ගිය සතියේ ජනාධිපතිවරයා සතියකින් ප්‍රශ්නය විසඳන බව කීවේය. මෙය ලියන මොහොත (13) වන විටත් ඔහුගේ ඒ විජ්ජා බලය ක්‍රියාත්මක වී නැත. ඇත්තෙන්ම ගත වූ සතිය තුළ, ඔහුගේ තත්වය තවත් දුෂ්කර අඩියකට ඇද වැටී ඇත. මන්ත්‍රීවරුන් 117 දෙනෙකුගේ වැඩි ඡන්දයෙන් රනිල් වික්‍රමසිංහ කෙරෙහි විශ්වාසය පළ කෙරෙන යෝජනාවක් ඊයේ පාර්ලිමේන්තුවේ සම්මත විය. මන්ත්‍රීවරුන් 225 දෙනාම එක් වී එවැනි යෝජනාවක් සම්මත කර ගත්තත් තමා රනිල් වික්‍රමසිංහ අගමැති තනතුරට පත් නොකරන බව කියන සිරිසේනට, ‘ප්‍රශ්නය විසඳීම’ දැන් තවත් අවුල් වනු ඇත.
අද සවස 4 ට අධිකරණයේ මතය ප්රකාශයට පත්වීමට නියමිතයි. එයින් ලැබෙන විනිශ්චය තමන්ට අවාසිදායක එකක් වෙතොත්, ඒ කාරණයම, එනම් පාර්ලිමේන්තුව විසුරුවා හැරිය යුතුද නැද්ද යන්න පිළිබඳ කාරණය අරභයා ජනමත විචාරණයක් පැවැත්විය යුතු බවට ඔහු අදහස් දක්වා ඇතැයි අද මාධ්‍ය වාර්තා කර තිබුණි. එහි අදහස වන්නේ, මේ දක්වා මේ ජනාධිපතිවරයා කර ඇති සෑම ව්‍යවස්ථා උල්ලංඝනයක් සඳහාම, එනම්, අගමැති රනිල් වික්‍රමසිංහ එම ධුරයෙන් පහ කිරීම, මහින්ද රාජපක්ෂ අගමැති ධුරයේ පිහිටුවීම සහ පාර්ලිමේන්තුව විසුරුවා හැරීම යන ප්‍රශ්න තුන සඳහාම ජනමත විචාරණ තුනක් පැවැත්වීමට අපට සිදු වනු ඇති බවයි. ඒ සියල්ලම එක ඡන්දයකින් විනිශ්චය කර ගැනීමේ තවත් අවකාශයක් ඇති බව ඔහු කියන්නේ නැත. එනම්, මේ පුද්ගලයා ජනාධිපති තනතුරේ තවදුරටත් සිටීමට සුදුසු ද නැද්ද යන්න දැන ගැනීම සඳහා ජනමත විචාරණයක් පැවැත්වීමයි.
සිරිසේන යනු, වචන රාශියක් බිනීමෙහි දක්ෂ, එහෙත් බුද්ධිමය පරිචයකින් ඒ වචන පාලනය කර ගැනීමට නොදන්නා ආලවට්ටම් දේශපාලනඥයෙකි. සංසන්දනයක් වශයෙන් ගත්තොත්, මහින්ද රාජපක්ෂට ලොකු වචන මල්ලක් නැත. එහෙත් ඔහු පාවිච්චි කරන වචන කිහිපය යම් හීලෑවක් ඇතිව ප්රකාශයට පත්කිරීමට දක්ෂ ය. එය කපටිකමක් වෙතත්, දක්ෂකමකි. 2015 සහ ඒ ආසන්නයේ සිරිසේන කතා කෙළේ වචන ස්වල්පයකි. ඒ නිසා, ඔහුගේ කතාවේ යම් සංයමයක් දක්නට ලැබුණි. එහෙත්, මහින්ද රාජපක්ෂ සමග අංශක 180 කරණම ගැසූ දිනවල පටන් සිරිසේන පොරොප්පය ගලවා වචනවලට නිදහසේ ගලා යන්නට ඉඩ හැර තිබේ. කොකාගේ සුද පෙනෙන්ට ගත්තේ එතැන් පටන් ය.
මන්ත්‍රීන් 225 දෙනාම සම්මත කර ගත්තත් තමා රනිල් වික්‍රමසිංහ අගමැති ධුරයට පත් නොකරන්නේය යන, දෝෂාභියෝගයකට පවා නිමිත්තක් විය හැකි ඒකාධිපති සහ ප්‍රජාතන්ත්‍ර විරෝධී මුග්ධ ප්‍රකාශය කිරීමෙන් අනතුරුව ඔහු තවත් එවැනිම ප්‍රකාශයක් කෙළේය. එනම්, මහින්ද රාජපක්ෂට 113 ක් සොයා ගත නොහැකි වුණේ මන්ත්‍රීවරුන්ගේ මිල ගණන් කෝටි 50 දක්වා වැඩි වූ නිසා බව කියා සිටීම ය. මෙයින් පෙනී යන එක කාරණයක් වන්නේ, ඔහු මහින්ද රාජපක්ෂ අගමැති තනතුරේ පිහිටුවා ඇත්තේ, මුල පටන්ම මන්ත්‍රීවරුන් යම් ප්‍රමාණයක් මිලට ගැනීමේ හොර වැඩ පිළිවෙළක් යටතේ බවයි. අනෙක් කාරණය වන්නේ, ඊට අඩු මුදලකට මන්ත්‍රීවරුන් මිල දී ගැනීමට තරම් මන්ත්‍රී වෙළඳපොළ මිළ අඩු මට්ටමක පැවතියේ නම්, තමාගේ ව්‍යවස්ථා විරෝධී තේරීම පවා ව්‍යවස්ථානුකූල කර ගැනීමට තිබුණේය යන විශ්වාසයකින් ඔහු මුල සිටම ක්‍රියා කරන්නට ඇති බවයි. රටේ පළමු පුරවැසියා ව්‍යවස්ථානුකූලත්වය සහතික කර ගැනීමට උත්සාහ කොට ඇත්තේ අල්ලස මගින් වන බව එයින් කියැවේ.
බලහත්කාරයෙන් බලය අත්පත් කර ගත් හෝ බලහත්කාරයෙන් බලය භාවිත කළ ලෝකයේ කිසි නායකයෙකු, තමන් එසේ කරන්නේ තමාගේ හෝ තම පවුලේ අභිවෘද්ධියට යැයි කියා නැත. ඒ සෑම දෙනාම කියා ඇත්තේ, තමන් එසේ කරන්නේ රටේ, ජනතාවගේ, සමාජයේ හෝ ආගමේ සුභසිද්ධියට බවයි. ඉතා ඈත අතීතයේ කලිගුලා වැනි ඒකාධිපතියන් සම්බන්ධයෙන් බැලුවත්, ඊට මෙහා ගෙන්ගිස් කාන් වැනි ඒකාධිපතියන් හෝ ඊටත් මෙහා ඇඩොල්ෆ් හිට්ලර් වැනි ඒකාධිපතියන් සම්බන්ධයෙන් සලකා බැලුවත් මේ තත්වය අපට දැක ගැනීමට ලැබේ. සිරිසේන එවැනි ඒකාධිපතියෙක් නොවේ. එසේ නොවන්නේ, ඔහුගේ විශේෂ යහගුණයක් නිසා නොව, ලංකාව ඒ තරම් මහා රංගනයක් කිරීමට තරම් සුවිසල් වේදිකාවක් නොවන නිසාත්, ඒ කුඩා වේදිකාවේ පවා ඔහු ඊටත් වඩා කුඩා චරිතයක් වන නිසාත් ය.
සිරිසේන දැන් මාස දෙකකට ආසන්න කාලයක් තිස්සේ ගෙන යමින් තිබෙන බලහත්කාරී රාජ්‍ය අවපාලනය යුක්ති සහගත කර ගැනීමට දැන් අවසානයේ ඉදිරිපත් කරන්නේ අර ඉහතින් කී බලඅපයෝජකයන් පොදුවේ පාවිච්චි කළ හේතුවාචකයකි. එනම්, මෙතැන ඇත්තේ තමා සහ රනිල් වික්‍රමසිංහ අතර ප්‍රශ්නයක් නොව, ජාතික සහ විජාතික බලවේග අතර ප්‍රශ්නයක් බවයි. මේ හේතු දැක්වීම, ඔහු මුලින් කළ හේතු දැක්වීම්වලට දළ වශයෙන් වෙනස් නැත. තමා රනිල් වික්‍රමසිංහට ‘අකමැති’ නිසා ඔහු ඉවත් කරන ලද බව කීමේදීත්, එක්සත් ජාතික පක්ෂයේ ‘අවපාලනය’ වැලැක්වීම සඳහා තමා කටයුතු කරන්නේ යැයි කී අවස්ථාවේදීත්, පාර්ලිමේන්තුවේ 225 දෙනාගේම අත්සන සහිතව රනිල් වික්‍රමසිංහ කෙරෙහි විශ්වාසය පළවීමක් සිදුවුවත් ඔහුව නම් අගමැති ධුරයේ පිහිටුවන්නේ නැතැයි කීමේදීත්, මේ කියන ‘ජාතික’ සහ ‘විජාතික’ ද්විවිධය පිළිබඳ ව්‍යාජ රෝග නිධානයේ සෙවනැල්ල පසුබිමේ තිබුණි. ඔහු සංස්කෘතික වෙනස යැයි වරක් කීවේ එයයි.
බලහත්කාරයෙන් බලය අත්පත් කර ගත් හෝ බලහත්කාරයෙන් බලය භාවිත කළ ලෝකයේ සිටි කිසි නායකයෙකුට කර ගත නොහැකි වූ දෙයක් ද තිබේ. එනම්, මේ කියන පොදු අභිලාෂය, එනම්, ජනතාව සඳහා, රට සඳහා, ජාතියක් හෝ ආගමක් සඳහා තමා කටයුතු කළ බව කී හැම නායකයෙකුම තමන් එසේ කටයුතු කළ බව ඔප්පු කිරීමට අවසානයේදී අසමත් වීමයි. ඉතා පහසු සහ සරල උදාහණයක් පමණක් ගන්නේ නම්, හිට්ලර් තමන්ගේ ‘උත්කෘෂ්ට අරමුණ’ අවසන් කරන විට මුළු ලෝකයක්ම විනාශ වී තිබුණි. අනිත් පැත්තෙන් ගත් විට, මේ සියලු නායකයන් තමන්ට කලින් පැවති පාලනය තුළ තමන්ගේ විවේචනයට ලක්වූ කටයුත්ත හෝ ක්‍රියාවලිය නිශ්චිතව සහ සංයුක්තව දැක්වීමට අපොහොසත්ව ඇති බව පෙනේ. හිට්ලර් ‘යුදෙව් කුමන්ත්රණයක්’ ගැන කතා කෙළේය. එය තමාගේ අරමුණ සඳහා ඔහු පාවිච්චියට ගත් ව්‍යාජයක් බව අවසානයේ ඔප්පු විය. නැවතත්, ලංකාවෙන් පහසු සහ සරල උදාහරණයට සිරිසේන ගතහොත්, තමා අයත් නොවන ‘විජාතිකත්වය’ හෝ තමා අයත් වන ‘ස්වදේශිකත්වය’ කුමක්දැ යි ඔහු නිශ්චිතව රටට පැහැදිලි කරන්නේ නැත. හම්බන්තොට හෝ වෙනත් ඕනෑම දේපළක් හෝ ආයතනයක් පසු ගිය වසර තුන හමාරක කාලය තුළ, තමාගේ අනුදැනුමකින් සහ අනුමැතියකින් තොරව, ‘විජාතිකකරණයට’ ලක්කිරීමට වික්‍රමසිංහ ආණ්ඩුව කටයුතු කෙළේ කෙසේදැයි ඔහු කියන්නේ නැත. කාන්තාවන්ට බාර්වල වැඩ කිරීම පිළිබඳව පැවති ආදිකාලීන ඉංග්‍රීසි නීතිය අහෝසි කිරීමට තැත් කිරීම සහ ස්වීප් ටිකට් එකේ මිල සම්බන්ධයෙන් ඒ ආණ්ඩුව කටයුතු කළ ආකාරය පවා, ඔහුගේ සහභාගිත්වයකින් සහ අනුදැමකින් තොරව ක්‍රියාවේ යෙදැවීමට තැත් කළ දේවල් නොවේ. එහෙත් දැන්, පසු ගිය වසර තුනකට වැඩි කාලයක් තිස්සේ යහපාලන ආණ්ඩුව කරන ලද සියලු යහපත් ක්‍රියා පමණක් තමන්ගේ අයිතියට පවරා ගන්නා අතරේ, ජනතා අප්‍රසාදයට පත් පියවර ගැන ‘තමන් දන්නේ පුවත්පත්වලින්’ පමණක් යැයි ඔහු කියා සිටින්නේය.
