මහලේකම්ද තනතුරෙන් ඉවත් කළ යුතුයි
පාර්ලිමේන්තුවේ කාර්ය මණ්ඩල ප්රධානි සහ පාර්ලිමේන්තුවේ නියෝජ්ය මහ ලේකම් ජීකේඒ චමින්ද කුමාර කුලරත්න සම්බන්ධයෙන් මූලික විමර්ශනයක් පවත්වා වාර්තාවක් ඉදිරිපත් කිරීමට පාර්ලිමේන්තු මහලේකම් 2025 අගෝස්තු 20 දරන ලිපිය මගින් විමර්ශන නිලධාරි එස් කේ ලියනගේ පත්කරනු ලැබිණ.
කාර්ය මණ්ඩල ප්රධානි සහ පාර්ලිමේන්තුවේ නියෝජ්ය මහ ලේකම් කේඒටී ජයතිලක අධිකරණ සේවයට පත්වීම සඳහා තනතුරෙන් ඉල්ලා අස්වීම නිසා 2023 ජුනි 7 සිට එම තනතුර පුරප්පාඩු විය.
සාමාන්යයෙන් මේ තනතුරට පත්කෙරෙන්නේ දැනට සිටින සහකාර මහලේකම්වරයකු උසස් කිරීමෙනි. ඒ සඳහා සහකාර මහලේකම් සිය තනතුරේ ස්ථිර කරන ලද හා සතුටුදායක සේවා කාලයක් සහිත අයකු විය යුතුය.
2023 ජුනි 7 දා එම තනතුර පුරප්පාඩු වන විට සහකාර මහලේකම් තනතුර දැරූ හංස අබේරත්න, එම තනතුරට පත්වී ගතව තිබුණේ මාස 3ක් පමණි. ඒ වන විට ඔහුගේ සේවය ස්ථිර කර තිබුණේද නැත. පාර්ලිමේන්තු කටයුතු පිළිබඳ උපදේශක කාර්රක සභාවේ අදහස වුණේ, ඒ තත්වය මත ඔහු මෙම ඉහළ තනතුරට පත්කළ නොහැකි බවයි.
ඒ නිසා අයැදුම්පත් කැඳවා සුදුස්සකු තෝරාගැනීමට තීරණය විය. ඒ පිළිබඳ දැන්වීමක් 2023 ජුනි 23 දින රජයේ ගැසට් පත්රයේ හා සති අන්ත පුවත්පත්වල පළකර ඇත.
මූලික සුදුසුකම් තිබුණු අපේක්ෂකයන් 6 දෙනකු 2023 සැප්තැම්බර් 8 පැවැති සම්මුඛ පරීක්ෂණයට කැඳවා තිබේ. සම්මුඛ පරීක්ෂණ මණ්ඩලය සමන්විත වුණේ, කතානායක මහින්ද යාපා අබේවර්ධන, අගමැති දිනේෂ් ගුණවර්ධන, සභානායක සුසිල් ප්රේම් ජයන්ත, විපක්ෂ නායක සජිත් ප්රේමදාස, විපක්ෂ ප්රධාන සංවිධායක ලක්ෂ්මන් කිරිඇල්ල, පාර්ලිමේන්තු මහලේකම් කේඒ රෝහණදීර යන අයගෙනි. මීට පෙර පාර්ලිමේන්තුවේ තනතුරු සඳහා තෝරාගැනීමට පවත්වන ලද සම්මුඛ පරීක්ෂණ මණ්ඩලවල සාමාජිකයන් වශයෙන් දේශපාලන තනතුරු දරන අය සහභාගි වී නැත.
කෙසේ වෙතත්, සම්මුඛ පරීක්ෂණයේ ප්රතිඵල අනුව චමින්ද කුලරත්න මහතා කථානායකගේ අනුමැතිය ඇතිව කාර්ය මණ්ඩල ප්රධානි සහ පාර්ලිමේන්තුවේ නියෝජ්ය මහ ලේකම් වශයෙන් පත්කර ඇත. ඒ 2023 සැප්තැම්බර් 15 දින සිට ක්රියාත්මක වන පරිදි, එක් අවුරුදු වැඩ බැලීමේ කාලයකට යටත්වය. එම කාලය පසුවූ විට, සැප්තැම්බර් 15 දින සිට ක්රියාත්මක වන පරිදි තනතුරේ ස්ථිර කර ඇත.
තොරතුරු ඉල්ලුම්පතක්
2025 මැද භාගයේදී එස් නන්දනන් නමැති අයකු කාර්ය මණ්ඩල ප්රධානි සහ පාර්ලිමේන්තුවේ නියෝජ්ය මහ ලේකම් සම්බන්ධයෙන් තොරතුරු තමාට ලබාදෙන ලෙස තොරතුරු දැනගැනීමේ අයිතිවාසිකම් පනත යටතේ ඉල්ලීමක් කර ඇත. පාර්ලිමේන්තුවේ තොරතුරු නිලධාරි, අයැදුම්කරු ඉල්ලා ඇති තොරතුරු සපයා ඇත. 2025 ජුලි 25 පැවැති කාර්ය මණ්ඩල උපදේශක කරක සභා රැස්වීමේදී, ඉහත කී තොරතුරු සැපයීමේදී තොරතුරු නිලධාරි විසින් සපයා ඇති තොරතුරු හා චමින්ද කුලරත්න මහතාගේ පෞද්ගලික ලිපි ගොනුවේ ඇතුළත් තොරතුරු අතර අර්ථ ව්යාකුල බවක් තිබෙන බව නිරීක්ෂණය විය.
ඒ සම්බන්ධයෙන් මූලික පරීක්ෂණයක් ඒක පුද්ගල පරීක්ෂණ මණ්ඩලයක් විසින් පැවැත්විය යුතු බවටත් එම පරීක්ෂකවරයා කථානායක විසින් නම් කරනු ලැබිය යුතු බවටත් කාරක සභාව තීරණය කර ඇත. ඒ අනුව කථානායක නම් කළ එස්කේ ලියනගේ මහතා, කාරක සභාවේදී අනුමත කර ඇත.
