනාවේ අනාගතයට සිදුවන බලපෑම පිළිබඳව අවධානය යොමු නොකර ඉතාමත් අදූරදර්ශී ආකල්පයකින් යුතුව ගත් තීරණයක් බවද, ජනාධිපතිවරයාට යොමුකළ ලිපියේ සඳහන් කර තිබේ. ලෝකයේ අනෙකුත් රටවල ස්වෙච්ඡා බලසේනාවන් ආකාරයට ඉංග්‍රීසි හමුදාව එහි රෙගුලාසි හා වරප්‍රසාද සකස් කර ඇති බවත්, එය ශ්‍රී ලංකාවට පමණක් ආවේණික නොවන්නක් බවත්, එය අනෙකුත් සෑම රටකම සිදුවන ක්‍රියාවලිය බවත් ජනාධිපතිවරයාට යැවූ ලිපියේ වැඩිදුරටත් සඳහන් කර තිබේ.

එමෙන්ම ස්වේච්ඡා බලසේනාව ස්ථාපනය කර ඇත්තේ රට තුළ ඇතිවන හදිසි අවස්ථාවන්හිදී සේවයට කැඳවා ගැනීමට හැකිවන පරිදි බවද, ලෝකයේ ඕනෑම රටක ස්වෙච්ඡා බලසේනාවන් ක්‍රියාත්මක වන්නේ ඒ ආකාරයට බවද එහි සඳහන් කර තිබේ. හදිසි අවස්ථාවකට පමණක් කැඳවා ඉන්පසු සේවයෙන් මුදා හැරීම නිසා රාජ්‍ය හා සිවිල් රැකියාවන්හි නිරත වෘත්තකයින් හා ක්‍රීඩක ක්‍රීඩිකාවන් වැනි පිරිස් ස්වේච්ඡා බලසේනාව වෙත අතීතයේ ආකර්ෂණය වී ඇත. එම ආකර්ෂණය සඳහා වැටුප් රහිත සක්‍රිය සේවයෙන් මුදවා හැරීමේ වරප්‍රසාදය බලපා ඇති අතර මෙම සක්‍රිය සේවයෙන් මුදා හැරීමේ කාල සීමාව ඔවුන්ගේ උසස් කිරීම්, සේවයේ ස්ථීර කිරීම් හා ජ්‍යෙෂ්ඨත්වය සඳහා බලපා නැත.

ඒ සඳහා ගණනය කිරීම් සිදුකර ඇත්තේ වැටුප් රහිතව මුදා හැරීමේ කාල සීමාවන්ද අයත් වන සේය. ශ්‍රී ලංකාව තුළ පැවති යුද්ධයෙන් පසු එම තත්වය වෙනස් වී ස්වෙච්ඡා බලසේනාව කැඳවා ආපසු යැවීමක් නොකර මේ දක්වා දිගටම නිත්‍ය සේවයක් ලෙස පවත්වාගෙන යන අතර මේ වනවිට එහි සිදුවී ඇත්තේ කිසියම් හේතුවක් නිසා නිත්‍ය හමුදාවට බැඳීමට නොහැකි පිරිස්වලට ස්ථීර රැකියාවක් ලෙස එයට බැඳීමට අවකාශ සැලසී තිබීමය. රටේ වත්මන් තත්වය අනුව එය වෙනස් විය යුතු බවට විවාදයක් නැත.

ශ්‍රී ලංකා යුද හමුදාව නිත්‍ය බල සේනාවකින් හා ස්වෙච්ඡා බලසේනාවකින් සමන්විතව පවතින්නක් වන අතර ස්වෙච්ඡා බලසේනාව මීට වසර 142කට පමණ පෙර ඉංග්‍රීසි හමුදා පාලන සමයේදී ආරම්භ කර ඇති එකකි. ආරම්භක හමුදාව වශයෙන්ද එය හැඳින්වේ. ශ්‍රී ලංකා යුද හමුදා නිලධාරීන්ගේ වත්මන් ධුරාවලිය අනුව ස්වෙච්ඡා බලසේනා අධිපතිවරයා යුද හමුදාවේ තනතුරු ජ්‍යෙෂ්ඨත්වයෙන් 4 වැනි ස්ථානයේ සිටින අතර එය සරත් පොන්සේකා හමුදාපති වීමට ප්‍රථම තිබී ඇත්තේ තනතුරු ජෙඨෂ්ඨත්වයෙන් 3 වැනි ස්ථානයේය. එම තත්වය වෙනස් කර ඇත්තේ සරත් පොන්සේකා හමුදාපති වූ පසුය.