මෙවැනි නිශ්චිත කාරණාවන්ගෙන් බැහැරව, ජාතික සහ විජාතික හෝ බටහිර කුමන්ත්‍රණ සහ අධිරාජ්‍යවාදය වැනි ‘මහා න්‍යාය’ තුළ තමන්ගේ චෝදනාව පදනම් කරන තැනැත්තා (විශේෂයෙන් එම තැනැත්තා එසේ කරන්නේ සටකපට චේතනාවකින් වන විට) තර්කණයේ විශේෂ වාසියක් භුක්ති විඳියි. එනම්, තමන්ගේ චෝදනාව සංයුක්තව පැහැදිලි කිරීමේ බරෙන් ඔහු නිදහස් වීමයි. උදාහරණයක් වශයෙන්, යමෙකුට බෙදුම්වාදියෙකු හෝ එන්.ජී.ඕ.කාරයෙකු යැයි කී විට, ලංකාවේ වර්තමාන සමාජ අවකාශය තුළ ඉබේ ඇති කෙරෙන ‘අවබෝධය’, චෝදනාවට ලක්වන තැනැත්තා මොන තරම් කරුණු ගෙනහැර පෑවත් ඛණ්ඩනය කිරීම පහසු නොවන බව පෙන්වා දිය හැකිය. මන්ද යත්, සමාජයක් වශයෙන් අර කියන පහසු සහ වෙහෙසකර නොවන තනි වචනයකින් හෝ යෙදුමකින් යමක් ‘තේරුම් ගැනීමට’ සමාජයේ බහුතරය කැමැත්තක් දක්වන බැවිනි. උදාහරණයක් වශයෙන්, ‘සිංහල ජාතිය අනිත් ජාතීන්ට වඩා ශ්‍රේෂ්ඨ’ යැයි සිතින් ගත් විට, උපතේ සිට මරණය දක්වා සිංහලයෙකු වන ඔබට එය ‘ඔප්පු’ කිරීම සඳහා කිරීමට ඇත්තේ, එසේ නොකියන තැනැත්තා ‘විජාතිකයෙකු’ හෝ ‘එන්.ජී.ඕ. කාරයෙකු’ හෝ ‘බෙදුම්වාදියෙකු’ යන වචනයකින් හැඳින්වීම පමණි.
ඉදිරියේ ඇති ජනාධිපති සිරිසේනගේ ඉතා කෙටි දේශපාලනික ආයු කාලය තුළ ඔහු අනුගමනය කිරීමට නියමිතව ඇත්තේ හරියටම ඒ ප්‍රතිපත්තියයි. මේ දක්වා ඔහු කළ සෑම අවකල් ක්‍රියාවක්ම, ජාතියේ නාමයෙන් සහ අනාගත පරපුරේ නාමයෙන් කළ කී දේවල් බවට එවිට භෞතීස්ම වනු ඇත.
ආපසු හැරී බලන විට, අද සිරිසේන මුළු රටක්ම එක මිටට ගෙන දූෂණය කරමින් සිටින සල්ලාලයෙකුගේ තත්වයට පත්ව ඇත. එය උමතුවකි. රටක ජනාධිපතිවරයාගේ මොළය පරීක්ෂා කළ යුතු යැයි ඉල්ලා පුරවැසියෙකු අධිකරණයක් ඉදිරියට ගිය වෙනත් රටක් ගැන මා අසා නැත. මුළු රටම පීඩාවට පත්ව සිටීම දකිමින්, එසේ රටක් අල්ලේ නැටවීමට තරම් තමාට හයියක් ඇතැයි සිතා ඉන් වින්දනයක් ලැබීම පරපීඩාකාමයක් වශයෙන් අපට හඳුනා ගත හැක. 18/19 සියවසේ ප්‍රංශයේ විසූ සාද් නම් වූ ආදිපාදවරයා මේ කියන පරපීඩාකාමය පිළිබඳ ලෝ ප්‍රකට පුද්ගලයා ය. ඇත්තෙන්ම, අප සිංහලෙන් භාවිත කරන මේ වචනයට (පරපීඩාකාමය) සමාන ප්‍රංශ සහ ඉංග්‍රීසි ඇතුළු වෙනත් යුරෝපා භාෂාවල සඳහන් වචනය උපන්නේ ඔහුගේ නමිනි. ඔහු ගැහැනුන්ගෙන් වින්දනය ලැබුවේ සම්මත ආකාරයෙන් නොව, එම ගැහැනුන් අසීමිත වධ බන්ධනයට පත්කිරීමෙනි. ඉන් සමහර ගැහැනු කැමැත්තෙන් ඒ පීඩාවට ලක්වූවෝය. තවත් අය බලහත්කාරයෙන් ඒ සඳහා යොදවා ගනු ලැබුණි. මේ සෙල්ලම සඳහා අපූරු මෙවලම් පවා ඔහු පාවිච්චියට ගත්තේය. එසේ පාවිච්චියට ගත් ආම්පන්න කෞතුකාගාරයක්ම අදටත් පැරිසියේ පිහිටා තිබේ.
සිරිසේනගේ මාස එක හමාරක පැටිකිරිය තුළ, රටක් පීඩාවට පත් කිරීම සඳහා ඔහු අවභාවිතයට ගෙන ඇති මෙවලම් කිහිපයක් අපට හමු වෙයි. ඉන් එකක් වන්නේ ආණ්ඩුක්‍රම ව්‍යවස්ථාවයි. අනෙක වන්නේ පාර්ලිමේන්තුවයි. ඊළඟට, ප්‍රජාතන්ත්‍රීය සම්ප්‍රදායයි. ඊයේ වන විට ඔහු අධිකරණයත් ඊට ඈඳාගෙන තිබුණි. එනම්, මේ රටේ යුක්තිය සහ ව්‍යවස්ථා නෛතිකත්වය ඉල්ලා පුරවැසියන් අධිකරණයට යෑම නිසා ප්‍රශ්නය දිග් ගැස්සුණු බව කීමෙනි. අධිකරණය ඉදිරියේ දැනට මේ සම්බන්ධයෙන් ඇති සියලු නඩු විභාග අවසන් වන තෙක් තමන් තීරණයක් නොගන්නා බවත් මේ වන විට මොහු කියා තිබේ.
විශේෂයෙන් පසුගිය ඔක්තෝබර් 26 වැනි දා සිට මේ පුද්ගලයා හැසිරුණු ආකාරයත්, පොදුවේ ගත් විට, ඊට සෑහෙන කාලයකට ඉහතදී පටන් ඔහු කර කියා ඇති දේ ගැනත් මඳක් විමසිල්ලෙන් සොයා බලන්න. ඔහු සහසුද්දෙන්ම පරපීඩාකාමියෙකු බව එවිට ඔබට වැටහෙනු ඇත. අවාසනාව වන්නේ, සාද් ආදිපාදවරයා ගැහැනු සිය ගණනක් පමණක් ස්වකීය පරපීඩක වින්දනය සඳහා පාවිච්චි කරද්දී සිරිසේන ආදිපාදයා දෙකෝටියක් ජනතාව ඒ නපුරු වින්දනය සඳහා යොදා ගනිමින් සිටීමයි.■
සිරිසේන යනු ජාතික පරපිඩාකාමියෙකි
මාධ්‍යවේදීන්ට වැටුප් නොගෙවා තර්ජනය කළ රිවිරේ රාජපක්ෂ සංස්කෘතිය
පුවත්පත් වැසී යෑම මේ වෙද්දී එදිනෙදා දෙයක් බවට පත්ව තිබෙන්නේය. සත්හඬ, සැබෑ, , ඉරිදා ඇපල් සහ රිවිර යන පුවත්පත් 2018 වර්ෂය තුළ වැසීගිය පුවත්පත්ය. ඒ අතරින් පුවත්පත් දෙකක්ම 2018 අවුරුද්දේම පටන්ගත් ඒවාය. රිවිර පුවත්පත 2018 වර්ෂයේදීම අලු‍තෙන් පටන්ගත් පුවත්පතකි.
අපේ කතාව මෙම පුවත්පත් අතරින් රිවිර පුවත්පත පිළිබඳවය. රිවිර පුවත්පත රාජපක්ෂලාගේ අතිශය සමීප හිතවාදීන් විසින් මුදල් යොදවා පවත්වාගෙන ගිය පුවත්පතක් බව අමුතුවෙන් කිව යුතු නැත. රිවිට සැමදා පැවතුණේ රාජපක්ෂ දේශපාලනය වෙනුවෙන්ය.
මාස කිහිපයකට පෙර දිනක් රිවිර පුවත්පතේ මාධ්‍යවේදීන් බොරැල්ල ඇන්.ඇම්. පෙරේරා මාවතේ පිහිටි කාර්යාලයට යද්දී එතැන රිවිර කාර්යාලය තිබුණේ නැත. ඔවුන්ට පසුව දැනගන්නට ලැබී තිබුණේ ඔවුන්ව ඉවත් කොට ඉරිදා රිවිර පුවත්පතක් අලු‍තෙන් මුද්‍රණය වෙන බවයි. ඉරිදා ජනයුගය පුවත්පත වැසෙද්දී ඉවත් වූ මාධ්‍යවේදීන් පිරිසක් නව රිවිර පුවත්පතේ කර්තෘ මණ්ඩලය බවට පත්ව තිබුණි.
