නීතිවිරෝධී ලෙස මහජනතාවගෙන් තැන්පතු ලබාගනිමින් මූල්ය ව්යාපාර පවත්වාගෙන ගිය බවට චෝදනා එල්ල වී ඇති සමාගම් හයක් සහ ඒවායේ අධ්යක්ෂවරුන් සතු වත්කම් හා දේපළ පැවරීම, විකිණීම හෝ වෙනත් ගනුදෙනුවකට ලක් කිරීම වළක්වමින් ශ්රී ලංකා මහ බැංකුව නිකුත් කළ අත්හිටුවීමේ නියෝග කොළඹ මහාධිකරණය විසින් තහවුරු කර දීර්ඝ කර තිබේ.
මහ බැංකුවේ මූල්ය නොවන ආයතන අධීක්ෂණ දෙපාර්තමේන්තුව විසින් 2011 අංක 42 දරන මුදල් ව්යාපාර පනතේ 44 වැනි වගන්තිය යටතේ මෙම නියෝග නිකුත් කර තිබූ බව මහ බැංකුව සඳහන් කරයි.
එලෙස වත්කම් අත්හිටුවීමේ නියෝගයට ලක්ව ඇති ආයතන වන්නේ කසාගල ග්රීන් ප්ලාන්ටේෂන් පුද්ගලික සමාගම, සිලෝන් ග්රීන් ලයිෆ් ප්ලාන්ටේෂන් පෞද්ගලික සමාගම, සිංහ කැපිටල් ඉන්වෙස්මන්ට් ලිමිටඩ්, ප්රෝ ෂොප් ඇඩ්වටයිසින් හෝල්ඩිංග්ස් පුද්ගලික සමාගම, ඇතන්ස් ඉන්ටර්නැෂනල් එඩියුකේෂන් සෙන්ටර් පුද්ගලික සමාගම සහ ඊයොන් ලංකා ඉන්වෙස්මන්ට් ඇන්ඩ් ෆිල්ම් ප්රොඩක්ෂන් ඉන්ටර්නැෂනල් පුද්ගලික සමාගමයි.
අධිකරණ නියෝගය අනුව එම සමාගම්වලට සහ ඒවායේ අධ්යක්ෂවරුන්ට අයත් චංචල හෝ නිශ්චල දේපළ වෙනත් පාර්ශ්වයකට පැවරීම හෝ විකිණීම ඇතුළු ගනුදෙනු සිදුකිරීම තහනම් වේ.කසාගල ග්රීන් ප්ලාන්ටේෂන් සහ සිලෝන් ග්රීන් ලයිෆ් ප්ලාන්ටේෂන් යන සමාගම් සම්බන්ධයෙන් මුදල් ව්යාපාර පනතේ 42 වැනි වගන්තිය යටතේ විශේෂ විමර්ශන දැනටමත් ක්රියාත්මක වන බව මහ බැංකුව සඳහන් කරයි.
අනෙක් සමාගම් හතර නිසි බලපත්රයකින් තොරව මහජනතාවගෙන් තැන්පතු ලබාගෙන මූල්ය ව්යාපාර පවත්වාගෙන යමින් මුදල් ව්යාපාර පනතේ 2 වැනි වගන්තිය උල්ලංඝනය කර ඇති බවට මහ බැංකුව අනාවරණය කරගෙන තිබේ. තමන් උපයාගන්නා මුදල් තැන්පත් කිරීමේදී නීත්යානුකූලව අවසර ලබා ඇති ආයතන පමණක් තෝරාගන්නා ලෙස මහ බැංකුව ජනතාවගෙන් ඉල්ලා සිටී.
1988 අංක 30 දරන බැංකු පනත හෝ 2011 අංක 42 දරන මුදල් ව්යාපාර පනත යටතේ නිසි බලපත්ර ලබා ඇති හෝ එම පනත් යටතේ නිශ්චිතව නිදහස් කර ඇති ආයතනවලට පමණක් මහජන තැන්පතු භාරගැනීමට නීත්යානුකූල බලය ඇති බව මහ බැංකුව 2026 සැප්තැම්බර් 22 දින නිකුත් කළ නිවේදනයේ වැඩිදුරටත් සඳහන් කරයි.
