ඝාතනයට ලක්වූ වැලිගම ප්‍රාදේශීය සභාවේ සභාපති ලසන්ත වික්‍රමසේකර තමාට පොලිස්පතිවරයාගෙන් ආරක්ෂාව ඉල්ලා ඇති බව මෑතකදී දැනගත් බවද, ඔහුට පොලීසිය ආරක්ෂාව ලබාදී නැත්තේ ලියාපදිංචි අපරාධකරුවන්ට ආරක්ෂාව සැපයීමට නොහැකි නිසා බවද මහජන ආරක්ෂක ඇමති ආනන්ද විජේපාල අනිද්දා කළ විමසීමකදී පැවසීය.

ඔහු ඒ බව පැවසුවේ ඝාතනයට ලක්වූ වැලිගම ප්‍රාදේශීය සභාවේ සභාපතිවරයා ආරක්ෂාව ලබාදෙන ලෙස පොලිස්පතිවරයාගෙන් කළ ඉල්ලීම පිළිබඳ හා ඒ සම්බන්ධයෙන් පොලීසිය ගෙන ඇති පියවර සම්බන්ධයෙන් කළ විමසීමේදීය.
මහජන ආරක්ෂක ඇමතිවරයා පැවසුවේ යම් අයකු ආරක්ෂාව ඉල්ලුවොත් එය සලකා බලන කමිටුවක් පවතින බවත්, එම කමිටුවේ නිර්දේශ මත ආරක්ෂාව සපයන බවත්ය. එසේම වින්දිතයන්ට හා සාක්ෂිකරුවන්ට එයට අදාළ ආයතනය යටතේ ආරක්ෂාවේ ප්‍රශ්නයක් ඇත්නම් ආරක්ෂාව සපයන බවද ඇමතිවරයා පැවසීය.

පාතාලය සම්බන්ධයෙන් විමර්ශන පවතින, නඩු පවතින අපරාධකරුවකු අපරාධ කර පොලිස් ආරක්ෂාව පතනවා නම් එය කළ නොහැකි බවත්, එසේ ආරක්ෂාව සැපයුවොත් ඝාතන සිදුකරන පුද්ගලයන් නීත්‍යනුකූලව ආරක්ෂාව ඉල්ලනු ඇති බවත් ඔහු පැවසීය.

මහජන නියෝජිතයෙකු ආරක්ෂාව ඉල්ලූ විටත් එය සිදුකළ නොහැකිදැයි ඔහුගෙන් කළ විමසීමේදී පැවසුවේ මහජන නියෝජිතයන් ලෙස නීතිගරුක පුරවැසියන් යෙදවීමට දේශපාලන පක්ෂ වගබලාගත යුතු බවයි. එසේ වුවද මෙම සිදුවීම සම්බන්ධයෙන් කණ්ඩායම් 4ක් විමර්ශනය කරන බවත්, දැනට සාර්ථක තොරතුරු ලැබී ඇති බවත්, සිද්ධියට සම්බන්ධ පුද්ගලයන් වහාම නීතිය ඉදිරියට ඉදිරිපත් කිරීමට බලාපොරොත්තු වන බවත් ඇමතිවරයා පැවසීය.

ඝාතනයට ලක්වූ වැලිගම ප්‍රාදේශීය සභාවේ සභාපති ලසන්ත වික්‍රමසේකර 2025.08.29 දින සහිතව ආරක්ෂාව සපයන ලෙස ඉල්ලමින් පොලිස්පතිවරයාට යවන ලද ලිපියක් විපක්ෂ නායක සජිත් ප්‍රේමදාස ඔක්තෝබර් 23 වැනිදා පාර්ලිමේන්තුවට ඉදිරිපත් කළේය.

‘මාගේ ජීවිතාරක්ෂාව සලසා ගැනීම සම්බන්ධයෙනි’ යනුවෙන් එහි උද්ධෘතය සඳහන් වේ. වැලිගම ප්‍රාදේශීය සභාවේ සභාපතිවරයා වශයෙන් දිවුරුම් දීමට ආසන්න කාල සීමාවේ සිට ඔහුට විවිධ පාර්ශ්වයන්ගෙන් තර්ජන එල්ල වූ බවත්, සභාපතිවරයා වශයෙන් දිවුරුම් දීමට අවස්ථාව නොදෙන බවට තර්ජන එල්ල වූ බවත් එහි සඳහන් කරයි.

එයට අමතරව විවිධ පාර්ශ්ව විසින් සමාජ මාධ්‍ය ජාලා හරහා තර්ජන එල්ල කරන බවත්, ඒ සම්බන්ධයෙන් අවස්ථා කිහිපයකදී පොලීසිය දැනුවත් කිරීමට කටයුතු කළ බවත්, එම තර්ජන පිළිබඳ අවධානයෙන් සිටින ලෙස පොලීසිය දැනුම් දුන් බවත් සඳහන් කරයි.

ඔහු අධිකරණයට පැමිණෙන අවස්ථාවකදී හෝ ප්‍රාදේශීය සභාවට පිටත්ව යන අවස්ථාවකදී ඝාතනය කිරීමට උත්සාහ දරන බවට විශ්වාසයක් පවතින බවත්, ඒ සම්බන්ධයෙන් ප්‍රධාන පාතාල කල්ලි ගණනාවක් තර්ජන කර ඇති බවත්, එම ලිපිය ලියන දිනයට පෙර දිනයේද මිදිගම රුවන් හෙවත් රුවන් ජයසේකර නැමැති පුද්ගලයා ෆේස්බුක් පොස්ටුවක් පළකර ඇති බව දැනගන්නට ලැබුණ බවත්, විවිධ පුද්ගලයන්ගේ නම් පළකර ඔහු ඔවුන්ගේ සමීපතමයකු බව සඳහන් කරමින් ජීවිතයට තර්ජනයක් වන ආකාරයේ තොරතුරු මාධ්‍ය හා සමාජ මාධ්‍ය හරහා සමාජය වෙත මුදා හැර ඇති බවත් සඳහන් කරයි.

එම කරුණු අනුව තම ජීවිතයට බරපතළ තර්ජනයක් ඇති බැවින් ජීවිත ආරක්ෂාව වෙනුවෙන් සුදුසු ක්‍රියාමාර්ගයක් ගන්නා ලෙස එහි වැඩිදුරටත් ඉල්ලා තිබේ.

විපක්ෂ නායකවරයා එහිදී වැලිගම ප්‍රාදේශීය සභා සභාපතිවරයා 2025 සැප්තැම්බර් 01 දින ඉදිරිපත් කර ඇති දිවුරුම් ප්‍රකාශයක්ද පාර්ලිමේන්තුවට ඉදිරිපත් කර ඇති අතර එහි ඔහුට ඇති තර්ජනවල ස්වරූපයන් සඳහන් කරමින් ඉල්ලා සිටින්නේ රාජකාරි වේලාවේදී හා පසුවත් සුදුසු ආරක්ෂාවක් ඔහු වෙත ලබාදීමට කටයුතු කරන ලෙසයි.

ජාතික තරුණ සේවා සභාවේ තරුණ සමුළුවට සහභාගි වූ දිස්ත්‍රික් නායකයින් තෝරාගැනීමේදී ආණ්ඩුවේ දේශපාලන අධිකාරිය හා යම් නියෝජිතයන් මැදිහත්ව එය දේශපාලනීකරණය කළ බවට බොහෝ දිස්ත්‍රික්කවල තරුණ නායකයින් මෙන්ම දේශපාලඥයින්ගෙන්ද චෝදනා එල්ල විය.‍ ඒ කුමන හෝ ක්‍රමවේදයක් මත තරුණ නායකයින් තෝරාගැනීමෙන් පසුව, ජාතික තරුණ සේවා සභාව මගින් සංවිධානය කරන ලද යුත් ක්ලබ් ජාතික තරුණ සමුළුව 2025 අගෝස්තු 12 වන දින ජනාධිපති අනුර කුමාර දිසානායක මහතාගේ ප්‍රධානත්වයෙන් කොළඹ සුගතදාස ගෘහස්ථ ක්‍රීඩාංගණයේ දී පැවැත්විණි.

මෙම දැවැන්ත ජාතික වැඩසටහන සඳහා ජාතික තරුණ සේවා සභාව විසින් දරන ලද සමස්ත වියදම රුපියල් මිලියන 38.8කි. (රු. 38,834,217.64) මෙම පිරිවැය පිළිබඳව ගැඹුරු මූල්‍ය හා පරිපාලනමය විමර්ශනයක් කිරීම වැදගත් වේ. තොරතුරු දැනගැනීමේ පනත යටතේ ලබා දී ඇති දත්ත විශ්ලේෂණය කිරීමේදී, සමුළුවේ මූල්‍ය සැකැස්ම, ප්‍රසම්පාදන ක්‍රියාවලිය සහ තරුණ නායකයින් තෝරා ගැනීමේ යාන්ත්‍රණය පිළිබඳව වැදගත් කරුණු රැසක් හෙළි වේ.

සමුළුවේ මූල්‍ය සැලැස්ම සහ වියදම් ව්‍යුහය

තරුණසේවා සභාව ලබාදුන් තොරතුරු අනුව, ජාතික තරුණ සමුළුව වෙනුවෙන් දරන ලද මුළු වියදම රුපියල් 38,834,217.64 ක් වන අතර, මෙම මුදල ප්‍රධාන කාණ්ඩ කිහිපයක් යටතේ වෙන් කර ඇත. සමස්ත වියදමෙන් වැඩිම මුදලක් වෙන් කර ඇත්තේ ටී ෂර්ට් සැපයීම සඳහා වන අතර එය රුපියල් එක්කෝටි දහඅට ලක්ෂ දොළොස්දහස් පන්සියකි. (11,812,500.00) එය උත්සවයේ සමස්ත වියදමින් 30.42%ක් තරම් විශාල පිරිවැයකි.