එක් සේවකයන් කණ්ඩායමකට පයින් ගසා ඇරඹුණු ඉරිදා රිවිර නිව් එඩිෂන් පුවත්පත මේ වෙද්දී නැවත වතාවක් වැසී ගොස්ය. මාධ්‍යවේදීන්ට මාස දෙකකට වැඩි කාලයක් වැටුප් ගෙවා නැත. වැටුප් ගෙවන තෙක් කැමරා ආදී උපකරණ ලබා නොදෙන බව පවසමින් මාධ්‍යවේදීන් විසින් ඒවා තමන් ළඟ තබාගෙන සිට ඇත. එහෙත් එලෙස උපකරණ ළඟ තබාගත් මාධ්‍යවේදීන්ට ඩිෆෙන්ඩර් වලින් පැමිණි පිරිසක් විසින් මරණ තර්ජන එල්ලකොට ඇත්තේ උපකරණ දෙන ලෙස පවසමින්ය. අවසානයේදී එක් මාධ්‍යවේදියෙකු ඒ සම්බන්ධයෙන් නාරාහේන්පිට පොලීසියට පැමිණිල්ලක් ඉදිරිපත් කර ඇත. මේ කතාව රිවිරේ සිදුවීම ගැනය.
රිවිර ආරම්භය
රිවිර පුවත්පත 2006 වර්ෂයේ දි රිවිර මීඩියා කෝපරේෂන් නමින් සමාගමක් ලෙස ලියාපදිංචි කර පටන් ගත් පුවත්පතකි. රිවිර හා ද නේෂන් පුවත්පත් එම සමාගම සතු විය. 2012 වර්ෂය වන විට රිවිර මිඩියා කෝපරේෂන් රිවිර මැනේජ්මන්ට් කන්සල්ටේසන් නම් විය. රිවිර පුවත්පත ආරම්භ කල සමයේ එම පුවත්පතේ සේවය කිරිම සඳහා මාධ්‍යවේදින් ඇතුළු සේවකයන් 200 ක් පමණ සිටි අතර 2018 අවසානය වන විට එම සේවකයන්ගේ ගණන 52 කට ආසන්න ප්‍රමාණයකට පහල ගොස් ඇත.
2006 සිට මේ දක්වා රිවිර පුවත්පතේ නිල නාමය සහ හිමිකාරීත්වය වෙනස් වී ඇත්තේ කිහිප වතාවක් පමණි. එහෙත් රිවිර පාලනය කළ ආයෝජකයන් කලින් කළට වෙනස් වී ඇත. ඒ සියළුදෙනාම පාහේ රාජපක්ෂ හිතවාදීන් විය. විශේෂයෙන්ම රාජපක්ෂ පාලන සමයේදී රිවිර හිමිකාරීත්වය දැරුවේ අසංග විජයරත්න විසින්ය. අසංග විජයරත්න යනු රාජපක්ෂ පුතුන්ගේ සමීපතමයෙකි.
රාජපක්ෂ සමයේදී රිවිරේ පළවූ සියලු දේ ඍජුව රාජපක්ෂලාගේ නිරීක්ෂණයට ලක් වූ බව කියැවෙයි. පුවත්පතේ හැම පිටපතක්ම රාජපක්ෂ පවුලේ හෝ පවුලේ සමීපතමයෙකුගේ නිරීක්ෂණයට ලක් වී අනුමැතිය ලැබීමෙන් පසුව පිටවෙන බව කියන්නේ එදා රිවිරේ සේවය කළ සේවකයන් විසින්ය.
රිවිරේ සිටි මාධ්‍යවේදියෙකු විසින්ම කී කතාවක් මෙසේය. ‘ආයතනයේ ඉහළ තනතුරු දැරු නිලධාරින් මහින්දවාදින් නොවුනත් ඔවුන් සිටියේ මහින්ද රාජපක්ෂ මහතාට බොහෝ යටහත් පහත්ව. මහින්ද මහත්තයා රට යනවා, යන්න කලින් පත්තරේ කොපියක් යවන්න ඕනෑ බව කියා පත්තරේ වැඩ දවල් 2.00 ට වගේ නතර කරලා පත්තරේ සියළු පිටු සැකසුම් මහින්ද රාජපක්ෂ මහතාට යැවු අවස්ථා බොහෝයි. එක කාලයක පත්තරේ පළවෙනි පිටුව මහින්ද රාජපක්ෂ මහතා වෙනුවෙන් වෙන් කර තිබුණා. දෙවනි පිටුව ජෝතිශ්‍ය සඳහා. , තුන්වන පිටුව ශිරන්ති රාජපක්ෂ වෙනුවෙන්. ක්‍රීඩා පිටු වෙන්වී තිබුණේ නාමල් , රෝහිත , යෝෂිත යන පුතුන් ත්‍රිත්වය වෙනුවෙන්. ඔවුන් ක්‍රීඩාවේ ක්‍රියාකාරීව නියැලෙන අන්දම ඡායාරූපයට නැඟීම අපගේ වගකීම වී තිබුණා. ඒ අතීතය 2015 අවසන් වුණා. ඒත් දේශපාලන අර්බුදයෙන් පස්සේ ඒ තත්වය නැවත ප්‍රතිස්ථාපනය වෙමින් තියෙනවා. මේ වෙද්දී ලොකු භීෂණයක් පත්තරයෙ වැඩ කරන අයට පවා එල්ලවෙලා තීයෙනවා. ඒත් මේ භීෂණය එල්ල වෙලා තියෙන්නෙ මහින්ද රාජපක්ෂ තමන්ගේ නායකයායැයි කියමින් මහින්දලාව ඉහළින්ම ඔසවා තබපු අයට. මහින්දව මේ තරම් ඉහළින් වර්ණනා කළ මිනිස්සුන්ට මේ වෙද්දී තියෙන තර්ජනය මෙහෙම නම්, සාමාන්‍ය සමාජයට මොනවගේ තර්ජනයක් ඉදිරියේ එල්ලවේවිදැයි අපට හිතාගන්න බැහැ.’
රිවිර කඩාවැටීම
රාජපක්ෂලාට ආණ්ඩුව තිබුණු සමයේදී රිවිර පුවත්පතට ලොකු ආර්ථික අර්බුදයක් තිබුණේ නැත. එසමයෙහි පුවත්පත පවත්වාගෙන යෑමට කෙසේ හෝ මුදල් ලැබී තිබුණි. එහෙත් 2015 පහු වෙද්දී රිවිර පවත්වාගෙන යෑමට මුදල් උපයාගැනීම අසීරු කටයුත්තක් බවට පත්ව තිබුණි. රාජපක්ෂලාට ආණ්ඩුවක් නොවීය.
ඒ නිසා වරින් වර රිවිරට මුදල් යෙදවූ පරිපාලකයන් වෙනස් වී තිබුණි. රිවිරේ සිටි ප්රධාන මාධ්‍යවේදීන් රැසක් වෙනත් පුවත්පත්වලට යන්නට පටන්ගෙන තිබුණි. ඒ කඩාවැටීම නිසා පුවත්පත් බෙදාහැරීමේ සේවාවන්ට මාස ගණනාවක් මුදල් නොගෙවා මඟහැර තිබුණි. පුවත්පත මුද්‍රණය කළ මුද්‍රණාලයන්ට මුදල් ගෙවීම අසීරු වී තිබුණි. මේ තත්වය 2017 වෙද්දී වර්ධනය වී තිබුණි. පුවත්පත් බෙදාහැරීමේ සේවා සපයන්නන් විසින් පුවත්පත බෙදාහැරීම ප්‍රතික්ෂේප කිරීමටද පටන්ගෙන තිබුණි.
රිවිර නිව් එඩිෂන්
රිවිර මීඩියා කෝපරේෂන් ආයතනය එක්වරම රිවිර නිව් එඩිෂන් බවට පත්ව, බොරැල්ලේ පිහිටි කාර්යාලයෙන් රාජගිරියට කාර්යාලයකට පැමිණ තිබුණේ එක රැයින්ය. ඒ 2018 ජනවාරි මාසයේ අග කාලයේදීය. රිවිර ආයතනයේ සේවය කළ සේවකයන්ට ඒ වෙද්දීත් මාස කිහිපයක වැටුප් ගෙවා තිබුණේ නැත. මාධ්‍යවේදීන් ඇතුළු සේවකයන්ව ඉවත් කිරීම ගැන කිසිදු ලියැවිල්ලක් හෝ ලබා දී නොතිබුණි. එය එම සේවකයන්ගේ අයිතිවාසිකම් අමු අමුවේ උල්ලංඝනය කිරීමක් විය.
එක් මාධ්‍යවේදීන් පිරිසකගේ අයිතිවාසිකම් නැති කරමින් රිවිර නිව් එඩිෂන් පටන්ගෙන තිබුණද නව පුවත්පතට එක්වීම සඳහා මාධ්‍යවේදීන් ඕනෑතරම් විය. මාධ්‍යවේදීන්ගේ අයිතිවාසිකම් තඹේකට නොතකන මාධ්‍යවේදීන් ඕනෑ තරම්ය. රිවිර නිව් එඩිෂන් සමඟ එක්වී තිබුණු පිරිස අතරින් බහුතරය අර්ජුන් ඇලෝසියස්ලාගේ ජනයුගය පුවත්පතේ සිටි මාධ්‍යවේදීන්ය. ජනයුගය පුවත්පත එකවර වසා දැමීමෙන් එම මාධ්‍යවේදීන්ගේ අයිතිවාසිකම් උල්ලංඝනය වී තිබුණි. ඔවුන් කළ යුතුව තිබුණේ තමන් ලක්වූ අසාධාරණයටම ලක්වූ රිවිර කෝපරේෂන්හි මාධ්‍යවේදීන් සමග එක්ව අයිතිවාසිකම් වෙනුවෙන් සටන් කිරීමය. එහෙත් ඔවුන් කළේ තවත් පිරිසක් අසාධාරණයට ලක් කරමින් රිවිර නව සංස්කරණයෙහි කර්තෘ මණ්ඩලය බවට පත්වීමයි.
කෙසේ හෝ නව කර්තෘ මණ්ඩලයක් සමඟ ආරම්භ කළ රිවිර නව සංස්කරණය ජනතාව අතට පත්කිරීමට අදාල සේවා සපයන ආයතන කිහිපයක්ම රිවිර බෙදාහැරීමේ කටයුත්ත ප්‍රතික්ෂේප කර තිබුණි. එයට හේතුව වී තිබුණේ රිවිර විසින් මීට පෙර ගෙවිය යුතු මුදල් ගෙවා නොතිබීමය. අවසානයේදී එවැනි සේවා සපයන්නන් කිහිපදෙනෙක්වම මහින්ද රාජපක්ෂ මන්ත්‍රීවරයා විසින්ම මුණගැසී තිබුණි. නැවත මුදල් ගෙවීමේ ගැටලු සිදුනොවෙන බවට සහතික වී තිබුණි. මීට පෙර හිඟ මුදල්ද ගෙවන බව කියා තිබුණි. මුද්‍රණාල සඳහාද ඒ පොරොන්දුවම ලබා දී තිබුණි. ඒ 2018 අප්‍රේල් මාසයේය.
එතෙක් රිවිරට මුදල් යෙදවූ කණ්ඩායම වෙනුවට කොළඹ නාගරික මන්ත්‍රීවරියක වන ප්‍රියංකා ජයසේකර නමැත්තිය විසින් රිවිරට මුදල් යොදවන බව නව පුවත්පතේ මාධ්‍යවේදීන්ට හා පුවත්පත මුද්‍රණය, බෙදාහැරීම හා අලෙවි කිරීම යන කටුයුතුවලට අදාළ කණ්ඩායම් වලට දන්වා තිබුණි.ඉන්පසුව රිවිර කාර්යාලය රාජගිරියෙන් බත්තරමුල්ලේ සුභූතිපුර කාර්යාලයකට ගෙන ගියේය.
