දූෂණ චෝදනා සම්බන්ධයෙන් අත්අඩංගුවට ගත් හිටපු පොල් සංවර්ධන හා ජනතා වතු සංවර්ධන අමාත්ය ජගත් පුෂ්පකුමාර මහතා ඇප මත මුදාහැරීමට කොළඹ ප්රධාන මහේස්ත්රාත් අධිකරණය ජුලි 8 නියෝග කර ඇත.
අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් අද උදෑසන ජගත් පුෂ්පකුමාර මහතා අත්අඩංගුවට ගෙන කොළඹ ප්රධාන මහේස්ත්රාත් අධිකරණයට ඉදිරිපත් කිරීමෙන් අනතුරුව අධිකරණය මෙම නියෝගය ලබා දී ඇත.
ඔහුට එරෙහිව නගා ඇති චෝදනා අනුව, 2014 ඌව පළාත් සභා මැතිවරණය ප්රකාශයට පත් කර තිබූ සමයේ රජයේ සංවර්ධන ව්යාපෘති පිළිබඳ ජනතාව දැනුවත් කිරීම සඳහා පෝස්ටර් හා අත්පත්රිකා 250,000ක් මුද්රණය කිරීමට හලාවත වැවිලි සමාගම සහ කුරුණෑගල වැවිලි සමාගම වෙත උපදෙස් ලබා දී රුපියල් 2,665,000ක මුදලක් වැය කිරීමට සැලැස්වීම සම්බන්ධයෙන් චෝදනා එල්ල වී තිබේ.
එමෙන්ම 2015 ජනාධිපතිවරණ සමයේ ගංවතුර ආධාර ලෙස බෙදා දීමට නියමිත සරම් හා ටී-ෂර්ට් ඇතුළත් ඇඳුම් කට්ටල 5,000ක් සහ සාය-හැට්ට ඇතුළත් ඇඳුම් කට්ටල 5,000ක් හලාවත සහ කුරුණෑගල වැවිලි සමාගම්වලින් නිසි ප්රසම්පාදන ක්රමවේදයෙන් තොරව මිලදී ගැනීමට කටයුතු කරවා එම සමාගම්වලට පිළිවෙළින් රුපියල් 3,275,000ක් සහ රුපියල් 3,075,000ක පාඩුවක් සිදු කිරීම හා එම භාණ්ඩ භෞතිකව බෙදා නොදීම සම්බන්ධයෙන් ද ඔහුට චෝදනා එල්ල වී ඇත.
තවද, 2013 සහ 2014 වසරවල මැයි දින පෙළපාලි සඳහා සහභාගි වූවන්ට හලාවත වැවිලි සමාගමෙන් ටී-ෂර්ට් 2,000ක් සහ සාරි 1,500ක් බැගින්ද, කුරුණෑගල වැවිලි සමාගමෙන් ටී-ෂර්ට් 2,000ක් සහ සාරි 1,500ක් බැගින්ද ලබාදීමට නිලධාරීන් පෙළඹවීම මගින් දූෂණය නැමැති වරද සිදු කළ බවට ද ඔහුට චෝදනා නඟා තිබේ.