වත්මන් තත්වය අනුව මෙම ස්වෙච්ඡා බලසේනාවේ අධිපතිවරයා නිත්‍ය හමුදාවේ මේජර් ජෙනරාල්වරයෙකු වන අතර එම බලසේනාවේ නියෝජ්‍ය අධිපතිවරයා පමණක් ස්වේච්ඡා බලසේනාවෙන් තේරී පත්වේ. ඒද මේජර් ජෙනරාල් නිලය හිමි අයෙකුටය. ස්වේච්ඡා බලසේනා සාමාජිකයෙකුට යාහැකි ඉහළම තත්වය මේජර් ජෙනරාල් නිලය වන අතර වත්මන් තත්වය අනුව එම බලසේනාවෙන් ජ්‍යෙෂ්ඨත්වය අනුව තේරී පත්වන්නේ එක් මේජර් ජෙනරාල්වරයෙකු පමණය. අනෙකුත් නිලයන් වන්නේ ඊට පහළින් ඇති බි්‍රගේඩියර්, කර්නල්, ලුතිනන් කර්නල් ආදි නිලයන්ය.

සේනාධිනායක වන ජනාධිපතිවරයාට යොමුකර ඇති ලිපිය අනුව වැටුප් රහිත සක්‍රිය සේවයෙන් මුදා හැරීමේ කාල සීමාවන් ගණනය නොකර නිලධාරීන් කිහිප දෙනෙකු ජ්‍යෙෂ්ඨත්වයෙන් ඉහළට ගැනීම සඳහා කටයුතු කරනවා යැයි කියන දෙයෙහි තේරුම වන්නේ එම ස්වෙච්ඡා බලසේනාවේ සාමාජිකයෙකුට යා හැකි එහි ඉහළම තනතුර වන නියෝජ්‍ය අධිපති ධුරය සඳහා යම් නිලධාරීන්ව පෙළගස්සනවා වැනි අදහසකි. මෙහිදී මතකයට නිරන්තරයෙන්ම එන්නේ ශ්‍රී ලංකා යුද හමුදාවේ නිත්‍ය බලසේනාවේ ජ්‍යෙෂ්ඨත්වය යුද හමුදාපතිවරයාගේ බලය යොදා වෙනස් කරමින් පවතින බවට පසුගිය කාලයේ අප පුවත්පත කළ වාර්තා කිරීම්ය.

එහිදී අප අවධාරණය කරන ලද්දේ යුද හමුදාවේ ගජබා රෙජිමේන්තුවේ සාමාජිකයන් මීලග යුද හමුදාපති ධුරය සඳහා පෙළ ගස්වමින් එම කටයුතු සිදුකරමින් පවතින බවයි. සමහරවිට ස්වෙච්ඡා බලසේනාව තුළ සිදුවෙමින් පවතින්නේද එයම විය හැකිය. මන්ද නිත්‍ය බලසේනාවට වඩා ස්වෙච්ඡා බලසේනාව අඩු වුවද එහිද සාමාජිකයන් 50,000ක පමණ පිරිසක් සිටින අතර ඔවුන් නිත්‍ය හමුදාවේ සෑම රෙජිමේන්තුවකම සේවය කරනු ලබයි. ඒ අනුව නිත්‍ය බලසේනාවේ මෙන්ම යුද හමුදාවේ සෑම රෙජිමේන්තුවක් පුරා විසිරී සිටින ස්වේච්ඡා බලසේනාවේ ඉහළම තනතුරද එකම රෙජිමේන්තුවක පිරිසක් අතට පත්කිරීම ජ්‍යෙෂ්ඨත්වය වෙනස් කිරීමේ එක් අරමුණ විය හැකිය.