අදාළ ලේඛන පෙන්වන්නේ, ජනාධිපති, මැති ඇමතිවරුන් හා වෙනත් ප්‍රභූවරුන් 200කට ආසන්න පිරිසකගේ සංග්‍රහ කටයුතු සඳහා රු. 525,000ක්, වියදම් කර තිබෙන බවටය. ඒ අනුව එම එක් පුද්ගලයෙකු වෙනුවෙන් එදින සංග්‍රහ කටයුතු සඳහා පමණක් රුපියල් 2625.00ක මුදලක් යොදවා තිබේ. මෙහි වැදගත් කරුණක් නම්, ජනාධිපතිවරයා විශේෂයෙන් මෙම උත්සවයට සහභාගි වී සිටියත් මෙම සංග්‍රහයට සහභාගි නොවීමයි. උත්සවයේ කටයුතු සඳහා පැමිණි නිලධාරීන් සඳහා රු. 536,445.50ක් වෙන් කර ඇති අතර, එය ප්‍රභූ සංග්‍රහය සඳහා වැය වූ මුදලට ආසන්න අගයකි. එමෙන්ම තරුණ තරුණියන් 7,500ක් ඇතුළු අනෙක් අයගේ සංග්‍රහ කටයුතු සඳහා රු. 2,196,000ක් වැය කර ඇත. අතර එහිදී සමුළුවට සහභාගි වූ තරුණ නායකයින්ගේ නිශ්චිත සංඛ්‍යාව සඳහන් නොවුණත්, ටී ෂර්ට් සකස් කර ඇත්තේ 7,500ක් සඳහා බැවින්, සහභාගි වූ තරුණ පිරිස දළ වශයෙන් එම අගයට ආසන්න යැයි සැලකිය හැකිය. ඒ අනුව තරුණ තරුණියන් 7,500 දෙනෙකුගේ සංග්‍රහ කටයුතු සඳහා වැය කර ඇත්තේ එක් අයකුට රුපියල් 292ක් වැනි මුදලකි. කෙසේ නමුත් මේ ආකාරයෙන් සිදුකර තිබෙන සමස්ත සංග්‍රහ වියදම් මුළු වියදමෙන් 9.3%ක් පමණ වේ. මේ අගය අතිශය වැඩි බව පෙනෙන්නේ, මෙවන් රාජ්‍ය වැඩසටහන් සඳහා පැමිණෙන රටේ මධ්‍යම පන්තියේ තරුණයන්ගේ ආර්ථික තත්ත්වය සැලකිල්ලට ගත් විට ය.

තරුණ නායකයන්ගේ සහභාගිත්වය ප්‍රවර්ධනය කිරීමේ ජාතික ව්‍යාපෘතියක් ලෙස, ප්‍රවාහන වියදම් (16.92%) සහ වේදිකා /සැරසිලි (15.72%) වැනි සෘජු මෙහෙයුම් වියදම්වලට වඩා ටී ෂර්ට් සඳහා වැඩි මුදලක් වෙන් කිරීමේ ප්‍රමුඛතාව ගැටලු‍සහගය.

සමස්ත සංග්‍රහ වියදම රුපියල් 3,257,445.50 ක් වන අතර, එය ‍ආහාර‍ (රු. 4,852,465.00) වියදමට අමතරව වෙනම ගණනය ඇති බව පෙනේ. මෙම සංග්‍රහ වියදම වෙන් වෙන්ව විශ්ලේෂණය කිරීමේදී, වියදම් කළමනාකරණයේදී අනුගමනය කර ඇති පිළිවෙත කෙරෙහි අවධානය යොමු කළ යුතුය.

මිලියන 11.8ක ටී ෂර්ට්

මෙම සමුළුව වෙනුවෙන් පැමිණි තරුණ තරුණියන් වෙනුවෙන් ටී ෂර්ට් සැපයීම සඳහා සමස්ත වියදමෙන් තුනෙන් එකකට ආසන්න මුදලක් (30.42%) වැය කර තිබීම මෙහි ඇති ප්‍රමුඛතම කරුණකි. සමුළුවේ විශාලතම වියදම (රු. 11,812,500.00) දැරූ ටී ෂර්ට් 7,500 සැකසීම සඳහා වන ප්‍රසම්පාදන ක්‍රියාවලිය, ටෙන්ඩර් කැඳවීමක් හරහා සිදු කර ඇති බව තහවුරු වුවත් එහි ඇති විනිවිදභාවය සම්බන්ධයෙන් ඇති ගැටලු‍කාරී තත්වයක් හේතුවෙන් මේ වනවිට ඒ සම්බන්ධයෙන් විගණනයක් කිරීමට කටයුතු කරමින් සිටින බව තරුණ සේවා සභාවේ අභ්‍යන්තර තොරතුරු මගින් දැනගන්නට ලැබේ. කෙසේ නමුත් සමුළුව වෙනුවෙන් සහභාගි වූ සියලු‍ තරුණ තරුණියන් වෙනුවෙන් එදිනම ටී ෂර්ට් සැපයීමට නොහැකි වී ඇති අතර එය අවස්ථා කීපයකදී සිදු කරනු ලැබූ බව ඒ සඳහා සහභාගිවූවෝ පවසති.

ටී ෂර්ට් 7,500 ක් නිපදවීම සඳහා ටෙන්ඩර් කැඳවා ඇති අතර, එකක් රු. 1,575කට සැපයීම සඳහා ලංසු තැබූ Cosmos Sports ආයතනයට එම ටෙන්ඩරය ලබා දී ඇත. ලැබී ඇති තොරතුරු අනුව, ටෙන්ඩර් ක්‍රියාවලිය සම්පූර්ණයෙන්ම ක්‍රියාත්මක කර ඇති බව ලේඛන පෙන්වුවද, මූල්‍ය තීරණය හා ලංසු ඇගයීමේ වගු අතර ඇති මිල වෙනස්කම් පිළිබඳ විවෘත ප්‍රකාශයක් නොමැතිවීම විනිවිදභාවයට අභියෝගයකි.

උදාහරණයක් ලෙස, Captain Promotion ආයතනයෙන් රු.1,750ක් ලෙස ලංසු ලබාදී ඇති නමුත් ක්‍දිපදි ීචදරඑි ආයතනයෙන් රු.1,375ක මිලක් ඉදිරිපත් කර තිබේ. නමුත් එම ආයතනයේ වැට් සඳහා අමතර 18%ක මුදලක් වූ විට ටී ෂර්ට් එකක මිල රුපියල් 1,622කි. එහෙත් අවසාන වශයෙන් තෝරාගත් CHAYA TEX ආයතනයේ මිල රු.1,575කි.

ප්‍රසම්පාදන මාර්ගෝපදේශ සංග්‍රහය (2.11.3) යටතේ දෙපාර්තමේන්තු ප්‍රසම්පාදන කමිටුවක් විසින් ටෙන්ඩර් ක්‍රියාවලිය මෙහෙයවා ඇති අතර සැපයුම්කරුවන්ගේ නාම ලේඛන සහ ඍ්සබඉදඅ ඡ්ටැි හරහා මිල ගණන් කැඳවා ඇති බවත් ආයතන 4 කින් මිල ගණන් ලබා දී ඇති බවත් ජාතික තරුණසේවා සභාව ලබාදුන් තොරතුරු මගින් අනාවරණය වේ. ඒ අනුව CHAYA TEX ආයතනය (පන්නිපිටිය, හෝකන්දර පාර) විසින් ටී ෂර්ට් 01 ක් සඳහා රු. 1,575.00 බැගින් මුළු මුදල රු. 11,812,500.00 කට සැපයීම සඳහා වූ යෝජනාව ප්‍රසම්පාදන මණ්ඩලය විසින් අනුමත කර ඇත.

දිස්ත්‍රික් මට්ටමේ කටයුතු සහ නායකයින් තෝරාගැනීම

දිස්ත්‍රික් මට්ටමින් පැවත යූත් ක්ලබ් දිස්ත්‍රික් සමුළු සඳහා ජාතික තරුණ සේවා සභාව විසින් සෘජුවම මුදල් ලබා දීමක් සිදු කර නොමැති බව වාර්තා වේ. මෙයින් අදහස් වන්නේ, දිස්ත්‍රික් මට්ටමේ රැස්වීම් හෝ සමුළු පැවැත්වීමට අවශ්‍ය වූයේ නම්, එම වියදම් දරා ඇත්තේ වෙනත් ආයතන, අනුග්‍රාහකයන් හෝ අදාළ දිස්ත්‍රික්කවල පිහිටුවා ඇති යූත් ක්ලබ් මණ්ඩල මගින් විය හැකි බවයි. එහෙත් ප්‍රාදේශීය ලේකම් කොට්ඨාස 337ක තරුණ නායකයන් තෝරාගැනීමේ නිලවරණ කටයුතු සඳහා රු. මිලියන 4.9 (4,938,450.0) ක් වියදම් කර තිබෙන බව අනාවරණය වේ. ජාතික තරුණ සේවා සභාව සඳහන් කරන්නේ, ග්‍රාමීය මට්ටමේ යූත් ක්ලබ් සංවිධායකයින් අතරින් ප්‍රාදේශීය මණ්ඩල මඟින් තෝරාගත් අය දිස්ත්‍රික් මණ්ඩල මඟින්, ජාතික මණ්ඩල නියෝජිතයින් ලෙස තෝරාගත් බවයි. යූත් ක්ලබ් ජාතික සමුළුව සඳහා සහභාගිවීමට අවස්ථාව ලබා දී ඇත්තේ ජාතික මණ්ඩලය, දිස්ත්‍රික් මණ්ඩලය, ප්‍රාදේශීය මණ්ඩලය සහ යූත් ක්ලබ් විධායක නිලධාරීන්ටය.

යූත් ක්ලබ් සමුළුව රටේ තරුණයන් එකතු කළත්, එය සැබෑ තරුණ ප්‍රතිපත්ති සංවර්ධනය අරමුණු කර ගත් එකක් නොව, බලය දරන අයගේ දේශපාලන අරමුණු මුල් කරගත් එකක් බවට තරුණ නායකයන් වෙතින්ම දැඩි විවේචන එල්ල විය. ඒ අනුව රු. මිලියන 38.8 ක් වැය වූ මෙම ජාතික තරුණ සමුළුව මඟින් පෙනී යන්නේ, එය පොදුවේ තරුණ පරපුරේ උන්නතිය සඳහා වන ප්‍රතිපත්ති සංවර්ධනයට වඩා, හුදු ප්‍රචාරාත්මක හා සංදර්ශනාත්මක කාර්යයකට ලඝු වී ඇති බවයි. මෙවන් උත්සව සඳහා යොදන මුදල්, තරුණයන්ගේ අනාගත අභිවෘද්ධියට හේතු වන පුහුණු වැඩසටහන්වලට හෝ තාක්ෂණික නවෝත්පාදන ක්‍රියාමාර්ගවලට යොදවන්නේ නම් බෙහෙවින් ඵලදායක වනු ඇත.

• රාහුල් සමන්ත හෙට්ටිආරච්චි

සබැඳි පුවත් – https://www.anidda.lk/2025/10/27/national-youth-conference/

කොළඹ, බම්බලපිටිය, තුම්මුල්ල ප්‍රදේශයේ හෝම්ලෑන්ඩ් ආයතනය ඉදිකිරීමට නියමිත තට්ටු 40ක දැවැන්ත ගොඩනැගිල්ලකට එරෙහිව එම ප්‍රදේශයේ ජනතාව ඔක්තෝබර් 11 වන දින ඉදිකෙරෙමින් පවතින ගොඩනැගිල්ල ඉදිරිපිට විරෝධයක නිරත වී තිබිණි. විරෝධතාවේ යෙදුණු ප්‍රදේශවාසීන් පැවසුවේ නාගරික සංවර්ධන අධිකාරිය සාමාන්‍ය ජනතාවට තට්ටු 3කට වඩා ඉදිකිරීමට අවසර නොදුන්නද හෝම්ලෑන්ඩ් ආයතනයට තට්ටු 40ක නිවාස සංකීර්ණයක් ඉදිකිරීමට අවසර දීම ප්‍රශ්නසහගත බවය.