විමර්ශන නිලධාරියාගේ නිරීක්ෂණ හා නිගමන
කාර්ය මණ්ඩල ප්රධානි සහ පාර්ලිමේන්තුවේ නියෝජ්ය මහ ලේකම් තනතුර පුරප්පාඩු වන විට, සහකාර මහලේකම් හැටියට සිටි නිලධාරියා ඊට පෙර නීතිපති දෙපාර්තමේන්තුවේ සේවයේ යෙදී සිටි, සේවය ස්ථිර කරන ලද නිලධාරියෙකි. ඒ නිසා ඔහු සහකාර මහ ලේකම් තනතුරට පත්කර ඇත්තේ අවුරුදු එකක වැඩ බැලීමේ කාලයකට යටත්වය. එවැනි නිලධාරියකු කාර්ය මණ්ඩල ප්රධානි සහ පාර්ලිමේන්තුවේ නියෝජ්ය මහ ලේකම් තනතුරට ස්ථිර පදනම මත පත්කළ නොහැකි වුණත්, වැඩ බැලීමේ පදනම මත හෝ අවම වශයෙන් රාජකාරි ඉටුකිරීමේ පදනම මත පත්කිරීමට බාධාවක් නැත. එහෙත් එසේ කර නොතිබිණි. එවැනි යෝජනාවක්, උපදේශක කාරක සභාවට ඉදිරිපත් කර ඇති බවක්ද නොපෙනේ. මහලේකම් අබේදීර වුවද එවැනි යෝජනාවක් ඉදිරිපත් කර නැත්තේ ඒ ගැන අවබෝධයක් නොතිබීම නිසාද, නැතිනම් වෙනත් හේතුවක් නිසාද යන්න පැහැදිලි නැත.
රාජ්ය සේවා කොමිෂන් සභාවේ රීති අනුව, අයැදුම්පත් කැඳවීමේ දැන්වීමක, සම්මුඛ පරීක්ෂෂණය සඳහා ලකුණු දෙන ආකාරය ඇතුළත් විය යුතුය. එහෙත් අයැදුම්පත් කැඳවීමේ දැන්වීමේ ලකුණු දෙන ආකාරය දක්වා නැත. එම දැන්වීම සකස් කර ඇත්තේ මහලේකම්ගේ කාර්ය මණ්ඩලය විසිනි. ඒ නිසා අයැදුම්පත් කැඳවීමේ දැන්වීමක ඇතුළත් විය යුතු එවැනි කරුණක් ඇතුළත් නොකිරීම ගැන මහෙල්කම් ඇතුළු නිලධාරින් වෙත වගකීම පැවරීම නොවැළැක්විය හැකිය.
මූලික සුදුසුකම්
අයැදුම්පතේ සඳහන් මූලික සුදුසුකම් චමින්ද කුලරත්න මහතා සපුරා තිබිණි. 2015 මැයි සිට 2018 ඔක්තෝබර් දක්වා තමා එක්සත් රාජධානියේ පිහිටි සයිප්රස් මහ කොමසාරිස් කාර්යාලයේ උපදේශකයකු වශයෙන් සේවය කළ බව ඔහු අයැදුම්පතේ සඳහන් කර ඇත. එහෙත් එම කරුණ තහවුරු කිරීමට කිසි ලේඛනයක් ඉදිරිපත් කර නැත. එහෙත්, එම කාලය නොසලකා හැරියද දැන්වීමේ ඇති අවුරුදු 10ක සේවා කාලය ඔහු සපුරා ඇත.
රාජ්ය සේවා කොමිසමේ රීති අනුව, සම්මුඛ පරීක්ෂණයකදී, එම ආයතනයේ නොවන එක් සාමාජිකයකුවත් පරිබාහිර අමාත්යාංශයකින් හෝ දෙපාර්තමේන්තුවකින් එම පරීක්ෂණ මණ්ඩලයට ඇතුළත් විය යුතුය. එහෙත් එවැන්නෙක් එම සම්මුඛ පරීක්ෂණ මණ්ඩලයට සහභාගි වී නැත. එම අවශ්යතාව කාරක සභාවට පෙන්වාදීම මහලේකම් හා අදාළ නිලධාරින්ගේ වගකීමකි. ඔවුන් එය පෙන්වා දී නැත.
නොකළ දේවල්වලටත් ලකුණු
අධිකරණ සේවයේ හෝ නීතිපති දෙපාර්තමේන්තුවේ හෝ එකම දිනයක්වත් සේවය කර නැති කුලරත්න මහතාට, සම්මුඛ පරීක්ෂණ මණ්ඩලයේ ඇම් සාමාජිකයන් විසින් අධිකරණ සේවයේ හෝ නීතිපති දෙපාර්තමේන්තුවේ පළපුරුද්ද වෙනුවෙන්ද ලකුණු ලබාදී ඇත. ලකුණු ලබාගැනීමට හිමිකම් නොමැති අංශ සඳහාද ලකුණු හිමිවීම නිසා, ඔහුගේ සමස්ත ලකුණු ප්රමාණය වැඩිවීම, සුදුස්සකු තෝරාගැනීමේදී බලපාන බව සඳහන් කළ යුතුය.
කුලරත්න මහතා 2023.09.15 දින තනතුරේ වැඩ බාරගෙන ඇතත්, ඒ සඳහා පත්වීම් ලිපියක් නිකුත් කර නැත.
