පළාත් සභා මැතිවරණය තවදුරටත් ප්‍රමාද නොකර පැවැත්වීමට කඩිනම් පියවර ගන්නා ලෙසත්, ඡන්දදායකයන්ගේ අයිතිවාසිකම් සුරක්ෂිත කිරීම සඳහා විකල්ප ඡන්ද ක්‍රම අත්හදා බලන ලෙසත් නිදහස් හා සාධාරණ මැතිවරණයක් සඳහා වූ ජනතා ක්‍රියාකාරීත්වය රජයෙන්, පාර්ලිමේන්තුවෙන් සහ අදාළ ආයතනවලින් ඉල්ලා සිටී.
විකල්ප ඡන්ද ක්‍රම හඳුන්වාදීම සම්බන්ධයෙන් දේශපාලන පක්ෂ 23ක් සමඟ පැවැත්වූ සාකච්ඡාවලදී, පක්ෂ 22ක් එනම් සියයට 95.7ක් තැපැල් ඡන්ද ක්‍රමය පුළුල් කිරීමට එකඟතාව පළ කළ බව PAFFREL සංවිධානය පවසයි.
එසේම කලින් ඡන්දය ප්‍රකාශ කිරීමේ ක්‍රමයක් හඳුන්වාදීම, විකල්ප ඡන්ද මධ්‍යස්ථාන පිහිටුවීම සහ විදේශගත ශ්‍රී ලාංකිකයන්ට ඡන්දය ප්‍රකාශ කිරීමට අවස්ථාව ලබාදීම පිළිබඳව ද එම සාකච්ඡාවලදී සහයෝගය පළ වී තිබේ.
ඒ අනුව, පළාත් සභා මැතිවරණය පැවැත්වීම සඳහා නිශ්චිත කාලරාමුවක් කඩිනමින් ප්‍රකාශයට පත් කරන ලෙස PAFFREL ඉල්ලා සිටින අතර තැපැල් ඡන්ද ක්‍රමය පුළුල් කිරීම, කලින් ඡන්දය ප්‍රකාශ කිරීමේ ක්‍රම සහ විකල්ප ඡන්ද මධ්‍යස්ථාන නියමු ව්‍යාපෘති ලෙස අත්හදා බැලීම ද එම යෝජනා අතර වේ.
ආබාධ සහිත පුද්ගලයන්, රෝහල්ගතව සිටින රෝගීන්, රිමාන්ඩ් බන්ධනාගාරගත පුද්ගලයන් සහ පෞද්ගලික අංශයේ සේවකයන් ඇතුළු සුදුසුකම්ලත් සියලු දෙනාට ඡන්දය ප්‍රකාශ කිරීමට අවස්ථාව සැලසිය යුතු බව ද එම සංවිධානය අවධාරණය කරයි.
යෝජිත ක්‍රම අත්හදා බැලීමේදී විනිවිදභාවයෙන් යුත් ක්‍රියාපටිපාටි අනුගමනය කිරීම, ස්වාධීන නිරීක්ෂණය සහතික කිරීම සහ නියමු ව්‍යාපෘතිවල ප්‍රතිඵල පිළිබඳ ප්‍රසිද්ධ ඇගයීමක් සිදු කිරීම ද අවශ්‍ය බව PAFFREL පෙන්වා දෙයි.
“සුදුසුකම්ලත් කිසිදු පුරවැසියෙකුට තම රැකියාව, පවතින තත්ත්වය හෝ පදිංචි ස්ථානය හේතුවෙන් ඡන්දය ප්‍රකාශ කිරීමේ අයිතිය අහිමි නොවිය යුතුය” යන ස්ථාවරය ද එම සංවිධානය අවධාරණය කරයි.
