ශ්රීලංකන් ගුවන් සේවය සඳහා එයාර්බස් ගුවන් යානා මිලදී ගැනීමේදී සිදුව ඇතැයි කියන අක්රමිකතා සම්බන්ධ මුදල් විශුද්ධිකරණ විමර්ශනයේදී පාර්ලිමේන්තු මන්ත්රී නාමල් රාජපක්ෂ මහතා සැකකරුවෙකු ලෙස නම් කිරීමට නීතිපති දෙපාර්තමේන්තුව පියවර ගෙන තිබේ.
ශ්රීලංකන් ගුවන් සේවයේ එයාර්බස් ගුවන් යානා ප්රසම්පාදන ක්රියාවලිය සම්බන්ධයෙන් සිදුව ඇතැයි කියන මූල්ය අක්රමිකතා පිළිබඳව බලධාරීන් විසින් මේ වනවිටත් විමර්ශන සිදුකරමින් පවතී.
මේ අතර ශ්රීලංකන් ගුවන් සේවයේ එයාර්බස් ගුවන් යානා ගනුදෙනුවට අදාළව සිදුව ඇතැයි කියන අල්ලස් සිද්ධිය සම්බන්ධ විමර්ශනයේ ප්රගතිය පිළිබඳ වාර්තාවක් ඔක්තෝබර් 13 වැනිදා අධිකරණයට ඉදිරිපත් කරන ලෙස කොළඹ ප්රධාන මහේස්ත්රාත් අසංග එස්. බෝදරගම මහතා අල්ලස් හෝ දූෂණ චෝදනා විමර්ශන කොමිසමට මීට පෙර නියෝග කර තිබිණි.
අදාළ නඩුව කොළඹ ප්රධාන මහේස්ත්රාත් අධිකරණය හමුවේ කැඳවූ අවස්ථාවේදී එම නියෝගය නිකුත් කර තිබේ.
එහිදී අල්ලස් හෝ දූෂණ චෝදනා විමර්ශන කොමිසම විසින් විමර්ශනවල ප්රගතිය ඇතුළත් වාර්තාවක් අධිකරණයට ඉදිරිපත් කර ඇති අතර විමර්ශන සම්බන්ධයෙන් තවදුරටත් කරුණු වාර්තා කිරීම සඳහා දිනයක් ලබාදෙන ලෙස ඉල්ලා තිබේ.
මෙම නඩුවේ පළමු සැකකරු ලෙස නම් කර සිටි ශ්රීලංකන් ගුවන් සේවයේ හිටපු ප්රධාන විධායක නිලධාරී කපිල චන්ද්රසේන මහතා මෑතකදී අභිරහස් ලෙස මියගොස් තිබුණු අතර එම නඩුවේ දෙවැනි සැකකාරිය වන ඔහුගේ බිරිඳ ප්රියංකා නියෝමාලි විජේනායක සහ තෙවැනි සැකකරු වන ශ්රීලංකන් ගුවන් සේවයේ හිටපු අධ්යක්ෂ මණ්ඩල සාමාජික ශමින්ද්ර රාජපක්ෂ යන අය අත්අඩංගුවට ගැනීම සඳහා මීට පෙර අධිකරණය විසින් වරෙන්තු නිකුත් කර තිබිණි.
කරුණු සලකා බැලූ කොළඹ ප්රධාන මහේස්ත්රාත්වරයා විමර්ශනයේ ප්රගතිය පිළිබඳ සවිස්තරාත්මක වාර්තාවක් ඔක්තෝබර් 13 වැනිදා අධිකරණයට ඉදිරිපත් කරන ලෙස දැනුම් දෙමින් එදිනට නඩුව යළි කැඳවීමට නියම කළේය.
