මෙය සම්මත වුණොත් පීටීඒ වගේම වෙයි
රජය විසින් පසුගියදා පාර්ලිමේන්තුවට ඉදිරිපත් කරන ලද රාජ්‍යය ත්‍රස්තවාදයෙන් ආරක්ෂා කිරීමේ පනත් කෙටුම්පත (පීඑස්ටීඒ), එය සම්පාදනය කිරීමට පත්කරන ලද කාරක සභාවේ සාමාජිකයන්ටවත් නොදන්වා වෙනස් කර ඇති බව ජනාධිපති නීතිඥ සාලිය පීරිස් සිය ෆේස්බුක් පිටුවේ සටහනක් තබමින් කියයි.
ජනාධිපති නීතිඥවරයා, පීඑස්ටීඒ පනත් කෙටුම්පත සකස් කිරීමට රජය විසින් පත්කරන ලද කාරක සභාවට ශ්‍රී ලංකා නීතිඥ සංගමයේ නියෝජිතයකු ලෙස සහභාගි විය.
මෙම පනත් කෙටුම්පත දැනට පවතින අයුරින්ම සම්මත වුවහොත්, පීඑස්ටීඒ යටතේ දීර්ඝ ලෙස රඳවා තබා ගැනීම් තවදුරටත් සිදුවනු ඇති, සැකකරුවන්ට එරෙහිව කිසිදු කරුණක් නොමැති වුවත් පීඑස්ටීඒ යටතේ ඉදිරිපත් කරන සැකකරුවන් රක්ෂිත බන්ධනාගාරගත කිරීමට මහේස්ත්‍රාත්වරුන්ට සිදු වනු ඇති බවද, ත්‍රස්තවාදය වැළැක්වීමේ පනත (පීටීඒ) යටතේ සිදු වූවාක් මෙන් බලයේ සිටින දේශපාලනඥයන්, පොලීසිය සහ ආරක්ෂක බලධාරීන් විසින් පීඑස්ටීඒ අවභාවිත කිරීම වැළැක්විය නොහැකි වනු ඇති බවද ජනාධිපති නීතිඥවරයා සිය ෆේස්බුක් සටහනෙහි වැඩිදුරටත් දක්වා ඇත.
සාලිය පීරිස් මහතාගේ සම්පූර්ණ සටහන මෙසේය.
ශ්‍රී ලංකා නීතිඥ සංගමයේ නියෝජිතයෙකු ලෙස, ත්‍රස්තවාදය වැළැක්වීමේ පනත (පීටීඒ) වෙනුවට හඳුන්වා දීමට නියමිත යෝජිත රාජ්‍යය ත්‍රස්තවාදයෙන් ආරක්ෂා කිරීමේ පනත (පීඑස්ටීඒ) පිළිබඳ කාරක සභාවේ සාමාජිකයෙකු ලෙස මම කටයුතු කළෙමි.
කරුණු තුනක් සම්බන්ධයෙන් කාරක සභාවේ බහුතරයේ වාර්තාව සමඟ මම එකඟ නොවූවෙමි. ඒවා නම්, ත්‍රස්තවාදය පිළිබඳ අර්ථ නිරූපණය (මගේ අදහසට අනුව එය ඉතා පුළුල් වන අතර බලධාරීන් විසින් අවභාවිත කරනු ලැබීමට ඉඩ ඇත); පරිපාලනමය රඳවා තබා ගැනීම (මගේ අදහසට අනුව එය අමාත්‍යාංශ ලේකම්වරයා වෙත නොව විනිශ්චයකාරවරුන් වෙත පැවරිය යුතුය) සහ සංවිධාන තහනම් කිරීමේ බලතල (මගේ අදහසට අනුව එය අධිකරණ බලධාරියෙකුට පැවරිය යුතුය).
එම වගන්ති හැරුණු විට, රඳවා තබා ගැනීමේ කාල සීමා කිරීම සහ සැකකරුවෙකුට එරෙහිව කිසිදු කරුණක් නොමැති අවස්ථාවලදී මහේස්ත්‍රාත්වරයාට ඇප ලබා දීමට ඉඩ සැලසීම ඇතුළු අනෙකුත් වගන්ති සම්බන්ධයෙන් කාරක සභාවේ සියලු‍ම සාමාජිකයෝ එකඟ වූහ.
පාර්ලිමේන්තුවට ඉදිරිපත් කරන ලද පනත් කෙටුම්පත පරීක්ෂා කිරීමේදී, කාරක සභාවේදී එකඟ වූ කරුණුවලින්, විශේෂයෙන් ඇප ලබා දීමේ වගන්ති සහ රඳවා තබා ගැනීම දීර්ඝ කිරීමේ ක්‍රියාවලිය සම්බන්ධයෙන් ප්‍රධාන වශයෙන් බැහැරවීම් සිදුව ඇති බව මට නිරීක්ෂණය විය.
මෙම වෙනස්කම් පිළිබඳව හෝ මෙම වෙනස්කම්වලට හේතු පිළිබඳව කාරක සභාව කිසි විටෙකත් දැනුවත් කර නොතිබුණි. කාරක සභාව සමඟ කිසිදු සාකච්ඡාවකින් තොරව මෙම වෙනස්කම් කිරීමට හේතු වූයේ කවුරුන්ද නැතහොත් කුමක්ද යන්න කාරක සභාවට පවසා නොමැත. ඒ අනුව, පනත් කෙටුම්පත කාරක සභා වාර්තාවෙන් බැහැර වී ඇති ආකාරය පෙන්වා දෙමින් මම ඊයේ කාරක සභාවේ සභාපතිවරයා වෙත ලිපියක් යැවුවෙමි.
මෙම කාරක සභාවට නීතිපති දෙපාර්තමේන්තුවේ සාමාජිකයින්, අධිකරණ අමාත්‍යාංශයේ, පොලීසියේ සහ ත්‍රිවිධ හමුදාවේ නිලධාරීන් මෙන්ම ජනාධිපති නීතිඥවරු, නීතිඥවරු කිහිපදෙනෙක් සහ පාර්ලිමේන්තු මන්ත්‍රීවරයෙක් ඇතුළත් වූහ.
මෙම පනත් කෙටුම්පත දැනට පවතින අයුරින්ම සම්මත වුවහොත්, පීඑස්ටීඒ යටතේ දීර්ඝ ලෙස රඳවා තබා ගැනීම් තවදුරටත් සිදුවනු ඇත. සැකකරුවන්ට එරෙහිව කිසිදු කරුණක් නොමැති වුවද, පීඑස්ටීඒ යටතේ ඉදිරිපත් කරන සැකකරුවන් රක්ෂිත බන්ධනාගාරගත කිරීමට මහේස්ත්‍රාත්වරුන්ට සිදු වනු ඇත. ත්‍රස්තවාදය වැළැක්වීමේ පනත (පීටීඒ) යටතේ සිදු වූවාක් මෙන් බලයේ සිටින දේශපාලනඥයන්, පොලීසිය සහ ආරක්ෂක බලධාරීන් විසින් පීඑස්ටීඒ අවභාවිත කිරීම වැළැක්විය නොහැකි වනු ඇත.
