සිරදඬුවමක් විඳිමින් සිටින ගලගොඩඅත්තේ ඥානසාර හිමියන් අධිකරණයට ඉදිරිපත් කිරීමේදී සිවුරෙන් සැරසී ඉදිරිපත් කරන ලෙස බන්ධනාගාර බලධාරීන්ට නියෝගයක් නිකුත් කරන්නැයි ඉල්ලා ශ්‍රේෂ්ඨාධිකරණයට මූලික අයිතිවාසිකම් පෙත්සමක් ගොනු කර තිබේ.
වෛද්‍ය බී.ඒ. රත්නපාල මහතා විසින් මෙම පෙත්සම ගොනු කර ඇත. පෙත්සම විභාගයට ගෙන අවසන් තීන්දුවක් ලබාදෙන තෙක් ඥානසාර හිමියන් සිවිල් ඇඳුමින් හෝ බන්ධනාගාර ඇඳුමින් සැරසී, එසේත් නැතහොත් මාංචු සහිතව මාධ්‍ය හෝ මහජනතාව ඉදිරියට ඉදිරිපත් කිරීමෙන් බලධාරීන් වළක්වන නියෝගයක් නිකුත් කරන ලෙස ද පෙත්සමෙන් ඉල්ලා ඇත.
එමෙන්ම බන්ධනාගාර නීතිවල 156(2) වගන්තියෙන් අවසර දී ඇති සීමාවන් ඉක්මවා ඥානසාර හිමියන්ගේ ඡායාරූප ගැනීම, වීඩියෝ පටිගත කිරීම, එම ඡායාරූප හෝ වීඩියෝ දර්ශන ප්‍රචාරය කිරීම හෝ බෙදාහැරීම වැළැක්වීමේ අතුරු නියෝගයක් නිකුත් කරන ලෙස ද පෙත්සමෙන් ඉල්ලා තිබේ.
