2019 පාස්කු ඉරිදා ත්රස්ත ප්රහාර සම්බන්ධයෙන් සිදුකළ විමර්ශනයකදී වත්මන් මහජන ආරක්ෂක අමාත්යාංශයේ ලේකම් රවි සෙනෙවිරත්න මහතාගේ සහ අපරාධ පරීක්ෂණ දෙපාර්තමේන්තුවේ නියෝජ්ය පොලිස්පති ශානි අබේසේකර මහතාගේ මූලික මිනිස් අයිතිවාසිකම් උල්ලංඝනය වී ඇති බව ශ්රේෂ්ඨාධිකරණය අද (15) තීන්දු කර ඇත.
ඒ අනුව හිටපු පොලිස්පති දේශබන්දු තෙන්නකෝන්, අපරාධ පරීක්ෂණ දෙපාර්තමේන්තුවේ එවක ප්රධාන පොලිස් පරීක්ෂක ඉන්දික ද සිල්වා සහ විශ්රාමික නියෝජ්ය පොලිස්පති පාලිත සිරිවර්ධන යන මහත්වරුන් විසින් පෙත්සම්කරුවන්ගේ මූලික මිනිස් අයිතිවාසිකම් උල්ලංඝනය කර ඇති බව අධිකරණය තීරණය කර තිබේ.
ශ්රී ලංකා ආණ්ඩුක්රම ව්යවස්ථාවේ 12(1), 12(2), 13(1) සහ 13(2) වගන්ති මගින් සහතික කර ඇති මූලික අයිතිවාසිකම් උල්ලංඝනය වී ඇති බව පවසමින් රවි සෙනෙවිරත්න සහ ශානි අබේසේකර යන මහත්වරුන් මෙම මූලික අයිතිවාසිකම් පෙත්සම ගොනු කර තිබුණි. එය ආණ්ඩුක්රම ව්යවස්ථාවේ 17 සහ 126 වගන්ති යටතේ ඉදිරිපත් කර තිබේ.
මෙම පෙත්සමට පාදක වූ විමර්ශනය ආරම්භ වී ඇත්තේ 2024 වසරේදී රවි සෙනෙවිරත්න සහ ශානි අබේසේකර යන මහත්වරුන්ට එරෙහිව ඉදිරිපත් කළ පැමිණිල්ලක් මතය.
එම පැමිණිල්ලෙන් ප්රධාන වශයෙන් චෝදනා කර තිබුණේ 2019 අප්රේල් 9 වැනිදා රාජ්ය බුද්ධි සේවයේ එවකට අධ්යක්ෂ නිලන්ත ජයවර්ධන මහතා විසින් පාස්කු ප්රහාරයක් සම්බන්ධයෙන් යොමු කළ බුද්ධි තොරතුරක් සම්බන්ධයෙන් ඔවුන් නිසි පියවර නොගත් බවයි.
අදාළ බුද්ධි වාර්තාව අප්රේල් 9 වැනිදා අපරාධ පරීක්ෂණ දෙපාර්තමේන්තුව වෙත යොමු කර තිබුණද එය ශානි අබේසේකර මහතා වෙත යොමු කර ඇත්තේ අප්රේල් 22 වැනිදා බවට පැමිණිල්ලෙන් චෝදනා කර තිබුණි.
කෙසේ වෙතත් පෙත්සම්කරුවන් එම චෝදනා ප්රතික්ෂේප කරමින් සඳහන් කර තිබුණේ අදාළ බුද්ධි වාර්තාව සෘජුවම එවකට පොලිස්පතිවරයා වෙත යොමු කර තිබූ බවත් රවි සෙනෙවිරත්න මහතා එම කාලය තුළ විදේශගතව සිටි බවත්ය.
ඔහු අප්රේල් 16 වැනිදා යළි රාජකාරියට පැමිණීමෙන් පසු අදාළ වාර්තාව ලැබුණු බවත් එදිනම එය එවකට අපරාධ පරීක්ෂණ දෙපාර්තමේන්තුව භාර නියෝජ්ය පොලිස්පතිවරයා වෙත යොමු කළ බවත් පෙත්සමේ සඳහන් කර තිබේ.
