වැටුප් අයවැයෙන්
බදු හා අනෙක් ආදායම් සභා තීරණ මත
තමා නියෝජනය කරන ජාතික ජන බලවේගයට බලය නොලැබෙන පළාත් පාලන ආයතනවලට මුදල් වෙන්නොකරන බවට ජනාධිපති අනුර කුමාර දිසානායක ප්‍රකාශ කළද, පාර්ලිමේන්තුව විසින් සම්මත කරන අයවැය මගින් වෙන්කරන මුදල්, බදු හා වෙනත් ආදායම් මගින් උපයා ගන්නා මුදල් එම ආයතන පවත්වාගෙන යෑම සඳහා ලැබෙන බව වාර්තාවේ.
මෙම කරුණ ගැන අදහස් දක්වමින් සමගි ජන බලවේග පාර්ලිමේන්තු මන්ත්‍රී මුදල් කාරක සභාවේ සභාපති ආචාර්ය හර්ෂ ද සිල්වා මාධ්‍යයට පවසා තිබුනේ සංවර්ධනය සඳහා මුදල් වෙන්කරනු ලබන්නේ ප්‍රාදේශීය සංවර්ධන කමිටු බවත්, මුදල් බලය ඇත්තේ ජනාධිපතිවරයාට නොව පාර්ලිමේන්තුවට බවත්ය. එමෙන්ම දඩ මුදල් හා මුද්දර ගාස්තු එම ආයතනවලට ලැබෙන බව ඔහු කියා තිබුණි.
ඊට අමතරව පළාත් රාජ්‍ය සේවයේ නිලධාරීන් හා සේවකයන් වෙනුවෙන් වන වැටුප් හා දීමනාවලට අදාළ මුදල් අයවැයෙන් පළාත් සභා සඳහා වෙන්කරන මුදල් යටතේ පළාත් පාාලන ආයතනවලට ලැබේ.
මේ සම්බන්ධයෙන් කළ විමසීමකදී කොළඹ මහ නගර සභාවේ හිටපු නාගරික කොමසාරිස්වරයෙකු හා පළාත් පාලන විෂය සම්බන්ධයෙන් ලෝක බැංකු හා ආසියානු සංවර්ධන බැංකු උපදේශකවරයෙකු වශයෙන් කටයුතු කළ කේඩී චිත්‍රපාල මහතා පැවසුවේ මහ නගර සභා, නගර සභා හා ප්‍රාදේශීය සභා යන පළාත් පාලන ආයතනවල ආදායම් ස්වයං උත්පාදක, ණය හා ආධාර වශයෙන් වර්ගීකරණය කර ඇති බවයි.
ඒ යටතේ වරිපනම් බදු, විනෝද බදු, කුලී, ව්‍යාපාර බදු, ගාස්තු, මුද්දර ආදායම් හා උසාවි දඩ යන ඒවා පවතින බවයි.
සෑම පළාත් පාලන ආයතනයකටම මාර්ග, කානු පද්ධති, මළ නාලිකා ආදී යටිතල පහසුකම් වෙනුවෙන් එම බල ප්‍රදේශයේ ඇති ඉඩම්, ගොඩනැගිලි හා නිවාසවලින් වරිපනම් බදු අය කිරීමේ හැකියාව ඇති බව ඔහු පවසයි.
බල ප්‍රදේශයේ පවත්වන විනෝදාස්වාද ක්‍රියාකාරකම් වෙනුවෙන් විනෝද බදු අයකළ හැකි බවද, පළාත් පාලන ආයතනයට අයත් ඉඩම්, ගොඩනැගිලි, වෙළඳසැල් හා පදික වේදිකා ආදිය මගින් කුලී ආදායම් ලැබිය හැකි බවද ඔහු පවසයි.
එමෙන්ම පළාත් පාලන ආයතන බලප්‍රදේශයේ ඇති ව්‍යාපාරවලින් එම ව්‍යාපාරයේ පිරිවැටුමෙන් සියයට 1ක බද්දක් අයකළ හැකි බවද, පළාත් පාලන ආයතනය ලබාදෙන මළනාලිකා ඇතුළු පහසුකම් වෙනුවෙන් මෙන්ම එම සීමාවේ ඇති මාර්ග කඩා සිදුකරන කටයුත්තක් වෙනුවෙන් ගාස්තු අයකළ හැකි බවද ඔහු පවසයි.
එසේම පළාත් පාලන ආයතන බලප්‍රදේශයට අදාළ ඉඩම් ලියාපදිංචි කිරීම ඇතුළු කටයුතු වෙනුවෙන් අය කෙරෙන මුද්දර ගාස්තු සම්පූර්ණ වශයෙන් එම ආයතනවල ආදායමක් බවද ඔහු පවසයි.
තවද පළාත් පාලන ආයතන බලප්‍රදේශයට අයත් මහේස්ත්‍රාත් අධිකරණ විසින් සුරාබදු ආඥා පනත යටතේ, මාර්ග ආඥා පනත යටතේ හා තවත් නීති යටතේ පනවන දඩ ආදායමද ඒ ඒ පළාත් පාලන ආයතනයට හිමි එකක් බව ඔහු පවසයි.