කෙසේ වෙතත් 2018 අගෝස්තු පහු වෙද්දී රිවිරට මුදල් යෙදවූ අය විසින් මුදල් යෙදවීම අඩපණ කර ඇතැයි වාර්තා වෙයි. ඒ අනුව මාධ්‍යවේදීන්ට මුදල් නොගෙවීමේ සිට සේවා සපයන ආයතනවලට මුදල් නොගෙවීම දක්වා අර්බුදය ගමන් කර තිබුණි. අවසාන කාලය වෙද්දී පුවත්පත් බෙදා හරින්නන් රිවිර බෙදාහැරීම ප්‍රතික්ෂේප කර තිබුණි. අන්තිමේදී රිවිර පුවත්පත පිටවීම හෝ නොවීම ඒ ඒ සතියේ මුදල් ලැබෙන ආකාරය අනුව තීරණය වන තත්ත්වයට පත්විය. රිවිර බෙදා හැරුණේ මුදල් යෙදවූ කණ්ඩායමේ වාහන කිහිපයකින්, කොළඹ අවට පමණි. මාධ්‍යවේදීන් මුදල් නොමැතිව අපහසුතාවයට පත්ව තිබුණි. මේ කඩාවැටීම තවත් උඝ්‍ර වෙමින්, පුවත්පතේ මුද්‍රනය විය යුතු පිටපත් ගණන මුද්‍රණාලයට තීරණය කිරීමේ හැකියාව ලැබෙන තත්වයට පත්ව තිබුණි. ලැබෙන මුදල් ප්‍රමාණයත්, ඉතිරි වී තිබෙන කාලයත් අනුව පුවත්පතේ පිටපත් ගණන තීරණය වන තත්වයට පසුබා තිබුණි.
කාර්යාල පවත්වාගෙන යෑමද අසීරු වී තිබුණි. ඒ අනුව ඔක්තෝම්බර් මාසයේ රිවිර කාර්යාලය අභයාරාමය දක්වා ගෙනගොස් තිබුණි. අභයාරාමය යනු මුරුත්තෙට්ටුවේ ආනන්ද හිමිනමගේ විහාරස්ථානය වෙයි. මුරුත්තෙට්ටුවේ ආනන්ද හිමියන් රාජපක්ෂලාගේ සමීපතමයෙකි. කෙසේ වුවත් රිවිරේ වෙබ් අඩවිය පමණක් අඛණ්ඩව ක්‍රියාත්මක විය. පුවත්පත මුද්‍රණය වීම අවිනිශ්චිත විය. අවසානයේදී මුද්‍රණය නවතා තිබුණු අතර ඔක්තෝබර් 26 වැනිදා රාජපක්ෂලා ආණ්ඩුව ගත් මොහොතේ මහින්ද රාජපක්ෂ මන්ත්‍රීවරයාගේ දැවැන්ත ඡායාරූපයක් සමඟ ජයග්‍රාහී ස්වරූපයේ මුල් පිටුවක් රැගත් පුවත්පතක් මුද්‍රණය කර තිබුණි. ඉන්පසුව සති කිහිපයක් අභයාරාමයේ සිට පුවත්පත මුද්‍රණය කර තිබුණි. එහෙත් මාධ්‍යවේදීන්ට වැටුප් ගෙවා තිබුණේ නැත.
වැටුප් නොගෙවීම නිසා මාධ්‍යවේදීන් විසින් පුවත්පතේ සේවය කිරීම ප්‍රතික්ෂේප කර තිබුණි. ඇතැම් අය නිවෙස්වල නැවතී සිට ඇති අතර පුවත්පත මුද්‍රණය කිරීම ඇණහිට ඇත. වැටුප් ගෙවන තෙක් තමන් සතු කැමරා ආදී උපකරණ නැවත ලබා නොදෙන බව මාධ්‍යවේදීන් කියා ඇත.
කෙසේ වෙතත් මේ තත්ත්වය නිසා රිවිර මාධ්‍යවේදීන්ගේ නිවෙස්වලට ඩිෆෙන්ඩර් පැමිණෙන්නට පටන්ගෙන තිබේ. නිවෙස්වලට පැමිණ මාධ්‍යවේදීන්ව සොයන්නටත්, උපකරණ බාරදෙන ලෙස තර්ජනය කරන්නටත් පටන්ගෙන තිබේ.
ඔක්තෝබර් 10 වන සඳුදා රිවිර ඡායාරූප කර්තෘ චමිල කරුණාරත්න මහතා පදිංචිව සිටින ගොතටුව නව නගරයේ නිවසට ඩිෆෙන්ඩර් මැරයන් කණ්ඩායමක් පැමිණ ඇත. ඔහුට තර්ජනය කොට ඔහු සතු කැමරා උපකරණ කිහිපයක් පැහැරගැනීමට තැත් කර ඇත. මේ සිද්ධිය සම්බන්ධයෙන් චමිල කරුණාරත්න විසින් නාරාහේන්පිට පොලිස් ස්ථානයේ පැමිණිල්ලක්ද කර තිබේ.
චමිල කරුණාරත්නට සහ තවත් ඡායාරූප මාධ්‍යවේදියෙකු තර්ජන හේතුවෙන් තමන් සතු කැමරා උපකරණ නාරාහේන්පිට පොලීසියට බාරදී ඇත. නාරාහේන්පිට පොලිස් ස්ථානය විසින් එම උපකරණ රිවිර ආයතනයට බාර දී ඇත.
රිවිර කෝපරේෂන් ආයතනයේ මාධ්‍යවේදින්ව දොට්ට දමා පටන්ගත් රිවිර නිව් එඩිෂන් ආයතනයේද මාධ්‍යවේදීන්ට දැන් අත් වී ඇත්තේ පෙර ඉරණමමය. නැවත රිවිර ආයතනයේම හෝ තවත් ආයතනයක මාධ්‍යවේදීන්ට මෙවැනි ඉරණමක් අත් නොවෙන්නට නම් මාධ්‍යවේදීන් ඉදිරියට පැමිණ සටන් කළ යුතුය. තමන්ගේ අයිතිවාසිකම් කඩ කිරීමට එරෙහි විය යුතුය.
කළු සල්ලි පත්තර
රිවිර පුවත්පත පැහැදිළිවම දේශපාලනඥයන් හා ඔවුන්ට හිතවත් ව්‍යාපාරිකයන්ගේ කළු සල්ලි මත පදනම් වූ පුවත්පතකි. එය පැවතුණේ කළු සල්ලි පවතින තාක් කල්ය. රිවිර පුවත්පතට සාධාරණ වාර්තාකරණයක් සිදුකොට පුවත්පතක් ලෙස ආදායමක් ඉපැයීමේ අවශ්‍යතාවයක් නොවීය.‘අලු‍ත්ම බිල්ලකට කොටි යළි නැඟිටියි’ වැනි භයානක ජාතිවාදී ප්රධාන ප්‍රවෘත්ති රිවිරේ පළ විය. දෙසැම්බර් 02 රිවිරේ ප්රධාන ප්‍රවෘත්තිය වී තිබුණේ ‘පොට්ටු අම්මාන් ජීවතුන් අතර’ යනුවෙනි. ඊට පෙර පුවත්පතක ‘කථානායක බටහිර බළල් අතක්’ යැයි ප්‍රවෘත්තියක් පළ වී තිබුණි.
මේ ප්‍රවෘත්ති පැහැදිළිවම ජාතිවාදී රාජපක්ෂ ව්‍යාපෘතිය වෙනුවෙන් නිර්වස්ත්‍රව මෙන්ම මාධ්‍ය ආචාරධර්ම උල්ලංඝනය කරමින් පෙනී සිටීම් විය. රිවිර මාධ්‍යවේදීන්ව පාවිච්චි කළේ ඒ ලැජ්ජා විරහිත කටයුත්ත වෙනුවෙන් බව කණගාටුවෙන් වුව කියන්නට සිදුවෙයි. ඒ කටයුත්ත වෙනුවෙන් පාවිච්චි කළ මාධ්‍යවේදීන්ටද වැටුප් නොගෙවා, අසාධාරණ ලෙස සලකමින්, තර්ජනය කරමින් සිටින රාජපක්ෂ සංස්කෘතිය රටින් අතුගා දැමිය යුතුය. එමෙන්ම කළු සල්ලිවලින් දුවන මාධ්‍ය සංස්කෘතියද අතුගා දැමිය යුතුමය.■
සැහැල්ලු පන්දුවලට නොපෙනෙන වාහන අවභාවිතාවේ ඇත්ත
මැච් පික්සින් හෙවත් ක්‍රිකට් තරග මුදලට පාවාදීමේ කටයුත්තකට ශ්‍රී ලංකාව අතිදක්ෂ බව දැන් ලෝකයම දනී. මේවාවලදී සිදුවන්නේ පිතිකරුවන් වුවමනාවෙන්ම කඩුළු පූජා කිරීම හෝ පන්දු යවන්නන් අසීරු නොවන පන්දු යවා පිතිකරුවන්ට ලකුණු ලබාගැනීමට ඉඩදීමය. ඊට අමතරව තීරණාත්මක උඩ පන්දු අත්හැරීම් සහ පිති ප්‍රහාරයක් නොවළක්වා හතරේ සීමාවට යෑමට ඉඩදීමේද සිදුවිය හැකිය.
ශ්‍රී ලංකාවේ දේශපාලන ක්ෂේත්‍රයේ කටයුතුද ඒ අරභයා වූ මාධ්‍ය වාර්තාකරණයන්ද සමහර විට මැච් පික්සින් ඝාතනයේ යැයි සිතේ. මාධ්‍යකරුවන්, දේශපාලනඥයන්ගෙ න් ඇසිය යුතු තීරණාත්මක ප්‍රශ්න අසන්නේ නැත. දේශපාලනඥයන්ට ප්‍රහාර එල්ල කිරීම සඳහා මාධ්‍යකරුවන් යවන්නේ අසීරු නොවන සැහැල්ලු පන්දුය. ඒවාට දේශපාලනඥයන් එල්ලකරන හයේ හා හතරේ පාරවල් දැස් මවිත කරවන සුළුය.
ඉතිං ඉන් පසු මාධ්‍යයේ කථාබහ ඇති වන්නේ තීරණාත්මක ප්‍රශ්නය ගැන නොවේය. ඒ වටා ඇති හෝ ඊට කිසිසේත් සම්බන්ධයක් නැති කරුණු කාරණා වටාය. අවසානයේ මාධ්‍ය මඟින් තොරතුරු දැන ගන්නා බහුතර ජනයා ගිලගන්නේ එයය.
ජනාධිපති පරීක්‍ෂණ කොමිෂන් සභා, අධිකරණ නඩු විභාග ආදියේ දීද මෙවැනි සැහැල්ලු පන්දු හෝ නිපන්දු එල්ල කිරීම්ද ඒවාට අතදිගහැර පහරදීමේද දැක ගත හැකිය. එවිට මාධ්‍යය සිය න්‍යාය පත්‍රය අනුව ක්ෂණිකව අල්ලා ගන්නේ එම අවශේෂ කාරණායය. සැබෑ ප්‍රශ්නය ගැන ජනතාවට දැනුවත් වීමත් ලබාදෙන්නේ නැති තරම්ය.
