ගලගොඩඅත්තේ ඥානසාර හිමියන් නිදහස් කරන ලෙස ත්‍රෛනිකායික මහනාහිමිවරුන් මෙතෙක් රජයෙන් ඉල්ලීමක් කර නොමැති බව කැබිනට් ප්‍රකාශක අමාත්‍ය වෛද්‍ය නලින්ද ජයතිස්ස මහතා අද (27) ප්‍රකාශ කළේය.
සතිපතා පැවැත්වෙන කැබිනට් මාධ්‍ය හමුවේදී අදහස් දක්වමින් අමාත්‍යවරයා සඳහන් කළේ එවැනි ඉල්ලීමක් ඉදිරිපත් කළ ද රජය ක්‍රියා කරන්නේ පවතින නීතියට අනුව බවයි. අධිකරණ තීන්දුවක් අභිබවා කටයුතු කිරීමට රජයට කිසිදු අදහසක් නොමැති බව ද ඔහු අවධාරණය කළේය.
මහනාහිමිවරුන් සිව්නමක් බන්ධනාගාර කොමසාරිස් ජනරාල්වරයා වෙත යොමු කළ ලිපියකට අනුව බන්ධනාගාර දෙපාර්තමේන්තුවේ ස්ථාවර නියෝග සංශෝධනය කිරීමට රජය පියවර ගත් බවත් ඉන් අනතුරුව අනුනාහිමිවරුන් ඇතුළු මහනාහිමිවරුන්ගේ නියෝජිතයන් සහ අදාළ නිලධාරීන් සමඟ සාකච්ඡා පැවැත්වූ බවත්, එම සාකච්ඡාවල ප්‍රතිඵලයක් ලෙස අදාළ බන්ධනාගාර රෙගුලාසි සංශෝධනය කිරීමට එකඟතාවකට පැමිණි බවත් ඔහු සඳහන් කළේය.
සංශෝධිත ස්ථාවර නියෝගවලට අනුව ඉදිරි කටයුතු සිදු කරන බව පැවසූ අමාත්‍යවරයා, මහනාහිමිවරුන් විසින් ඉදිරිපත් කළ කරුණු සම්බන්ධයෙන් රජය අවශ්‍ය පියවර ගෙන ඇති බව ද ප්‍රකාශ කළේය.
“සියලු දෙනාම නීතියට යටත්ය යන පදනම මත රජය කටයුතු කරනවා. අධිකරණයට ඉහළින් සිටීමට හෝ අධිකරණ තීන්දුවක් වෙනස් කිරීමට රජය උත්සාහ කරන්නේ නැහැ” යනුවෙන් ද අමාත්‍යවරයා වැඩිදුරටත් සඳහන් කළේය.
