පූජ්‍ය ගලගොඩඅත්තේ ඥානසාර හිමියන්ගේ චීවරය ඉවත් කර සිවිල් ඇඳුමින් සැරසීම සිදුකර ඇත්තේ බන්ධනාගාර ආඥා පනතේ විධිවිධාන අනුව බව කැබිනට් ප්‍රකාශක අමාත්‍ය වෛද්‍ය නලින්ද ජයතිස්ස මහතා පවසා ඇත.
ඒ මහතා මේ බව පවසා ඇත්තේ ඔක්තෝබර් (06) පැවති සතිපතා කැබිනට් මාධ්‍ය හමුවේදීය. ඔහු වැඩිදුරටත් පැවසූවේ මෙම සිද්ධියේදී බන්ධනාගාර දෙපාර්තමේන්තුව අදාළ ආඥා පනතේ විධිවිධාන අනුව කටයුතු කර ඇති බවයි.
දැනට බෞද්ධ භික්ෂූන් වහන්සේලා 63 නමක් විවිධ වැරදි සම්බන්ධයෙන් සිර දඬුවම් විඳිමින් සිටින බවත්, එම සියලු දෙනා සම්බන්ධයෙන් ද එකම ක්‍රියාපටිපාටිය අනුගමනය කර ඇති බවත් අමාත්‍යවරයා පැවසීය.
“මෙවැනි ක්‍රියාමාර්ග ගැනීම සඳහා බන්ධනාගාර ආඥා පනත යටතේ නියමිත ක්‍රියාපටිපාටියක් තිබෙනවා. මෙහිදී කිසිදු විශේෂ ව්‍යතිරේකයක් සිදුකර නැහැ. දැනට සිර දඬුවම් විඳින භික්ෂූන් වහන්සේලා 63 නම සම්බන්ධයෙන් කටයුතු කළ ආකාරයටම ඥානසාර හිමියන් සම්බන්ධයෙන්ද බන්ධනාගාර දෙපාර්තමේන්තුව කටයුතු කර තිබෙනවා,” යනුවෙන් ඔහු සඳහන් කළේය.
ඥානසාර හිමියන් අද අධිකරණයට සිවිල් ඇඳුමින් ඉදිරිපත් කිරීම සම්බන්ධයෙන්ද මේ වන විට දැඩි අවධානයක් යොමුව තිබේ. මේ අතර ඥානසාර හිමියන්ගේ චීවරය ඉවත් කිරීම සම්බන්ධයෙන් කෝට්ටේ සංඝ සභාවද ප්‍රකාශයක් නිකුත් කර බන්ධනාගාර කොමසාරිස් ජනරාල්වරයා වෙත ලිපියක් යොමු කර ඇත.
එම ලිපියේ සඳහන් කර ඇත්තේ ඥානසාර හිමියන් විසින් චීවරය ඉවත් කිරීමට තරම් බරපතළ වරදක් හෝ විනය පිටකයට අදාළ වෙනත් වරදක් සිදුකර ඇති බවට සංඝ සභාව සතුව කිසිදු වාර්තාවක් නොමැති බවයි. ශාසනික දෘෂ්ටිකෝණයකින් මේ සම්බන්ධයෙන් විනය පරීක්ෂණයක් පැවැත්වීම සහ උන්වහන්සේ චීවරය දැරිය යුතුද නැද්ද යන්න තීරණය කිරීමේ වගකීම සංඝ සභාව සතු බවද එම ලිපියේ සඳහන් කර තිබේ.
තවද ඥානසාර හිමියන්ගේ චීවරය ඉවත් නොකර, අධිකරණය හමුවේද චීවරයෙන් පෙනී සිටීමට අවස්ථාව ලබාදෙන ලෙස කෝට්ටේ සංඝ සභාවේ ප්‍රධාන ලේකම් පූජ්‍ය ආචාර්ය කොටපිටියේ රාහුල අනුනාහිමියන් බන්ධනාගාර කොමසාරිස් ජනරාල්වරයාගෙන් ඉල්ලා තිබිණි.
