2023 දෙසැම්බර් 31 වැනිදා වැලිගම, පැලෑන ප්‍රදේශයේ හෝටලයක සිදුවූ මාරක වෙඩි තැබීමේ සිද්ධිය සම්බන්ධයෙන් හිටපු පොලිස්පති දේශබන්දු තෙන්නකෝන් මහතා ඇතුළු සැකකරුවන් අටදෙනෙකුට එරෙහිව අද (07) මාතර මහාධිකරණයේදී අධිචෝදනා භාර දී තිබේ.
හිටපු පොලිස්පති දේශබන්දු තෙන්නකෝන් මහතා ඇතුළු විත්තිකරුවන් අටදෙනා අද මාතර මහාධිකරණය හමුවේ පෙනී සිටි අතර නඩුව විනිසුරු නන්දන අමරසේන මහතා ඉදිරියේ කැඳවා තිබේ. මෙම සිද්ධිය සම්බන්ධයෙන් අපරාධ පරීක්ෂණ දෙපාර්තමේන්තුව විසින් විමර්ශන සිදුකර ඇත.
අධිචෝදනා භාරදීමෙන් අනතුරුව සැකකරුවන් අටදෙනාට රුපියල් 250,000 බැගින් වූ මුදල් ඇප සහ රුපියල් මිලියන 5 බැගින් වූ පුද්ගලික ඇප බැඳුම්කර හතරක් මත මුදාහැරීමට අධිකරණය නියෝග කර තිබේ.
එම ඇපකරුවන් හතරදෙනාගෙන් දෙදෙනෙකු සමීප ඥාතීන් විය යුතු බවටද අධිකරණය ඇප කොන්දේසියක් පනවා ඇත. නඩුව නොවැම්බර් 27 වැනිදා යළි කැඳවීමට නියමිතය.
