උපරිමාධිකරණ විනිසුරුවරුන් ඇතුළු විනිසුරුවරුන්ගේ විශ්රාම යාමේ වයස දීර්ඝ කිරීම සඳහා ආණ්ඩුක්රම ව්යවස්ථාව සංශෝධනය කිරීම සම්බන්ධයෙන් ශ්රී ලංකා නීතිඥ සංගමයේ ස්ථාවරය ප්රකාශ කිරීමට පැවැති මහජන සභාවේදී දක්වන ලද විද්වත් අදහස් වැරදි ලෙස සංස්කරණය කොට, වැරදි අර්ථ නිරූපණ ඇතිවන සේ ඇතැම් මාධ්ය මගින් ප්රචාරය කිරීම පිළිබඳව ශ්රී ලංකා නීතිඥ සංගමයේ සභාපති ජනාධිපති නීතිඥ රජීව් අමරසූරිය තමාගේ කනස්සල්ල පළකරමින් සිය ෆේස්බුක් පිටුවේ සටහනක් තබා තිබේ.
“මෙම ගෞරවනීය සම්පත්දායකයින් ප්රකාශ කළ අදහස් මාධ්යයේ ඇතැම් කොටස් විසින් මුළුමනින්ම විකෘති කර සහ වැරදි ලෙස නිරූපණය කර තිබීම දැකීමෙන් මම පුදුමයටත් කලකිරීමටත් පත් වීමි.”යි ඔහු කියයි.
මෙම මහජන සභාව ජුලි 4 වැනිදා කොළඹ පදනම් ආයතනයේදී පැවැත්විණි. එහිදී දෙස් විදෙස් විද්වතුන් දැක්වූ සාරවත් අදහස්වලට නිසි ප්රචාරයක් නොදී, එම කතාවලින් කොටස් අත්තනෝමතික ලෙස සංස්කරණය කර ප්රචාරය කිරීම මෙන්ම, සංවිධානාත්මකව එම ස්ථානයට පැමිණි ආණ්ඩුවේ අනුගාමිකයන්ගේ ප්රකාශ පමණක්ම ප්රචාරය කිරීම රජයේ මාධ්ය මෙන්ම රජයට හිතවත් පෞද්ගලික මාධ්ය විසින්ද කරනු දැකිය හැකි විය.
මේ, ඒ පිළිබඳව ශ්රී ලංකා නීතිඥ සංගමයේ සභාපති ජනාධිපති නීතිඥ රජීව් අමරසූරිය තැබූ සම්පූර්ණ ෆේස්බුක් සටහනයි.
“ශ්රේෂ්ඨාධිකරණ සහ අභියාචනාධිකරණ විනිසුරුවරුන් ඇතුළු විනිසුරුවරුන්ගේ විශ්රාම යාමේ වයස දීර්ඝ කිරීම සඳහා ආණ්ඩුක්රම ව්යවස්ථාව සංශෝධනය කිරීම සම්බන්ධයෙන් ශ්රී ලංකා නීතිඥ සංගමයේ ස්ථාවරය පිළිබඳ මහජන සභාව ඊයේ සාර්ථකව පවත්වන ලදි.
යෝජිත මෙම සංශෝධනය එක හඬින් හෙළාදුටු පහත සඳහන් කීර්තිමත් කථිකයෝ අප සමඟ එක්වූහ. පොදුරාජ්ය මණ්ඩලීය නීතිඥ සංගමයේ සභාපති ස්ටීවන් තිරු මහතා, ලෝඒෂියා හි සභාපති යාප් ටියොන්ග් ලියැන්ග් මහතා, සම්මානිත නීති මහාචාර්ය, කොළඹ විශ්වවිද්යාලය මහාචාර්ය සාවිත්රී ගුණසේකර මහත්මිය, එක්සත් ජාතීන්ගේ දේශපාලන කටයුතු පිළිබඳ දෙපාර්තමේන්තුවේ හිටපු ජ්යෙෂ්ඨ දේශපාලන නිලධාරී සහ ආණ්ඩුක්රම ව්යවස්ථා උපදේශක රොහාන් එදිරිසිංහ මහතා, ශ්රී ලංකා මානව හිමිකම් කොමිෂන් සභාවේ හිටපු සභාපතිනි සහ පේරාදෙණිය විශ්වවිද්යාලයේ නීති අධ්යයන අංශයේ හිටපු ප්රධානී ආචාර්ය දීපිකා උඩගම මහත්මිය, ජනාධිපති නීතිඥ සහ හිටපු පාර්ලිමේන්තු මන්ත්රී එම්. ඒ. සුමන්තිරන් මහතා, නීතිඥ ශ්රීනාත් පෙරේරා මහතා, ජනාධිපති නීතිඥ අනුර මැද්දේගොඩ මහතා, ජනාධිපති නීතිඥ, ශ්රී ලංකා නීතිඥ සංගමයේ හිටපු සභාපති ජෙෆ්රි අලගරත්නම් මහතා, ශ්රේෂ්ඨාධිකරණ නීතිඥ, ජ්යෙෂ්ඨ මාධ්යවේදී කේ. ඩබ්ලිව්. ජනරංජන මහතා
මෙම ගෞරවනීය සම්පත්දායකයින් ප්රකාශ කළ අදහස් මාධ්යයේ ඇතැම් කොටස් විසින් මුළුමනින්ම විකෘති කර සහ වැරදි ලෙස නිරූපණය කර තිබීම දැකීමෙන් මම පුදුමයටත් කලකිරීමටත් පත් වීමි.
මගේ වැටහීම සහ දැක්ම අනුව විශේෂයෙන්ම මෙවැනි ජාතික වැදගත්කමක් ඇති කරුණුවලදී මාධ්යයේ වගකීම විය යුත්තේ පක්ෂග්රහණයෙන් තොර අදහස් ඉදිරිපත් කිරීම මිස දේශනවලින් කොටස් පමණක් තෝරාගෙන ඒවායේ සමස්ත අර්ථය නොසැලකිලිමත් ලෙස විකෘති කිරීම නොවේ!”
