රුවන්වැලිසෑය අසල ඇති වූ ගැටුම සම්බන්ධයෙන් සිදු කෙරෙන විමර්ශනයට අදාළව රාජාංගනේ සද්ධාරතන හිමි අනුරාධපුර පොලිසිය විසින් අත්අඩංගුවට ගෙන තිබේ.
අත්අඩංගුවට ගැනීමට පෙර අද (18) උදෑසන රාජාංගනේ සද්ධාරතන හිමි සහ තවත් පුද්ගලයෙකු අනුරාධපුර පොලිසිය විසින් ප්රශ්න කර තිබේ.
මෙම අත්අඩංගුවට ගැනීම සිදුකර ඇත්තේ අදාළ ගැටුමට සම්බන්ධ බවට චෝදනා එල්ල වන පුද්ගලයන් අත්අඩංගුවට ගැනීමට අපොහොසත් වීම සම්බන්ධයෙන් අනුරාධපුර කොට්ඨාසය භාර ජ්යෙෂ්ඨ පොලිස් අධිකාරිවරයාට නොවැම්බර් 26 වැනිදා අධිකරණය හමුවේ පෙනී සිට කරුණු දක්වන ලෙස අනුරාධපුර ප්රධාන මහේස්ත්රාත් අධිකරණය ඊයේ නියෝග කිරීමෙන් අනතුරුවය.
අදාළ සිද්ධිය සම්බන්ධයෙන් අත්අඩංගුවට ගත් සැකකරුවන් හත්දෙනෙකු වෙනුවෙන් ඉදිරිපත් කළ ඇප ඉල්ලීම සලකා බැලීමේදී අනුරාධපුර ප්රධාන මහේස්ත්රාත් සියපත් සසිඳු වික්රමරත්න මහතා එම නියෝගය නිකුත් කර තිබේ.
එහිදී සැකකරුවන් වෙනුවෙන් පෙනී සිටි නීතිඥවරුන්, ගැටුම ඇති කිරීමට මුල් වූ බවට චෝදනා එල්ල වන රාජාංගනේ සද්ධාරතන හිමි ඇතුළු පුද්ගලයන් 25කට අධික පිරිසක් අත්අඩංගුවට ගෙන අධිකරණයට ඉදිරිපත් කර නොමැති බවට චෝදනා කර ඇත.
කෙසේ වෙතත්, සැකකරුවන් හත්දෙනා වෙනුවෙන් ඉදිරිපත් කළ ඇප ඉල්ලීම අධිකරණය ප්රතික්ෂේප කර ඇති අතර, චෝදනා එල්ල වන අනෙකුත් පුද්ගලයන් සම්බන්ධයෙන් නීතිමය පියවර නොගැනීම පිළිබඳව කරුණු දක්වන ලෙස ජ්යෙෂ්ඨ පොලිස් අධිකාරිවරයාට නියෝග කර තිබේ.