මේ සම්බන්ධයෙන් ප්‍රදේශවාසීන් නාගරික සංවර්ධන අධිකාරියට කෙතරම් පැමිණිලි කළද පලක් වී නොමැති බවත් ඔවුහු පවසති.

ඔක්තෝබර් 12 වැනි දින තුම්මුල්ල ප්‍රදේශයේ පදිංචිකරුවන් ජනාධිපති අනුර කුමාර දිසානායක වෙත ලිපියක් යවා ඇත. එම ලිපියෙන් ඔවුන් ඉල්ලා ඇත්තේ මහල් 40 කින් යුත් “හෝම්ලන්ඩ් පෙන්ටාරා” නිවාස සංකීර්ණය සඳහා නාගරික සංවර්ධන අධිකාරියේ නිලධාරීන් විසින් ලබා දී ඇති අනුමැතිය පිළිබඳව වහාම සහ ස්වාධීන පරීක්ෂණයක් පවත්වන ලෙසය. හෝම්ලන්ඩ් සමාගම විසින් ආරම්භ කරන ලද මෙම ව්‍යාපෘතිය පවතින නීති රීති උල්ලංඝනය කර ඇති බවටත් එම ලිපියෙන් ඔවුන් චෝදනා කර ඇත.

“විශේෂ ප්‍රාථමික නේවාසික සංවර්ධන කලාපයක්” තුළ මෙම ඉදිකිරීම් ආරම්භ කර ඇති බව ලිපියේ ඔවුන් අවධාරණය කර ඇත. මෙම ඉඩම “මධ්‍යම ඝනත්ව මිශ්‍ර සංවර්ධන කලාපයකට” අයත් ලෙස කඩිමුඩියේ සහ රහසිගතව නැවත වර්ගීකරණය කර ඇති බවත් 2025 අගෝස්තු 1 වන දින නාගරික සංවර්ධන අධිකාරියේ ජ්‍යෙෂ්ඨ නිලධාරීන් මෙම ගොඩනැගිල්ල සෑදීම සදහා අනුමැතිය ලබා දී ඇති බවත් ජනාධිපතිවරයාට යැවූ ලිපියේ සඳහන් කර ඇත.

මෙම මතභේදාත්මක පියවරට විරෝධය පළ කරමින්, පදිංචිකරුවන් පැවැත්වූ විරෝධතාවෙන් පසුව, ප්‍රදේශය භාර පොලිස් නිලධාරීන් ඉදිකිරීම් ස්ථානයට පැමිණ ව්‍යාපෘතිය සම්බන්ධයෙන් නීතිමය පියවර ගත හැකි බව දැනුම් දුන් බව ප්‍රදේශවාසීහු පවසති.

කාල්සන් ප්ලේස්හි ජීවත්වන දුලානි ගුණසේකර මහත්මිය මෙසේ පැවසුවාය:‘මම ඉපදුණු දවසේ ඉදලා ජීවත් වෙන්නේ ක්ලාසන් ප්ලෙස්වල. මෑතකදී හෝම්ලෑන්ඩ් ආයතනයෙන් නිවාස සංකීර්ණයක් හදන්න ගත්තා. ක්ලාසන් ප්ලේස් එක විශේෂ කලාපයක් හැටියට 2020 – 2030 මාර්ග සංවර්ධන අධිකාරියේ කොළඹ සැලැස්මේ නම් කරලා තියෙනවා. ඒ සැලැස්මේ හැටියට ගොඩක් ගොඩනැගිලි හදන්නේ නැති ආරක්ෂිත කලාපයක් ලෙස නම් කරලා තියෙන්නේ. ඒත් ඒ සැලසුම් මායිම් කරන්නේ නැතිව තට්ටු 43ක ගොඩනැගිල්ලක් හදන්න මාර්ග සංවර්ධන අධිකාරියෙන් අවසර ලබා දීලා තියෙනවා. මගේ නිවස අවුරුදු 100කට වඩා පැරණි නිවසක්. මේ ගොඩනැගිල්ලේ ඉදිකිරීම් නිසා නිවසේ ඉරිතැලීම් වුණා. ඉන්පස්සේ අපේ නිවාසවලට හානි වීම සම්බන්ධයෙන් අපි විරෝධතාවක් කළා. ඉන්පස්සේ හෝම්ලෑන්ඩ් ආයතනයෙන් ඇවිත් අපිට වුණ අලාභහානි ගැන සමීක්ෂණයක් කළා. ඒත් ඒ වන්දි මුදල් අපිට තවම ලැබුණේ නැහැ. ඒ වන්දි ලැබෙනකම් අපි ජීවත්වෙයිද දන්නේ නැහැ. තට්ටු 43 ගොඩනැගිල්ල ඉදිකරන අත්තිවාරම් දාන්න මීටර් 100ක් විතර යටට පොළොව හාරනවා. ඒ හාරන විදියට අපේ ගෙවල් ඉතිරිවෙයිද කියලා අපිට බයයි. කැණිම්වලින් අපේ ගෙවල් දෙදරනවා. මේ ගොඩනැගිල්ල නිසා අපේ ගෙවල් කඩා වැටිලා අපේ ජීවිතවලට හානිවෙයි කියලා අපිට බයක් දැනෙනවා.’

විරෝධතාවේ යෙදුණු කොළඹ 08, ටිකල් පාරේ පදිංචිකාරියක් මෙසේ පැවසීය.‘මේ විරෝධතාවේ යෙදෙන්නේ කොළඹ 05, ක්ලාසන් ප්ලේස් සහ ටිකල් පාරේ කොළඹ 08 යන ප්‍රදේශවල පදිංචිකරුවන්. ක්ලාසන් පෙදෙසේ තට්ටු කිහිපයකට වඩා ගොඩනැගිලි හදන්න දෙන්නේ නැහැ. මාර්ග සංවර්ධන අධිකාරියෙන් හරිත ආවරණය ආරක්ෂා කරන්න ආරක්ෂිත කලාපයක් ලෙස කලාපීකරණය තියෙනවා. අපි මාර්ග සංවර්ධන අධිකාරියෙන් මේ ගොඩනැගිල්ල ඉදිකිරීම සම්බන්ධයෙන් ප්‍රශ්න කරලා ලියුම් භාරදුන්නා. ඒත් අපේ ප්‍රශ්නය අහන්නවත් අපිට මාර්ග සංවර්ධන අධිකාරියෙන් කතා කළේ නැහැ. අපි ඉන්පස්සේ තොරතුරු දැනගැනීමේ පනත යටතේ මේ ඉදිකිරීමට අනුමැතිය ලැබුණේ කොහොමද කියලා අහලා යැව්වා. අපේ තොරතුරු දැනගැනීමේ ඉල්ලු‍ම්පතට මාර්ග සංවර්ධන අධිකාරියෙන් පිළිතුරුක් ලබා දුන්නේ නැහැ. අපිට ගෙවල්වල ජීවත්වෙන්න අපහසු නිසායි මේ විදියට විරෝධතාවක් කරන්න හිතුවේ. අපිට සාධාරණයක් කරන්න කියලා අපිට ජනාධිපතිවරයාගෙන් සහ මාර්ග සංවර්ධන අධිකාරියන් ඉල්ලන්නේ.’

කාල්සන් ප්ලේස්හි ජීවත්වන පදිංචිකාරියක් ඇගේ අත්දැකීම් මෙසේ පැවසීය.‘හෝම්ලෑන්ඩ් එකෙන් මගේ ගෙදර ඉස්සරහ තිබුණ හිස් ඉඩමක් අරගෙන, හැව්ලොක් පාර පැත්තෙනුත් ඉඩම් කිහිපයක් අරගත්තා. ප්‍රදේශවාසීන් කිසිම කෙනෙකුට තමන්ගේ ගෙවල් තට්ටු 3කට වඩා ඉහළින් හදන්න මාර්ග සංවර්ධන අධිකාරියෙන් අවසර ලබා දෙන්නේ නැහැ. නමුත් කොහොමද තට්ටු 43ක් හදන්න අවසර දුන්නේ කියලා ප්‍රශ්නයක් අපිට තියෙනවා. මේ පැත්තේ ගොඩක් ගෙවල්වල ඉන්නේ අවුරුදු 50ත් අවුරුදු 60ත් අතර වයසක මිනිස්සු. අපිට ගෙවල්වල ඉන්න බැහැ. ගෙවල් හෙල්ලෙනවා. උදේ ඉඳන් රාත්‍රිය වෙනකම් ගොඩනැගිල්ල හදන වැඩ කරනවා. අපිට ගෙවල්වල ඉන්න බැහැ ශබ්දය නිසා. හෝම්ලෑන්ඩ් එකේ අයගෙන් ඇහුවාම අපිට කියනවා පොළොව දෙදරීම 65කට වඩා එන්නේ නැහැ කියලා. ඒත් අපි ගණනය කරලා බැලු‍වාම 80ත් 85ත් අතර පොළොව දෙදරන ගතියක් තියෙනවා. අලු‍තින් හදපු ගෙවල් පවා දැන් සමහර තැන් පුපුරලා.’

නාගරික සංවර්ධන අධිකාරිය අමාත්ය බිමල් රත්නායකගේ විෂය පථයට අයත් වන බැවින්, නව අමාත්‍යවරයා මෙම අසාධාරණය සම්බන්ධයෙන් නිවැරදි තීරණයක් ගනු ඇතැයි ප්‍රදේශවාසීහු බලාපොරොත්තු වෙති. ස්වාධීන පරීක්ෂණයක් සිදු කර, නාගරික සංවර්ධන අධිකාරියේ බලය අවභාවිත කර ඇති බවට චෝදනා එල්ල වන නාගරික සංවර්ධන අධිකාරියේ නිලධාරීන්ට එරෙහිව දැඩි නීතිමය ක්‍රියාමාර්ග ගනු ඇති බවට ප්‍රදේශවාසීන් අපේක්ෂා අපේක්ෂා කරන බව පවසමින් ප්‍රදේශවාසීන් අමාත්‍ය බිමල් රත්නායක වෙත ලිපියක් භාරදී ඇත.