එදින මහලේකම් රෝහණදීර මුණගැසුණු බවත්, එදින නව තනතුරේ වැඩ බාරගන්නා හැටියට ඇය ලිඛිතව උපදෙස් දුන් බවත්, ඒ අනුව තමා එදා වැඩ බාරගත් බවත් චමින්ද කුලරත්න මහතා කියයි. නමුදු, රෝහණදීර මහත්මිය කීවේ, තමා එවැනි ලිඛිත දැනුම්දීමක් නොකළ බවයි. මහලේකම් විසින් නිකුත් කරන ලද එවැනි ලිපියක්, කුලරත්න මහතා පරීක්ෂණයේදී ඉදිරිපත් කළේද නැත. ඒ අනුව එදින නව තනතුරේ වැඩ බාරගන්නා ලෙස දන්වමින් මහලේකම් තමාට ලිපියක් දුන් බවට කුලරත්න මහතා කළ ප්රකාශය වැරදි එකකි. කුලරත්න මහතා වැඩ බාරගෙන ඇත්තේ පත්වීම් බලධාරියා විසින් නිකුත් කරන ලද පත්වීම් ලිපියක් ලැබී නොතිබියදීය.
අඩුගණනේ තාවකාලික පත්වීම් ලිපියක් හෝ නොමැතිව නිලධාරියකුට තනතුරක් බාරගත නොහැකි අතර, ඔහුට වැටුප් ගෙවන්නටද හැකියාවක් නැත.
කුලරත්න මහතාට පත්වීම් ලිපිය නිකුත් කර ඇත්තේ 2024 මැයි 7දාය. ඒ ඔහු රාජකාරි බාරගෙන මාස 7කට පසුවය. කුලරත්න මහතා ගැන අසාදු නොවන මූලික ආරක්ෂක නිෂ්කාෂණ වාර්තාව 2023 සැප්තැම්බර් 21 දින ලැබී ඇති නමුත්, එදින සිටවත්, තාවකාලික පත්කිරීම් ලිපියක්වත් ඔහුට ලබාදී නැත.
ඒ අනුව, තනතුර පුරප්පාඩු වී ඉතා කෙටි කලකින් කුලරත්න මහතා තෝරාගැනීම හා කිසිදු විධිමත් අනුමැතියකින් තොරව ඔහුට නව තනතුරේ රාජකාරි බාරගැනීමට අවස්ථාව සලසා දුන් නිලධාරින්, ඔහු රාජකාරි බාරගෙන හා ආරක්ෂක නිෂ්කාෂණ වාර්තාව ලබාගෙන මාස කිහිපයක් ගතවන තෙක්ම ඔහුට පත්වීම් ලිපියක් නිකුත් කර නැත. නව තනතුරට බඳවා ගැනීමේදී පාර්ලිමේන්තුවේ නිලධාරින් දක්වා ඇති කාර්යක්ෂමතාව, ඔහුට පත්වීම් ලිපිය නිකුත් කිරීමේදී දක්වා නැත.
පත්වීමේ ලිපියක් නැහැ
කුලරත්න මහතා පත්වීම් ලිපියකින් තොරව නව තනතුරේ රාජකාරි බාරගෙන ඇතත්, ඔහුගේ පත්වීම පිළිබඳව කථානායක මහින්ද යාපා අබේවර්ධන පාර්ලිමේන්තුවට නිවේදනය කර ඇත. එයින් පැහැදිලි වන්නේ පත්වීම් ලිපියක් නැතත්, ඔහුගේ පත්වීම බලධාරින් පිළිගෙන ඇති බවයි. ඔහුට වැටුප් ගෙවීමට නිලධාරින් කටයුතු කර ඇත. ගෙවා ඇත්තේද නියමිත වැටුපට වැඩි වැටුපකි.
අයැදුම්පත් කැඳවීමේ දැන්වීමේ සඳහන් මාසික ආරම්භක වැටුප රුපියල් 98,650කි. පසුව නිකුත් කළ පත්වීමේ ලිපියේද දක්වා ඇත්තේ එම වැටුප් පියවරේ තබා වැටුප් ගෙවන බවයි. එහෙත් පත්වු දා සිට ඔහුට මාසික වැටුප ලෙස රුපියල් 104,500ක මුදලක් ගෙවා ඇත. එය ඔහු කලින් දරන ලද තනතුරේ වැටුප් පියවර බව පෙනීයයි. එය ඔහු නීත්යනුකූලව හිමිවිය යුතු වැටුපට වැඩි වැටුපකි.
සැප්තැම්බර් 9 දින සිට ඔහු තනතුරට පත්කර ඇත්තේ එක් අවුරුදු වැඩ බැලීමේ කාලයකට යටත්වය. එක් අවුරුදු වැඩ බැලීමේ කාලයකට යටත්ව පත්කරන්නට නම්, ඊට පෙර ඔහු ස්ථිර සහ විශ්රාම වැටුප් සහිත තනතුරක් දරන ලද සේවයේ ස්ථිර කරන ලද නිලධාරියකු නවිය යුතුය. එසේ නොවන අය පත්කළ යුත්තේ අවුරුදු 3ක වැඩ බැලීමේ කාලයකට යටත්වය.
කුලරත්න මහතා ඊට ඉහතින් දැරූ පාර්ලිමේන්තු ආණ්ඩු පක්ෂයේ ප්රධාන සංවිධායක ලේකම් තනතුරට ඔහු පත්කර තිබුණේ කොන්ත්රාත් පදනම මතය. අමාත්ය මණ්ඩලය අනුමත කර තිබුණේද ඔහු කොන්ත්රාත් පදනම මත ඊට පත්කිරීමටය. එහෙත්, තමා කලින් දැරූ තනතුර ස්ථිර හා විශ්රාම වැටුප් සහිත තනතුරක් බැවින්, කාර්ය මණ්ඩල ප්රධානි සහ පාර්ලිමේන්තුවේ නියෝජ්ය මහ ලේකම් තනතුරේ සේවය ස්ථිර කිරීමේ කාලය අවුරුද්දක් ලෙස සැලකීමට කටයුතු කරන ලෙස, කුලරත්න මහතා 2024 ජනවාරි 9 දින ලිපියකින් ඉල්ලා ඇත.
ඔහු මෙම ඉල්ලීම කර ඇත්තේ ඊට පෙර දැරූ තනතුරට තමාව පත්කරන ලද්දේ කොන්ත්රාත් පදනම මත බව හොඳින් දැන සිටියදීය.
