මෙම ව්යසන අවස්ථාවේදීත් එදා ජනතා විමුක්ති පෙරමුණේ ක්රියාකාරීන් වී සිටි දැන් ජාතික ජන බලවේගය ලෙස නාමකරණය වී සිටින ප්රධානීන් කියන්නේ සුනාමි අවස්ථාවේදී වෙරළබඩ දුම්රිය මාර්ගය ප්රතිසංස්කරණය කරමින් රටේ දකුණු දිග වෙරළ තීරය ශුද්ධ පවිත්ර කිරීමේ කටයුතුවල ඔවුන්ගේ දායකත්වයේ පුරාජේරුවයි. එම දායකත්වය ගැන කිසිවෙක් එදා දොස් කීවේ නැත.
අද ද දොස් කියන්නේ නැත. නමුත් එදා එම කටයුත්තේ තවත් තේරුම් ගත යුතු තත්වයක්ද තිබේ. ඒ ඔවුන්ගේ එම කටයුතු සිදුවූයේ දකුණු වෙරළ තීරයේ බවය. එය සමතලා භූමියකි. සුනාමිය ජල රළ රට තුළට ගලාගෙන විත් මහා විනාශයක් කරමින් ආපසු ගියේය. ඉතිරි වූයේ සුන්බුන් පමණය. ඒ නිසා ජනතා විමුක්ති පෙරමුණේ රතු තරුව බලකායට තිබූ ප්රධාන කාර්ය වූයේ සුන්බුන් ඉවත් කිරීම, ගෙවල් සෝදා පවිත්ර කිරීම, ළිං ශුද්ධ පවිත්ර කිරීම කිරීම වැනි කාර්යයන් පමණය. මෙම කටයුතු ජනතා විමුක්ති පෙරමුණේ රතු තරුව බලකායේ නොවන වෙනත් කණ්ඩායම් විසින්ද සිදුකළ බව අමතක කළ යුතු නැත.
මුහුදු බඩ දුම්රිය මාර්ගය සකස් කිරීම සඳහා වෙනත් පිරිසකගේ අත් උදව් තිබුණද, එය දුම්රිය දෙපාර්තමේන්තු සේවකයන්ගේ මූලිකත්වයෙන් සිදුකෙරුණු එකක් විය. මන්ද දුම්රිය මාර්ග සකස් කිරීම හා අලුත්වැඩියා කටයුතු සඳහා පළපුරුද්ද තිබුණේ ඔවුන්ට වන නිසාය. එහිදී ජනතා විමුක්ති පෙරමුණට අයත් වෘත්තීය සමිති නියෝජනය කළ පිරිස් එම වැඩ කටයුතුවල නිරත වූවා විය හැකිය. එහෙත් එය සම්පූර්ණයෙන්ම ජනතා විමුක්ති පෙරමුණේ රතු තරුව බලකායේ වැඩක් වූයේ නැත.
එහෙත් වත්මන් සුළි කුණාටු ආපදා තත්වය ඊට වඩා වෙනස්ය. එහි බොහෝ බලපෑමක් ඇත්තේ රටේ මධ්ය කඳුකරය ඇතුළු කඳුකර ප්රදේශවලටය. ඉහතින් සඳහන් කළ ආකාරයේ මහ විනාශයන් එහි සිදුවී ඇත. බේරා ගැනීමේ මෙහෙයුම් මෙම සටහන ලියන මොහොත වනවිටත් අවසන් නැත. ඒ සඳහා මේ වනවිටත් සම්බන්ධ වී සිටින්නේ යුද, ගුවන් හා නාවික යන ත්රිවිධ හමුදා, පොලීසිය, විදේශ රටවලින් ආ මුදා ගැනීම් කණ්ඩායම් හා බෝට්ටු සමඟ ආ ධීවරයින් හා වෙනත් පුහුණු පළපුරුදු පිරිසක්ය. සමහර ස්ථානවලදී මුදා ගැනීමේ හා බේරා ගැනීමේ කටයුතු සඳහා එම පිරිස්වලට අයත් නැති යම් පුහුණුවක් ඇති හා නැති සාමාන්ය ජනයාද සම්බන්ධ වන අයුරු දිස්වන අතර එය මෙවන් ආපදා තත්වයකදී අප මෙතෙක් දැක ඇති සාමාන්ය තත්වයයි.