අධි සුඛෝපභෝගී ‘පැන්තරා’ නම් මෙම නිවාස සංකීර්ණය ප්‍රවර්ධනය සඳහා ලාංකීය සම්භවයක් ඇති බොලිවුඩ් නිළි ජැක්ලීන් ෆර්නැන්ඩස් සහභාගි වී තිබුණු අතර ජාත්‍යන්තර තලයේ බැබළෙන තාරකාවක් වන ජැක්ලීන් මෙනවිය සමඟ ඇතිකරගත් මෙම සහයෝගිත්වය ඔස්සේ ලාංකීය සුපිරි නිවහන් ක්ෂේත්‍රයේ නව්‍ය, චමත්කාරජනක යුගයක් උදාවනු ඇතැයි සමාගම පවසා තිබිණි.

ලබාදී ඇත්තේ පෞද්ගලික තොරතුරු නැති පොදු ලිපියක්

ඉන්දියානු රජයේ ආධාර මත වතුකරයේ ජනතාව සඳහා නිවාස 10,000ක් ලබාදීමේ වැඩසටහන යටතේ නිවාස 2056කට හිමිකම් ලබාදීමේ උත්සවයක් ජනාධිපති අනුර කුමාර දිසානායකගේ ප්‍රධානත්වයෙන් ඔක්තෝබර් 12 දින පැවැත්වූයේ බණ්ඩාරවෙල මහජන ක්‍රීඩාංගණයේදීය.

එහිදී ජනාධිපතිවරයා කීවේ වතුකරයේ හෙවත් මලයගම් ජනතාවට නිවසක, ඉඩමක අයිතිය ලබාදීම රජයේ වගකීමක් බවත්, එය මෙම වසරේ ඉටුකිරීමට කටයුතු කරන බවත්ය. එමෙන්ම රුපියල් 1750ක දෛනික වැටුපක් ලබාදෙන ලෙස ඔවුන් දිගු කාලයක සිට ඉල්ලීම් කරන බවත් එය මෙම වසරේ කුමන ආකාරයට හෝ ඉටුකර දෙන බවත්ය.

එම උත්සව සභාව අමතමින් වැවිලි සහ ප්‍රජා යටිතල පහසුකම් ඇමති සමන්ත විද්‍යාරත්න පැවසුවේ ඔවුන්ගේ හැටන් ප්‍රකාශනය අනුව වතුකරයේ මලයගම් ජනතාවගේ නොවිසඳුණු ප්‍රශ්න විසඳන බවට පොරොන්දු වූ බවත් ඒ අනුව ඔවුන්ට පර්චස් 10ක තමන්ට කියා නිවසක් ලබාදෙන බවත්ය.

ලබාදුන් ලිපියට විරෝධය

එහෙත් එදිනම ප්‍රවෘත්ති සාකච්ඡාවක් පවත්වමින් ලංකා කම්කරු කොංග්‍රසයේ උප සභාපති කනපති කනගරාජ් පැවසුවේ එම උත්සවයේදී ඉඩම් හිමිකම වෙනුවට කොළ කැබැල්ලක් ලබාදී ඇති බවත්, ඔවුන් ඉල්ලුවේ එල්ආර්සී (ඉඩම් ප්‍රතිසංස්කරණ කොමිෂන් සභා) ඔප්පු බවත්ය. පසුගිය ආණ්ඩුව පර්චස් 10ක් ලබාදෙන බව පැවසූ බවත්, ඒ සඳහා ඉඩම් මැනීම සිදුකළ බවත්, රුපියල් මිලියන 400ක මුදලක් වෙන්කළ බවත් හා මේ ආකාරයට ලබාදෙන කොළ කෑලි ඊළඟ ආණ්ඩුවක් පිළිගන්නේ නැති බවත්ය.

ඒ සඳහා වූ ප්‍රතිචාරය එදින දෙරණ රූපවාහිනියෙන් විමසා තිබුණ අතර ඊට පිළිතුරු ලබාදෙමින් වැවිලි සහ ප්‍රජා යටිතල පහසුකම් අමාත්‍යාංශයේ ලේකම් ප්‍රභාත් චන්ද්‍රකීර්ති පවසා තිබුණේ නිවාස 10,000ක් ලබාදීමේ ව්‍යාපෘතිය යටතේ නිවාස නිවාස 4700ක මූලික කටයුතු ඔවුන් ආරම්භ කළ බවත්, අධිඅවදානම් තත්වයක සිටින 2056ක් තෝරාගෙන නිවසක් සමඟ ඉඩමක් ලැබෙන හිමිකමක් ලබාදුන් බවත්ය. එමෙන්ම එල්ආර්සී ඔප්පු 20ක පමණ පිරිසකට ලබාදුන් බවද, තවත් 200කට පමණ ලබාදීමට නියමිත බවද, එය ඔවුන්ගේ වැඩසටහනක් බවද, මෙය ඉන්දියානු වැඩසටහනක් බවද කියා තිබුණි.

ලිපියේ ඇත්තේ මේවායි

එදින ජනාධිපතිවරයාගේ අතින් ලබාදී ඇත්තේ ඇත්ත වශයෙන්ම හිස් පොදු ලිපියකි. එහි ශ්‍රී ලංකා රජයේ හා ඉන්දීය රජයේ රාජ්‍ය ලාංඡන සහිතව ‘මලයියාග මහීල්චී’ නිවාස හිමිකම ඉන්දියානු ප්‍රදානය නිවාස ව්‍යාපෘතිය යනුවෙන් උද්ධෘතය ලෙස සඳහන් වුවද එම ලිපිය ලැබෙන පුද්ගලයාගේ නම, ජාතික හැඳුනුම්පත් අංකය, වත්ත, අංශය, ප්‍රාදේශීය ලේකම් කොට්ඨාසය හා දිස්ත්‍රික්කය යන පිරවිය යුතු තැන් ඇත්තේ හිස්වය. එම ලිපියේ දළ සිංහල පරිවර්තනය මේ ආකාරය.

‘සමෘද්ධිමත් ජාතියක්, සුන්දර ජීවිතයක්’ යන මුල පිරීම යටතේ ඉන්දීය රජයේ නිවාස ව්‍යාපෘතියේ කොටසක් ලෙස 2017 දී ඉන්දීය අග්‍රාමාත්‍යවරයා ශ්‍රී ලංකාවේ ඉන්දීය සම්භවයක් ඇති දෙමළ ප්‍රජාව සඳහා නිවාස 10,000ක් ඉදිකිරීමට සහාය වීම සඳහා ශ්‍රී ලංකා රජය, වතුකරයේ ප්‍රජාව සඳහා සුවපහසු නිවාස ලබාාදීම අරමුණු කරයි. මෙම අරමුණ ඉටුකර ගැනීම සඳහා ඉන්දියානු නිවාස ව්‍යාපෘතියේ 4 වන අදියරේ 2 වන පියවර යටතේ කඳුකරයේ ආපදාවන්ට ලක්විය හැකි ප්‍රදේශවල පදිංචිකරුවන්ට ප්‍රමුඛතාව ලබාදෙමින් වතු කම්කරුවන් සඳහා නිවාස 4700ක් ඉදිකිරීමට නියමිත අතර, ඉන්දීය රජයේ පූර්ණ මූල්‍ය ආධාරය සහ ශ්‍රී ලංකා රජයේ සහාය ඇතිව සිදුකෙරේ. ප්‍රතිලාභය ලබා ගැනීම සඳහා සියලු පූර්ව කොන්දේසි සපුරාලීමට යටත්ව ඔබට සහ ඔබේ පවුලේ අයට පර්චස් 10ක ඉඩමක නිවසක් සඳහා මෙම වැඩසටහන යටතේ විභව ප්‍රතිලාභියකු ලෙස ඔබ තෝරාගෙන ඇති බව සතුටින් දන්වමු.

අවසානයේ ඔබට ඉඩම වෙන්කළ පසු නිවස ඉදිකිරීම සඳහා ඔබේ ශ්‍රමය නොමසුරුව දායක කර ගැනීම සහ නිවස පිහිටා ඇති ඉඩම නිසි ලෙස නඩත්තු කිරීම සහතික කිරීම ඔබේ වගකීමකි. ව්‍යාපෘති අරමුණු සපුරාලීමට අපොහොසත් වීමෙන් හෝ ඔබෙන් අපේක්ෂා කරන වගකීම් නොසලකා හැරීමෙන් මෙම නිවසේ සතුට ඔබට අහිමි නොවනු ඇතැයි අපි අවංකවම බලාපොරොත්තු වෙමු. ඔබේ වගකීම් කඩිසරව ඉටු කිරීමෙන් අනාගතයේදී ඔබ නිවසේ හිමිකාරිත්වය සඳහා සුදුසුකම් ලබනු ඇත. එමඟින් ඔබේ පවුලේ අය සහ අසල්වාසීන් සමඟ සතුටින් හා සමෘද්ධිමත් ජීවිතයක් භුක්ති විඳීමට ඔබට හැකිවේ.’

වැවිලි හා ප්‍රජා යටිතල පහසුකම් අමාත්‍යාංශයේ ලේකම්වරයා සහ ශ්‍රී ලංකාවේ ඉන්දීය මහ කොමසාරිස්වරයා එම ලිපියට ප්‍රතිරූප අත්සන් යොදා තිබේ.

ඉන්දීය රජයේ ආධාර යටතේ නුවරඑළිය, බදුල්ල, කොළඹ, කළුතර, මොනරාගල හා රත්නපුර යන දිස්ත්‍රික්කවල මෙම නිවාස වැඩසටහන ක්‍රියාත්මක වීමට නියමිත අතර ඒ යටතේ වර්ග අඩි 550ක එක් නිවසක් සඳහා ඉන්දීය රජය රුපියල් ලක්ෂ 28ක මුදලක් වැය කිරීමට නියමිතය. ශ්‍රී ලංකා රජය එම නිවාසයක් ඉදිකිරීම සඳහා පර්චස් 10ක බිම් කොටසක් වතු සමාගම්වලින් වෙන්කර දිය යුතු අතර ඊට අමතරව නිවාස ව්‍යාපෘතියට අදාළ ජලය, විදුලිය, ප්‍රවේශ මාර්ග අභ්‍යන්තර මාර්ග ශ්‍රී ලංකා රජය විසින් සැපයිය යුතුය.

නිවාස ඉදිකිරීමට නියමිතව තිබූ ප්‍රදේශ

මේ යටතේ කලාප 13ක පිහිටි වතු 262ක අදියර 4ක් යටතේ මෙම නිවාස ව්‍යාපෘතිය ක්‍රියාත්මක වීමට නියමිතව තිබූ අතර ඒ සඳහා අවුරුදු 3ක කාලයක් මුලින් ඇස්තමේන්තුගත කර තිබුණි. අදියර 1 යටතේ නුවරඑළියේ වතු 38ක පළමු වසරේදී 808ක්, දෙවන වසරේදී 884ක් හා තෙවන වසරේදී 476ක් ලෙස නිවාස 2168ක් ඉදිකිරීමට නියමිත විය. එමෙන්ම එම අදියර යටතේම තලවාකැලේ වතු 21ක පළමු වසරේ 312ක්, දෙවන වසරේ 340ක් හා තුන්වන වසරේ 405ක් වශයෙන් මුළු නිවාස 1057ක් ඉදිකිරීමට නියමිත විය.

