පූජ්‍ය ගලගොඩඅත්තේ ඥානසාර හිමියන් අධිකරණයට ඉදිරිපත් කිරීමේදී බන්ධනාගාර දෙපාර්තමේන්තුව විසින් චීවරය ඉවත් කිරීමට එරෙහිව අද (07) කොළඹ අධිකරණ පරිශ්‍රයේදී සාමකාමී විරෝධතාවක් පැවැත්වීමට නියමිත බව වාර්තා වේ.
ඥානසාර හිමියන් අධිකරණයට ඉදිරිපත් කිරීමේදී සිවිල් ඇඳුමින් සැරසීම සම්බන්ධයෙන් මේ වන විට මතභේදයක් හටගෙන තිබේ.
කෙසේ වෙතත් බන්ධනාගාර කොමසාරිස් සහ මාධ්‍ය ප්‍රකාශක සෙනක පල්ලෙතැන්න මහතා සඳහන් කර ඇත්තේ දැඩි සිරදඬුවම් නියම වූ රැඳවියන් බන්ධනාගාරයෙන් ලබාදෙන ඇඳුම් ඇඳිය යුතු බවට බන්ධනාගාර රෙගුලාසි පවතින බවයි. බන්ධනාගාරගත භික්ෂූන් වහන්සේලා සම්බන්ධයෙන් පවතින රෙගුලාසි සහ රැඳවියන් අධිකරණයට ඉදිරිපත් කිරීමේදී අනුගමනය කළ යුතු ඇඳුම් සම්බන්ධ ක්‍රියාපටිපාටි අනුව කටයුතු කර ඇති බවද ඔහු සඳහන් කර තිබේ.
ඥානසාර හිමියන්ගේ චීවරය ඉවත් කිරීම සම්බන්ධ මතභේදය මතුව ඇත්තේ අධිකරණයට අපහාස කිරීමේ වරද සම්බන්ධයෙන් නියම වූ වසර හයක සිරදඬුවමේ ඉතිරි කාලය ක්‍රියාත්මක කිරීමට පියවර ගැනීමත් සමඟය.
