ශ්රී ලංකා මහවැලි අධිකාරියට අයත් සෙවණගල, කිරිඉබ්බන්වැව ප්රදේශයේ පිහිටි ඉඩමක අනවසරයෙන් ඉදිකළ ගොඩනැගිල්ලක් ඇතුළු දේපළ සඳහා 2022 වර්ෂයේ මැයි මස 09 වැනිදා ඇති වූ ගැටුම්කාරි තත්වය නිසා හානි වූ බව පවසමින් අදාල දේපළවලට වන්දි ලබා ගැනීමේ ‘දූෂණය’ නැමැති වරද සිදු කළා යැයි චෝදනා එල්ල වූ හිටපු රාජ්ය අමාත්ය ශෂීන්ද්ර රාජපක්ෂ මහතා, සේපාලිකා සමන් කුමාරි සහ කීර්ති බණ්ඩාර කොටගම යන විත්තිකරුවන් තිදෙනෙකුට කොළඹ මහාධිකරණය හමුවේ අධිචෝදනා භාර දී ඇත.
අල්ලස් හෝ දූෂණ චෝදනා විමර්ශන කොමිෂන් සභාව විසින් ගොනුකර තිබූ මෙම නඩුවට අදාළ අධිචෝදනා කොළඹ මහාධිකරණ විනිසුරු රවීන්ද්ර ප්රේමරත්න මහතා ඉදිරියේදී භාරදීම සිදු කර තිබිණි.
අධිචෝදනා භාරදීමෙන් අනතුරුව එක් එක් විත්තිකරු රුපියල් ලක්ෂ 10 බැගින් වූ ශරීර ඇප දෙකක් මත අදාල විත්තිකරුවන් මුදා හැරීමට විනිසුරුවරයා නියම කර තිබුණු අතර ඔවුන්ගේ විදේශ ගමන් තහනම් කිරීමටද නියෝග කර තිබිණි.
තවද අදාල විත්තිකරුවන්ගේ ඇඟිලි සලකුණු ලබාගෙන ඒ සම්බන්ධයෙන් වාර්තාවක් අධිකරණයට ඉදිරිපත් කරන ලෙසත් මහේස්ත්රාත්වරයා විමර්ශන නිලධාරීන්ට නියෝග කර තිබිණි.
අදාල නඩුව නැවත අගෝස්තු මස 05 වනදා කැඳවන ලෙසත් නියම අතර ශ්රී ලංකා මහවැලි අධිකාරියට අයත් සෙවණගල, කිරිඉබ්බන්වැව ප්රදේශයේ පිහිටි ඉඩමක අනවසරයෙන් ඉදිකර ඇති ගොඩනැගිල්ලක් ඇතුළු දේපළ වලට 2022 වසරේ මැයි මස 09 වැනි දින හානියට පත් වූවා යැයි පවසමින් එම දේපළ සඳහා වන්දි ගෙවීම හානිපූර්ණය සඳහා වන කාර්යාලය ප්රතික්ෂේප කර තිබියදී ඊට පටහැනිව එම කාර්යාලයට අනුයුක්තව කටයුතු කළ රජයේ නිලධාරින්ට තම නිල බලය භාවිත කරමින් බලපෑම් සිදුකර රුපියල් 8,850,000ක වන්දි ලබා ගැනීම තුළින් “දූෂණය” නමැති වරද සිදුකිරීම සහ ඊට ආධාර අනුබලදීම සම්බන්ධයෙන් විත්තිකරුවන්ට එරෙහිව අල්ලස් කොමිසම විසින් චෝදනා ඉදිරිපත් තිබිණි.