ඒ අනුව එම ඉල්ලීම මගින් ඔහු අදාළ නිලධාරින් නොමග යැවීමට උත්සාහ කර ඇති බව පෙනීයයි. කුලරත්න මහතා එක්අවුරුදු වැඩබැලීමේ කාලයකට යටත්ව පත්කරන ලද්දේ ඔහුගේ පූර්ව සේවා කාලය ස්ථිර හා විශ්රාම වැටුප් සහිත තනතුරක් වශයෙන් තමා සැලකූ නිසා බව මහලේකම් රෝහණදීර ප්රකාශ කළාය. කුලරත්න මහතාගේ අයැදුම්පතේ, ඒ වන විට ඔහු දැරූ ආණ්ඩු පක්ෂයේ ප්රධාන සංවිධායක ලේකම් තනතුරේ ඔහු ස්ථිර කර ඇති බවට අගමැති ලේකම් සඳහන් කර තිබීම නිසා, ඔහුගේ තනතුර ස්ථිර එකක් වන්නට ඇතැයි තමා සිතූ බව මහලේකම් කීවාය. කුලරත්න මහතාගේ තනතුරේ ස්ථිර කර ඇති බව අගමැති ලේකම් ඔහුගේ අයැදුම්පතේ සඳහන් කර අත්සන තබා ඇත. එහෙත් එම කරුණ වැරදිය. අගමැති ලේකම් එවැනි වැරදි සහතිකයක් සටහන් කර ඇත්තේ කුලරත්න මහතා දැරූ තනතුර කෝන්ත්රාත් එකක් බව නොදැනීම නිසා නොව, කුලරත්න මහතා ඔහුව නොමග යැවීම නිසා හෝ වෙනත් බලපෑමක් නිසා බව පෙනේ.
ඒ අතර, චමින්ද කුලරත්න මහතා, 2025 ජනවාරි 15 දිනැති ලිපියක් විශ්රාම වැටුප් අධ්යක්ෂ ජෙනරාල්ට යවමින්, 2020.02.03 සිට 2023.09.14 දක්වා තමා දැරූ පාර්ලිමේන්තුවේ ආණ්ඩු පක්ෂ ප්රධාන සංවිධායක ලේකම් තනතුරේ සේවා කාලය, තමාගේ විශ්රාම වැටුප් සේවා කාලයට එක්කිරීමට කටයුතු කරන ලෙස ඉල්ලා ඇත. පූර්ව සේවා කාලය සැබවින්ම ස්ථිර හා විශ්රාම වැටුප් සහිත එකක් නම්, එම සේවා කාලය තමාගේ විශ්රාම වැටුපට එකතු කරන ලෙස ඉල්ලා සිටීමට අවශ්යතාවක් නැත. කුලරත්න මහතා එවැනි ඉල්ලීමක් කර ඇත්තේ, එම සේවා කාලය කොන්ත්රාත් පදනම මත වූවක් බව හොඳින්ම දැන සිටි නිසාය.
විශ්රාම වැටුප් අධ්යක්ෂෂ ජෙනරාල් නිවැරදි ලෙස ඊට දන්වා ඇත්තේ එකී ලේකම් තනතුර ලබාදී ඇත්තේ කොන්ත්රාත් පදනම මත බැවින්, එම තනතුරේ සේවයේ යෙදීසිටි කාලයට විශ්රාම වැටුප් හිමි නොවන බවයි. මෙයින් පැහැදිලි වන්නේ චමින්ද කුලරත්න මහතා දැරූ මුල් තනතුර ස්ථිර හා විශ්රාම වැටුප් හිමි තනතුරක් නොවන බවයි.
දෙකම වැරදියි
කුලරත්න මහතා රාජකාරි බාරගත් 2023.09.15 දින සසිට ක්රියාත්මක වන පරිදි තනතුරේ ස්ථිර කර ඇත. ඒ එක් අවුරුද්දක වැඩ බැලීමේ කාලය ඉකුත්වීමෙන් පසුවය. ඔහු එක් අවුරුදු වැඩබැලීමේ කාලයකට යටත්ව පත්කිරීමද වැරදි බැවින් එක් අවුරුදු කාලය අවසන් වීමනේ පසුව තනතුරේ ස්ථිර කිරීමද වරදකි.
නිලධාරියකු සේවයේ ස්ථිර කිරීමට පෙර ඔහු විසින් ඉදිරිපත් කරන ලද අධ්යාපන හා වෘත්තීය සුදුසුකම් පිළිබඳ සහතික පත්ර අදාළ බලධාරීන් වෙත යොමු කොට තහවුරු කරවාගත යුතුය. නමුත් කුලරත්න මහතාගේ සහතික පත් ඒ ලෙස සනාථ කර නොගත් බව මහලේකම් පිළිගත්තාය. ඇගේ පිළිතුර, පාර්ලිමේන්තුවේ ලිපිකාරිනියක වශයෙන් පත්වී දස වසරකට අධික කාලයක් එම තනතුරේ සෙස්වය කොට ක්රමයෙන් උසස් තනතුරුවලට පත්වී මේ වන විට පාර්ලිමේන්තු කාර්ය මණ්ඩලයේ උසස්ම තනතුර වන මහලේකම් තනතුර දරන දීර්ඝකාලීන පළපුරුද්දක් ඇති නිලධාරියකුගෙන් අපේක්ෂා කළ හැකි පිළිතුරක් නොවේ.
කුලරත්න මහතා ස්ථිර කිරීමේදී වෛද්ය පරීක්ෂණ වාර්තාවක්ද ලබාගෙන නැත. රාසේ කොමිසමේ රීති අනුව රාජ්ය සේවයට පත්වන නිලධාරියකු රජයේ රෝහලක වෛද්ය නිලධාරියා වෙතින් වෛද්ය පරීක්ෂණ වාර්තාවක් ලබාගත යුතුය. ඔහු කලින් සේවය කළ ආයතනයේ පෞද්ගලික ලිපිගොනුවේද එවැනි වාර්තාවක් නැත. තමා තනතුරට පත්වූ පසු වෛද්ය පරීක්ෂණයකට පෙනී නොසිටි බව කුලරත්න මහතාද පිළිගනියි.