එමෙන්ම, අදාළ බුද්ධි වාර්තාව අප්රේල් 16 වැනිදා නිසි ලෙස භාරදීම සිදු නොවීම හේතුවෙන් එය අපරාධ පරීක්ෂණ දෙපාර්තමේන්තුව භාර නියෝජ්ය පොලිස්පතිවරයා වෙත ලැබීම ප්රමාද වී ඇති බව විමර්ශන ප්රගති වාර්තාවෙන් අනාවරණය වූ බවද පෙත්සම්කරුවන් පෙන්වා දී තිබේ.
පාස්කු ඉරිදා ප්රහාර සම්බන්ධයෙන් ජනාධිපති විමර්ශන කොමිසම, මලල්ගොඩ කොමිසම සහ පාර්ලිමේන්තු විශේෂ කාරක සභාව ඇතුළු ආයතන කිහිපයක් විමර්ශන සිදුකර තිබුණද එම විමර්ශනවලින් අපරාධ පරීක්ෂණ දෙපාර්තමේන්තුව හෝ පෙත්සම්කරුවන් වරදකට වගකිව යුතු බවට තීරණය කර නොතිබූ බවද පෙත්සම්කරුවන් සිය පෙත්සමෙන් පෙන්වා දී තිබුණි.
පාස්කු ප්රහාරයට පෙර නාත්තන්ඩිය, මාවනැල්ල සහ වනාතවිල්ලුව ආශ්රිතව සිදුකළ ත්රස්ත විමර්ශනවලදී අපරාධ පරීක්ෂණ දෙපාර්තමේන්තුව සහරාන් හෂීම් ඇතුළු ජාතික තව්හීද් ජමාත් සංවිධානය සම්බන්ධයෙන් වැදගත් තොරතුරු අනාවරණය කරගෙන තිබූ බවද පෙත්සමේ දීර්ඝ ලෙස සඳහන් කර තිබේ.
වනාතවිල්ලුව ප්රදේශයේදී පුපුරන ද්රව්ය සහ අවි සොයා ගැනීම ඇතුළු විමර්ශනවල තොරතුරුද පෙත්සම මගින් අධිකරණයට ඉදිරිපත් කර තිබුණි.
ශ්රේෂ්ඨාධිකරණය අද දින ලබාදුන් තීන්දුව අනුව අදාළ පැමිණිල්ල සහ ඒ මත සිදුකළ විමර්ශන සම්බන්ධයෙන් දේශබන්දු තෙන්නකෝන්, ඉන්දික ද සිල්වා සහ පාලිත සිරිවර්ධන යන නිලධාරීන් දේශපාලන න්යාය පත්රයකට අනුව කටයුතු කර ඇති බව අධිකරණය තීරණය කර තිබේ.
එම ක්රියාමාර්ග හේතුවෙන් රවි සෙනෙවිරත්න සහ ශානි අබේසේකර යන මහත්වරුන්ගේ මූලික මිනිස් අයිතිවාසිකම් උල්ලංඝනය වී ඇති බවද අධිකරණය තීන්දු කර ඇත.
මූලික මිනිස් අයිතිවාසිකම් උල්ලංඝනය කිරීම සම්බන්ධයෙන් පෙත්සම්කරුවන් රුපියල් මිලියන 100ක වන්දියක් හෝ අධිකරණය සාධාරණ යැයි තීරණය කරන මුදලක් ඉල්ලා තිබූ අතර, ඔවුන්ගේ කීර්තිනාමයට සහ වෘත්තීය ගෞරවයට සිදුවූ හානිය වෙනුවෙන් එම වන්දිය ඉල්ලා තිබුණි.
මෙම තීන්දුව ශ්රේෂ්ඨාධිකරණ විනිසුරු ගිහාන් කුලතුංග මහතා විසින් ප්රකාශයට පත්කර ඇති අතර, අගවිනිසුරු ප්රීති පද්මන් සූරසේන සහ විනිසුරු අචල වෙංගප්පුලි යන මහත්වරුන්ගේ එකඟත්වයද ඊට හිමිව තිබේ.
