තමන්ට බහුතර බලයක් නැති පළාත් පාලන ආයතනවල බලය පිහිටුවීමේදී මෙතෙක් දූෂිත පාලනයන්ට හවුල් වී නැති ස්වාධීන කණ්ඩායම් සමඟ පමණක් එක්ව එය සිදුකරන බව ජාතික ජන බලවේගය ප්‍රකාශ කළද, පැවති පාලනයන්ට සම්බන්ධ පක්ෂ සමඟද ඔවුන් ඒ සඳහා සාකච්ඡා කර ඇති බව වාර්තාවේ.
මේ සම්බන්ධයෙන් කළ විමසීමකදී පාර්ලිමේන්තු මන්ත්‍රී මනෝ ගනේෂන් පැවසුවේ පළාත් පාලන ආයතනවල බලය පිහිටුවීම සඳහා සහාය ලබාදෙන ලෙස ජාතික ජන බලවේගය දුරකතනය ඔස්සේ තමාගෙන් ඉල්ලීමක් කළ බවයි.
එහිදී තමා ජාතික මට්ටමින් එක තැනක ඉඳීමටත්, ප්‍රාදේශීය වශයෙන් තව තැනක ඉඳීමටත් බැරි බව ජාතික ජන බලවේග නියෝජිතයාට පැවසූ බවද ඔහු පවසයි.
මේ අතර සර්ව ජන බලය නායක දිලිත් ජයවීර ප්‍රකාශ කර තිබුනේ පළාත් පාලන ආයතනවල බලය පිහිටුවීම සඳහා ඔහුගේ සහාය ජාතික ජන බලවේගය ඉල්ලා සිටි බවත්, තමා ඇන්ටිජන් හොරා නිසා එය ප්‍රතික්ෂේප කළ බවත්ය. ඒ සම්බන්ධයෙන් වැඩිදුරටත් විමසීම සඳහා දිලිත් ජයවීර මහතා දුරකතනයට සම්බන්ධකර ගැනීමට උත්සාහ කළද ඔහු ප්‍රතිචාර දැක්වූයේ නැත.
ඒ සම්බන්ධයෙන් ඇමති වසන්ත සමරසිංහ ප්‍රකාශ කර තිබුනේ දිලිත් ජයවීර ඔවුන් සමග සාකච්ඡා නොකළද එම පක්ෂයෙන් තේරී පත්වී ඇති සභිකයන් ඔවුන් සමග සාකච්ඡා කරන බව හා සභා පිහිටුවන අවස්ථාවේදී ඒ බව දැකගත හැකි වනු ඇති බවයි.
පුටුව ලකුණින් තරග කළ පොදුජන එක්සත් පෙරමුණේ අනුර ප්‍රියදර්ශන යාපා මහතාගෙන් ඒ පිළිබඳව කළ විමසීමේදී ඔහු පැවසුවේ එක්සත් ජාතික පක්ෂය හා සමගි ජන බලවේගය ඔවුන් සමග සාකච්ඡා කරමින් සිටින බවත් හා ආණ්ඩුව පාර්ශවයෙන් ඔවුන්ට කතා කර නැති බවයි. එසේ වුවද එම පක්ෂයෙන් තේරී පත්වී ඇති සභිකයින්ට ආණ්ඩුව පාර්ශවයෙන් කතා කර ඇති බවයි.
කොළඹ මහ නගර සභාවේ බලය පිහිටුවීම සම්බන්ධයෙන් වන සාකච්ඡාවලදීද ස්වාධීන කණ්ඩායම් නොවන සභිකයන් තේරී පත්වී ඇති ජාතික සාම සන්ධානය හා හිටපු පාර්ලිමේන්තු මන්ත්‍රී ප්‍රභා ගනේෂන් නායකත්වය දරන ප්‍රජාතන්ත්‍රවාදී ජාතික සන්ධානය යන පක්ෂ සමග ජාතික ජන බලවේගය සාකච්ඡා පවත්වා තිබේ.