විමර්ශනයේදී අනාවරණය වූ ඉහත කරුණු අනුව, චමින්ද කුලරත්න මහතා කාර්ය මණ්ඩල ප්රධානි සහ පාර්ලිමේන්තුවේ නියෝජ්ය මහ ලේකම් තනතුරට පත්කිරීම හා එම තනතුරේ ස්ථිර කිරීම රාජ්ය සේවය පිළිගත් කාර්ය පටිපාටියට පටහැනිව කර ඇත. එමගින් කුලරත්න මහතාට අයථා වාසි ලබාගැනීමට ඉඩ සලසා දී ඇති බවත් පැහැදිලිය. කුලරත්න මහතා එක් අවුරුදු වැඩ බැලීමේ කාලයකට යටත්ව පත්කිරීම මගින් සිදුවූ වරද, නිවැරදි කිරීමේ අවස්ථාවක් (විශ්රාම වැටුප් අධ්යක්ෂගේ තීරණය ලැබීමෙන් පසුවවත්) මහලේකම්වරියට තිබුණද, ඒ අවස්ථාවේදී හෝ එය නිවැරදි කිරීමට පියවර ගෙන නැත.
කුලරත්න මහතා ඉදිරිපත් කර ඇති ලිපි ලේඛන අනුව, වර්තමාන තනතුරට පත්වීමට පෙර ඔහු දැරූ තනතුරු සියල්ලම පාහේ කිසියම් දේශපාලන නායකත්වයක අභිමතය පරිදි ලබාදෙන ලද, සාමාන්ය ව්යවහාරයේදී දේශපාලන පත්වීම් වශයෙන් සලකන තනතුරු බව පෙනීයයි. ඒ කවර හෝ තනතුරක් තරග විභාගයක හෝ සම්මුඛ පරීක්ෂණයක ප්රතිඵල අනුව ලබාගත් ඒවා බවක් නිරීක්ෂණය නොවේ.
තමා සම්බන්ධයෙන් වන මේ විමර්ශනය, කථානායක තමා සමග ඇති අමනාපයක් නිසා සිදුකරවන්කනක් බව කුලරත්න මහතා පුන පුනා පැවසීය. කවරකු අමනාප වීම නිසා විමර්ශන ආරම්භ කළද තමා වරදක් සිදුකර නැත්නම් ඒ සම්බන්ධයෙන් බියවීමට හේතුවක් කිසිදු නිලධාරියකුට නැත.
නිර්දේශ
සාවද්ය කරුණු ඉදිරිපත් කරමින් කාර්ය මණ්ඩල ප්රධානි සහ පාර්ලිමේන්තුවේ නියෝජ්ය මහ ලේකම් තනතුරට පත්වීම ලබාගැනීම හා එම තනතුරේ සේවය ස්ථිර කරවා ගැනීම මගින් මෙන්ම තමාට හිමි නැති වැටුප් පියවර පරිමාණයක් ලබාගැනීම මගින්ද, රාජ්ය සේවයේ පවත්නා රෙගුලාසිවලට පටහැනිව කටයුතු කරමින් රජයට පාඩු සිදුකිරීම සම්බන්ධයෙන්ද ජීකේඒසීකේ කුලරත්න මහතා වැඩ තහනමට ලක්කොට ඔහු සම්බන්ධයෙන් විනය කටයුතු කළ යුතුය.
චෝදනා පත්රය
මෙම වාර්තාවට පසුව, 2026 පෙබරවාරි 2 වැනිදා, චමින්ද කුලරත්න මහතා වෙත විධිමත් චෝදනා පත්රයක් ඉදිරිපත් කර ඇත. එහි චෝදනා 8ක් සඳහන් වෙයි.ඊට අමතරව 2026 ජනවාරි 13 වැනිදා කථානායක වෙත යවන ලද ලිපියකින් තවත් නිර්දේශ තුනක් විමර්ශන නිලධාරියා විසින් ඉදිරිපත් කරනු ලැබ තිබේ.
මහලේකම් තාවකාලිකව ඉවත් කරන්න
එකක් නම්, පිළිගත් ක්රමවේදයට පටහැනිව යමින් කුලරත්න මහතා කාර්ය මණ්ඩල ප්රධානි සහ පාර්ලිමේන්තුවේ නියෝජ්ය මහ ලේකම් තනතුරට පත්කිරීම හා ස්ථිර කිරීම මගින් රජයට පාඩු කිරීම සම්බන්ධයෙන් මහලේකම් කේඒ රෝහණදීර මහත්මිය තාවකාලිකව දැනට දරන තනතුරින් ඉවත් කර ඇය සම්බන්ධයෙන් විනය කටයුතු සිදුකිරීමයි.
දෙවැන්න, ප්රධාන නිලධාරි පීජීපී ප්රියංකර වෙනත් අංශයකට මාරු කොට ඔහු සම්බන්ධයෙන් විනය කටයුතු සිදු කිරීමයි.
තුන්වැන්න, ඉහත පත්වීම පිළිගත් ක්රමවේදයට පටහැනිව කර ඇති බව දැනගන්නට ලැබිමෙන් පසුව හෝ ඒ ගැන උසස් නිලධාරින්ගේ අවධානයට ලක් නොකිරීම ගැන සහකාර අධ්යක්ෂ (පරිපාලන) ඩබ්ලිව් ඒ කේ සී උඩපොළගෙන් නිදහසට කරුණු විමසා ඔහු ලබාදෙන පිළිතුර සලකා බලා සුදුසු පියවර ගැනීමයි.
ඉවත් කෙරුණු ලේකම්ගෙන් කථානායකට බරපතළ චෝදනා
පෞද්ගලික සිද්ධියක්, නිල නිවාස දෙකක්, වාහන අවභාවිතය, ඉන්ධන දීමනා වැඩියෙන් අරගෙන.
