2022 හා 2023 වර්ෂවලට අදාළ හිටපු ජනාධිපතිවරුන්ගේ විදේශ සංචාර පිළිබඳ තොරතුරු ඒ පිළිබඳ පරික්ෂා කිරීම් අවසන් වී නොමැති බැවින් මේ අවස්ථාවේ ලබාදිය නොහැකි බව ජනාධිපති කාර්යාලය ඒ සම්බන්ධයෙන් තොරතුරු ඉල්ලූ අයෙකුට දැනුම් දී ඇත.
තොරතුරු ඉල්ලුම්කරු වන නීතිඥ ජේඑල්ඩීඑන් ද සිල්වා අමතමින් ජනාධිපති කාර්යාලයේ තොරතුරු නිලධාරි, ජනාධිපති ජ්‍යෙෂ්ඨ අතිරේක ලේකම් ජීජීඑස්සී රෝෂන් විසින් එම දැනුම් දීම සිදුකර ඇත. එහි වැඩිදුරටත් සඳහන් කර ඇත්තේ එම පිළිතුරෙන් සෑහීමකට පත් නොවන්නේ නම් නම්කළ නිලධාරියා වන ජනාධිපති ජ්‍යෙෂ්ඨ අතිරේක ලේකම් කේ ප්‍රසන්න චන්දිත්ට අභියාචනයක් කළ හැකි බවයි.
තොරතුරු දැනගැනීමේ අයිතිවාසිකම පිළිබඳ පනත යටතේ ඉල්ලුම්කරු වන නීතිඥ ජේඑල්ඩීඑන් ද සිල්වා එම තොරතුරු ඉල්ලීම කර ඇත. ඔහු ඒ මගින් ඉල්ලා ඇත්තේ 2022 හා 2023 යන වර්ෂවලදී හිටපු ජනාධිපතිවරුන් සිදුකළ විදේශ සංචාරවලදී ජනාධිපතිවරයා හා ඔහුගේ දූත පිරිසට අදාළ ගුවන් ටිකට් පත්, නවාතැන්, දීමනා ඇතුළු සියලු වියදම්වල තොරතුරුය.