ආපදා තත්වය පහව යෑමෙන් පසු ඉන් පීඩාවට පත් ජනතාවගේ නිවාස ශුද්ධ පවිත්ර කර දීම, ළිං ඉසීම වැනි කටයුතු සඳහා සාමාන්ය ජනයාට සිය ශ්රම දායකත්වය ලබාදිය හැකි අතර ඊට අමතරව ප්රදේශ ශුද්ධ පවිත්ර කරදීමේ කටයුතු ද සිදුකර දිය හැකිය. එහෙත් මෙහිදී අමතක නොකළ යුතු කරුණ වන්නේ මෙම කටයුතු සිදුකිරීමට සිදුවී ඇති බොහෝ ස්ථාන තැනිතලා ස්ථාන නොවන බවය. ඒවා බොහෝමයක් නාය ගිය, තවදුරටත් ඉදිරි වැසි තත්වයකදී නාය යෑමේ අනතුරක් පවතින ස්ථාන බවය. එමෙන්ම එවන් ස්ථානවල ගස් අතු කපා ඉවත් කිරීම්, පස් ඉවත් කිරීම් ඇතුළු සමහර කටයුතු සඳහා යන්ත්ර සූත්ර මෙන්ම උපාංගද අවශ්ය විය හැකි බවය. ස්වෙච්ඡාවෙන් පිරිසිදු කිරීමේ කටයුතු වෙනුවෙන් එන පිරිස අතර එවන් යන්ත්ර සූත්ර මෙන්ම ඒවා ක්රියාකිරීමේ පළපුරුද්දක් තිබිය හැකිය. එහෙත් එම කටයුතු අවශ්ය යන්ත්ර සූත්ර ද සමඟ එම කටයුතු සිදුකරන පිරිසේ ආරක්ෂාවද තහවුරු කර ගනිමින් යම් අධීක්ෂණයක් යටතේ සිදුකළ යුතු එකක් බවට විවාදයක් නැත.
එහෙත් දැනට මුදා ගැනීමේ මෙහෙයුම්වල නිරත වී සිටින ඉහතින් සඳහන් කළ පිරිස්වල අධීක්ෂණයකින් තොරව දේශපාලන මෙහෙයුමක් ලෙස එම පිරිසිදු කිරීමේ කටයුතුවලට ස්වේච්ඡාවෙන් ඉදිරිපත් වූ පිරිස් යොදවන ආකාරයක් අපට දිස්වූයේ බදුල්ල දිස්ත්රික්කයේ එම කටයුතු සඳහා මාතරින් පැමිණි පිරිස් පිළිගනිමින් ඇමති සමන්ත විද්යාරත්න හා ජාතික ජන බලවේගයේ මාතර දිස්ත්රික් පාර්ලිමේන්තු මන්ත්රී අක්රම් ඉල්ලියාස් රඟදැක්වූ නාටකය දෙස බලන විටදීය.
එහිදී ඇමති සමන්ත විද්යාරත්න හඟවන්නට උත්සාහ කළේ මාතරින් පැමිණි එම පිරිස ජාතික ජන බලවේගයේ රතු තරුව බලකාය බවය. එය ඇත්තදැයි නොදනිමු. එහෙත් සමාජ මාධ්යවල උපුටා දක්වා ඇති ඔහුගේ ෆේස්බුක් පිටුව අනුව මුලින් ස්වේච්ඡා ශ්රම දායකයින් වූ ඔවුන් පසුව ‘රතු තරුව සහන සේවා බලකාය’ බවට පත්වී තිබේ. එම පළමු පෝස්ටු ඉන්පසු ඔහු ඉවත් කර ගෙන ඇති අතර මාතරින් පැමිණි එම සහන සේවා කණ්ඩායමේ පිරිස ඔහුගේ ෆේස්බුක් පිටුවේ පසුව හඳුන්වා ඇත්තේ එම සහන කණ්ඩායමට රතු තරුව සංවිධාන, විවිධ ස්වෙච්ඡා කණ්ඩායම්, සමාජ ක්රියාකාරීන් සහ මාධ්ය කණ්ඩායම් ඇතුළු විශාල පිරිසක් ඇතුළත් වන බවයි. ඒ අනුව මාතරින් පැමිණි ස්වේච්ඡා සහන පිරිස අමතමින් සිදුකළ ඇමති විද්යාරත්නගේ හා මන්ත්රී අක්රම්ගේ සළුපිළි දැන් ගැලවී ඇත.
