පොලිස් අත්අඩංගුවේ සිටියදී සැකකරුවෙකු නිකවැරටිය රෝහලේදී මියයෑමේ සිද්ධිය සම්බන්ධයෙන් රාජකාරි පැහැර හැරීමේ චෝදනා මත කොබෙයිගනේ පොලිස් ස්ථානයට අනුයුක්ත පොලිස් සැරයන්වරුන් දෙදෙනෙකුගේ සහ පොලිස් කොස්තාපල්වරයෙකුගේ සේවය අත්හිටුවා තිබේ.
ඔක්තෝබර් 27 වැනිදා පොලිස් අත්අඩංගුවේ සිටියදී නිකවැරටිය රෝහලට ඇතුළත් කිරීමෙන් පසු සැකකරුවෙකු මියයෑමේ සිද්ධිය සම්බන්ධයෙන් මෙම පියවර ගෙන ඇති බව පොලිසිය සඳහන් කරයි.
සොරකම් කිහිපයකට සම්බන්ධ බවට සැක කෙරෙන මෙම පුද්ගලයා ඔක්තෝබර් 25 වැනිදා කොබෙයිගනේ, බද්දේගම ප්‍රදේශයේදී ප්‍රදේශවාසීන් විසින් අල්ලා ගනු ලැබ ඇති අතර ඉන් අනතුරුව ඔහුව ගසක බැඳ සිට පොලිසියට භාරදී ඇත.
එම පුද්ගලයා දින දෙකක පමණ කාලයක් පොලිස් අත්අඩංගුවේ සිට ඇති අතර ඔක්තෝබර් 27 වැනිදා නිකවැරටිය රෝහලට ඇතුළත් කිරීමෙන් පසු මියගොස් තිබේ. මරණයෙන් අනතුරුව සැකකරු අල්ලා පොලිසියට භාරදුන් ප්‍රදේශවාසීන් පස්දෙනෙකු ද කොබෙයිගනේ පොලිසියේ නිලධාරීන් විසින් අත්අඩංගුවට ගෙන ඇත.
කෙසේ වෙතත් අත්අඩංගුවට ගත් පුද්ගලයන්ගේ ඥාතීන් පවසන්නේ සැකකරු අල්ලා ගසක බැඳ පැයකට ආසන්න කාලයක් ඇතුළත ඒ බව පොලිසියට දැනුම් දුන් බවත් ඔහුට කිසිදු හානියක් නොවන පරිදි පොලිසියට භාරදුන් බවත්ය.ගම්වාසීන් විසින් අල්ලාගත් අවස්ථාවේදී සැකකරුට පහරදීමක් සිදුව තිබුණේ නම්, ඔහු මියයෑමට පෙර රෝහල්ගත කිරීමට අවශ්‍ය පියවර ගත යුතුව තිබූ බව ද ඔවුහු පවසති.
එමෙන්ම මියගිය පුද්ගලයා සොරකම්වලට සම්බන්ධ බවට සැක කරමින් අවස්ථා කිහිපයකදීම පොලිසියට පැමිණිලි කර තිබූ බව ද ඥාතීන් සඳහන් කරයි. එම අවස්ථාවලදී සැකකරු අල්ලා පොලිසියට භාරදෙන ලෙස පොලිසිය විසින් තමන්ට උපදෙස් ලබාදී තිබූ බව ද ඔවුහු වැඩිදුරටත් පවසති.
සිද්ධිය සම්බන්ධයෙන් පොලිස් විමර්ශන ක්‍රියාත්මක වන අතර සැකකරුගේ මරණයට හේතුව සහ ඔහු පොලිස් අත්අඩංගුවේ සිටි කාලය තුළ සිදුවූ කරුණු පිළිබඳව විමර්ශන මගින් තහවුරු කරගැනීමට නියමිතය.
