2026 ජූලි 5 සහ 6 යන දිනවල මීගමුව බන්ධනාගාරයේ ඇති වූ ගැටුම්වලදී මියගිය හෝ ආබාධිත තත්ත්වයට පත්වූ බන්ධනාගාර නිලධාරීන් වෙනුවෙන් රුපියල් මිලියන 5ක් දක්වා විශේෂ වන්දි මුදලක් ලබාදීමට කැබිනට් මණ්ඩලය අනුමැතිය ලබාදී තිබේ.
2026 අගෝස්තු 3 වැනිදා පැවැති කැබිනට් රැස්වීමේදී ගත් තීරණයකට අනුව, අධිකරණ සහ ජාතික ඒකාබද්ධතා අමාත්‍යාංශයේ ලේකම්වරයාගේ ප්‍රධානත්වයෙන් පත් කළ කමිටුව ඉදිරිපත් කළ නිර්දේශ මත මෙම තීරණය ගෙන ඇත.
ගැටුම් අතරතුර රාජකාරියේ නිරතව සිටියදී මියගිය හෝ තුවාල ලැබූ බන්ධනාගාර නිලධාරීන්ට වන්දි සහ සහන ලබාදීම සම්බන්ධයෙන් නිර්දේශ ඉදිරිපත් කිරීම එම කමිටුවට පැවරී තිබිණි. අධිකරණ සහ ජාතික ඒකාබද්ධතා අමාත්‍යවරයා විසින් කමිටු වාර්තාව කැබිනට් මණ්ඩලයට ඉදිරිපත් කිරීමෙන් අනතුරුව එහි නිර්දේශ ක්‍රියාත්මක කිරීමට අනුමැතිය හිමිව තිබේ.
ඒ අනුව, ගැටුම්වලදී මියගිය සෑම නිලධාරියකු වෙනුවෙන්ම ඔහුගේ හෝ ඇයගේ පවුලට රුපියල් මිලියන 5ක වන්දි මුදලක් හිමිවේ. සම්පූර්ණ ආබාධිත තත්ත්වයට පත්වූ නිලධාරීන්ට ද රුපියල් මිලියන 5ක වන්දියක් ලබාදීමට නියමිතය.
අර්ධ ආබාධිත නිලධාරීන්ට රුපියල් මිලියන 4ක වන්දියක් ද, තාවකාලික අර්ධ ආබාධිත තත්ත්වයට පත්වූ නිලධාරීන්ට රුපියල් මිලියන 3ක වන්දියක් ද ලබාදීමට අනුමැතිය හිමිව තිබේ.
මෙම විශේෂ වන්දි මුදල් රාජ්‍ය පරිපාලන චක්‍රලේඛ අංක 22/93 යටතේ ලබාදෙන ගෙවීම්වලට අමතරව ලබාදීමට ද කැබිනට් මණ්ඩලය තීරණය කර ඇත.
මේ අතර සිද්ධියෙන් අනතුරුව බන්ධනාගාර උපක්‍රමික බලකාය (Prison Tactical Force) ශක්තිමත් කිරීම සඳහා ද කැබිනට් අනුමැතිය හිමිව තිබේ. ඒ යටතේ එම බලකායට විධිමත් නීතිමය පිළිගැනීමක් ලබාදීම සඳහා බන්ධනාගාර ආඥාපනත සංශෝධනය කිරීම, අවශ්‍ය සුදුසු නිලධාරීන් බඳවා ගැනීම, විශේෂිත පුහුණුව සහ නවීන උපකරණ සැපයීම මෙන්ම බලකායේ මූලස්ථානය සුදුසු ස්ථානයක පිහිටුවීම ද ඇතුළත් වේ.
