යෝජිත 22 වැනි ආණ්ඩුක්රම ව්යවස්ථා සංශෝධනය සම්බන්ධයෙන් ශ්රී ලංකා නීතිඥ සංගමය ගෙන ඇති ස්ථාවරයට පූර්ණ සහාය පළ කරන බව ශ්රී ලංකා දුම්රිය ස්ථානාධිපති සංගමය පවසයි.
අධිකරණයේ ස්වාධීනත්වය, නීතියේ ආධිපත්යය, බලතල වෙන් කිරීමේ මූලධර්මය සහ ජනතා පරමාධිපත්යය ආරක්ෂා කිරීම නීතිඥ ප්රජාවට පමණක් සීමා වූ වගකීමක් නොව සමස්ත පුරවැසි සමාජයේම වගකීමක් බව එම සංගමය නිවේදනයක් නිකුත් කරමින් සඳහන් කර ඇත.
උසස් අධිකරණ විනිසුරුවරුන්ගේ ධුර කාලය හෝ විශ්රාම ගැන්වීමේ වයස වෙනස් කිරීම සාමාන්ය පරිපාලනමය සංශෝධනයක් ලෙස සැලකිය නොහැකි බවද දුම්රිය ස්ථානාධිපති සංගමය පෙන්වා දෙයි.
එවැනි වෙනසක් සිදුකරන ආකාරය, එහි කාලසීමාව, එම සංශෝධනයෙන් බලපෑමට ලක්විය හැකි වර්තමාන ධුරධාරීන් සහ එමගින් අධිකරණයේ ස්වාධීනත්වය පිළිබඳ මහජන විශ්වාසයට ඇති විය හැකි බලපෑම පිළිබඳව ඉතා ප්රවේශමෙන් සලකා බැලිය යුතු බවද එම සංගමය සඳහන් කරයි.
යුක්තිය ඉටු කිරීම පමණක් ප්රමාණවත් නොවන බවත්, යුක්තිය ස්වාධීනව, අපක්ෂපාතීව සහ බාහිර බලපෑම්වලින් තොරව ඉටු වන බව මහජනතාවට පැහැදිලිව පෙනී යාමද ප්රජාතන්ත්රවාදී රාජ්යයක අත්යවශ්ය කොන්දේසියක් බවත් ඔවුන් පෙන්වා දී ඇත.
විනිසුරුවරුන්ගේ ධුර කාලය සම්බන්ධ නීතිමය රාමුව වෙනස් කිරීමේදී අධිකරණයේ ස්වාධීනත්වය පිළිබඳ මහජන විශ්වාසයට හානිවන ආකාරයේ සැකයක් හෝ අහිතකර පූර්වාදර්ශයක් ඇති නොවන බවට වගබලා ගැනීම අත්යවශ්ය බවද දුම්රිය ස්ථානාධිපති සංගමය අවධාරණය කරයි.
මේ අතර අධිකරණ පද්ධතියේ පවතින නඩු ප්රමාදය, නඩු ගොඩගැසීම සහ කාර්යක්ෂමතාව පිළිබඳ ගැටලු සඳහා විසඳුම් අවශ්ය බවද එම සංගමය පිළිගෙන තිබේ.
එහෙත් එවැනි පරිපාලනමය හෝ පද්ධතිමය ගැටලු විසඳීම සඳහා ගනු ලබන පියවර අධිකරණයේ ආයතනික ස්වාධීනත්වයට හෝ මහජන විශ්වාසයට හානි වන ආකාරයෙන් ක්රියාත්මක නොවිය යුතු බවද එම සංගමය සඳහන් කරයි.
අධිකරණ තීන්දු විවේචනය කිරීමටත්, අධිකරණ පද්ධතියේ අඩුපාඩු සම්බන්ධයෙන් නීත්යානුකූලව ප්රශ්න කිරීමටත් ප්රජාතන්ත්රවාදී සමාජයක අවකාශ තිබිය යුතු බව පවසන දුම්රිය ස්ථානාධිපති සංගමය එවැනි ගැටලු සඳහා විසඳුම් සෙවීමේදී ස්ථාපිත ව්යවස්ථානුකූල සහ නීතිමය ක්රියාපටිපාටි අනුගමනය කිරීම අත්යවශ්ය බවද අවධාරණය කරයි.
ඒ අනුව අධිකරණයේ ස්වාධීනත්වය, නීතියේ ආධිපත්යය, ජනතා පරමාධිපත්යය සහ රටේ ප්රජාතන්ත්රවාදී ව්යවස්ථාමය වටිනාකම් ආරක්ෂා කිරීම සඳහා ශ්රී ලංකා නීතිඥ සංගමය ගෙන ඇති මූලධර්මාත්මක ස්ථාවරයට සිය පූර්ණ සහයෝගය පළ කරන බව ශ්රී ලංකා දුම්රිය ස්ථානාධිපති සංගමය සඳහන් කර ඇත.
නීතිඥ සංගමය විසින් මෙම කරුණ සම්බන්ධයෙන් ව්යවස්ථානුකූල හා නීත්යානුකූල රාමුව තුළ ගනු ලබන ක්රියාමාර්ග සඳහාද සහාය ලබාදෙන බව එම සංගමය පවසයි.
මෙය නීතිඥ ප්රජාවට පමණක් අදාළ ගැටලුවක් නොවන අතර සියලු පුරවැසියන්ගේ අයිතිවාසිකම්, නිදහස සහ අනාගත ප්රජාතන්ත්රවාදී පාලනය සම්බන්ධයෙන් ජාතික වැදගත්කමක් ඇති කරුණක් බවද ඔවුන් අවධාරණය කර තිබේ.
තම සංගමය කිසිදු පුද්ගලයකු, ආයතනයක් හෝ දේශපාලන පාර්ශ්වයක් වෙනුවෙන් නොව ස්වාධීන අධිකරණයක්, නීතියේ ආධිපත්යය සහ ජනතා පරමාධිපත්යය ආරක්ෂා කිරීම වෙනුවෙන් මෙම ස්ථාවරය ගන්නා බවද ශ්රී ලංකා දුම්රිය ස්ථානාධිපති සංගමය වැඩිදුරටත් සඳහන් කර ඇත.