ඇමති සමන්ත විද්යාරත්න එකී නාටක අවස්ථාවේ පැවැත්වූ ඔහුගේ කතාවේදී කීවේ බදුල්ල දිස්ත්රික්කයේ එක් ප්රදේශයට එම පැමිණි පිරිස වෙන්කර යවන ප්රමාණයන් පිළිබඳවයි. එමෙන්ම එහිදී ඔවුන් ජාතික ජන බලවේගයේ ප්රාදේශීය මන්ත්රීවරුන් මෙන්ම සංවිධායකයින්ගේ මඟ පෙන්නීම් යටතේ කටයුතු කළ යුතු බවයි.්
මේ අනුව පෙනෙන්නේ කුමක්ද? මහජනයා ඡන්දයෙන් තෝරා පත්කර ගත් නියෝජිතයින් ලෙස එම කටයුතු සඳහා දේශපාලන නායකත්වය ලබාදෙනවා වෙනුවට ජාතික ජන බලවේගය පක්ෂයක් ලෙස එම කටයුතු සිදුකිරීමට ප්රයන්තයක නියැලෙන බවයි. ප්රාදේශීය වශයෙන් මහජනයා තෝරා පත්කර ගත් ජාතික ජන බලවේග නියෝජිතයින් මෙන්ම වෙනත් පක්ෂ හා ස්වාධීන කණ්ඩායම්වල නියෝජිතයින්ද සිටිති. එහෙත් මෙහිදී සිදුවන්නේ ජාතික ජන බලවේගයේ මහජන නියොා්ජිතයින් නොමැති ස්ථානවලදී මහජන නියෝජිතයින් නොවන ඔවුන්ගේ ප්රාදේශීය සංවිධායකයින් මගින් එම කටයුතු සම්බන්ධීකරණය කිරීමය. ඒ නිසා රාජ්ය යාන්ත්රණය සමඟ සිදුකරන මෙම කටයුත්තේදී වෙනත් පක්ෂවල මහජන නියෝජිතයින් ඉවත්කර ඇත. එය මෙවන් පොදු ආපදා තත්වයකට කොහෙත්ම ගැලපෙන එකක් නොවේ. ආපදාව තුළ දේශපාලන වශයෙන් බොර දියේ මාළු බෑමකි.
ජනතා විමුක්ති පෙරමුණ විපක්ෂයේ සුළු පක්ෂයක් ලෙස සිටි සුනාමි ව්යවසන අවස්ථාවේදී රතු තරුව බලකායක් සාදා එසේ මිනිස්සුන්ට පිහිට වීම තේරුම් ගත හැකි තත්වයකි. ඒ ඔවුන් දේශපාලන වශයෙන් ජනතාව අතර ස්ථාපිත වීමට එවන් තනි ක්රියාකාරිත්වයන් අවශ්ය වේයැයි එදා සිතූ නිසා විය හැකිය.
එහෙත් දැන් රටේ පාලන බලය හොබවන්නේ ජනතා විමුක්ති පෙරමුණේ නායකත්වයෙන් යුත් ජාතික ජන බලවේග ආණ්ඩුවකි. යළි ජනතාව අතර ස්ථාපිත වීමට කියා අමුතු දෙයක් ඔවුන් කළ යුතු නැත. දැනටමත් ජනතාව ඡන්දයෙන් ඔවුන් බලයට පත්කර ඇත.