මෙම පැමිණිල්ල සම්බන්ධයෙන් ජනාධිපති කාර්යාලය ආරක්ෂක අමාත්‍යාංශයේ ලේකම්වරයාගෙන් වාර්තාවක් ඉල්ලා ඇති අතර ඒ සඳහා ආරක්ෂක අමාත්‍යාංශ ලේකම්වරයාගේ ප්‍රතිචාරය කුමක් වේද යන්න තවම කිව නොහැකිය. එහෙත් ආරක්ෂක අමාත්‍යාංශයේ ලේකම්වරයාද ගජබා රෙජිමේන්තු සාමාජිකයෙකු වන බැවින් හා යුද හමුදාපතිවරයාද ගජබා රෙජිමේන්තු සාමාජිකයෙකු වන බැවින් එම ජ්‍යෙෂ්ඨත්වය වෙනස් කිරීමේ අරමුණ ඉහත සඳහන් කළ යුද හමුදාවේ ගජබාකරණය නම් තත්වයේ වෙනසක් නම් නොවනු ඇත.

විශාල නිත්‍ය යුද හමුදාවක් රටකට අවශ්‍ය වන්නේ යුද්ධ පවතින අවස්ථාවලදී පමණය. මේ වන විට ශ්‍රී ලංකාවේ නිත්‍ය හා ස්වෙච්ඡා බලසේනා සාමාජිකයන් සිටින්නේ රටට දැරිය නොහැකි බරක් ලෙසය. ඒ නිසා සිදුවිය යුත්තේ රජයෙන් වැටුප් ලබන හමුදා සාමාජිකයන් ගණන අඩු කිරීමය. ඒ සඳහා කළ හැකි එක් ක්‍රමවේදයක් වන්නේ යුද්ධයකට පෙර තිබූ තත්වය මෙන් ස්වේච්ඡා බලසේනාවේ සාමාජිකයන් වැටුප් රහිත සක්‍රිය සේවයෙන් මුදා හැරීමය. අවශ්‍ය අවස්ථාවලදී පමණක් සක්‍රිය සේවයට කැඳවීමය.

එහිදී උසස්වීම් ලබාදීමේදී හා තනතුරේ ස්ථීර කිරීමේදී වැටුප් රහිතව සක්‍රිය සේවයෙන් ඉවත් කිරීමේ කාලය ගණනය කරනවාද නැද්ද යන්න වෙනමම සලකා බැලිය යුතු තත්වයකි. මන්ද දැන් පවතින ආකාරයට අනුව අවශ්‍ය අවස්ථාවලදී පමණක් ස්වේච්ඡා බලසේනාව කැඳවන්නේ නම් ඔවුන්ට වැටුප්, දීමනා, පහසුකම් හා විශ්‍රාම වැටුප් ආදිය ලබාදීමේ අවශ්‍යතාවක් පැන නොනගින නිසාය. අවශ්‍ය අවස්ථාවලදී පමණක් ස්වේච්ඡා බලසේනාව කැඳවන්නේ නම් විශ්‍රාම වැටුප් හිමිකම ලැබෙන සෙසු නිලයන් සඳහා වන අවුරුදු 22ක කාලයක් හා නිලධාරීන් සඳහා වන අවුරුදු 20ක සේවා කාලයක් ස්වේච්ඡා බලසේනා සාමාජිකයන්ට සම්පූර්ණ කිරීමට නොහැකි වේ. ඔවුන්ට ඉතිරි වන්නේ හමුදා සේවයේ නිල තනතුරු නාමයන් පමණය.

යුද්ධයක් නොමැති රටවල් සිදුකළ යුත්තේ නිත්‍ය බලසේනාව අඩු කිරීමය. අවශ්‍ය අවස්ථාවලදී කැඳවීම සඳහා ස්වේච්ඡා බලසේනාවක් පවත්වාගෙන යෑමය. ඒ මගින් රජයකට හමුදාවක් නඩත්තු කිරීම සඳහා දැරීමට සිදුවන පිරිවැය අඩුකර ගැනීමට හැකියාවක්ද පවතී. විශේෂයෙන්ම ශ්‍රී ලංකාව වැනි සංවර්ධනය වෙමින් පවතිනවා යැයි කියන රටකට හා වත්මන් තත්වය අනුව ආර්ථික වශයෙන් අගාධයට වැටී සිටින රටකට එය වඩා වැදගත් වේ. එහෙත් හමුදා බලය මත රට පාලනය කිරීමට සිතා සිටින පාලකයින් එවන් තීරණයක් ගනීද යන්න සැක සහිතය.