කොළඹ මහ නගර සභාවේ පුරපතිනි ව්රායි කැලී බල්තසාර් මහත්මිය 2026 වර්ෂයේ මාර්තු 21 වැනිදා සිට 30 වැනිදා දක්වා ඕස්ට්රේලියාවේ සිදු කළ දින නවයක නිල සංචාරය වෙනුවෙන් දෛනික දීමනාව ලෙස ලබා දී ඇත්තේ දිනකට ඩොලර් 25ක් ලෙස ඇමෙරිකානු ඩොලර් 225ක් හෙවත් රුපියල් 71,483.53ක මුදලක් කොළඹ මහ නගර සභා අරමුදලින් වැය කර ඇති බව කොළඹ නගර සභාව පවසා ඇත.
මාධ්යවේදිනි රේඛා නිලුක්ෂි විසින් 2026 අප්රේල් 07 වන දින තොරතුරු දැනගැනීමේ පනත යටතේ පුරපතිනියගේ ඕස්ට්රේලියානු සංචාරය පිළිබඳව විමසා කොළඹ මහ නගර සභාවෙන් ඉල්ලා තිබිණි.
කොළඹ මහ නගර සභාවේ නාගරික කොමසාරිස්වරයා (රා.ඉ), ඒ.ඩී.එස් රෝහණ මහතාගේ අත්සනින් විසින් 2026 අගෝස්තු 11 දින නිකුත් කර ඇති පිළිතුරේ සඳහන් වන්නේ, අදාළ සංචාරය සඳහා බස්නාහිර පළාත් අමාත්යාංශයේ අනුමැතියට අනුව බස්නාහිර පළාත් මුදල් චක්රලේඛ අංක 09/2023 යටතේ නියම කර ඇති දෛනික දීමනා ප්රතිපාදන අනුව මුදල් ගෙවා ඇති බවය.
ඒ අනුව දින නවයක් සඳහා දිනකට ඇමෙරිකානු ඩොලර් 25 බැගින් ඇමෙරිකානු ඩොලර් 225ක දෛනික දීමනාවක් පුරපතිනියට ගෙවා ඇති අතර එහි ශ්රී ලංකා රුපියල් වටිනාකම රුපියල් 71,483.53ක් ලෙස නගර සභාව දක්වා ඇත.
අදාළ තොරතුරු ඉල්ලීම මගින් පුරපතිනියගේ ගුවන් ගමන්, නවාතැන්, වාහන, සංචාරයට සහභාගී වූ පුද්ගලයන් සහ ඔවුන් වෙනුවෙන් දැරූ වියදම් ඇතුළු කරුණු රැසක් පිළිබඳ තොරතුරු ඉල්ලා තිබිණි.
අදාළ සංචාරය සඳහා ආරාධනය ලැබී ඇත්තේ ඕස්ට්රේලියානු රජයේ Department of Foreign Affairs and Trade (DFAT) ආයතනයෙන් බව නගර සභාව සඳහන් කර ඇති අතර ගුවන් ටිකට්පත් සහ නවාතැන් ඇතුළු එම වියදම් DFAT ආයතනය විසින් දරා ඇති බවද පිළිතුරේ දැක්වේ.
තොරතුරු ඉල්ලීම මගින් මෙම විදේශ සංචාරය සංවිධානය කිරීමට හේතුව සහ එහි අරමුණ පිළිබඳවද විමසා තිබිණි. ඊට පිළිතුරු ලෙස නගර සභාව සඳහන් කර ඇත්තේ සංචාරයේ අරමුණු අතර තාක්ෂණික හා පළාත් පාලන පරිපාලනය සම්බන්ධ ක්රමවේද පිළිබඳ අවබෝධයක් ලබා ගැනීම, නාගරික පරිපාලනය සම්බන්ධ ආයතනික දැනුම ලබා ගැනීම, ජාත්යන්තර සබඳතා සහ හවුල්කාරිත්වයන් වර්ධනය කර ගැනීම මෙන්ම මහා නගර සහ නාගරිකත්වය සම්බන්ධයෙන් දැක්ම වර්ධනය කර ගැනීම ඇතුළත් බවයි.
ඒ අනුව මෙම සංචාරය හුදෙක් විදේශ සංචාරයක් නොව, පළාත් පාලන හා නාගරික පරිපාලන ක්රමවේද පිළිබඳ දැනුම සහ අත්දැකීම් ලබාගැනීම මෙන්ම ජාත්යන්තර හවුල්කාරිත්වයන් වර්ධනය කරගැනීම අරමුණු කරගත් නිල සංචාරයක් ලෙස නගර සභාව එය හඳුන්වාදී තිබේ.
පුරපතිනිය සමඟ මෙම සංචාරයට සහභාගී වූ පිරිස පිළිබඳවද තොරතුරු ඉල්ලීමේදී විමසා තිබූ අතර කොළඹ මහ නගර සභාව නියෝජනය කරමින් අදාළ සංචාරයට සහභාගී වී ඇත්තේ පුරපතිනිය පමණක් බව පිළිතුරේ සඳහන් කර තිබේ.
මෙම තොරතුරු කොළඹ මහ නගර සභාවේ නාගරික කොමසාරිස්වරයා විසින් නිකුත් කළ ලිඛිත පිළිතුරකින් ලබාදී ඇති අතර එය 2026 ජූලි 2 දින ඉදිරිපත් කළ අභියාචනයට අදාළ ප්රතිචාරයකි.