අදියර දෙක යටතේ හැටන් වතු 72ක පළමු වසරේ 730ක්, දෙවන වසරේ 1045ක් හා තුන්වන වසරේ 875ක් වශයෙන් නිවාස 26650ක් ඉදිකිරීමට නියමිත විය. එම අදියර යටතේම බදුල්ලේ වතු 32ක පළමු වසරේ 450ක්, දෙවන වසරේ 600ක් හා තුන්වන වසරේ 450ක් වශයෙන් නිවාස 1500ක් ඉදිකිරීමට නියමිත විය.

තුන්වන අදියර යටතේ මහනුවර වතු 32ක පළමු වසරේ 225ක්, දෙවන වසරේ 500ක් හා තුන්වන වසරේ 345ක් ලෙස මුළු නිවාස 1070ක් ඉදිකිරීමට නියමිත විිය. එම අදියර යටතේම මාතලේ වතු 8ක පළමු වසරේ 100ක්, දෙවන වසරේ 125ක් හා තුන්වන වසරේ 25ක් ලෙස නිවාස 250ක් ඉදිකිරීමට නියමිත විය. කෑගල්ලේ වතු 20ක පළමු වසරේ 100ක්, දෙවන වසරේ 150ක් හා තුන්වන වසරේ 255ක් වශයෙන් නිවාස 505ක් ඉදිකිරීමට නියමිත විය. කුරුණෑගල වතු 4ක පළමු වසරේ 50ක්, දෙවන වසරේ 50ක් ලෙස නිවාස 100ක් ඉදිකිරීමට නියමිත විය.

අදියර 4 යටතේ රත්නපුරේ වතු 22ක පළමු වසරේ 100ක්, දෙවන වසරේ 150ක් හා තුන්වන වසරේ 150ක් වශයෙන් නිවාස 400ක් ඉදිකිරීමට නියමිත විය. ගාල්ලේ වතු 5ක පළමු වසරේ 50ක් හා තුන්වන වසරේ 50ක් ලෙස නිවාස 100ක් ඉදිකිරීමට නියමිත විය. මාතර වතු 2ක පළමු වසරේ 25ක් හා දෙවන වසරේ 25ක් වශයෙන් නිවාස 5ක් ඉදිකිරීමට නියමිත විය. කලුතර වතු 4ක පළමු වසරේ 50ක් හා දෙවන වසරේ 50ක් වශයෙන් නිවාස 100ක් ඉදිකිරීමට නියමිත විය. මොනරාගල වතු 2ක පළමු වසරේ 25ක් හා දෙවන වසරේ 25ක් වශයෙන් නිවාස 50ක් ඉදිකිරීමට නියමිත විය.

මේ සම්බන්ධයෙන් ඔක්තෝබර් 10 දින පාර්ලිමේන්තුවට ප්‍රකාශයක් කරමින් වැවිලි සහ ප්‍රජා යටිතල පහසුකම් ඇමති සමන්ත විද්‍යාරත්න පවසා තිබුණේ මෙම මුලපිරීම මගින් පැරණි ‘ලයින් කාමර’ වෙනුවට වඩාත් නවීන සුවපහසු නිවාස ඒකක ආදේශ කිරීම, මූලික පහසුකම් හා පවුල් සඳහා ඉඩම් හිමිකම් ලබාදීමද අරමුණු කර තිබෙන බවයි.

එහෙත් විශාල ප්‍රචාරයක් ලබාදෙමින් ශ්‍රී ලංකාවේ ඉන්දීය මහ කොමසාරිස්වරයාගේද සහභාගිත්වයෙන් හා ජනාධිපතිවරයාගේ ප්‍රධානත්වයෙන් පැවැත්වූ එම උත්සවයේදී ලබාදුන් එම ලිපිය අනුව පෙනෙන්නේ ඉදිකිරීමට නියමිත එම නිවාස 2056 සඳහා තවමත් ඉඩම්වත් හඳුනාගෙන නැති බවයි. එම ප්‍රචාරක ව්‍යාපෘතිය වෙනුවෙන් පෙන්වන ලද නිවාසවලට අදාළ රූපරාමු මීට පෙර එම ව්‍යාපෘතිය යටතේ පැවති ආණ්ඩු විසින් ඉදිකරන ලද නිවාස වේ. වැවිලි සහ ප්‍රජා යටිතල පහසුකම් අමාත්‍යාංශයේ ලේකම්වරයා කියා ඇති බවට ඉහත සඳහන් කර ඇති ඉන්දීය නිවාස ව්‍යාපෘතිය හා ඉඩම් හිමිකම වෙනත් ව්‍යාපෘතියක් යන්න සත්‍ය නොවේ. මීට පෙර එම ඉන්දීය ආධාර යටතේ ඉදිකරන ලද එහෙත් ඉඩම් ප්‍රතිසංස්කරණ කොමිෂන් සභාවෙන් හිමිකම ලබානොගත් නිවාසවලට එම ඉඩම් හිමිකම ලබාදීම ඒ යටතේ සිදුකර ඇත. එම කටයුතු ආරම්භ වී ඇත්තේද පසුගිය ආණ්ඩු යටතේය.

ඒ අනුව ඉන්දීය නිවාස ව්‍යාපෘතියේ පර්චස් 10ක ඉඩම් අයිතිය පිළිබඳ ඒ වෙනුවෙන් මීට පෙර කටයුතු කරන ලද දේශපාලන පක්ෂ සැකයක් ඇතිකරගෙන කොළ කැබලි වෙනුවට ඉඩම්වල අයිතිය ලබාදෙන ලියවිල්ලක් ඉල්ලීම අසාධාරණ නොවේ.

අන් ප්‍රදේශවල ඉඩම් අයිතියත් ප්‍රමාදයි

වර්තමානයේ බලයේ සිටින ජාතික ජන බලවේගයේ දේශපාලන පක්ෂය වන ජනතා විමුක්ති පෙරමුණ සිය දේශපාලන පන්ති පහෙන් එකක් ලෙස එදා හැඳින්වූයේ ඉන්දියානු ව්‍යාප්තවාදයයි. එහි ඉලක්කය වූයේ වතුකරයේ ජනතාවයි. හිමිකම් පත් හෝ දීමනා පත් යටතේ රටේ අනෙකුත් ප්‍රදේශවල රජයේ ඉඩම් භුක්ති විඳින ජනතාවට සින්නක්කර ඔප්පු ලබාදීම සඳහා හිටපු ජනාධිපති රනිල් වික්‍රමසිංහ ආරම්භ කරන ලද උරුමය වැඩසටහන යළි සමාලෝචනය කළ යුතු බව සඳහන් කරමින් අත්හිටුවන ලද්දේ මෙම ආණ්ඩුව විසිනි. එම සමාලෝචනය සඳහා පත්කරන ලද කමිටු වාර්තාව ආණ්ඩුවට ලැබී දැන් මාස ගණනාවකි. එහෙත් ආණ්ඩුව ජනතාවට සින්නක්කරව ඉඩම් අයිතිය ලබාදීමට මැලිකමක් දක්වන බව සිදුවන පමාවෙන් පෙන්නුම් කරයි.

රටේ දකුණේ ජනතාවගේ ඉඩම් අයිතිය වෙනුවෙන් එවන් පමාවක් සිදුකරන වත්මන් ආණ්ඩුව වතුකරයේ ජනතාවට ඉඩම් හිමිකම නොවන හුදු ලිපියක් පමණක් ලබාදීම ගැන විවේචන එල්ල වීම හා ඒ සඳහා නිසි විසඳුම් ලබාදෙන ලෙස ඉල්ලීම අසාධාරණ නොවේ.

නව ගම්මාන ලෙස වත්තෙන් එළියට ගන්න
නීතිඥ ගෞතමන් බාලචන්ද්‍රන්

අපේ පැත්තෙන් බැලුවාම මේ සිදුවන්නේ සැබෑ විසඳුම නෙමේ. මේ ජනතාව ඉන්නේ වතු ඇතුළේ නේවාසිකව. වත්තේ හාම්පුතාගෙන් අවසර ගන්න ඕනෑ සෑම දෙයකටම. ඒ නිසා මේ විදියට ගෙයක් ලබාදෙන අයව ගමක් විදියට වත්තෙන් වෙන්කරන්න ඕනෑ, ප්‍රදේශයේ ප්‍රාදේශීය ලේකම්වරයා සමඟ සෘජුව ගනුදෙනු කළ හැකි විදියට.

මෙම වැඩසටහනේ ඉදිරි අදියර සඳහා මෙම ආණ්ඩුව ප්‍රතිලාභීන් 2056 දෙනෙකු තෝරා ගැනීමේදී වතු සමාගම් මැදිහත්වෙලා තියෙනවා. ප්‍රමුඛතාව ලබාදීලා තියෙන්නේ වත්තේ වැඩ කරන අයට. වතුවල ජීවත්වන අයගෙන් දැන් සියයට පනහක් පමණ වත්තේ වැඩ කරන්නේ නෑ. ඒ අයට මේ ක්‍රමය යටතේ කවදාවත් නිවසක් ලැබෙන්නේ නෑ. අපි කියන්නේ වතු ප්‍රජාවට ඉඩම් ලබාදෙන්න. ඔවුන්ම ඒවායේ නිවාස හදාගනියි. තවදුරටත් වත්තේ හිරකරගෙන සිදුකරන මෙම ව්‍යාපෘති සැබෑ විසඳුම නෙමෙයි.

ඔවුන්ව නව ගම්මාන හැටියට පරිවර්තනය කරන්න, රටේ අනෙක් පුරවැසියන් වගේ ග්‍රාම නිලධාරි, ප්‍රාදේශීය ලේකම් සමඟ කටයුතු කරන්න පුළුවන් විදියට. වතු පෞද්ගලීකරණය කරද්දී ඒවායේ ලක්ෂ හතරක පමණ පිරිසක් වැඩ කළා. අද ඉන්නේ ලක්ෂයක පමණ පිරිසක්. වතුවලින්ම අද ඒ ඒ පවුල්වලට කොටස් බෙදාදීලා ඒවා නඩත්තු කරමින් තේ අස්වැන්න ලබාදෙන්න කියලා ලබා ගන්නවා. මේක තමයි ඇත්ත තත්වය.

