ජාතික ඉතිරි කිරීමේ බැංකුවේ හිටපු සභාපති ප්‍රදීප් ගාමිණී සුරාජ් කාරියවසම් මහතා දූෂණ චෝදනාවක් සම්බන්ධයෙන් අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් අද (07) අත්අඩංගුවට ගෙන තිබේ.
කාරියවසම් මහතාට එරෙහි චෝදනාව වී ඇත්තේ ජාතික ඉතිරි කිරීමේ බැංකුව සතුව පැවති රුපියල් මිලියන 10ක රජයේ මුදලක් නිසි ක්‍රමවේදයෙන් බැහැරව ‘සිරිලිය සවිය’ සංවිධානය වෙත ලබාදීම තුළින් දූෂණය නමැති වරද සිදුකළ බවයි.
අල්ලස් කොමිසම සඳහන් කළේ ඔහු අද පෙරවරු 9.50ට පමණ කොළඹ 08, ලේක් ඩ්‍රයිව් ප්‍රදේශයේ පිහිටි නිවසේදී අත්අඩංගුවට ගත් බවයි. අත්අඩංගුවට ගත් සැකකරු කොළඹ ප්‍රධාන මහේස්ත්‍රාත් අධිකරණයට ඉදිරිපත් කිරීමට නියමිත බවද අල්ලස් හෝ දූෂණ චෝදනා විමර්ශන කොමිෂන් සභාව සඳහන් කරයි.
මෙම අත්අඩංගුවට ගැනීම සිදුකර ඇත්තේ ‘සිරිලිය සවිය’ සංවිධානය සම්බන්ධයෙන් සිදුකෙරෙන විමර්ශන අතරතුරදීය.
