හිටපු අධිකරණ අමාත්‍ය විජයදාස රාජපක්ෂ මහතාගේ පුත් රකිත රාජපක්ෂ මහතාට අයත් බැංකු ගිණුම් කිහිපයක් අල්ලස් හෝ දූෂණ චෝදනා විමර්ශන කොමිෂන් සභාව විසින් සිදුකරන විමර්ශනයකට අදාළව අත්හිටුවීමට පියවර ගෙන තිබේ.
අපරාධවලින් උපයාගත් දේපළ සම්බන්ධයෙන් පවතින නීතිමය ප්‍රතිපාදන යටතේ මෙම පියවර ගෙන ඇති බව වාර්තා වේ.
මේ සම්බන්ධයෙන් දැනුම්දීමේ නිවේදනය භාරදීම සඳහා අල්ලස් හෝ දූෂණ චෝදනා විමර්ශන කොමිෂන් සභාවේ නිලධාරීන් කණ්ඩායමක් පසුගිය ඔක්තෝබර් 28 වැනිදා නාවල පිහිටි රකිත රාජපක්ෂ මහතාගේ නිවසට ගොස් තිබේ. කෙසේ වෙතත් එම අවස්ථාවේදී රකිත රාජපක්ෂ මහතා නිවසේ සිට නොමැති බව කොමිෂන් සභාව සඳහන් කර ඇත.
ඒ අනුව අදාළ බැංකු ගිණුම් අත්හිටුවීම සම්බන්ධ නිවේදනය භාරදීම සඳහා කොමිෂන් සභාවේ නිලධාරීන් යළිත් ඔහුගේ නිවසට යාමට නියමිත බව නිලධාරියෙකු සඳහන් කර තිබේ.මෙම ගිණුම් අත්හිටුවීම සිදුකර ඇත්තේ රකිත රාජපක්ෂ මහතා සම්බන්ධයෙන් ක්‍රියාත්මක වන අල්ලස් හා දූෂණ විමර්ශනයට අදාළවය.