අල්ලස් කොමිසම පරීක්ෂණයක් කරාවිද?
සේවයෙන් ඉවත් කෙරුණු චමින්ද කුලරත්න මහතා, අල්ලස් හෝ දූෂණ චෝදනා විමර්ශන කොමිසම වෙත කතානායක ජගත් වික්රමරත්නට එරෙහිව චෝදනා සහිත පැමිණිල්ලක් පසුගිය සතියේදී බාරදුන්නේය.එහි සඳහන් වන කරුණු මෙසේය;
කුලරත්න මහතා, 2005 දෙසසැම්බර් ශ්රේෂ්ඨාධිකරණයේ නීතිඥයකු වශයෙන් දිවුරුම් දී ඇත.
2023 සැප්තැම්බර් 15 සිට 2026 ජනවාරි 23 දක්වා කාර්ය මණ්ඩල ප්රධානි හා පාර්ලිමේන්තුවේ නියෝජ්ය මහ ලේකම් ලෙස ඔහු කටයුතු කළේය. පාර්ලිමේන්තු කාර්ය මණ්ඩල උපදේශක සභා රැස්වීමේ තීරණය පරිදි ඔහුගේ වැඩ තහනම් කරන ලදි.
කතානායක ජගත් වික්රමරත්න සිය බලය අනිසි ලෙස භාවිත කරමින් කළ නීති විරෝධී හා දූෂණ කටයුතු රාශියක් සම්බන්ධයෙන් වරින්වර අවධානයට යොමු කළ විට ඔහු ඒ ගැන අප්රසාදය පළකරන ලදි.
තොරතුරු පනත යටතේ සිවිල් ක්රියාකාරිකයන් තොරතුරු ඉල්ලූ විට තොරතුරු නිලධාරි අංක 1 වශයෙන් තමාගේ නිර්දේශය වුණේ එම තොරතුරු ලබාදිය යුතු බවයි.
2025 ජුනි 18 හෝ ඊට ආසන්න දිනයකදී පාර්ලිමේන්තු සංකීර්ණයේ කථානායක දිවා ආහාර ගන්නා කාමරයේදී සිදුවූ යම් පෞද්ගලික සිද්ධියක් නිසා කථානායකවරයා කුලරත්න මහතා කෙරෙහි ඇතිකරගත් ද්වේෂය නිසා තම බලතල ඉක්මවා නීති විරෝධී ආකාරයෙන් පත්කරගන්නා ලද, විශ්රාමික අතිරේක ලේකම් එස් කේ ලියනගේ විසින් සකස් කරන ලදැයි කියන සාවද්ය තොරතුරු මත පදනම් වී ඇති වාර්තාවක් පාර්ලිමේන්තු කාර්ය මණ්ඩල උපදේශක සභාවට ඉදිරිපත් කර, එම සභාවද නොමග යවමින් කුලරත්න මහතාගේ වැඩ තහනම් කිරීමට කටයුතු කර ඇත.
2024.12.17 දින කථානායක හැටියට පත්වූ අවස්ථාවේ සිට සිදුකරන ලද දූෂණ විරෝධී පනත යටතට ගැනෙන නීති විරෝධී හා දූෂිත ක්රියා..
1. වාහන අවභාවිතය – පාර්ලිමේන්තු උපදේශක කාරක සභාව විසින් කථානායක, කැබිනට් අමාත්යවරයතුට සමාන වාහන හා ඉන්ධන දීමනා ලබාගත යුතු බව තීරණය කර ඇත. ඒ මත පාර්ලිමේන්තු මහලේකම් විසින් නිකුත් කළ පරිපාලන චක්රලේඛය අනුව 2025.05.02 දින සිට කථානායකගේ පරිහරණය සඳහා උපරිම වශයෙන් නිල වාහන දෙකක්, හා එම වාහන සඳහා උපරිම ඉන්ධන ලීටර් 900කි.එහෙත් කථානායක නිලවාහන තුනක් පරිහරණය කරයි. නිල වශයෙන් හිමි වාහන දෙකට අමතරව, උඡ භක් 4923 දරන වෑන් රථය පෞද්ගලික පරිහරණයට භාවිත කරයි. අනුමත ඉන්ධන දීමනාවට අමතරව මාස 6කට අධික කාලයක් තිස්සේ එම රථය සඳහාද ඉන්ධන ලබාගෙන ඇත. මේ පිළිබඳ තොරතුරු පාර්ලිමේන්තුවේ ප්රවාහන අංශයේ හා පරිපාලන අංශයේ ලිපි ලේඛනවලද, අදාළ රථවල ධාවන සටහන්වලද ලිඛිතව සටහන්වී ඇත.
2. නීති විරෝධී ලෙස ඉන්ධන දීමනා දෙකක් ලබාගැනීම – කථානායකවරයා තමාට හිමි ඉන්ධන දීමනාවට අමතරව, 2024.12.17 සිට 2025 නොවැම්බර් දක්වා පොලොන්නරු දිස්ත්රික් පාර්ලිමේන්තු මන්ත්රී වශයෙන් ලීටර් 568ක පමණ ඉන්ධන දීමනාවක් ලබාගෙන ඇත. ඒ කාලය සඳහා ඉන්ධණ දීමනාව වශයෙන් රුපියල් ලක්ෂ 20 පමණ මුදලක් පාර්ලිමේන්තු ගිණුමෙන් කිසිදු අනුමැතියකින් තොරව නීති විරෝධී ආකාරයෙන් ලබාගෙන ඇත.කථානායක තනතුරට අමතරව, පාර්ලිමේන්තු මන්ත්රීවරයකු වශයෙන් තවත් ඉන්ධන දීමනාවක් ලබාගැනීමට කිසිදු චක්ර ලේඛයකින් හෝ අමාත්ය මණ්ඩල තීරණයකින් අනුමැතිය ලබාදී නැත.