ඊට ඇති මෑතක හොඳම උදාහරණය වන්නේ හිටපු ජනාධිපති මහින්ද රාජපක්‍ෂගේ කාර්ය මණ්ඩල ප්‍රධානී ගාමිණී සෙනරත් ඇතුළු තිදෙනෙකුට එරෙහිව කොළඹ ත්‍රිපුද්ගල මහාධිකරණයේ විභාග වන නඩුවය. එම නඩුවට අදාළ මුදල් අවභාවිතය රුපියල් ලක්ෂ ගණනක් නොවේ. එය රුපියල් මිලියන ගණනකි. පොලිස් මූල්‍ය අපරාධ කොට්ඨාසය. එම නඩුවට අදාළ මූලික පරීක්‍ෂණයක් කරන සමයේ ප්‍රකාශයක් ලබාදීම මඟහරිමින් ගාමිණි සෙනරත් හැංගිමුත්තන් කළ ආකාරයත් ඔහුව අත්අඩංගුවට ගැනීමෙන් වළකින ලෙස උසාවිවලින් ඉල්ලීම් සිදුකිරීමත් එදා දෙවෙනි වූයේ ගෝඨාභය රාජපක්ෂ නාටකයට පමණය. එදා ගෝඨාභය රාජපක්ෂ ද පරීක්‍ෂණ ආයතනවලට ප්රකාශ ලබාදීම මඟහරිමින් රටේ උසාවිවලින් ඔහුව අත්අඩංගුවට නොගන්නා ලෙස ඉල්ලීම් සිදුකිරීම විලාසිතාවක් බවට පත්කරගෙන තිබුණි.
හම්බන්තොට හසට් රිජන්සි හෝටලය ඉදිකිරීම සඳහා යැයි කියමින් රුපියල් මිලියන 315ක මුදලක් වැය කර කිසිඳු ඉදිකිරීමක් සිදුකර නොතිබීම, ගාමිණී සෙනරත් ඇතුළු පිරිසට එරෙහි ප්රධාන චෝදනාව විය. ( එම හෝටලය ඉදිකිරීම් මුල් ඇස්තමේන්තු ගත වියදම වූයේ රුපියල් බිලියන 4ක් හෙවත් රුපියල් කෝටි 400කි)
මේ හෝටල් ව්‍යාපෘතිය සඳහා ශ්‍රී ලංකා රක්ෂණය, ලිට්රෝ ගෑස් සමාගම හා සේවක අර්ථසාධක අරමුදල යන රාජ්‍ය ආයතන මූල්‍ය දායකත්වය දරා තිබුණි. නඩු විභාගයේදී ලිට්රෝ ගෑස් සමාගමේ නිලධාරීන්ව ගෙන්වා සාක්ෂි විමසන්නට අවශ්‍ය වූයේ මේ මහා මූල්‍ය අපරාධය තහවුරු කර ගැනීම සඳහාය. එහෙත් පෙර විස්තර කළ ආකාරයටම සිදුවූයේ එම මහා මූල්‍ය වංචාවට කිසිසේත්ම සම්බන්ධයක් නැති ප්‍රශ්නයක් හෙවත් නිපන්දුවක් විත්තියේ නීතිඥයන් විසින් එල්ලකිරීමත්, ඒ බව දැනගෙන සිටි සාක්ෂිකරුවා විසින් එයට වැරදී පහරදීමත්ය. එම පහරදීමේ ප්‍රතිඵලය වූයේ මූලික ප්‍රශ්නය මඟහැර මාධ්‍ය තුළ අවශේෂ ප්‍රශ්නයකට ඉඩකඩ විවරවීමය.
එම අවශේෂ ප්‍රශ්නය තුළ රාජ්‍ය මුදල් අවභාවිතයක් සිදුවී තිබේ නම් ඒවාට එරෙහිව කටයුතු කළ යුතුමය. ඒ පිළිබඳ විවාදයක් නැත. එහෙත් එහිදී රුපියල් දහ පහළොස් දාහට වඩා රුපියල් මිලියන ගණන් ප්‍රමුඛ විය යුතුය. ජනාධිපති මෛත්‍රීපාල සිරිසේන දෙසැම්බර් 11 වැනිදා රාත්‍රී පැවති ශ්‍රීලනිප හා පොහොට්ටු මන්ත්‍රීන්ගේ සාකච්ඡාවේදී ප්රකාශ කර ඇත්තේ රනිල් වික්‍රමසිංහ ආණ්ඩුවේ වංචා දූෂණ සෙවීමට ජනාධිපති පරීක්‍ෂණ කොමිෂමක් පත්කරන බවය. අලුත් කොමිෂන් පත්කිරීමත් කිනම් කාලයකට අයත් වුවත් වංචා දූෂණ සෙවීමත්, එම වංචා දූෂණවලට එරෙහිව නීති මඟින් කටයුතු කිරීමත් අප අගය කරන කාරණය.
තව තවත් වාර්තා ගොඩගසා ගැනීමට ප්‍රථම ජනාධිපතිවරයාට දැනටමත් ඔහු සතුව ඇති වාර්තා දෙකකින් බොහෝ වැඩ වංචා දූෂණවලට එරෙහිව කළ හැකිය. එකක් විශේෂ ජනාධිපති විමර්ශන කොමිෂන් සභා වාර්තාවය. අනෙක බැඳුම් කර වාර්තාවය. පළමුවෙන්ම කළ යුත්තේ මේ වාර්තා දෙක සම්පූර්ණ වශයෙන් ප්‍රසිද්ධියට පත්කිරීම හෝ පාර්ලිමේන්තුවට ඉදිරිපත් කිරීමය.
කළ යුතු නිවැරදි දේ නොකර ජනාධිපතිවරයා වහසිබස් දොඩවන බවත්, ඔහුගේ සෙවළ කථාවලට පදනමක් නොමැති බවත් දේශපාලනඥයන්ට භක්තිමත් නොවන මහජනයා දැන් හොඳින්ම දන්නා කරුණක්ය.
පරීක්‍ෂණ කොමිෂන් සභා වාර්තා නොවුණත් යහපාලන ආණ්ඩුව බලයට පත්වීමෙන් පසු රාජ්‍ය දේපල අවභාවිත කිරීම සම්බන්ධයෙන් සැකසූ වාර්තා කිහිපයක්ම ඇත්තේය. ඒවා පිළිබඳ ජනාධිපති මෛත්‍රීපාල සිරිසේන හොඳින්ම දැනුවත්ය. අතීත සිදුවීම්වලට අදාළව මතකය අමතකවීමේ ලක්ෂණ ඔහු මේ වනවිට දැඩිව පෙන්නුම් කරමින් සිටින නිසා එවන් වාර්තාව කරුණු කිහිපයක් ඔහුගේ අවධානයට යොමු කිරීම වටිනේයැයි සිතේ.
එම වාර්තාවන්නේ ජනාධිපති කාර්යාලය විසින් නඩත්තු කටයුතු සිදුකරනු ලැබූ වාහන ලැයිස්තුය. එම වාර්තාවල අඩංගු කරුණු කිහිපයක් පසුගිය ‘අනිද්දා’ පුවත්පතේ සඳහන් කර තිබූ අතර මෙවර අප උත්සාහ කරන්නේ ඊට වඩා තොරතුරු සංඛ්‍යාවක් ජනාධිපතිවරයාගේ මතකයට යොමුකරන්නටය.
එම වාහන ලැයිස්තුවට අනුව පැහැදිලි වෙන්කිරීම් කිහිපයක් හඳුනාගත හැකිය. ඒ දේශපාලනඥයන්ට, නිලධාරීන්ට, ජනාධිපති බිරිඳට, හමුදාවට, තරුණ කටයුතුවලට, පන්සල්වලට, ප්‍රාදේශීය කාර්යාලවලට , කළාකරුවන්ට හා බලවත් පුද්ගලයන්ට ආදි වශයෙන්ය.
රාජ්‍ය අයවැය අනුමත කරද්දී රජයේ කාර්යාල වශයෙන් ‘ජනාධිපති ආර්යාවගේ කාර්යාලය’ යනුවෙන් යුතු කාර්යාලයකට මුදල්වෙන් කිරීමක් සිදු නොකළද මෙහි ජනාධිපති බිරිඳගේ කාර්යාලයටද වාහන 3ක් වෙන්කර ඇත. එය කමක් නැතැයි මොහොතකට සිතුවද අදහගත නොහැකි තවත් වෙන්කිරීමක් මෙහි ඇත. එහි නම වන්නේ “සමීප ඥාතින්” යන්නය. VVIP හෙවත් අතිවිශේෂ පුද්ගලයන්ට වෙන් කර ඇති වාහන 151ක් වූ ලැයිස්තුවේ එම සමීප ඥාතීන්ගේ වාහන 5ට අයත් KM 8583 දරණ කාරයට මාසික කුලිය රුපියල් 50,000කි. KP 2383 අංකය දරණ කාරයට මාසික කුලිය රුපියල් 45,000කි. KP 2382 අංකය දරණ කාරයට මාසික කළිය රුපියල් 50,000කි. GY 9384 අංකය දරණ කාරයට මාසික කුලිය රුපියල් 50,000කි. KR 5382අංකය දරණ කාරයට මාසික කුලිය රුපියල් 120,000කි.
මෙම වාහන භාවිත කළ රාජපක්‍ෂවරුන්ගේ සමීප ඥාතීන් කවුරුන්දැයි දැන ගැනීමට සාමාන්‍ය මහජනතාව පමණක් නොව දේශපාලන කථිකාව තුළ සිටින පුද්ගලයන්ද කැමති බවට කිසිඳු සැකයක් නැත.
එමෙන්ම මෙම ලැයිස්තුවේ ඇති තරුණ කටයුතු අංශය යනු කුමක්දැයි යන්න හා එම අංශය භාවිත කළ වාහන 15 භාවිත කළ පුද්ගලයන් කවුරුන්ද යන්න හා එම අංශයට නායකත්වය ලබාදුන්නේ කවුරුන්ද යන්න පිළිබඳවද දැනගැනීමට ඉහත සඳහන් අය කැමති බවට සැකයක් නැත.
තවද නාවික හමුදාව වශයෙන් සඳහන්කර ඇති වාහන 18 භාවිත කළේ කවුරුන්ද යන්නද එම කටයුතු බාරව සිටියෝ කවුරුන්ද යන්න පිළිබඳව දැනගැනීමට තවදුරටත් ඉහත අය කැමති බවට සැකයක් නැත.
ඉහත වාහන 151 ක්වූ අති ප්‍රභූ ලැයිස්තුවේ ඇති විශේෂත්වය වන්නේ එම වාහන කුලී පදනම මත ලබාගෙන ඒවා භාවිත කළ පුද්ගලයන්ට ලබාදි තිබිමය. ඒවාහි මාසික කුලී මුදල රුපියල් 30,000සිට රුපියල් 175,000 දක්වා අගයක් ගනී.