ඔක්තෝබර් 15 වැනිදා අපරභාගයේ ගල්කිස්ස මහේස්ත්‍රාත් උසාවියට ඉදිරිපත් වූ නීතිඥ ගුණරත්න වන්නිනායකට මහේස්ත්‍රාත් පසන් අමරසේන ඇප නියම කළේය. ඒ රුපියල් ලක්ෂ 5 බැගින් වූ ශරීර ඇප දෙකකි. සාක්ෂිකරුවන්ට බලපෑම් කිරීමෙන් වළකින ලෙසටද ඔහුට නියෝග කෙරිණ. පසුදින, එනම් ඔක්තෝබර් 16, පෙරවරු 9ට බස්නාහිර දකුණ දිසා අපරාධ කොට්ඨාසයේ ස්ථානාධිපතිට ප්‍රකාශයක් දෙන ලෙසටද නියෝග කෙරිණ.

එදින නීතිඥ වන්නිනායක ගල්කිස්ස උසාවියට එන තුරු පොලිසිය බලාසිටියේ නොඉවසිල්ලෙනි. ඒ එන අතරමගදී ඔහු අත්අඩංගුවට ගැනීමටය. තමන්ගේ ‘පොලිස් පොඩ්ඩකු’ රිමාන්ඩ් කිරීමට හේතුව වූ වන්නිනායක මහතා අල්ලාගෙන ඔහුද දවසකට හෝ රිමාන්ඩ් කරවාගැනීමේ අරමුණ පොලිසියට දැඩිව තිබෙන බව පෙනිණ. (හිටපු පොලිස්පති දේශබන්දු තෙන්නකෝන්ට වරෙන්තු කර තිබියදී, තලවතුගොඩ නිවසක සිටි ඔහු මාසයක් නොඅල්ලා සිටින්නටත්, නඩු දිනයේ අධිවේගී මාර්ගය ඔස්සේ මාතර දක්වා අත්අඩංගුවට පත්නොවී එන්නටත් ඉඩ දුන්නේ මේ පොලිසියමය.)

වෑයම ව්‍යර්ථ වෙයි

එහෙත් පොලිසියේ වෑයම ව්‍යර්ථ කරමින්, වන්නිනායක මහතා උසාවියට පැමිණියේ ශ්‍රී ලංකා නීතිඥ සංගමයේ සභාපති නීතිඥ රජීව් අමරසූරියගේ වාහනයෙනි.

ගල්කිස්ස උසාවියේදී වන්නිනායක මහතා වෙනුවෙන් කරුණු දක්වමින් ජනාධිපති නීතිඥ උපුල් ජයසූරිය මෙසේ පැවසූ බව මාධ්‍ය වාර්තා කළේය. “ලංකා ඉතිහාසයේ පළමු අවස්ථාව නෙවෙයි මේ පොලිස් නිලධාරීන් නීතීඥවරුන්ට පහරදීමක් කළ. නමුත් මේ සිද්ධිය බරපතළ තත්ත්වයක් දක්වා උත්සන්න වුණා… නීතිඥ ගුණරත්න වන්නිනායක සහ ඔහුගේ කනිෂ්ඨ නීතිඥ සංජීව ඇන්තනි සහ ගුණරත්න වන්නිනායකගේ පුත් විහඟ වන්නිනායක නඩු කටයුතු අවසන් කර ඔවුන්ගේ මෝටර් රථයෙන් උසාවි භුමියෙන් පිටව යන අවස්ථාවේ මේ පහරදීම සිදුවී තිබෙන්නේ. නීතිඥ සංජීව ඇන්තනිට තමා පහරදෙන්නේ. පහරදීමෙන් අනතුරුව පොලිස් කොස්තාපල්වරයා හා වන්නිනායක මහතා අතර වචන හුවමාරුවක් සිදුවී තිබෙනවා. මේ සිද්ධිය අපේ වෘත්තීය ගරුත්වයට විශාල හානියක්. ගුණරත්න වන්නිනායක මහතාට දණ්ඩ නීති සංග්‍රහයේ 183, 187, 344, 287, 486 වගන්ති යටතේ බී වාර්තාවේ චෝදනා ගොනු කරලා තිබෙනවා.‍

දණ්ඩ නීති සංග්‍රහයේ 287 කියන්නේ අසභ්‍ය ගීත ගායනා කිරීම. මේ නීතිඥ මහතා ගීත ගායනා කිරීමක් නම් ඒ අවස්ථාවේදී කළේ නෑ. ගීත ගායනයයි රාජකාරියට බාධා කිරීමයි එකට යන්නේ නැහැ. බරපතළ ගණයේ පාතාලේ පිරිස් අල්ලන්න තියෙද්දී මොහුව අත්අඩංගුවට ගන්න පොලිස් කණ්ඩායම් 3, 4ක්ම දාලා. එය පොලිස් නිලධාරීන් ඔවුන්ගේ රාජකාරී බලතල අවභාවිත කිරීමක්. මේක පොලිසිය සහ නීතිඥවරු අතර ගැටුමක් නොවෙයි. මේක අපගේ වෘත්තීය ගරුත්වය පිළිබඳ ගැටලුවක්. අපි මීට පෙර නඩු දිනයේදී කිව්වා ඊළඟ නඩු දිනයේදී නීතිඥ වන්නිනායක මහතා අධිකරණයට ඉදිරිපත් කරන බව. එහෙම තියෙද්දී සර්ච් වොරන්ට් එකක් නැතුවම මෙතුමාගේ ගෙදරටත් ගිහින් පොලිසිය. කවදාවත් නැතුව අද ගාලු‍ පාරේ තැන් දෙකක විශේෂ පොලිස් කණ්ඩායම් දෙකක් යනඑන වාහන චෙක් කරනවා. ගුණරත්න වන්නිනායක අත්අඩංගුවට ගන්න ඒ චෙක් කළේ. රාජ්‍ය නිලධාරීන් මේ ආකාරයෙන් හැසිරිය යුතු නෑ. ගුණරත්න වන්නිනායක මහතාට පහරදීමක්, අත්අඩංගුවට ගැනීමක් සිදුවීමේ හැකියාව තිබුණා. ඒ නිසායි නීතිඥ සංගමයේ සභාපති ඇතුළු නීතිඥවරු පිරිසක් එක්ක ඔහු අද අධිකරණයට ඉදිරිපත් වුණේ.”‍

පොලිස් නීති කොට්ඨාසය වෙනුවෙන් පෙනීසිටි නීතිඥ දිමුතු ප්‍රදීප් ජයසිංහ නීතිඥ වන්නිනායකට ඇප ලබාදීමට විරෝධය දක්වමින් මෙසේ පවසා තිබිණ.

“අද මේ නඩුව කැඳවූවේ, පසුගියදා ගල්කිස්ස උසාවිය භූමිය තුළ පොලිස් නිලධාරියකුගේ රාජකාරියට බාධා කිරීම, බැන තර්ජනය කර සාපරාධී බිය වැද්දීමේ සිද්ධිය සම්බන්ධවයි. නීතිඥවරු පැවසූ පරිදි මෙය පොලීසිය සහ නීතිඥවරු අතර ගැටුමක් නොවෙයි. සිද්ධිය වූ දින පොලිස් නිලධාරීන් බොහොම ඉවසීමෙන් කටයුතු කළා. එදා අපිට මේ නීතිඥ මහතා අත්අඩංගුවට ගැනීමේ හැකියාවක් නැහැ. සාධාරණ ලෙස විමර්ශනයක් සිදුකර කරුණු අවධාරණය කරගෙන තමා බී වාර්තාවක් අධිකරණයට ඉදිරිපත් කළේ. මේ විමර්ශනයට සැකකාර නීතිඥවරයා සහාය දුන්නේ නෑ. සිද්ධිය වූ දිනට පසුදින බොරලැස්ගමුව පොලිසිය හරහා පොලීසියට පැමිණ ප්‍රකාශයක් ලබාදෙන්න කිව්වා. ආවේ නෑ. පසුව මොහු සොයන්න පදිංචි ස්ථානයට ගියා. පදිංචි ස්ථානයේ සිටියේත් නෑ. ඒ වගේම සිද්ධිය වූ අවස්ථාවේ මොහු ‘ප්‍රියන්තට කෝල් එකක් ගන්න, වටගලට කෝල් එකක් ගන්න’ කියනවා. ඒ තුළින් පෙනෙනවා මොහුගෙන් සාක්ෂිකරුවන්ට වුවත් බලපෑමක් වෙන්න පුළුවන්. මේ නඩුව සම්බන්ධව විශාල මහජන අවධානයක් යොමුව තිබෙනවා. ඇප ලබාදීමෙන් මහජන කැළඹීමක් ඇති විය හැකියි. එම නිසා සැකකරු රක්ෂිත බන්ධනාගාරගත කරන ලෙස ඉල්ලා සිටිනවා.”

මහජන කැළඹීම් කෝ?

එදින වන්නිනායක මහතාට ඇප ලැබුණු නමුත්, පොලිසිය කියූ පරිදි මහජන කැළමීමක් නම් මේ වන තෙක් ඇතිවී නැත.
එදිනම උදේ එනම් ඔක්තෝබර් 15 වැනිදා, තමා අත්අඩංගුවට ගැනීමෙන් වළක්වාලන නියෝගයක් නිකුත් කරන ලෙස ඉල්ලමින් නීතිඥ වන්නිනායක අභියාචනාධිකරණයට රිට් පෙත්සමක් ඉදිරිපත් කර තිබිණ. වන්නිනායක වෙනුවෙන් ජනාධිපති නීතිඥ ෆයිස් මුස්තාපා අභියාචනාධිකරණයට කීවේ, නීතිඥ වන්නිනායක අධිකරණය හමුවට ඉදිරිපත් වීමට සූදානම් බවයි. එහිදී අභියාචනාධිකරණ සභාපති රොහාන්ත අබේසූරිය කියා තිබුණේ, එවැනි නියෝගයක් නිකුත් කළහොත් එය වැරදි පූර්වාදර්ශයක් විය හැකි බවයි. කෙසේ වෙතත් වන්නිනායක මහතා සිද්ධිය වූ අවස්ථාවේදී හැසිරී තිබෙන ආකාරය පිළිගත නොහැකි බව කී සභාපති විනිසුරුවරයා, ගල්කිස්ස මහේස්ත්‍රාත් උසසාවියට ඉදිරිපත් වී ගැටලුව නිරාකරණය කරගැනීම සුදුසු බව සඳහන් කළේය.‍

අනතුරුව එදින පස්වරුවේ වන්නිනායක මහතා ගල්කිස්ස මහේස්ත්‍රාත් උසාවියට ඉදිරිපත් විය.
නීතිඥ සංජීව ඇන්තනිගේ පැමිණිල්ල අනුව, සිද්ධිය සම්බන්ධයෙන් 10 වැනිදා පස්වරුවේ අත්අඩංගුවට ගැනුණු පොලිස් කොස්තාපල්වරයා 13 වැනිදා වන තෙක් රිමාන්ඩ්ගත කෙරිණ. 13දා රුපියල් ලක්ෂය බැගින් වූ ශරීර ඇප දෙකක් මත ඔහු මුදාහැරීමට ගල්කිස්ස මහේස්ත්‍රාත් පසන් අමරසේන නියෝග කළේය. එදින උසාවියේ කටයුතු විශාල මහජන අවධානයක් ලබාගත්තේය.