3 පාර්ලිමේන්තුවේ මාධ්ය අංශය සතු උපකරණ අවභාවිතය – කථානායකට අනුමත කාර්ය මණ්ඩලය තුළ සිය පෞද්ගලික මාධ්ය ඒකකයක් සඳහා අනුමැතියක් නැත. එහෙත් ඔහු පාර්ලිමේන්තු මාධ්ය අංශය සතු කැමරා උපකරණ තම පෞද්ගලික කාර්ය මණ්ඩලයේ භාවිතයට යොදාගෙන ඇත.
4. නියමිත මුදල නොගෙවා පාර්ලිමේන්තු ගිණුම යටතේ අමතර දිවා ආහාර පහසුකම් ලබාගැනීම – කථානායකට දිවා ආහාර පහසුකම් සලසා ඇත්තේ දෙවන මහලේ පිහිටි කථානායකට වෙන් කර ඇති කාමරය තුළය. 2024.12.17 දින කථානායත තනතුරට පත්වූ දා සිට ජගත් වික්රමරත්න මහතා දිවා ආහාර ගන්නේ එම කාමරය තුළදීය. කථානායකට ආහාර සැපයීම වෙනුවෙන්, ඔහුගේ වැටුපෙන් එක් අයකුට දිවා ආහාර වෙනුවෙන් අයකරගනු ලබන නිශ්චිත මුදලක් පාර්ලිමේන්තුව අයකරගනියි. එහෙත් ඔහුගේ පෞද්ගලික ලේකම් චමීර ගාල්ලගේද ඔහු සමග දිවා ආහාර කාමරයේ දිවා ආහාරය ගනියි.
කථානායකගේ අමුත්තකු වශයෙන් කිසිවකු ආහාර ගන්නේ නම් එක් දිවා ආහාර වේලක් සඳහා රුපියල් 900ක් අයකරගත යුතුය. එහෙත් ඒ වෙනුවෙන් චමීර ගාල්ලගේගේ වැටුපෙන් අයකර ගන්නේ රුපියල් 150ක් පමණි. (මුලදී දිවා ආහාර වේලකට රුපියල් 75ක් බැගින් මසකට 1500ක් හා 2025 ජුලි මාසයේ සිට 150ක් බැගින් 3000ක් වශයෙනි.) එම මුදලට අමතරව කථානායකගේ වැටුපෙන් කිසිදු අඩුකරගැනීමක් සිදු නොවේ.
කථානායක ආහාර ගන්නා කාමරයේදී පෞද්ගලික ලේකම්ද ආහාර ගන්නවා නම් අමුත්තකුට ආහාර ලබාදීම වෙනුවෙන් වැයවන මුදල කථානායක ගෙවිය යුතු බව කථානායකගේම ප්රධානත්වයෙන් පවත්වන ලද අංශ ප්රධානි රැස්වීමකදී නිලධාරින් විසින් අවධාරණය කෙරිණ. එහිදී කථානායක ප්රකාශ කළේ මින් ඉදිරියට එසේ සිදු නොවන බවයි. එහෙත් එතැන් සිට අද දක්වාද ඒ ආකාරයෙන් දෙදෙනා එම කාමරයේදී දිවා ආහාර ගනිති.
5. නීති විරෝධී ලෙස විමර්ශන නිලධාරියකු පත්කර ඔහුට පාර්ලිමේන්තු ගිණුමෙන් මුදල් ගෙවීමට හා ආහාර හා ප්රවාහන පහසුකම් දීමට කටයුතු කිරීම – මා කෙරෙහි ඇතිකර ගත්තායැයි විශ්වාස කරන ද්වේෂ සහගතභාවය හේතුවෙන් ඔහු අමාත්ය මණ්ඩල තීරණයන්ට හා රජයේ චක්රලේඛයන්ට පටහැනිව, පාර්ලිමේන්තු කාර්ය මණ්ඩල උපදේශක සභාව නොමග යවමින් විශ්රාමික අතිරේක ලේකම්වරයකු වන එස් කේ ලියනගේ මා සම්බන්ධයෙන් විමර්ශනයක් කිරීමට නීති විරෝධී ආකාරයෙන් පත්කර ඇත.
ඔහු වෙත අනීතිකව රු….. මුදලක් මේ වන විට පාර්ලිමේන්තු ගිණුමෙන් ගෙවීම සඳහා අනුමැතිය ලබාදීමට (එම මුදල චෙක්පතකින් ගෙවා ඇත.) අතිරේකව අවසන් වාර්තාව වෙනුවෙන් අමතර …. මුදලක් ඔහු වෙත යෝජනා කර ඇත.
ඔහු වෙත පාර්ලිමේන්තු ගිණුමෙන් දිනකට රු900 බැගින් වැය කර දින 11ක් දිවා ආහාර සපයා දීද පාර්ලිමේන්තු වාහන සංචිතයේ වාහන හා ඉන්ධන යොදාගනිමින් ඔහු වෙත ප්රවාහන පහසුකම් ලබාදීද ඇත.
6. නීති විරෝධී ලෙස රජයට අයත් නිලනිවාස දෙකක් භාවිත කිරීම – කථානායකගේ නිලනිවාසය ආයතන සංග්රහය යටතේ උපලේඛනගත නිල නිවාසයකි. එවැනි නිල නිවසක් හිමිව තිබියදී එම නිල නිවස සිය රාජකාරි හා පෞද්ගලික කටයුතු සඳහා භාවිත කරමින්, ඊට අතිරේකව කොළඹ 4, ලොරිස් පටුමග පිහිටි රාජ්ය පරිපාලන පළාත් සභා හා පළාත් පාලන අමාත්යාංශයට අයත් මහල් නිවාස සංකීර්ණයේ අංක 8-1 දරන රජයේ නිල නිවස 2025 ජනවාරි සිට තම නමට වෙන්කරවාගෙන පරිහරණය කරයි.
