සංවිධානාත්මක අපරාධ කල්ලි සාමාජික නඳුන් චින්තක හෙවත් “හරක් කටා” රැඳවුම් භාරයේ සිටියදී ඔහුට සහන සැලසීම සඳහා රුපියල් ලක්ෂ 1,200ක අල්ලසක් ලබාගැනීමේ සිද්ධියට අදාළව, එම මුදල් හුවමාරුව සිදුවූ බව කියන කාලසීමාව තුළ එවක අධිකරණ අමාත්ය විජයදාස රාජපක්ෂ මහතාද ඩුබායිහි රැඳී සිට ඇති බව අල්ලස් හෝ දූෂණ චෝදනා විමර්ශන කොමිෂන් සභාව (CIABOC) කොළඹ ප්රධාන මහෙස්ත්රාත් අධිකරණයට අද (3) දැනුම් දුන්නේය.
මෙම නඩුවේ සැකකරුවන් වන විජයදාස රාජපක්ෂ මහතාගේ පුත් නීතිඥ රඛිත රාජපක්ෂ, සමගි ජන බලවේගයේ හිටපු හොරණ ආසන සංවිධායක චරිත් අබේසිංහ සහ සිවිල් ගුවන්සේවා අධිකාරියේ හිටපු අධ්යක්ෂ අරුණ වරුණහැන්නදිගේ යන අය අද කොළඹ ප්රධාන මහෙස්ත්රාත් අධිකරණයට ඉදිරිපත් කෙරිණි.
අල්ලස් කොමිසමේ සහකාර නීති අධ්යක්ෂ අනුෂා සම්බන්දප්පෙරුම මහත්මිය අධිකරණයට කරුණු දක්වමින් සඳහන් කළේ, සැකකරුවන් තිදෙනා 2023 මාර්තු 25 සිට 29 දක්වා ඩුබායිහි රැඳී සිටියදී අදාළ අල්ලස් ගනුදෙනුව සිදුව ඇති බවට විමර්ශනවලින් අනාවරණය වී ඇති බවයි.
එම කාලසීමාව තුළ එවක අධිකරණ අමාත්ය විජයදාස රාජපක්ෂ මහතාද 2023 මාර්තු 21 සිට 28 දක්වා ඩුබායිහි රැඳී සිට ඇති බව අනාවරණය වී ඇති අතර, ඔහු ඩුබායි වෙත ගියේ කුමන කාර්යයකටද, එහිදී කවුරුන් හමුවූයේද සහ මෙම සිද්ධියට කිසියම් සම්බන්ධයක් තිබේද යන්න පිළිබඳව වැඩිදුර විමර්ශන සිදුකරන බවද ඇය පැවසුවාය.
අල්ලස් මුදලින් රුපියල් ලක්ෂ 200ක් ආපසු යවා ඇති බවටද විමර්ශනවලින් අනාවරණය වී ඇති බව අල්ලස් කොමිසම අධිකරණයට දැනුම් දුන්නේය. එම මුදල චරිත් අබේසිංහ විසින් ලසන්ත නමැත්තෙකුට ලබාදී, මිදිගම රුවන් නමැත්තා මාර්ගයෙන් නිර්මල බණ්ඩාර හෙවත් “හර්බි” හරහා හරක් කටාගේ බිරිඳ වෙත යවා ඇති බවට විමර්ශනවලදී තොරතුරු හෙළිවී ඇතැයි ද සඳහන් කෙරිණි.
මෙම රුපියල් ලක්ෂ 200 නුගේගොඩ නාවල පාරේ විජයබා මාවතේ පිහිටි ස්ථානයකදී ලබාදී ඇති බවත්, එම ස්ථානය විජයදාස රාජපක්ෂ මහතාගේ නිවස පිහිටි ස්ථානය බවත් විමර්ශනවලදී අනාවරණය වී ඇතැයි අල්ලස් කොමිසම අධිකරණයට දැනුම් දුන්නේය.
අදාළ අල්ලස් මුදල් මෙරටට ගෙනවිත් ඇත්තේ “උණ්ඩියල්” ක්රමවේදය ඔස්සේ බවට මේ වනවිට අනාවරණය වී ඇති අතර, සැකකරුවන් සන්තකයේ තිබී අත්අඩංගුවට ගත් ජංගම දුරකථනවල ඇමතුම් සහ WhatsApp පණිවිඩ විශ්ලේෂණය කරමින් සිටින බවද කොමිසම පැවසීය.
තවද සැකකරුවන්ගේ වත්කම් සම්බන්ධයෙන් අපරාධයකින් උපයාගත් දේපළ පිළිබඳ නීතිය යටතේද විමර්ශන සිදුකරන බවත්, විදේශගතව සිටින හරක් කටාගේ බිරිඳගෙන් ප්රකාශයක් ලබාගැනීමට කටයුතු කරන බවත්, මැඩගස්කරයෙන් මෙරටට රැගෙන ආ හරක් කටා CID රැඳවුම් භාරයේ සිටියදී නිලධාරීන් කටයුතු කළ ආකාරය පිළිබඳවද විමර්ශනයක් ආරම්භ කරන බවත් අල්ලස් කොමිසම දැනුම් දුන්නේය.
සැකකරුවන් වෙනුවෙන් පෙනී සිටි නීතිඥවරු ඇප ඉල්ලීම් ඉදිරිපත් කරමින් චෝදනා ප්රතික්ෂේප කළ අතර, දූෂණ විරෝධී පනතේ 149(1) වගන්තිය යටතේ ඉදිරිපත් කළ සහතිකය නීත්යනුකූල නොවන බවටද තර්ක කළහ.
කෙසේ වෙතත්, එම තර්ක ප්රතික්ෂේප කළ කොළඹ ප්රධාන මහෙස්ත්රාත් අසංග එස්. බෝදරගම මහතා, ඉදිරිපත් වූ කරුණු ඇප ලබාදීමට ප්රමාණවත් සුවිශේෂී කරුණු නොවන බව සඳහන් කරමින් ඇප ඉල්ලීම් ප්රතික්ෂේප කළේය.
ඒ අනුව රඛිත රාජපක්ෂ, චරිත් අබේසිංහ සහ අරුණ වරුණහැන්නදිගේ යන සැකකරුවන් ජූලි 17 වැනිදා දක්වා යළි රක්ෂිත බන්ධනාගාරගත කිරීමට අධිකරණය නියෝග කළේය.