වන්නිනායක මහතා එදින උසාවියට ඉදිරිපත්වී නොසිටි අතර, ඔහු වෙනුවෙන්, ශ්‍රී ලංකා නීතිඥ සංගමය වෙනුවෙන්, ගල්කිස්ස අධිකරණයේ නීතිඥ සංගමය වෙනුවෙන් ආදි ලෙස සියයකට අධික නීතිඥවරු/වරියෝ පිරිසක් අධිකරණයට පැමිණ සිටියෝය.

දුප්පත් ගමෙන් ආ තරුණයා

මහේස්ත්‍රාත් උසාවියේ මේ කාරණය කැඳවූ අවස්ථාවේදී (වන්නිනායක මහතාගේ කනිෂ්ඨ නීතිඥ සංජීව ඇන්තනි ගොනුකළ) පැමිණිල්ල වෙනුවෙන් පෙනීසිටි පොලිසිය, පොලිස් කොස්තාපල්ට ඇප නියම කිරීමට විරුද්ධත්වයක් නැති බව කීවේය. කොස්තාපල්වරයා දුප්පත් ගමකින් ආ තරුණයකු බවත්, සේවයට පැමිණ අවුරුදු 6කට වඩා නැති බවත්, බලසම්පන්න නීතිඥවරුන් සමග හැප්පෙන්න ඔහුට බැරි බවත් පොලිසිය කීවේය. මහේස්ත්‍රාත්වරයා කාරණය සමථ මණ්ඩලයට ඉදිරිපත් කරන ලෙසද එහි වාර්තාව උසාවියට ඉදිරිපත් කරන ලෙසද නියම කළේය.

ඉන්පසුව පොලිසිය පැත්තෙන් වන්නිනායක මහතාට එරෙහිව තවත් බී වාර්තාවක් ඉදිරිපත් කරන ලදි. ඒ අවස්ථාවේදී වන්නිනායක මහතා වෙනුවෙන් පෙනීසිටි නීතිඥවරු, සිදුවීම සමථ මණ්ඩලයට ඉදිරිපත් කිරීමට කැමැත්ත පළකළෝය. එහෙත්, පොලිස් කොස්තාපල් වෙනුවෙන් පෙනීසිටි නීතිඥවරියක් සමථ මණ්ඩලයට ඉදිරිපත්කිරීමට අකමැත්ත ප්‍රකාශ කළාය.
නීතිඥ වන්නිනායක පොලිසියට සාපරාධී බලහත්කාරය පෑම සම්බන්ධයෙන් සහ පොලිස් විමර්ශනවලට දායකවී නැති බවට කරුණු වාර්තා කරමින් ගල්කිස්ස මූලස්ථාන පොලිසිය එම බී වාර්තාව ගොනුකර තිබිණ. සාපරාධී බලහත්කාරය පෑම, රාජකාරියට බාධා කිරීම, ප්‍රසිද්ධ ස්ථානයක පරුෂ වචනයෙන් බැන තර්ජනය කිරීම ආදි චෝදනා සම්බන්ධයෙන් විමර්ශනය සඳහා අවශ්‍ය කරුණු ඉදිරිපත්ව ඇති බවත්, සිද්ධිය වූ අවස්ථාවේදී අධිකරණ භූමියේ රැඳීසිටි පුද්ගලයින් කිහිප දෙනෙකුගෙන් ප්‍රකාශ සටහන් කරගෙන ඇති බවත්, සැකකාර නීතිඥවරයාගේ ප්‍රකාශයක් සටහන් කරගැනීම සඳහා 12 වන දින ගල්කිස්ස පොලිසියට එන ලෙසට දන්වා තිබුණද ඔහු පොලිසියට නොආ බවත්, නීතිඥවරයාගේ දූරකථනය පවා ක්‍රියාවිරහිතව ඇති බවත්, ජ්‍යෙෂ්ඨ නීතිඥවරයා රටින් පලායෑමට කටයුතු කරන බවට බුද්ධි අංශ වෙත කරුණු වාර්තා වී ඇති බවත් ගල්කිස්ස පොලිසිය අධිකරණයට පැවසීය.

කොස්තාපල්වරයා පහරදීමක් කර නැති බව විමර්ශනවලදී අනාවරණය වී ඇති බැවින් ඒ බව පරීක්ෂා කිරීමට අධිකරණයේ සීසීටීවී දර්ශන ලබාදෙන ලෙස පොලිසිය මහේස්ත්‍රාත්වරයාගෙන් ඉල්ලීය. අධිකරණයේ සීසීටීවී ක්‍රියා විරහිත වී ඇති බව පූර්වගාමී මහේස්ත්‍රාත්වරිය තමාට දැනුම් දුන් බව මහේස්ත්‍රාත්වරයා පැවසීය. වන්නිනායක මහතාගේ පෙන්වා දුන්නේ තමා පහරදුන් බව පොලිස් නිලධාරියාම කියන (“මට අනංමනං කිව්වා, මං දෙකක් ඇන්නා”) වීඩියෝවක් ඇති බවයි. එම වීඩියෝව උසාවිය ඉදිරියේ පෙන්වන ලදි. කෘත්‍රිම බුද්ධිය හරහා ඕනෑ දෙයක් නිර්මාණය කළ හැකි නිසා එය විශ්වාස කළ නොහැකි බව පොලීසිය කීවේය. සිදුවීම සම්බන්ධයෙන් විමර්ශනයක් කරමින් සිටින බවත් කොස්තාපල්වරයා අත්අඩංගුවට ගනු ලැබුවේ විමර්ශනයකින් පසු බවත් පොලිසිය වැඩිදුරටත් කීවේය.

‘ජ්‍යෙෂ්ඨ නීතිඥ ගුණරත්න වන්නිනායක යනු අසාධාරණය වෙනුවෙන් පෙනීසිටි නීතිඥවරයෙක් බවත්, රටින් පලායෑමේ අවශ්‍යතාවක් ඔහුට නොමැති බවත්’ පවසමින් නීතිඥවරයා වෙනුවෙන් පෙනීසිටි ජනාධිපති නීතිඥ අනුර මැද්දෙගොඩ චෝදනා ප්‍රතික්ෂේප කළේය.

අත්අඩංගුවට ගන්නවා

කෙටි දිනක් ඇතුළත ගල්කිස්ස පොලිසියට පැමිණ විමර්ශනයන්ට අදාළව ප්‍රකාශයක් ලබාදීමට නීතිඥවරයාට නියෝග කරන ලෙසට ගල්කිස්ස පොලිසිය කළ ඉල්ලීම මහේස්ත්‍රාත්වරයා ප්‍රතික්ෂේප කළේය. නීතිඥවරයා විමර්ශනවලට සහයෝගය ලබා නොදෙන්නේ නම් අත්අඩංගුවට ගන්නා බවට ගල්කිස්ස පොලිසිය පැවසු අවස්ථාවේදී ඒ සඳහා තමාගේ විරුද්ධත්වයක් නොමැති බවද මහේස්ත්‍රාත්වරයා පැවසීය.

නීතිඥවරයාගේ දූරකථන වාර්තා ලබා ගැනීමටත්, ඔහුට විදෙස් ගමන් තහනමක් පැනවීමටත් පොලිසිය කළ ඉල්ලීම්ද මහේස්ත්‍රාත්වරයා ප්‍රතික්ෂේප කළේය.

මෙම අවස්ථාවේ ගුණරත්න වන්නිනායක මහතා වෙනුවෙන් ජනාධිපති නීතිඥ අනුර මැද්දෙගොඩ, සංජීව ඇන්තනි වෙනුවෙන් ජනාධිපති නීතිඥ ශානක රණසිංහ, උසාවියට සහායවීමට නීතිපති දෙපාර්තමේන්තුව වෙනුවෙන් අතිරේක සොලිසිටර් ජෙනරල් වසන්ත පෙරේරා, විත්තිකාර පොලිස් නිලධාරියා වෙනුවෙන් හිටපු ජේ්‍යෂ්ඨ නියෝජ්‍ය පොලිස්පති නීතිඥ කමල් සිල්වා, නීතිඥ සංගමය වෙනුවෙන් ජනාධිපති නීතිඥ රියන්සි අර්සකුලරත්න හා ජනාධිපති නීතිඥ උපුල් කුමරප්පෙරුම, ගල්කිස්ස නීතිඥ සංගමය වෙනුවෙන් නීතිඥ අතුල රණගල පෙනීසිටියහ.

කොස්තාපල්වරයා වෙනුවෙන් පෙනීසිටීම නිර්භය හා ජාතික කර්තව්‍යයක් බව මවාපාන්නට ගන්නා උත්සාහයක්ද කැපී පෙනිණ. එක් නීතිඥවරියක මාධ්‍යවලට කීවේ, අනෙක් පැත්තේ නීතිඥවරුන් 100කට එරෙහිව තමා පෙනීසිටි බවයි. ඇයගේ නම ‘පෙනීසිටි’ උසාවි නාමලේඛනයේ නැති නමුත්, සමථ මණ්ඩල යෝජනාව ඉදිරිපත්වූ අවස්ථාවේ ඇය ඊට විරුද්ධවූ බව එහි සිටි නීතිඥවරු කියති. එක පැත්තකට නීතිඥවරුන් සියයක් සිටියත්, ‘පෙනීසිටින්නේ’ එක්කෙනෙකු දෙන්නකු නිසා, ‘අනෙක් පැත්තේ සිටි සීයක් එක්ක තමා හැප්පුණා’ වැනි කතාවලට උසාවිවලදී වැදගත්කමක් නැත. කෙසේ වෙතත්, කොස්තාපල් වෙනුවෙන් තමා අභීතව පෙනීසිටි බව සමාජ මාධ්‍ය පෝස්ටු දමමින් මහජනතාවට නිවේදනය කරන්නට සමහර නීතිඥවරු තරගයක යෙදීසිටියහ.

කොස්තාපල්ට ඇප ලැබීමෙන් පසුව තවත් සංදර්ශනයක් පැවැත්විණ. උසාවිය ඉදිරියේ සංවිධානාත්මකව රැස්වී සිටි පිරිසක්, කොස්තාපල්ට මල්මාලා දමා කරේ තබාගෙන ගියෝය. නීතිඥවරයකුට පහර දීම ගැන චෝදනා ලබා ඇති පොලිස් නිලධාරියකු එසේ කර තබාගෙන ගියේ, රටේ හැම පැත්තෙන්ම දිනපතාම වාගේ අනීතික පොලිස් පහරදීම් සිදුවන බවට මාධ්‍ය වාර්තා පළවන රටකය.

