සමගි ජන බලවේගයේ පාර්ලිමේන්තු මන්ත්‍රී නලින් බණ්ඩාර මහතා අවශ්‍ය අනුමැතීන් ලබා නොගෙන මෙරටට රැගෙන ආ ඩ්‍රෝන යානා 39ක් සහ මයික්‍රෆෝන 16ක් රේගු නිලධාරීන් විසින් සිය භාරයට ගෙන තිබේ.
රේගු මාධ්‍ය ප්‍රකාශක චන්දන පුංචිහේවා මහතා මාධ්‍ය වෙත පවසා ඇත්තේ අගෝස්තු 11 වැනිදා උදෑසන කටුනායක ගුවන්තොටුපොළේදී මෙම උපකරණ සොයාගෙන ඇති බවයි. සිංගප්පූරුවේ සිට ශ්‍රීලංකන් ගුවන් සේවයේ UL 307 දරන ගුවන් යානයෙන් පෙරවරු 11.23ට මෙරටට පැමිණි මන්ත්‍රීවරයාගේ ගමන් මලු පරීක්ෂා කිරීමේදී රේගු නිලධාරීන්ට මෙම උපකරණ හමුවී තිබේ.
රේගු මාධ්‍ය ප්‍රකාශකවරයාට අනුව අදාළ ඩ්‍රෝන යානා මෙරටට ආනයනය කිරීම සඳහා අවශ්‍ය ආනයන බලපත්‍ර, ශ්‍රී ලංකා විදුලි සංදේශ නියාමන කොමිෂන් සභාවේ (TRCSL) අනුමැතිය සහ ආරක්ෂක අමාත්‍යාංශයේ අවසරය ලබාගෙන නොමැත.
