හෝමාගම පොලිස් අත්අඩංගුවේ සිටියදී මියගිය තරුණයාගේ ඉළ ඇට තුනක් කැඩී ඇති බවත්, මොළයේ රුධිර වහනයක් සිදුව ඇති බවත් වෛද්‍ය වාර්තාවෙන් අනාවරණය වී ඇතැයි බස්නාහිර පළාත භාර ජ්‍යෙෂ්ඨ නියෝජ්‍ය පොලිස්පති සජීව මැදවත්ත මහතා ප්‍රකාශ කර තිබේ.
මෙම මරණය පහරදීමක් හේතුවෙන් සිදුවූවක් බවට පොලිසිය සැක කරන බව ද ඔහු සඳහන් කර ඇත.
මෙලෙස මියගොස් ඇත්තේ කිරිවත්තුඩු ප්‍රදේශයේ පදිංචිව සිටි 29 හැවිරිදි ඉෂාර හර්ෂ කුමාර නමැති දෙදරු පියෙකි. ඔහු 2026 ඔක්තෝබර් 25 වැනිදා හෝමාගම පොලිස් ස්ථානයේ අත්අඩංගුවේ සිටියදී සැකකටයුතු තත්ත්වයක් යටතේ මියගොස් තිබිණි.
පොලිස් මාධ්‍ය කොට්ඨාසයේ පැවති විශේෂ මාධ්‍ය හමුවකට එක්වෙමින් ජ්‍යෙෂ්ඨ නියෝජ්‍ය පොලිස්පති සජීව මැදවත්ත මහතා මෙම කරුණු අනාවරණය කර තිබුණු අතර ඔහු පවසා සිටියේ විමර්ශනවලදී අනාවරණය වූ තොරතුරු අනුව මියගිය පුද්ගලයාගේ හිසට ද තුවාල සිදුව ඇති බවය.
මියගිය තරුණයා පොලිස් සිරමැදිරියට ඇතුළත් කිරීමට පෙර යම් කාලයක් හෝමාගම පොලිසියේ අපරාධ විමර්ශන අංශයේ රඳවාගෙන සිට ඇති බවත්, එම කාලය තුළ ඔහුට පහරදීමක් සිදුව ඇති බවට තොරතුරු ලැබී ඇති බවත් ජ්‍යෙෂ්ඨ නියෝජ්‍ය පොලිස්පතිවරයා පැවසීය.
කෙසේ වෙතත්, එම පහරදීම සිදුවූ බව කියන තත්ත්වයන් මෙතෙක් නිශ්චිතව තහවුරු වී නොමැති අතර ඒ සම්බන්ධයෙන් වැඩිදුර විමර්ශන සිදුකරමින් පවතින බව ද ඔහු අවධාරණය කළේය.
මරණයට නිශ්චිත හේතුව සහ එයට තුඩුදුන් සිදුවීම් හඳුනාගැනීම සඳහා වෛද්‍ය පරීක්ෂණවල සොයාගැනීම් මෙන්ම දැනට ක්‍රියාත්මක විමර්ශනවල ප්‍රතිඵල ද තීරණාත්මක වනු ඇති බව ජ්‍යෙෂ්ඨ නියෝජ්‍ය පොලිස්පති සජීව මැදවත්ත මහතා වැඩිදුරටත් සඳහන් කළේය.