මෙසේ මුදල් ගෙවා වාහන ලබාදුන් අය අතර පුජ්‍ය වටිනාපහ සෝමානන්ද හිමි, පූජ්‍ය ගැටමාන්නේ ගුණානන්ද හිමි, එගොඩ උයනේ ඥාණ විමල හිමි හා අක්මීමන දයාරත්න හිමි යන භික්ෂුන් සිටිති. දේශපාලනඥයන් ලෙස රජීව විජේසිංහ, සිවනේසතුරේ චන්ද්‍රකාන්තන් හෙවත් පිල්ලෙයාන්, මාධ්‍යම පළාත් ප්රධාන අමාත්‍යවරයා එස්.චන්ද්‍රසේකරන් මිය, රොහාන් අබේගුණසේකර, තිළිණ බණ්ඩාර තෙන්නකෝන්, ඒ.එච්.එම් අස්වර්, ප්‍රියංගනී අබේධීර, හීන්මහත්තයා ලියන්ගේ, වී.පුත්‍රසිගාමනි ආදීන් සිටී. එමෙන්ම විශේෂ රාජකාරි යනුවෙන් හැඳින්වූ ලැයිස්තුවේ අය අතර පසුගිය සතියේ සඳහන් කළ විමල් වීරවංශගේ පක්ෂයේ මන්ත්‍රීවරුන් ඇතුළු නියෝජිතයින්ට අමතරව වාසුදේව නානායක්කාර, චන්දන කත්‍රිආරච්චි ආදීන් සිටිති.
හිටපු නාවික හමුදාපතිවරු වූ සෝමතිලක දිසානායක , ජයනාත් කොළඹගේ ආදීන්ද, හසන් මවුලානා පූජක තුමාද, රොස්මන්ඞ් සේනාරත්නද, මහින්ද රාජපක්‍ෂගේ මස්සිනා වූ වෛද්‍ය ලලිත් චන්ද්‍රදාසද සිටී.
අනෙක් වාහන වූ කලී ජනාධිපති කාර්යාලයේ මෙහෙයවීමෙන් පාවිච්චි කළ රජයට අයත් වාහන 556 ක ලැයිස්තුවය. එහි එහි හිටපු ජනාධිපති මහින්ද රාජපක්‍ෂගේ නිල තනතුරු දරන්නන් මෙන්ම තනතුරු නොදරන්නන් හඳුනාගත හැකිය. නිල තනතුරු දරන්නන් පවා පාවිච්චි කළ වාහන ගණන අදහගත නොහැකි තරම් ඉහළ අගයක් ගනී. ගාමිණි සෙනරත් (ජනාධිපති කාර්ය මණ්ඩල ප්‍රධානී ලෙස) ගෝඨාභය රාජපක්ෂ (ආරක්ෂක අමාත්‍යංශයේ ලේකම් ලෙස), චමල් රාජපක්ෂ (කථානායක ලෙස) ලලිත් වීරතුංග (ජනාධිපති ලේකම් ලෙස) ඒ අතරින් කැපී පෙනේ.
එම ලැයිස්තුවේ සිටින දේශපාලනඥයන් අතර ඉදිරියෙන්ම ඉන්නේ සජින්වාස් ගුණවර්ධනය. ඔහු බාරයේ තිබී ඇති වාහන සංඛ්‍යාව 9ක්ය. ඊළඟට කප් ගසා ඇත්තේ ඩලස් අලහප්පෙරුම හා ශ්‍රී රංගා යන මන්ත්‍රීවරුන්ය. ඔවුන් දෙදෙනා වාහන දෙක බැඟින් භාවිත කර ඇත. අනෙක් දේශපාලනඥයන් වන්නේ වී.කේ . ඉන්දික, මහින්දානන්ද අලුත්ගමගේ, ප්‍රියංකර ජයරත්න, පී.දයාරත්න, නිර්මල කොතලාවල, සුසන්ත පුංචි නිලමේ, වඩිවෙල් සුරේෂ්, මර්වින් සිල්වා, නිශාන්ත මුතුහෙට්ටිගම, මිලින්ද මොරගෙ ාඩ, ලක්ෂ්මන් සෙනෙවිරත්න, නිමල් විජේසිංහ, අබ්දුල් කාදර්, උපෙක්ෂා ස්වර්ණමාලි, මනුෂ නානායක්කාර, අර්ල් ගුණසේකර හා භාරත ලක්ෂමන් ප්‍රේමචන්ද්‍රගේ බිරිඳ ආදීන්ය.
මෙම ලැයිස්තුවේ ඇති අනෙක් විශේෂත්වය වන්නේ පන්සල් ගණනාවකට හා බෞද්ධ භික්ෂුන් ගණනාවකටද වාහන ලබාදි තිබීමය. එම පන්සල් හා භික්ෂුන් වහන්සේලා වන්නේ යාපනය නාග විහාරය , සිතුල්පව්ව පන්සල, පූජ්‍ය මාතලේ අමරවංශ හිමි, පූජ්‍ය පල්ලත්තර සුමනජෝති හිමි, පූජ්‍ය ඇල්ලේ ගුණවංශ හිමි, දෙනියාය පන්සල, හෙල්ලල පන්සල, සියඹලාන්ඩුව පන්සල, මහානායක රෝහණ පාර්ශවය රුහුණු කතරගම දේවාලය, මල්වතු අස්ගිරි අනුනායක හිමිවරු, රුවන්වැලි සෑ මහ නායකහිමි. රාමඤ්ඤ නිකායේ මහානාහිමි, එල්ලාවල මේධානන්ද හිමි යන අයය.
මෙම සටහනේ සඳහන් කළ හා සඳහන් නොකළ මෙම ලැයිස්තුවල සිටින අයට වාහන ලබාදුන්නේ කිනම් හේතුවකටද යන්න ඇත්ත වශයෙන්ම මේ රටේ පුරවැසියන් දැන ගත යුතුය. ඒ මේ සඳහා වැය කළ මුදල් මහජන මුදල් වන බැවිනි.■
රාජ්‍ය විරෝධී කුමන්ත්රණය විසින් රජයේ පදනම් විනාශකර දැමූ හැටි
ජනාධිපති මෛත්‍රීපාල සිරිසේන විසින් මහින්ද රාජපක්ෂ ද හවුල් කරගෙන සිදු කරන ලද කුමන්ත්‍ර‍ණයට මේ වන විට දින 50ක් ගතවෙමින් තිබේ. චිත්‍ර‍පටයක් පවා දින 50ක් එක දිගට පෙන්වීම සැමරුම් අවස්ථාවකි. කුමන්ත්‍ර‍ණයට දින 50ක් ගතවන විට සිදු වී තිබෙන්නේ කුමක්දැයි විමසා බැලීම වැදගත් ය.
මෙම අර්බුදය හේතුවෙන් ලොකුම අලකලංචිය සිදු වූයේ ආර්ථිකයට ය. අර්බුදයට විසඳුමක් නොදී මේ තත්ත්වය දිග්ගැසෙමින් ගතවෙන සෑම දිනයක් පාසාම රුපියල් මිලියන 2000කට අධික වැය බරක් ලංකාවේ ආර්ථිකයට ඇති වන බව චම්පික රණවක මන්ත්‍රීවරයා ප්රකාශ කළේ ය. ”හැමෝටම තේරෙන්න සරලවම කියනවා මේ ප්‍රශ්නය නිසා මේක විසඳෙන තුරු සෑම දිනයකටම රුපියල් 100 බැගින් අපේ රටේ ජනතාවට බර පැටවීමක් සිදුවෙනවා,” යි ඔහු පැවසී ය.
ශ්‍රී ලංකාවේ ආර්ථිකයේ මේ වන විට සිදු වන මූලික කාර්යය වන්නේ ණය ගෙවීම සඳහා ණය ගැනීම යි. ඒ සඳහා රටේ ණය ගෙවීමේ හැකියාව පවත්වාගෙන යා යුතු ය. එහෙත්, මෙම අර්බුදය හේතුවෙන් මූඩි, ෆිච්, ස්ටෑන්ඩඞ් ඇන්ඞ් පුවර්ස් යන ප්රධාන ජාත්‍යන්තර ණය ශ්‍රේණිගතකිරීමේ ආයතන තුන ම විසින් ශ්‍රී ලංකාව පහත හෙළා තිබේ. ණය ආපසු ගෙවීමේ අවදානම ඉහළ රටක් ලෙස හඳුනාගැනීමෙහි ප්‍ර‍තිඵලයක් ලෙස දැන් ශ්‍රී ලංකා රජයට ණය ලබාගැනීම පහසු නැත. එහෙත් අපට ණය නොගෙන පැවතිය නොහැකි නිසා සිදු වන්නේ ඉහළ පිරිවැයක් යටතේ ණය ලබාගන්නටයි.
දේශපාලන අර්බුදය නිසා ජාත්‍යන්තර මූල්‍ය අරමුදල විසින් ශ්‍රී ලංකාවට ලබා දෙන්නට සිටි ණය මුදලකුත් නවත්වන ලදි. මේ ණය පාවිච්චි කරන්නට නියමිතව තිබුණේ රටේ විදේශ සංචිත ශක්තිමත් කරගන්නටයි. 2016 ජුනි 3 අනුමත කරන ලද ජාත්‍යන්තර අරමුදලේ එක්සත් ජනපද ඩොලර් බිලියන 1.5ක ණය මුදලින් ඩොලර් මිලියන 250කට ආසන්න හයවන කොටසයි මෙසේ නවතා දමා තිබෙන්නේ. ජාත්‍යන්තර මූල්‍ය අරමුදල විසින් මෙම ණය ලබා දී තිබෙන්නේ පුළුල් ආර්ථික ප්‍ර‍තිසංස්කරණ සිදුකිරීමේ කොන්දේසි මතයි. කරන ලද ආර්ථික ප්‍ර‍තිසංස්කරණ නිරීක්ෂණය කිරීමෙන් අනතුරුවයි මෙම ණය වාරික වශයෙන් නිකුත් කරන්නේ. බදු ප්‍ර‍තිපත්තිය, ඉන්ධන මිල සූත්‍ර‍ය වැනි ආර්ථික ප්‍ර‍තිසංස්කරණ ක්‍රියාත්මක කරනු ලැබුවේ මෙම ණය සඳහා කොන්දේසි ලෙසයි. ඔක්තෝබර් 26දා බලය අල්ලාගන්නා ලද නීති විරෝධී රජය විසින් ඉන්ධන මිල සූත්‍ර‍ය අහෝසි කරන ලදි. මිල සූත්‍ර‍ය පැවතියා නම් ලෝක වෙළඳපොළේ ඉන්ධන මිල පහළ යාම සමග මේ වන විට ලංකාවේ තෙල් මිල මීට වඩා අඩු විය හැකි ය.
එක්සත් ජනපදයේ මිලෙනියම් චැලේන්ජ් සහයෝගිතාව යටතේ ලංකාවට ලැබෙන්නට තිබුණු ආපසු නොගෙවිය යුතු ඩොලර් මිලියන 450ක් සිරිසේන මහින්ද කුමන්ත්රණය හේතුවෙන් රටට අහිමි වන තර්ජනයක් පැනනැගී ඇත. දේශපාලන අර්බුදය හේතුවෙන් මේ වන විට එය අත්හිටුවා තිබේ. මේ මුදල් ආයෝජනය කරන්නට නියමිතව තිබුණේ මිනින්දෝරු කටයුතු, ඔප්පු සැකසීම්, ට්‍රැෆික් පාලනය සහ ප්‍රාදේශීය පාරවල් හැදීම වැනි කටයුතුවලට ය. කොළඹ සැහැල්ලු දුම්රිය ව්‍යාපෘතිය වෙනුවෙන් ජපානය ලබාදෙන්නට නියමිතව තිබුණු ඩොලර් බිලියන 1.4 ක ආධාරය ද මේ අන්දමින් ම අත්හිටුවා තිබේ. එයින් ඩොලර් මිලියන 400ක් ලැබෙන්නට ආසන්නව තිබිණි. මේ විදේශ ප්‍රාග්ධනයන් රට තුළට ගලා ඒම ශ්‍රී ලංකාවේ ගෙවුම් ශේෂය තුලනය කරගැනීම සඳහා අත්‍යවශ්‍ය වූ අතර ඒවා අහිමි වීම දරුණු ප්‍ර‍තිවිපාක ඇති කරයි.
