මීගමුව බන්ධනාගාරයේ ඇති වූ සිද්ධිය සම්බන්ධයෙන් විමර්ශනයක් සිදුකිරීමට ශ්රී ලංකා මානව හිමිකම් කොමිෂන් සභාව සැලසුම් කර ඇති බව එම සභාවේ ඉහළ නිලධාරියෙකු පැවසීය.
මීගමුව බන්ධනාගාරයේ ගැටුම ඇති වූ අවස්ථාවේදී විමර්ශන නිලධාරීන් කණ්ඩායමක් මීගමුව බන්ධනාගාරයට ගිය නමුත් එම ස්ථානයේ හට ගෙන තිබුණඅ නොසන්සුන්කාරී තත්වය නිසා විමර්ශන නිලධාරීන්ට එම ස්ථානය පරීක්ෂා කිරීමට නොහැකි වූ බවත් ඔහු පැවසීය.
කෙසේවෙතත් ඉදිරි දින කිහිපය තුළ මීගමුව බන්ධනාගාරය වෙත ගොස් අදාළ සිදුවීම පිළිබද විමර්ශන ආරම්භ කරන බවත් පැවසීය.
විමර්ශන කමිටුවට කැබිනට් අනුමැතිය
මීගමුව බන්ධනාගාරයේ ඇතිවූ ප්රචණ්ඩකාරී සිද්ධිය සම්බන්ධයෙන් විධිමත් විමර්ශනයක් සිදු කිරීමට හා අදාල ගැටුමට හේතු වූ කරුණු මේ ආකාරයේ ගැටුම් ඉදිරියේදී සිදු නොවීමට ගත යුතු නිර්දේශ ඇතුළත් වාර්තාවක් ඉදිරිපත් කිරීම සඳහා කමිටුවක් ජුලි 06 වන දින රැස්වූ අමාත්ය මණ්ඩලය අනුමැතිය ලැබී තිබිණි.
අදාල කමිටුවේ සභාපතිවරයා ලෙස විශ්රාමික ශ්රේෂ්ඨාධිකරණ විනිසුරු ප්රියන්ත ප්රනාන්දු, විශ්රාමික අතිරේක සොලිසිටර් ජනරාල් ජනාධිපති නීතිඥ මිලින්ද ගුණතිලක සහ ජනාධිපති නීතිඥ මොහාන් වීරකෝන් යන මහත්වරුන් පත් කර ඇත.
CCD සහ CIDයෙන් විමර්ශන
මීගමුව බන්ධනාගාරයේ ඇති වූ ප්රචණ්ඩකාරී සිද්ධිය සම්බන්ධයෙන් විමර්ශන කොළඹ අපරාධ පරීක්ෂණ දෙපාර්තමේන්තුව සහ අපරාධ විමර්ශන දෙපාර්තමේන්තුව විසින් ආරම්භ කර ඇත.
මියගිය සංඛයාව 26ක් දක්වා ඉහළට
ජුලි 05 සහ 06 යන දෙදින තුළ මීගමුව බන්ධනාගාරය තුළ ඇති වූ ගැටුමෙන් පුද්ගලයින් 26 දෙනෙකු මිය ගොස් ඇති බවත් මිය ගිය පුද්රැගලයන් අතර රැඳවියන් 19 දෙනෙකු සහ බන්ධනාගාර නිලධාරීන් 7 දෙනෙකු ද සිටින බව අධිකරණ අමාත්ය නීතිඥ හර්ෂණ නානායක්කාර ජුලි 06 වෙනිදා මාධ්ය වෙත අදහස් දක්වමින් පැවසීය.
තවද බන්ධනාගාර නිලධාරීන් 23 දෙනෙකු සහ රැඳවියන් 54 දෙනෙකු තවදුරටත් ප්රතිකාර ලබමින් සිටින බවත් බරපතළ තත්ත්වයේ පසුවන තුවාලකරුවන් 18 දෙනෙක් වැඩිදුර ප්රතිකාර සඳහා කොළඹ ජාතික රෝහලට ඇතුළත් කළ බවත් බන්ධනාගාරය තුළ තිබූ CCTV පද්ධති සහ බොඩි ස්කෑනර් යන්ත්රයද රැඳවියන් විනාශ කර ඇති බව අමාත්යවරයා පැවසීය.
ගැටුමට මුලික වූ රැඳවියන් පිරිසක් අඟුණුකොළපැලැස්සට සහ වැලිකඩට යොමු කළ බවත් මීගමුව බන්ධනාගාරයේ සිටි තවත් රැඳවියන් 700ක් පමණ ආසන්න පිරිසක් අඟුණකොළපැලැස්ස, බෝගම්බර, අනුරාධපුරය, පොළොන්නරුව සහ කුරුවිට යන බන්ධනාගාර වෙත යවා ඇති බවත් අධිකරණ අමාත්යවරයා පැවසීය.
