රජයේ මුදල් අවභාවිත කරමින් තම බිරිඳගේ උපාධි උත්සවයට සහභාගි වූ බවට චෝදනා එල්ල වු හිටපු ජනාධිපති රනිල් වික්රමසිංහ මහතා සහ හිටපු ජනාධිපති ලේකම් සමන් ඒකනායක මහතා සම්බන්ධයෙන් ඉදිරි නීතිමය පියවර පිළිබඳ නීතිපතිවරයාගේ ස්ථාවරය දැනුම් දීම සඳහා නඩුව සැප්තැම්බර් 30 දක්වා කල් තැබීමට කොළඹ කොටුව මහේස්ත්රාත් අධිකරණය ජුලි 08 දින නියෝග කර ඇත.
අදාල නඩුව කොළඹ කොටුව මහේස්ත්රාත් පසන් අමරසේන මහතා ඉදිරියේ කැඳවූ අවස්ථාවේදී අපරාධ පරීක්ෂණ දෙපාර්තමේන්තුවේ නිලධාරීන් අදාල විමර්ශනයේ කරුණු ඉදිරිපත් කරමින් අධිකරණය දැනුම් දී ඇත්තේ සිද්ධියට අදාළ විමර්ශන අවසන් කර ගොනු නීතිපතිවරයා වෙත යොමු කර ඇති බවය.
නීතිපති දෙපාර්තමේන්තුව වෙනුවෙන් අධිකරණය හමුවේ කරුණු ඉදිරිපත් කරමින් ජ්යෙෂ්ඨ රජයේ නීතිඥ සමදරී පියසේන මහත්මිය අධිකරණය හමුවේ පවසා ඇත්තේ අදාල විමර්ශන අවසන් කර ඇති බැවින් නීතිපතිවරයාගේ ස්ථාවරය දැනුම් දීම සඳහා දිනයක් ලබාදෙන ලෙසය.
එහිදී රනිල් වික්රමසිංහ මහතා වෙනුවෙන් පෙනී සිටි ජනාධිපති නීතිඥ අනූජ ප්රේමරත්න මහතා ප්රකාශ කළේ නඩුවට පාදක වන මුදලින් සැලකිය යුතු කොටසක් වාහන සම්බන්ධ වියදම් වන බවට විමර්ශන නිලධාරීන් සඳහන් කර ඇති බවය.
කෙසේ වෙතත් අදාළ වාහන බ්රිතාන්ය රජය විසින් ලබා දී තිබූ බවත් ඒ සම්බන්ධයෙන් බ්රිතාන්ය රජය අනුගමනය කළ ක්රියාමාර්ග ඇතුළත් ලේඛන රජයේ නීතිඥවරිය වෙත භාර දී ඇති බවත් ජනාධිපති නීතිඥවරයා අධිකරණයට දැනුම් දී ඇති අතර ඒ සම්බන්ධයෙන් විමර්ශනයක් සිදු කරන ලෙසද ඔහු ඉල්ලා තිබිණි.
ඉදිරිපත් වූ කරුණු සලකා බැලූ මහේස්ත්රාත් පසන් අමරසේන මහතා අදාල නඩුව සැප්තැම්බර් 30 දින යළි කැඳවන ලෙස නියෝග කළ අතර එදින නීතිපතිවරයාගේ ස්ථාවරය අධිකරණයට දැනුම් දෙන ලෙසත් රජයේ නීතිඥවරියට නියෝග කර ඇත.
හිටපු ජනාධිපති රනිල් වික්රමසිංහ මහතා සහ ඔහුගේ හිටපු ලේකම් සමන් ඒකනායක මහතාට එරෙහිව චෝදනා වී ඇත්තේ 2023 වසරේ බ්රිතාන්යයේ පැවති තම බිරිඳගේ උපාධි ප්රදානෝත්සවයට සහභාගි වීම සඳහා සිදු කළ පෞද්ගලික සංචාරයකදී රුපියල් ලක්ෂ 166කට අධික රාජ්ය මුදලක් වැය කරමින් රාජ්ය මුදල් අවභාවිත කළ බවය.