මේ වසරේදී ශ්‍රී ලංකාව සංචාරක කර්මාන්තයෙන් උපයන ආදායම ඩොලර් බිලියන 3.5ක් වනු ඇතැයි අපේක්ෂා කර තිබුණු නමුත්, අර්බුදය නිසා මේ වන විට යුරෝපය, ඇමරිකා එක්සත් ජනපදය, ඉන්දියාව වැනි රටවලින් පැමිණෙන්නට නියමිතව සිටි සංචාරකයෝ සිය සංචාර අවලංගු කරමින් සිටිති. එයින් ඩොලර් 400,000ක පමණ පාඩුවක් රටට සිදු වනු ඇතැයි කර්මාන්ත අංශ ගණන් බලා තිබේ.
ඇමරිකා එක්සත් ජනපදයේ ජාතිකවාදී ආර්ථික ප්‍ර‍තිපත්ති හේතුවෙන් ශ්‍රී ලංකාවෙන් පිටතට ප්‍රාග්ධනය ගලායාමේ ප්‍ර‍වණතාවක් අර්බුදයට පෙර සිට ම තිබුණ අතර ඔක්තෝබර් 26දායින් පසුව එය වේගවත් විය. මේ වන විට ශ්‍රී ලංකාවේ විදේශ සංචිත ප්රමාණය ද අඩු වෙමින් තිබේ. මෙම වසර අවසානය වන විට ශ්‍රී ලංකාවේ විදේශ සංචිත ප්රමාණය ඇ.ඩො බිලියන 9.5ක දක්වා ඉහළ යනු ඇතැයි අපේක්ෂා කරන බව ශ්‍රී ලංකා මහ බැංකුව ජුනි මාසයේදී නිවේදනය කළේ ය. එහෙත් දැන් මෙම ඉලක්ක සපුරාගත නොහැකි තත්වයක් ඇති වී තිබේ. ඉදිරි වසර හතර – පහ තුළ වසරකට ඇ.ඩො. බිලියන 3.9ක පමණ මුදලක් ණය වාරික වශයෙන් ගෙවිය යුතු බවත්, ඉතා සංයමයෙන් යුතුව විදේශ සංචිත හැසිර විය යුතු බැවින් එයට සරිලන අයුරින් ශ්‍රී ලංකා මහ බැංකුව විසින් විදේශ සංචිත ක්‍රමිකව ගොඩනගමින් පවතින බවත්, මෙය ඉදිරි වසරවලදී ණය කළමනාකරණය සඳහා බෙහෙවින් උපකාරී වනු ඇති බවත් ශ්‍රී ලංකා මහ බැංකු අධිපති අධිපති ආචාර්ය ඉන්ද්‍රජිත් කුමාරස්වාමි මහතා ජුනි මාසයේදී ප්රකාශ කළේය. එහු වැඩිදුරටත් පැවසුවේ පසුගිය රජය විසින් 2007 වසරේ සිට ජාත්‍යන්තර මූල්‍ය වෙළෙඳපොළෙන් වාණිජ පොලිය මත ලබා ගත් ණය එකවර කල් පිරීම හේතුවෙන් සහ එම කාලය තුළ අපනයනය වැඩි කිරීම සඳහා දිගු කාලීන සැලසුම් ක්‍රියාත්මක නොකිරීම හේතුවෙන් මෙසේ ණයබරතාව උග්‍ර වී ඇති බව යි.
කුමන්ත්රණය විසින් මේ වන විට රට ආර්ථික වශයෙන් දරුණු අර්බුදයකට ඇද දමා ඇති බව ඉහත දක්වන ලද සාක්ෂිවලින් පැහැදිලි වේ. මෙය ව්‍යවස්ථා කුමන්ත්රණයක් පමණක් නොව රජය විනාශ කරන රාජ්‍ය විරෝධී කුමන්ත්රණයක් වන්නේ ඒ නිසා ය. එමගින් සිදු කර තිබෙන්නේ රාජ්‍යයේ පදනම් බිඳදැමීම යි. ව්‍යවස්ථාදායකය කඩාකප්පල් කිරීම යි. එමගින් මේ වන විට රටේ ආණ්ඩුක්‍ර‍මය ද තියුණු අර්බුදයකට ලක් කර තිබේ. ජනාධිපතිවරයා කටයුතු කර තිබෙන්නේ ව්‍යවස්ථාව මුළුමනින් ම උල්ලංඝනය වන අන්දමින් බව අපගේ අදහසයි. කෙසේ වෙතත්, මේ වන විට ඒ සම්බන්ධයෙන් අධිකරණ විමර්ශනයක් සිදුවෙමින් තිබේ. මෙම ලිපිය පළ වන විට ශ්‍රේෂ්ඨාධිකරණය ඒ සම්බන්ධයෙන් තම තීන්දුව ප්රකාශයට පත් කර තිබෙන්නට පුළුවන. එමගින් ජනාධිපතිවරයා ව්‍යවස්ථාව උල්ලංඝනය කර ඇති බව ඔප්පු වුවහොත් මෙම රාජ්‍ය විරෝධී කුමන්ත්රණය අලුත් තලයකට පැමිණෙන බව පැවසිය යුතු ය.
ජනාධිපතිවරයා එක්කෝ තමන් විසින් මුල පුරන ලද කුමන්ත්රණය විප්ලවීය දිශානතියකට යොමු කරමින් ව්‍යවස්ථාව මුළුමනින් ම අත්හැර දමා අලුත් ආණ්ඩුක්‍ර‍මයක් බිහිකිරීම සඳහා බලහත්කාරී ලෙස දිගට ම ක්‍රියා කරගෙන යා යුතු ය. නැතිනම්, රාජ්‍ය විරෝධී කුමන්ත්රණය සම්බන්ධයෙන් වන්දි ගෙවිය යුතු ය. පසුගියදා දෙරණ රූපවාහිනියේ අංශක 360 වැඩසටහනට සහභාගි වෙමින් ජවිපෙ දේශපාලන මණ්ඩල සාමාජික ලාල් කාන්ත පැවසූ පරිදි කැරැලි අසාර්ථක වූ අවස්ථාවේදී ජවිපෙට ප්‍ර‍තිප්‍ර‍හාර දුන් ආකාරයෙන් ම මේ රාජ්‍ය විරෝධී කුමන්ත්‍ර‍ණකරුවන්ට ද සැලකිය යුතු ය.■
■ අජිත් පැරකුම් ජයසිංහ
නාවික සාක්ෂිකරුගේ වෛද්‍ය වාර්තා අතුරුදන්
තරුණයන් පස් දෙනෙකු ඇතුළු පුද්ගලයන් එකොළොස් දෙනෙකු කප්පම් ගැනීම සඳහා පැහැරගෙන ගොස් අතුරුදන් කිරීමේ නඩුවේ ප්රධාන සාක්ෂිකරු වන නාවික හමුදා ලුතිනන් කමාන්ඩර් ගලගමගේ ලක්සිරිගේ වෛද්‍ය වාර්තා ලිපිගොනුවේ ඇති ලියවිලි කිහිපයක් ඇතුරුදන් වී ඇත.
මේ සම්බන්ධයෙන් ලුතිනන් කමාන්ඩර් ගලගමගේ ලක්සිරි විසින් දෙසැම්බර් 12 දින CIB II 127/81 යටතේ කොළඹ කොටුව පොලීසියට පැමිණිල්ලක් ඉදිරිපත් කර ඇත.
එම පැමිණිල්ලෙන් ඔහු කියා ඇත්තේ නාවික හමුදාවෙන් විශ්‍රාම ලැබීම සඳහා වෛද්‍ය පරීක්ෂණයට මුහුණදීමේදී ඔහුගේ වෛද්‍ය වාර්තා කිහිපයක් අතුරුදන් වී ඇති බව දැනගත් බවයි.
පුද්ගලයන් 11 දෙනෙකු අතුරුදන් කිරීම පිළිබඳ නඩුවේදී ආරක්ෂක මාණ්ඩලික ප්‍රධානී අද්මිරාල් රවීන්ද්‍ර විජේගුණරත්න වෙනුවෙන් පෙනීසිටි නීතිඥයා ලුතිනන් කොමාන්ඩර් ගලගමගේ ලක්සිරිට මානසික ආබාධයක් ඇතැයි ප්‍රකාශයක් කර ඇත. එම ප්‍රකාශයත් ලිපිගොනුවේ වෛද්‍ය වාර්තා අතුරුදන්වීමත් අතර සම්බන්ධයක් ඇතැයි ගලගමගේ ලක්සිරි සිය පැමිණිල්ලේ සඳහන් කර ඇත.
ඔහු වැඩිදුරටත් පැමිණිල්ලේ සඳහන් කර ඇත්තේ එම නඩුවේ සාක්ෂිකරු වූවායින් පසු ඔහුට නාවික හමුදාවේ කිසිදු රාජකාරියක් නොපවරා, කඳවුරෙන් එළියට යෑමට ඉඩනොදී මාස 9ක කාලයක් කාමරයක සිරකරගෙන සිටි බවත්, එම කාලයේදී ඇතිවූ කකුලේ ආබාධයකට ප්‍රතිකාර ගැනීමට යෑමේදී ඔහුගේ තත්ත්වය පිළිබඳ විමසන විට ඔහු සිරකර තැබීමෙන් සිදුවූ මානසික ආතතිය සමනය වීම සඳහා වෛද්‍යවරයා විසින් නින්ද යෑම සඳහා බෙහෙත් නියමකර තිබුණු බවයි.
තමාගේ ලිපිගොනුවෙන් අතුරුදන් වී ඇත්තේ එම වාර්තා බවත් අධිකරණයේදී ප්රකාශ කර ඇත්තේ එම කරුණු බවත් ලුතිනන් කමාන්ඩර් ගලගමගේ ලක්සිරි වැඩිදුරටත් ප්රකාශ කර ඇත.■
රනිල්ට නොදී ඉන්න බලපෑම්
ශ්‍රේෂ්ඨාධිකරණය පාර්ලිමේන්තුව විසිරවීම පිළිබඳව කුමන තීරණයක් ලබා දුන්නද, දැනට අත්හිටුවා තිබෙන ආණ්ඩුව බලහත්කාරයෙන් පවත්වාගෙන යායුතුයැයි විමල් වීරවංශ ප්‍රමුඛ බොහෝ දෙනෙකු ජනපති මෛත්‍රීපාල සිරිසේනට සහ පාර්ලිමේන්තු මන්ත්‍රී මහින්ද රාජපක්ෂට බලකරමින් ඇතැයි අනිද්දා වෙත වාර්තා වෙයි.
බරපතළ රනිල් විරෝධයක පසුවෙන මෙම මන්ත්‍රීවරුන් බොහෝ දෙනෙක් නැවත රනිල් වික්‍රමසිංහට අගමැති ධුරය නොදෙන්නැයි ජනපති සිරිසේනට බලකරමින් සිටිති. ඔවුන් මහින්ද රාජපක්ෂටද පවසා ඇත්තේ නීති විරෝධී ලෙස අගමැති ධුරයේ කටයුතු කරන ලෙසය.