පාර්ලිමේන්තුවට අයත් රජමල්වත්ත පිහිටි කථානායක නිල නිවස තම පෞද්ගලික හා රාජකාරි කටයුතුවලට භාවිත කරයි. එම නිල නිවස නඩත්තුව සඳහා කථානායක විසින් පෞද්ගලික කාර්ය මණ්ඩලයක් පත්කරගනු ලැබ සිටියි. එවැනි නිල නිවසක් නඩත්තු කරමින් සිටියදී රජයට අයත් තවත් නිල නිවසක් භාවිත කරයි. රජමල්වත්තේ නිල නිවසට අයත් බඩුබාහිරාදිය ලොරිස් පටුමග පිහිටි නිල නිවසට හෝ වෙනත් ස්ථානයකට නිල අනුමැතියකින් තොරව බැහැරට ගෙනයාමට කටයුතු කර ඇත.
7. තොරතුරු දැනගැනීමේ පනත යටතේ ඉල්ලා සිටි තොරතුරු ලබාදීම නීති විරෝධී ලෙස ප්රතික්ෂේප කර තම වංචා හා දූෂණ ක්රියා යටපත් කරගැනීමට කටයුතු කිරීම – කථානායකගේ පෞද්ගලික කාර්ය මණ්ඩලය, මාධ්ය ඒකකය හා එම ඒකකයට ලබාදි ඇති බඩුබාහිරාදිය, ඔවුන්ගේ වැටුප් හා දීමනා, ඔවුන් භාවිත කරන නිල රථ පිළිබඳව, තොරතුරු දැනගැනීමේ පනත යටතේ සිවිල් සමාජ ක්රියාකාරීන් විසින් තොරතුරු ඉල්ලා ඇත. කථානායකවරයා විසින් හා/හෝ ඔහුගේ උපදෙස් පරිදි පෞද්ගලික ලේකම් චමීර ගාල්ලගේ විසින් ඉහත තොරතුරු ලබා නොදෙන ලෙස පාර්ලිමේන්තු තොරතුරු නිලධාරීන් වෙත ලිඛිතව නියෝග ලබාදී ඇත. (චමින්ද කුලරත්නද පාර්ලිමේන්තුවේ කෙතාරතුරු නිලධාරියෙකි.)
1953 /21 දරන පාරිල්මේන්තු (වරප්රසාද හා බලතල) පනත යටතේ ආවරණය වනුයේ පාර්ලිමේන්තුවේ ව්යවස්ථාදායක සේවා හා සම්බන්ධ කටයුතු පමණකි. එම පනතින් කථානායකගේ හෝ පාර්ලිමේන්තුවේ පරිපාලන කටයුතු සම්බන්ධයෙන් කිසිදු කටයුත්තක් ආවරණය නොවේ.
ඒ බව පහත තොරතුරු ඉල්ලුම්පත් පරීක්ෂා කර ලැබීමෙන් තහවුරු කරගත හැකිය.
පී/1/25/0104, පී/1/25/0112, පී/1/25/172, පී/1/25/173, පී/1/25/183, පී/1/25/195, පී/1/25/197, පී/1/25/198 ඒ අනුව, තමා සිදුකරන රාජ්ය මුදල් අවභාවිතය හා රජයට මූල්යමය පාඩු සිදුකරන කටයුතු ව්යවස්ථාපිත ප්රතිපාදන අවභාවිත කරමින් හෙළිදරව් වීම වළක්වා ඇත.
8. පාර්ලිමේන්තු කාර්ය මණ්ඩල පරිපාලනයට අනීතික ලෙස මැදිහත් වීම – ආණ්ඩුක්රම ව්යවස්ථාව අනුව පාර්ලිමේන්තුවේ මහලේකම්ගේ කාර්ය මණ්ඩල පත්කිරීම සඳහා කථානායකගේ අවසරය ලබාගත යුතුය. 1953/9 දරන පාර්ලිමේන්තු කාර්ය මණ්ඩල පනත අනුව මහලේකම්ගේ කාර්ය මණ්ඩලයේ විනය හා පරිපාලන බලධාරියා මහලේකම්ය. එහෙත් කථානායකවරයා තමාට හිමි ව්යවස්ථාපිත බලතල අබිබවා පෞද්ගලිකව මැදිහත් වෙමින් පාර්ලිමේන්තු මහලේකම්ගේ කාර්ය මණ්ඩල නිලධාරින්ගේ අස්වීම්, විදේශ ශිෂ්යත්ව හා වැඩමුළු සඳහා නාමයෝජනා කිරීමට අනීතික ලෙස මැදිහත් වෙයි.
9. කථානායකගේ උපදෙස් පරිදි ඔහුගේ පෞද්ගලික ලේකම් චමීර ගාල්ලගේ විසින් පාර්ලිමේන්තුවේ මහලේකම් වෙත යවන ලද ලිපිය හා 2025.08.13 දිනැති ලිපිය මගින් කරන ලද දැනුම් දීම අනුව පාර්ලිමේන්තුවේ මහලේකම් විසින් විමර්ශනයක් පවත්වා එහි වාර්තාව කථානායක වෙත භාරදී ඇත.
‘පාර්ලිමේන්තුවට අදාළ රහස්ය තොරතුරු අවසරයකින් තොරව මාධ්යයට හෙළිදරව් වීම සම්බන්ධයෙන් සහ කථානායකගේ නිල නිවාසය පිළිබඳව රහස් තොරතුරු තෙවැනි පාර්ශ්වයකට හෙළිදරව් වීම සහ එම තොරතුරු මාධ්ය මගින් ප්රචාරය වීම’ යනුවෙන් සඳහන් එකී වාර්තාව පරිශීලනය කිරීමෙන් මා ඉහත දක්වා ඇති කථානායක විසින් සිදුකරන ලද හා තවදුරටත් කරමින් සිටින නීති විරෝධී හා දූෂණ කටයුතු රාශියක් සම්බන්ධයෙන් පාර්ලිමේන්තු කාර්ය මණ්ඩලය විසින් ලබාදෙන ලද වාචිත හා ලිඛිත ප්රකාශ මගින් තහවුරු කරගත හැකිය.