අහිංසකයා කියන තරම් අහිංසක නැත

සිදුවීම වුණේ ඔක්තෝබර් 10 වැනිදා ගල්කිස්ස උසාවි පරිශ්‍රය තුළදීය. සාමාන්‍යයෙන් උසාවි පරිශ්‍රයේ බන්ධනාගාර බස්රථ නවත්වන ස්ථානයක් තිබේ. නීතිඥ වන්නිනායකත්, ඔහුගේ කනිෂ්ඨ නීතිඥවරයාත්, පුත්‍රයාත් රැගත් මෝටර් රථය උසාවි බිමෙන් පිටතට පැමිණෙන අවස්ථාවේදී, බන්ධනාගාර බස්රථය ඇතුළු වීම සඳහා වාහනය පසුපසට ගන්නා ලෙස එහි සිටි ජ්‍යෙෂ්ඨ පොලිස් නිලධාරියෙකු රියැදුරු අසුනේ සිටි නීතිඥ සංජීව ඇන්තනිට කියා තිබිණ. ඒ අනුව වාහනය පසුපසට ගත්තද, ප්‍රමාණවත් නොවුණු බැවින්, ජ්‍යේෂ්ඨ පොලිස් නිලධාරියා එය හසුරුවන ලෙස විවාදගත කොස්තාපල්වරයාට කීවේය. ඒ අවස්ථාවේදී ඉදිරි වම්පස අසුනේ සිටි නීතිඥ වන්නිනායක හා කොස්තාපල් අතර කතාබහක් ඇතිවිය. අඩක් විවෘත කර තිබුණු රියැදුරු අසුන පැත්තේ කවුළුවෙන් ඇතුළට අත දමා වන්නිනායක වෙත එල්ල කරමින්, කොස්තාපල් වන්නිනායක සමග වාදයෙහි පැටලී සිටියේය. එවිට රියැදුරු අසුනේ සිටි නීතිඥ ඇන්තනි තමාගේ මුහුණ ඉදිරියෙන් ළෙල දෙන කොස්තාපල්ගේ අත එළියට තල්ලු කළේය. පහරදීම සිදුවුණා යැයි කියන්නේ එවිටය. මෙලෙස සිදුවීම දැක්වීම වරදක් නොවනු ඇත්තේ දැන් කාරණය ඇත්තේ සමථ මණ්ඩලය ඉදිරියේ නිසාය.

මේ සිදුවීම ගැන සමාජ මාධ්‍යවල මහා වාදයක පැටලී සිටි ‘යුක්තිගරුක නීතිගරුක මහජනතාව’ සිදුවීමේ මේ මුල් කොටස දුටුවේ නැත. ඔවුන් දුටුවේ, සිය කනිෂ්ඨ නීතිඥයාට කොස්තාපල් පහරදුන් පසු රථයෙන් පිටතට පැමිණ කොස්තාපල්ට බැනවැදුණු වන්නිනායක මහතාගේ ක්‍රියාවය. ඒ, සමාජ මාධ්‍යවල හුවමාරුවූ වීඩියෝව නිසාය. වීඩියෝ කරන්නට පටන් ගත්තේ, වන්නිනායක වාහනයෙන් බැස බනින්නට පටන්ගත් පසුය. උසාවි පරිශ්‍රය තුළ විඩියෝගත කිරීම නිති විරෝධී වන නමුත්, මේ වීඩියෝව කරනු ලැබ තිබුණේ එතැන සිටි තවත් පොලිස් නිලධාරියකු විසිනි.

ශබ්දය ඇසී, උසාවියේ සිටි නීතිඥවරුන් මෙතැනට රොක්වුණු අතර, එක් නීතිඥවරයකු කළ දැනුම්දීමක් මත ගල්කිස්ස ප්‍රදේශය බාර උසස් පොලිස් නිලධාරීහු කිහිපදෙනෙක් කෙටි වේලාවක් තුළ එතැනට පැමිණියහ. වන්නිනායක මහතා පරුෂ වචනයෙන් බැනවදිමින් සිටියදී එම උසස් නිලධාරීහු සිද්ධියේ උණුසුම නිවීමට කටයුතු කළහ. පහරදීමක් සිදුවුණු බවට වන්නිනායක මහතා උස් හඬින් කියමින් සිටි නමුත්, අඩු ගණනේ තමන්ගේ උසස් පොලිස් නිලධාරීන් ඉදිරියේදී, ලද පළමු අවස්ථාවේදීම, තමාගේම නිවැරදිකාරිත්වය පැහැදිලි කිරීම සඳහා, තමා එවැන්නක් නොකළ බවට පොලිස් කොස්තාපල්වරයා වචනයක්වත් නොකී බව එහි සිටි නීතිඥවරු කියති. “ඒ වෙලාවෙත් කොස්තාපල් හිටියේ ‘ගේම ඉල්ලනවා’ වගේ හෙන උණකින්” එක් නීතිඥවරයෙක් අනිද්දාට කීවේය.

වන්නිනායක අසෝබනයි

නීතිඥ වන්නිනායක එහිදී හැසිරුණු ආකාරය කිසිවකුට අනුමත කළ නොහැකිය. එය ඔහු වැන්නකුට කිසිසේත් නොගැළපේ. උසාවි බිමේ හඬනගා ‘කුණුහරුප’ කීමද වැරදිය. පොලිස්පතිට, (ඔහුගේ මිතුරු) වටගල ඇමතිට කෝල් ගන්න යැයි ඔහු කියන නමුත්, පොලිස්පති හා ඔහු අතර දූරකථන සංවාදයක් ඇතිවී නැති බව පොලිසිය මාධ්‍ය නිවේදනයක් නිකුත් කරමින් කීවේය. වටගලට කතාකරද නැත. කෙනකු අහවලාට කෝල් එකක් ගන්න යැයි කී පමණින්, පොලිසිය කියන අන්දමේ ‘බලපෑමක්’ වන්නේ කෙසේදැයි පැහැදිලි නැත.

එදින සිදුවීම අවසන් වුණේ, කොස්තාපල් 13 වැනි සඳුදා තෙක් රිමාන්ඩ්ගත කිරීමෙනි.
සිදුවීමෙන් අඩක් පමණක් පෙන්වූ වීඩියෝව ක්ෂණයකින් වයිරල් විය. සිදුවීමේ එම කොටස මගින් පමණක් යුක්තිය, නීතිය ඉදිරියේ සමානත්වය හා ප්‍රභූ-නිර්ප්‍රභූ භේදය පිළිබඳ ඇවිළෙන හැඟීම් සහ විනිශ්චයන් ඇතිකරගත් රටේ සමාජ මාධ්‍යවල හැසිරෙන ‘මහජනතාව’, (ඔවුන්ගෙන් සාතිශය බහුතරයේ ප්‍රොෆයිල් බැලුවොත් හොඳ මාලිමාකාරයන් බව පැහැදිලි වෙයි.) මෙන්ම බුද්ධිමත්තුද වන්නිනායක මහතාට එලව එලවා පහරදුන් අතර, අහිංසක කොස්තාපල්වරයා වෙනුවෙන් පෙනීසිටින බවට ශපථ කළහ. තමන්ගේ ආණ්ඩුව නීතිය ඉදිරියේ සියල්ලන් සමාන බව පුන පුනා කියද්දී, වන්නිනායක වැන්නෙකු මෙලෙස නීතියට උඩින් සිටිය යුතු නැතැයි ඔවුහු අවධාරණය කළහ. අතිශය ආවේගකාරි යූටියුබ්කරුවෝද, ඒ ඇවිළෙන මතය නිදහසේ ප්‍රකාශ කළෝය.

එතැන් සිට සමාජ මාධ්‍යවල බලවත් හඬ වුණේ ‘නීතිය සැමට සමාන ලෙස ක්‍රියාත්මක කරනු, වන්නිනායක අල්ලනු, රිමාන්ඩ් කරනු’ යන්නයි. කොස්තාපල් රිමාන්ඩ් වූ නිසා, වන්නිනායකද රිමාන්ඩ් කිරීමෙන් ‘ඇසට ඇස, දතට දත’ න්‍යාය සම්පූර්ණ කරගැනීමට බොහෝ දෙනා කල්පනා කළ බව පෙනේ. දඬුවම් ලෙස පුද්ගලයන් රිමාන්ඩ් කිරීමට සැලැස්වීම මේ දිනවල ආණ්ඩුවේද ප්‍රතිපත්තියක් වන නිසා, මේ ‘මහජන ඉල්ලීම’ද එය හා නිසි ලෙස සමපාත විය.
පොලිස් පොඩ්ඩා බේරාගැනීමට පොලිසිය ඉදිරිපත් නොවීම ගැනද විශාල විවේචනයක් ඇතිවිය. එහි ප්‍රතිඵලයක් ලෙස ගල්කිස්ස මූලස්ථාන පොලිස් පරීක්ෂක එච්.ටී.එම් තුෂාර එම තතතුරින් සාමාන්‍ය රාජකාරිවලට එක පෑන් පහරින් මාරු කර යැවිණ.

පොලිස්පති හා ඇමතිගේ විනිශ්චය

ආණ්ඩුවද ක්ෂණයකින් ගත්තේ කොස්තාපල්ගේ පැත්තය. පොලිස්පතිත්, මහජන ආරක්ෂාව බාර ඇමතිත් වහාම මේ සිදුවීමේ දිව්‍යමය විනිසුරුවරුන් බවට තමන්ම පත්කරගත්හ. ඇමතිවරයා මාධ්‍යවලට කිව්වේ, නීතිඥවරයාගේ අසෝබන හැසිරීම අධිකරණයට අපහාසයක් බවයි. පොලිස්පතිවරයා කීවේ නීතිඥවරයාගේ හැසිරීම අසික්කිත බවයි. ඒ කතාවලින් ආණ්ඩුවේත්, පොලිසියේත් ස්වාධීන බව තවදුරටත් ඔප්පු වෙයි.

ඒ අතර බොහෝ නීතිඥවරුන්/වරියන් සතුටින් සිටින්නේ, හුදෙක් එක සිදුවීමක් නිසා, තමන් ප්‍රභූ පන්තියේ අය බවට ක්ෂණයකින් පත්වී ඇති බව තමන්ටම වැටහී ඇති නිසාය. මේ සිදුවීම ප්‍රභූන් හා නිර්ප්‍රභූන් අතර ගැටුමක් බවට අර්ථ නිරූපණය කරමින් සිටි සමාජ මාධ්‍ය බුද්ධිමතුන්ටද, පසුගිය සතියෙන් එය අතහැර, විග්‍රහ කරන්නට අලුත් මාතෘකාවක් ලැබී තිබේ. ඒ සෙව්වන්දිය. සෙව්වන්දි සිනා සිසී ලංකාවට පැමිණීම ගැනය.

• අරුණ ජයවර්ධන