මෙලෙස බලකරන මේ පිරිස ජනවාරි 8න් පසුව ජනාධිපතිවරණයකට හෝ ජනමත විචාරණයකට යෑම සුදුසු යැයි යෝජනා කරමින් ඇත. මෙම තත්ත්වය තුළ ශ්‍රීලනිපය තුළ මෙන්ම පොදුජන පෙරමුණ තුළද බරපතළ මත ගැටුමක් නිර්මාණය වී ඇතැයි දැනගන්නට ලැබේ.■
පරාජය පිළිගෙන ඒකාබද්ධය විපක්ෂයට යා යුතුයි
මේ වනවිට තම කණ්ඩායමට පාර්ලිමේන්තුවේ බහුතරයක් නොමැති බව පැහැදිලි වී තිබෙන නිසා, විපක්ෂයේ අසුන් ගැනීම හැර වෙනත් තීරණයක් ගැනීමේ ඉඩක් නැතැයි අනිද්දා සමග අදහස් දැක්වූ ඒකාබද්ධ විපක්ෂයේ පාර්ලිමේන්තු මන්ත්‍රීවරු පිරිසක් පැවසූහ.
පුවත්පත මුද්‍රණයට යන විටත් ශ්‍රේෂ්ඨාධිකරණ තීන්දුවෙන් පසුව ඒකාබද්ධ විපක්ෂ කණ්ඩායම විසින් එම තීන්දුව පිළිබඳව පැවැත්වූ සාකච්ඡාව අවසන් වී තිබුණේ නැත. එසේ වුව ආණ්ඩුව අත්හැර විපක්ෂයට යෑම තමන්ගේ මතය වී ඇතැයි එම සාකච්ඡාවට පෙර අනිද්දා සමඟ අදහස් දැක්වූ මන්ත්‍රීවරු පැවසූහ.
ප්‍රජාතන්ත්‍රවාදයට ගරු නොකරන බව කලෙක පටන් තම කණ්ඩායමට තිබුණු ප්රධාන චෝදනාවක් බවත්, ඔක්තෝබර් 26 කුමන්ත්රණය නිසා එම චෝදනාව යළිත් වරක් තම ඔඩොක්කුවට දමාගැනීමට සිදුවූ බවත් අනිද්දා සමඟ අදහස් දැක්වු එක් මන්ත්‍රීවරයෙක් පැවසීය. තවදුරටත් බලයේ රැඳීමට උත්සාහ කළහොත් එය තව තවත් ප්‍රජාතන්ත්‍ර විරෝධී වීමක් බවද ඔහු කීය. තම කණ්ඩායම ප්‍රජාතන්ත්‍රවාදයේ ගිනිසිළුව තමන් අතට ගත යුතු බවත්, ප්‍රජාතන්ත්‍රවාදය ගරු කරන පුද්ගලයන්ගේ ගෞරවය දිනාගත යුතු බවත් විපක්ෂ කණ්ඩායමකට ආණ්ඩු බලය ලබාගැනීමට තිබෙන හොඳම ක්‍රමය එය බවත් ඔහු පැවසීය.■
ඊවා නැති විනිසුරු මඬුල්ලක් ඉල්ලයි
පාර්ලිමේන්තු මන්ත්‍රී මහින්ද රාජපක්ෂ ඇතුළු කණ්ඩායම විසින් අභියාචනාධිකරණය විසින් නිකුත් කළ ක්වෝ වොරොන්ටෝ ආඥාවට එරෙහිව ශ්‍රේෂ්ඨාධිකරණයට ඉදිරිපත් කර තිබෙන අභියාචනය විභාග කිරීම සඳහා ශ්‍රේෂ්ඨාධිකරණ විනිසුරු ඊවා වනසුන්දර නොමැති පස් දෙනෙකුගෙන් යුතු විනිශ්චය මණ්ඩලයක් ඉල්ලා එක්සත් ජාතික පක්ෂය විසින් ශ්‍රේෂ්ඨාධිකරණයට මෝසමක් ගොනු කර ඇත.
මහින්ද රාජපක්ෂ ඇතුළු කණ්ඩායම විසින් නීති විරෝධී ලෙස පවත්වාගෙන ගිය ආණ්ඩුවේ ඔවුන්ගේ ධුර තාවකාලිකව බල රහිත කරමින් අභියාචනාධිකරණය විසින් අදාළ ක්වෝ වොරොන්ටෝ ආඥාව නිකුත් කර තිබුණි. ඒ සම්බන්ධයෙන් මහින්ද රාජපක්ෂ ඇතුළු කණ්ඩායම විසින් ඉදිරිපත් කර තිබුණු අභියාචනය දෙසැම්බර් 12 වැනිදා කැඳවා තිබුණි. එය දෙසැම්බර් 14 වැනිදා යළි විභාගයට ගැනීමට නියමිතය.
අනුරංග ජයසිංහ
ජනමත විචාරණ අදහස අත්හරියි
ශ්‍රේෂ්ඨාධිකරණය විසින් පාර්ලිමේන්තුව විසුරුවාහැරීම නීති විරෝධී බවට තීන්දුවක් ලබාදුනහොත්, මහ මැතිවරණයක් පැවැත්වීම සම්බන්ධයෙන් ජනමත විචාරණයක් පැවැත්විය යුතුය යන අදහස තම කණ්ඩායම විසින් අතහැර දැමූ බව අනිද්දා සමග අදහස් දැක්වූ ඒකාබද්ධ විපක්ෂ මන්ත්‍රීවරයෙක් පැවසීය.
පාර්ලිමේන්තුව විසිරවීම ව්‍යවස්ථානුකූල නොවන බවට ශ්‍රේෂ්ඨාධිකරණය විසින් තීන්දුවක් ලබාදීමෙන් පසුව ජනමත විචාරණයක් පැවැත්වුවද මහමැතිවරණය පැවැත්වීමට නීත්‍යනුකූල අවසරයක් ලැබෙන්නේ නැතැ’යි අනිද්දා සමග අදහස් දැක්වූ මන්ත්‍රීවරයා පැවසීය.
කෝටි ගණනාවක් වියදම් කොට ජනමත විචාරණයක් පවත්වා ජයගත්තද එය ජනතාවගේ මතය විමසීමක් පමණක් බවත්, ඉන්පසුවද පාර්ලිමේන්තුවේ තුනෙන් දෙකක අනුමැතියක් නොලබා මැතිවරණයක් පැවැත්වීමට හැකියාවක් නොලැබෙන බවත් ඔහු පැවසීය.
ජනමත විචාරණයක් පවත්වා ජනතා අනුමැතියක් ලබාගෙන මහමැතිවරණයක් පැවැත්විය හැකි බව මීට පෙර ජී.එල්. පීරිස්, ආචාර්ය ජයතිස්ස ද කොස්තා වැනි අය විසින් පවසා තිබුණු අතර ජෝන් සෙනෙවිරත්න, වාසුදේව නානායක්කාර වැනි පාර්ලිමේන්තු මන්ත්‍රීවරුන් විසින්ද මීට පෙර ඒ බව ප්රකාශ කර තිබුණි.
කෙසේ වෙතත් පසුගිය දිනවල ඒකාබද්ධ විපක්ෂයේ අභ්‍යන්තර සාකච්ඡාවලදී එම කණ්ඩායමේ බහුතරයකගේ අදස වී ඇත්තේ එවැනි නීතිමය තත්ත්වයක් නොමැති බවත්, ජනමත විචාරණයකින් ප්‍රයෝජනයක් නොමැති බවත්ය.
අනුරංග ජයසිංහ
අගමැති රනිල් මෛත්‍රී කැමති වෙයි
ශ්‍රේෂ්ඨාධිකරණ නඩු තීන්දුවෙන් පසු රනිල් වික්‍රමසිංහ වෙත යළිත් අගමැතිධුරය ලබාදෙමින් ඔක්තෝබර් 26 වැනිදා තිබුණු තත්වයට යළි රට ගෙනයෑමට ජනාධිපති මෛත්‍රීපාල සිරිසේන එකඟ වී ඇතැයි වාර්තා වෙයි.
ජනාධිපති මෛත්‍රීපාල සිරිසේන, කතානායක කරූ ජයසූරිය සමඟ පවත්වා ඇති සාකච්ඡාවලදී කතානායකවරයාට ඒ පිළිබඳ එකඟතාව ප්රකාශ කර තිබේ. ජනාධිපති මෛත්‍රීපාල සිරිසේන සහ කතානායක කරූ ජයසූරිය අතර පසුගිය සති දෙකක කාලය තුළ වරින් වර දූරකථන මාර්ගයෙන් හා මුණගැසී සාකච්ඡා කිහිපයක් පවත්වා ඇත.
එහිදී කතානායකවරයා පෙන්වා දී ඇත්තේ පාර්ලිමේන්තුවේ බහුතරය මහින්ද රාජපක්ෂ පාර්ශ්වයට නැති බව පැහැදිලිවම පෙනී ගොස් තිබෙන බවත්, එවැනි පසුබිමක ඔවුන්ට ආණ්ඩුවක් පවත්වාගෙන යා නොහැකි බවත්ය. එක්සත් ජාතීන්ගේ සංවිධානය, පොදුරාජ්‍ය මණ්ඩලය ඇතුළු ජාත්‍යන්තර සංවිධාන රැසක් මෙන්ම විදේශීය රජයන් රැසක් මේ පිළිබඳව උනන්දුවෙන් සිටින බවත් ව්‍යවස්ථානුකූලව කටයුතු කරන ලෙස ජනාධිපතිවරයාට දන්වා තිබෙන බවත් කතානායකවරයා වැඩිදුරටත් පෙන්වා දී ඇත.
රනිල් වික්‍රමසිංහ නම් පුද්ගලයා මත පදනම්ව නොව, ඔක්තෝබර් 26 වැනිදාට පෙර තිබුණු තත්ත්වයට යා යුතුය යන අදහස මත පදනම්ව රනිල් වික්‍රමසිංහ අගමැති ධුරයට පත් කිරීම සඳහා එහිදී ජනාධිපති මෛත්‍රීපාල සිරිසේන එකඟ වී ඇත.
කෙසේ වෙතත් ජනාධිපති මෛත්‍රීපාල සිරිසේන එකඟ වූ ආකාරයට කටයුතු කරනු ඇතිදැයි විශ්වාසයක් නොමැති බව එක්සත් ජාතික පෙරමුණට සමීප ආරංචි මාර්ග ප්රකාශ කරයි.
මේ අතර ජනාධිපතිවරයාට සමීප ආරංචි මාර්ග ප්රකාශ කරන ආකාරයට පාර්ලිමේන්තුවේ 225ක් අත්සන් කළද රනිල් වික්‍රමසිංහට කිසිසේත්ම අගමැතිධුරය ලබා නොදෙන බවට ජනාධිපතිවරයා කළ ප්‍රකාශය එක්සත් ජාතික පක්ෂයේ අනාගත යහපත තකා කී ප්‍රකාශයක් පමණක්යැයි ජනාධිපතිවරයාට සමීප කණ්ඩායම් විසින් ඉදිරියේදී ප්‍රචාරය කිරීමට නියමිතය.■