ආණ්ඩු බලය ලබා ගැනීමෙන් පසු යම් දේශපාලන පක්ෂයකට හෝ ව්යාපාරයකට තමන්ට ඡන්දය දුන් අය වෙනුවෙන් පමණක් කටයුතු කළ නොහැකිය. ඔවුන් තමන්ට ඡන්දය දුන් නොදුන් සියලු දෙනා වෙනුවෙන් රාජ්යය පාලනය කළ යුතුය. එම නිසා මෙවැනි ආපදා තත්වයකදී පක්ෂ, විපක්ෂ, ජාති, ආගම් හා වර්ග බේද නොතකා සියයල්ලන්ගේ සහභාගිත්වයෙන් හා සියල්ලන්ට සහභාගි විය හැකි ලෙස ආපදා සහන මෙහෙයුම් පවත්වාගෙන යෑම ආණ්ඩුවේ වගකීම වේ. මන්ද එහිදී යාන්ත්රණය තුළ නිලධාරීන් ලෙස, යන්ත්ර සූත්ර ලෙස, වාහන ලෙස, මුදල් ලෙස හෝ වෙනත් ආකාරයකට භාවිත වන්නේ ජනතා විමුක්ති පෙරමුණේ හෝ ජාතික ජන බලවේගයේ සම්පත් නොව රාජ්ය සම්පත් වන නිසාය. එම සම්පත් ආණ්ඩු කරන දේශපාලන පක්ෂයට අයත් එකක් වන්නේ නැත.
එම නිසා රතු තරුව සහන බලකා කියන්නේ, එම වගකීම ආණ්ඩුව තේරුම් නොගෙන කටයුතු කිරීමේ අවස්ථාවක් මෙන්ම රාජ්ය සම්පත් අවභාවිත කිරීමේ අවස්ථාවක්ද වේ.
ත්රිවිධ හමුදාව ලෙසද, පොලිසිය ලෙසද, වෙනත් රාජ්ය නිලධාරීන් හා සේවකයන් ලෙසද මෙම ආපදා අවස්ථාවේ සිය රාජකාරි වගකීමට ඔබ්බෙන් ගොස් කටයුතු කරන සියල්ලන්ම ජාතික ජන බලවේගයට ඡන්දය දුන් අය නොවේ. ඔවුන් අතර වෙනත් දේශපාලන පක්ෂවලට ඡන්දය දුන් අය මෙන්ම කිසිවකුට ඡන්දය නොදුන් අයද සිටිය හැකිය. එමෙන්ම ජාතික ජන බලවේගයට හෝ වෙනත් දේශපාලන පක්ෂවලට සම්බන්ධ පිරිස් මෙන්ම එසේ සම්බන්ධ නොවූ පිරිස්ද සිටිය හැකිය. බලයේ සිටින්නේ තමන් ඡන්දය නොදුන් හා අකමැති දේශපාලන පක්ෂයක් යැයි කියා එම රාජ්ය යාන්ත්රණයේ කිසිවකු සිය රාජකාරි හෝ වගකීම් පසෙකට දමා කටයුතු කරන බවක් වාර්තා වන්නේ නැත. ඒ වෙනුවට ඔවුන් මෙම ආපදා අවස්ථාවේ ඉටු කරමින් පවතින්නේ ඔවුන්ගේ රාජකාරිමය වගකීම මෙන්ම ඉන් ඔබ්බට ගොස් රට වෙනුවෙන් හා රටේ පුරවැසියන් වෙනුවෙන් කටයුතු කිරීමේ යුතුකමක් හා වගකීමකි.
ජාතික ජනබලවේග ආණ්ඩුව රතු තරුව සහන බලකා වෙනුවට තේරුම් ගත යුතු තත්වය එයයි. රටක් විපතට පත් අවස්ථාවේදී සිදුකළ යුත්තේ සියල්ලන් එක්කරගෙන එයට මුහුණ දීමය. ඒ වෙනුවට තමන් පමණයි යැයි කියා අනෙක් අයට සහභාගිත්වයට ඇති අවස්ථාවන් අවහිර කරමින් ගෝත්රිකව කටයුතු කිරීම නොවේ.
